| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৩. ততিযনযো অসঙ্গহিতেনসঙ্গহিতপদৰণ্ণনা
3. Tatiyanayo asaṅgahitenasaṅgahitapadavaṇṇanā
১৭৯. ইদানি অসঙ্গহিতেনসঙ্গহিতপদং ভাজেতুং ৰেদনাক্খন্ধেনাতিআদি আরদ্ধং। তত্রিদং লক্খণং – ইমস্মিঞ্হি ৰারে যং খন্ধপদেন অসঙ্গহিতং হুত্ৰা আযতনধাতুপদেহি সঙ্গহিতং, তস্স খন্ধাদীহি সঙ্গহং পুচ্ছিত্ৰা ৰিস্সজ্জনং কতং। তং পন রূপক্খন্ধৰিঞ্ঞাণক্খন্ধচক্খাযতনাদীসু ন যুজ্জতি। রূপক্খন্ধেন হি চত্তারো খন্ধা খন্ধসঙ্গহেন অসঙ্গহিতা। তেসু তেন একধম্মোপি আযতনধাতুসঙ্গহেন সঙ্গহিতো নাম নত্থি। ননু চ ৰেদনাদযো ধম্মাযতনেন সঙ্গহিতাতি? সঙ্গহিতা। ন পন রূপক্খন্ধোৰ ধম্মাযতনং, রূপক্খন্ধতো হি সুখুমরূপমত্তং ধম্মাযতনং ভজতি। তস্মা যে ধম্মাযতনেন সঙ্গহিতা, ন তে রূপক্খন্ধেন সঙ্গহিতা নাম। ৰিঞ্ঞাণক্খন্ধেনপি ইতরে চত্তারো খন্ধা অসঙ্গহিতা। তেসু তেন একোপি আযতনধাতুসঙ্গহেন সঙ্গহিতো নাম নত্থি। এৰং সঙ্গহিততায অভাৰতো এতানি অঞ্ঞানি চ এৰরূপানি চক্খাযতনাদীনি পদানি ইমস্মিং ৰারে ন গহিতানি। যানি পন পদানি ৰিঞ্ঞাণেন ৰা ওল়ারিকরূপেন ৰা অসম্মিস্সং ধম্মাযতনেকদেসং দীপেন্তি, তানি ইধ গহিতানি। তেসং ইদমুদ্দানং –
179. Idāni asaṅgahitenasaṅgahitapadaṃ bhājetuṃ vedanākkhandhenātiādi āraddhaṃ. Tatridaṃ lakkhaṇaṃ – imasmiñhi vāre yaṃ khandhapadena asaṅgahitaṃ hutvā āyatanadhātupadehi saṅgahitaṃ, tassa khandhādīhi saṅgahaṃ pucchitvā vissajjanaṃ kataṃ. Taṃ pana rūpakkhandhaviññāṇakkhandhacakkhāyatanādīsu na yujjati. Rūpakkhandhena hi cattāro khandhā khandhasaṅgahena asaṅgahitā. Tesu tena ekadhammopi āyatanadhātusaṅgahena saṅgahito nāma natthi. Nanu ca vedanādayo dhammāyatanena saṅgahitāti? Saṅgahitā. Na pana rūpakkhandhova dhammāyatanaṃ, rūpakkhandhato hi sukhumarūpamattaṃ dhammāyatanaṃ bhajati. Tasmā ye dhammāyatanena saṅgahitā, na te rūpakkhandhena saṅgahitā nāma. Viññāṇakkhandhenapi itare cattāro khandhā asaṅgahitā. Tesu tena ekopi āyatanadhātusaṅgahena saṅgahito nāma natthi. Evaṃ saṅgahitatāya abhāvato etāni aññāni ca evarūpāni cakkhāyatanādīni padāni imasmiṃ vāre na gahitāni. Yāni pana padāni viññāṇena vā oḷārikarūpena vā asammissaṃ dhammāyatanekadesaṃ dīpenti, tāni idha gahitāni. Tesaṃ idamuddānaṃ –
‘‘তযো খন্ধা তথা সচ্চা, ইন্দ্রিযানি চ সোল়স।
‘‘Tayo khandhā tathā saccā, indriyāni ca soḷasa;
পদানি পচ্চযাকারে, চুদ্দসূপরি চুদ্দস॥
Padāni paccayākāre, cuddasūpari cuddasa.
‘‘সমতিংস পদা হোন্তি, গোচ্ছকেসু দসস্ৰথ।
‘‘Samatiṃsa padā honti, gocchakesu dasasvatha;
দুৰে চূল়ন্তরদুকা, অট্ঠ হোন্তি মহন্তরা’’তি॥
Duve cūḷantaradukā, aṭṭha honti mahantarā’’ti.
এতেসু পন পদেসু সদিসৰিস্সজ্জনানি পদানি একতো কত্ৰা সব্বেপি দ্ৰাদস পঞ্হা ৰুত্তা। তেসু এৰং খন্ধৰিভাগো ৰেদিতব্বো। আযতনধাতূসু পন ভেদো নত্থি। তত্থ পঠমপঞ্হে তাৰ – তীহি খন্ধেহীতি রূপসঞ্ঞাসঙ্খারক্খন্ধেহি। আযতনধাতুযো পন ধম্মাযতনধম্মধাতুৰসেন ৰেদিতব্বা।
Etesu pana padesu sadisavissajjanāni padāni ekato katvā sabbepi dvādasa pañhā vuttā. Tesu evaṃ khandhavibhāgo veditabbo. Āyatanadhātūsu pana bhedo natthi. Tattha paṭhamapañhe tāva – tīhi khandhehīti rūpasaññāsaṅkhārakkhandhehi. Āyatanadhātuyo pana dhammāyatanadhammadhātuvasena veditabbā.
তত্রাযং নযো – ৰেদনাক্খন্ধেন হি নিব্বানঞ্চ সুখুমরূপসঞ্ঞাসঙ্খারা চ খন্ধসঙ্গহেন অসঙ্গহিতা হুত্ৰা আযতনধাতুসঙ্গহেন সঙ্গহিতা। তেসু নিব্বানং খন্ধসঙ্গহং ন গচ্ছতি, সেসা রূপসঞ্ঞাসঙ্খারক্খন্ধেহি সঙ্গহং গচ্ছন্তি। আযতনধাতুসঙ্গহং পন নিব্বানম্পি গচ্ছতেৰ। তেন ৰুত্তং – ‘‘অসঙ্খতং খন্ধতো ঠপেত্ৰা তীহি খন্ধেহি, একেনাযতনেন, একায ধাতুযা সঙ্গহিতা’’তি। সঞ্ঞাক্খন্ধপক্খে পনেত্থ সঞ্ঞং অপনেত্ৰা ৰেদনায সদ্ধিং তযো খন্ধা সঙ্খারাদীসু সঙ্খারক্খন্ধং অপনেত্ৰা রূপৰেদনাসঞ্ঞাৰসেন তযো খন্ধা ৰেদিতব্বা।
Tatrāyaṃ nayo – vedanākkhandhena hi nibbānañca sukhumarūpasaññāsaṅkhārā ca khandhasaṅgahena asaṅgahitā hutvā āyatanadhātusaṅgahena saṅgahitā. Tesu nibbānaṃ khandhasaṅgahaṃ na gacchati, sesā rūpasaññāsaṅkhārakkhandhehi saṅgahaṃ gacchanti. Āyatanadhātusaṅgahaṃ pana nibbānampi gacchateva. Tena vuttaṃ – ‘‘asaṅkhataṃ khandhato ṭhapetvā tīhi khandhehi, ekenāyatanena, ekāya dhātuyā saṅgahitā’’ti. Saññākkhandhapakkhe panettha saññaṃ apanetvā vedanāya saddhiṃ tayo khandhā saṅkhārādīsu saṅkhārakkhandhaṃ apanetvā rūpavedanāsaññāvasena tayo khandhā veditabbā.
১৮০. দুতিযে – চতূহি খন্ধেহীতি ৰিঞ্ঞাণৰজ্জেহি। তে হি নিরোধেন খন্ধসঙ্গহেন অসঙ্গহিতা হুত্ৰা আযতনধাতুসঙ্গহেন সঙ্গহিতা।
180. Dutiye – catūhi khandhehīti viññāṇavajjehi. Te hi nirodhena khandhasaṅgahena asaṅgahitā hutvā āyatanadhātusaṅgahena saṅgahitā.
১৮১. ততিযে – দ্ৰীহীতি ৰেদনাসঞ্ঞাক্খন্ধেহি। রূপারূপজীৰিতিন্দ্রিযেন হি ৰেদনাসঞ্ঞাৰিঞ্ঞাণক্খন্ধা চ খন্ধসঙ্গহেন অসঙ্গহিতা। তেসু পন ৰেদনাসঞ্ঞাৰ আযতনধাতুসঙ্গহেন সঙ্গহিতা। তেন ৰুত্তং – ‘‘ৰেদনাসঞ্ঞাক্খন্ধেহী’’তি। ইমিনা উপাযেন সব্বত্থ খন্ধভেদো ৰেদিতব্বো। ইতো পরঞ্হি খন্ধানং নামমত্তমেৰ ৰক্খাম।
181. Tatiye – dvīhīti vedanāsaññākkhandhehi. Rūpārūpajīvitindriyena hi vedanāsaññāviññāṇakkhandhā ca khandhasaṅgahena asaṅgahitā. Tesu pana vedanāsaññāva āyatanadhātusaṅgahena saṅgahitā. Tena vuttaṃ – ‘‘vedanāsaññākkhandhehī’’ti. Iminā upāyena sabbattha khandhabhedo veditabbo. Ito parañhi khandhānaṃ nāmamattameva vakkhāma.
১৮২. চতুত্থে – তীহি খন্ধেহীতি ইত্থিন্দ্রিযপুরিসিন্দ্রিযেসু ৰেদনাসঞ্ঞাসঙ্খারেহি, ৰেদনাপঞ্চকে রূপসঞ্ঞাসঙ্খারেহি; সদ্ধিন্দ্রিযাদীসু ফস্সপরিযোসানেসু রূপৰেদনাসঞ্ঞাক্খন্ধেহি। ৰেদনায ৰেদনাক্খন্ধসদিসোৰ তণ্হুপাদানকম্মভৰেসু সঙ্খারক্খন্ধসদিসোৰ ৰিনিচ্ছযো।
182. Catutthe – tīhi khandhehīti itthindriyapurisindriyesu vedanāsaññāsaṅkhārehi, vedanāpañcake rūpasaññāsaṅkhārehi; saddhindriyādīsu phassapariyosānesu rūpavedanāsaññākkhandhehi. Vedanāya vedanākkhandhasadisova taṇhupādānakammabhavesu saṅkhārakkhandhasadisova vinicchayo.
১৮৩. পঞ্চমে – জাতিজরামরণেসু জীৰিতিন্দ্রিযসদিসোৰ। ঝানেন পন নিব্বানং সুখুমরূপং সঞ্ঞা চ খন্ধসঙ্গহেন অসঙ্গহিতা হুত্ৰা আযতনধাতুসঙ্গহেন সঙ্গহিতা। তস্মা তং সন্ধায রূপক্খন্ধসঞ্ঞাক্খন্ধানং ৰসেন দ্ৰে খন্ধা ৰেদিতব্বা।
183. Pañcame – jātijarāmaraṇesu jīvitindriyasadisova. Jhānena pana nibbānaṃ sukhumarūpaṃ saññā ca khandhasaṅgahena asaṅgahitā hutvā āyatanadhātusaṅgahena saṅgahitā. Tasmā taṃ sandhāya rūpakkhandhasaññākkhandhānaṃ vasena dve khandhā veditabbā.
১৮৪. ছট্ঠে – সোকাদিত্তযে ৰেদনায সদিসো। উপাযাসাদীসু সঙ্খারসদিসো। পুন ৰেদনায ৰেদনাক্খন্ধসদিসো, সঞ্ঞায সঞ্ঞাক্খন্ধসদিসো, চেতনাদীসু সঙ্খারক্খন্ধসদিসো ৰিনিচ্ছযো। ইমিনা উপাযেন সত্তমপঞ্হাদীসুপি সঙ্গহাসঙ্গহো ৰেদিতব্বোতি।
184. Chaṭṭhe – sokādittaye vedanāya sadiso. Upāyāsādīsu saṅkhārasadiso. Puna vedanāya vedanākkhandhasadiso, saññāya saññākkhandhasadiso, cetanādīsu saṅkhārakkhandhasadiso vinicchayo. Iminā upāyena sattamapañhādīsupi saṅgahāsaṅgaho veditabboti.
অসঙ্গহিতেনসঙ্গহিতপদৰণ্ণনা।
Asaṅgahitenasaṅgahitapadavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ধাতুকথাপাল়ি • Dhātukathāpāḷi / ৩. অসঙ্গহিতেনসঙ্গহিতপদনিদ্দেসো • 3. Asaṅgahitenasaṅgahitapadaniddeso
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৩. ততিযনযো অসঙ্গহিতেনসঙ্গহিতপদৰণ্ণনা • 3. Tatiyanayo asaṅgahitenasaṅgahitapadavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৩. ততিযনযো অসঙ্গহিতেনসঙ্গহিতপদৰণ্ণনা • 3. Tatiyanayo asaṅgahitenasaṅgahitapadavaṇṇanā
