| Library / Tipiṭaka / তিপিটক • Tipiṭaka / পঞ্চপকরণ-অনুটীকা • Pañcapakaraṇa-anuṭīkā |
৩. ততিযনযো অসঙ্গহিতেনসঙ্গহিতপদৰণ্ণনা
3. Tatiyanayo asaṅgahitenasaṅgahitapadavaṇṇanā
১৭৯. রূপক্খন্ধেন খন্ধসঙ্গহেন অসঙ্গহিতেসূতি নিদ্ধারণে ভুম্মং। তস্মাতি যস্মা একদেসসভাগতা সমুদাযসভাগতা ন হোতি, তস্মা। তেনাতি রূপক্খন্ধেন। তানীতি ৰেদনাদিক্খন্ধত্তযনিব্বানানি। যথা চ একদেসৰিসভাগতায ন সঙ্গহিততা, এৰং একদেসসভাগতায অসঙ্গহিততাপি নত্থীতি দস্সেন্তো ‘‘ন কেৰল’’ন্তিআদিমাহ। সঙ্গহিতানেৰ ন ন হোন্তীতি যোজনা। তেতি ৰেদনাদিক্খন্ধত্তযনিব্বানসুখুমরূপধম্মা। তেহীতি ৰিঞ্ঞাণক্খন্ধচক্খাযতনাদীহি। ন কথঞ্চি সম্মিস্সাতি কেনচিপি পকারেন ন সম্মিস্সাতি অসম্মিস্সতায সঙ্গহিতত্তাভাৰং সাধেতি। রূপক্খন্ধেন ৰিয…পে॰… ন হোতীতি যথা রূপক্খন্ধেন সভাগতাভাৰতো নিব্বানং ন কেনচিপি সঙ্গহণেন সঙ্গহিতং, এৰং ৰিঞ্ঞাণক্খন্ধচক্খাযতনাদীহি তং আযতনধাতুসঙ্গহেহি সঙ্গহিতং ন হোতীতি খন্ধসঙ্গহাভাৰো পাকটো ৰুত্তোৰাতি এৰং ৰুত্তং।
179. Rūpakkhandhenakhandhasaṅgahena asaṅgahitesūti niddhāraṇe bhummaṃ. Tasmāti yasmā ekadesasabhāgatā samudāyasabhāgatā na hoti, tasmā. Tenāti rūpakkhandhena. Tānīti vedanādikkhandhattayanibbānāni. Yathā ca ekadesavisabhāgatāya na saṅgahitatā, evaṃ ekadesasabhāgatāya asaṅgahitatāpi natthīti dassento ‘‘na kevala’’ntiādimāha. Saṅgahitāneva na na hontīti yojanā. Teti vedanādikkhandhattayanibbānasukhumarūpadhammā. Tehīti viññāṇakkhandhacakkhāyatanādīhi. Na kathañci sammissāti kenacipi pakārena na sammissāti asammissatāya saṅgahitattābhāvaṃ sādheti. Rūpakkhandhena viya…pe… na hotīti yathā rūpakkhandhena sabhāgatābhāvato nibbānaṃ na kenacipi saṅgahaṇena saṅgahitaṃ, evaṃ viññāṇakkhandhacakkhāyatanādīhi taṃ āyatanadhātusaṅgahehi saṅgahitaṃ na hotīti khandhasaṅgahābhāvo pākaṭo vuttovāti evaṃ vuttaṃ.
এৰরূপানন্তি রূপক্খন্ধৰিঞ্ঞাণক্খন্ধচক্খাযতনাদীনং। ন হি নিব্বানং সন্ধায ‘‘রূপক্খন্ধেন ৰিঞ্ঞাণক্খন্ধেন চক্খাযতনেন যে ধম্মা খন্ধসঙ্গহেন অসঙ্গহিতা, আযতনধাতুসঙ্গহেন সঙ্গহিতা’’তি সক্কা ৰত্তুং। তেন ৰুত্তং ‘‘সঙ্গাহকত্তাভাৰতো এৰা’’তি। তথা ‘‘অব্যাকতেহি ধম্মেহি যে ধম্মা খন্ধসঙ্গহেন অসঙ্গহিতা, আযতনধাতুসঙ্গহেন সঙ্গহিতা’’তিআদি ন সক্কা ৰত্তুং তাদিসস্স ধম্মস্স অভাৰতোতি আহ ‘‘সনিব্বান…পে॰… ভাৰতোৰা’’তি। অগ্গহণং ৰেদিতব্বন্তি যোজনা। তেনাহ ‘‘ন হী’’তিআদি। কঞ্চীতি কঞ্চি ধম্মজাতং। তেতি অব্যাকতধম্মাদযো। অত্তনোতি অব্যাকতধম্মাদিং সন্ধাযাহ। একদেসোতি রূপক্খন্ধাদি। অত্তেকদেসসভাগোতি নিব্বানং। তঞ্হি ধম্মাযতনধম্মধাতুপরিযাপন্নতায তদেকদেসসভাগো। অসঙ্গহিতসঙ্গাহকত্তাতি খন্ধসঙ্গহেন অসঙ্গহিতানং সঞ্ঞাক্খন্ধাদীনং আযতনধাতুসঙ্গহেন সঙ্গাহকত্তাতি অত্থো।
Evarūpānanti rūpakkhandhaviññāṇakkhandhacakkhāyatanādīnaṃ. Na hi nibbānaṃ sandhāya ‘‘rūpakkhandhena viññāṇakkhandhena cakkhāyatanena ye dhammā khandhasaṅgahena asaṅgahitā, āyatanadhātusaṅgahena saṅgahitā’’ti sakkā vattuṃ. Tena vuttaṃ ‘‘saṅgāhakattābhāvato evā’’ti. Tathā ‘‘abyākatehi dhammehi ye dhammā khandhasaṅgahena asaṅgahitā, āyatanadhātusaṅgahena saṅgahitā’’tiādi na sakkā vattuṃ tādisassa dhammassa abhāvatoti āha ‘‘sanibbāna…pe… bhāvatovā’’ti. Aggahaṇaṃ veditabbanti yojanā. Tenāha ‘‘na hī’’tiādi. Kañcīti kañci dhammajātaṃ. Teti abyākatadhammādayo. Attanoti abyākatadhammādiṃ sandhāyāha. Ekadesoti rūpakkhandhādi. Attekadesasabhāgoti nibbānaṃ. Tañhi dhammāyatanadhammadhātupariyāpannatāya tadekadesasabhāgo. Asaṅgahitasaṅgāhakattāti khandhasaṅgahena asaṅgahitānaṃ saññākkhandhādīnaṃ āyatanadhātusaṅgahena saṅgāhakattāti attho.
ৰিসভাগক্খন্ধনিব্বানসমুদাযত্তা খন্ধসঙ্গহেন ধম্মাযতনেন ন কোচি ধম্মো সঙ্গহিতো অত্থীতি যোজনা। এতস্সাতি ‘‘ধম্মাযতনেন সঙ্গহিতা’’তি এতস্স পদস্স ধম্মাযতনগণনেন সঙ্গহিতাতি অত্থো। ওল়ারিকরূপসম্মিস্সং ধম্মাযতনেকদেসং।
Visabhāgakkhandhanibbānasamudāyattā khandhasaṅgahena dhammāyatanena na koci dhammo saṅgahito atthīti yojanā. Etassāti ‘‘dhammāyatanena saṅgahitā’’ti etassa padassa dhammāyatanagaṇanena saṅgahitāti attho. Oḷārikarūpasammissaṃ dhammāyatanekadesaṃ.
ততিযনযঅসঙ্গহিতেনসঙ্গহিতপদৰণ্ণনা নিট্ঠিতা।
Tatiyanayaasaṅgahitenasaṅgahitapadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ধাতুকথাপাল়ি • Dhātukathāpāḷi / ৩. অসঙ্গহিতেনসঙ্গহিতপদনিদ্দেসো • 3. Asaṅgahitenasaṅgahitapadaniddeso
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৩. ততিযনযো অসঙ্গহিতেনসঙ্গহিতপদৰণ্ণনা • 3. Tatiyanayo asaṅgahitenasaṅgahitapadavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৩. ততিযনযো অসঙ্গহিতেনসঙ্গহিতপদৰণ্ণনা • 3. Tatiyanayo asaṅgahitenasaṅgahitapadavaṇṇanā
