| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā |
೩. ತತಿಯನಯೋ ಅಸಙ್ಗಹಿತೇನಸಙ್ಗಹಿತಪದವಣ್ಣನಾ
3. Tatiyanayo asaṅgahitenasaṅgahitapadavaṇṇanā
೧೭೯. ರೂಪಕ್ಖನ್ಧೇನ ಖನ್ಧಸಙ್ಗಹೇನ ಅಸಙ್ಗಹಿತೇಸೂತಿ ನಿದ್ಧಾರಣೇ ಭುಮ್ಮಂ। ತಸ್ಮಾತಿ ಯಸ್ಮಾ ಏಕದೇಸಸಭಾಗತಾ ಸಮುದಾಯಸಭಾಗತಾ ನ ಹೋತಿ, ತಸ್ಮಾ। ತೇನಾತಿ ರೂಪಕ್ಖನ್ಧೇನ। ತಾನೀತಿ ವೇದನಾದಿಕ್ಖನ್ಧತ್ತಯನಿಬ್ಬಾನಾನಿ। ಯಥಾ ಚ ಏಕದೇಸವಿಸಭಾಗತಾಯ ನ ಸಙ್ಗಹಿತತಾ, ಏವಂ ಏಕದೇಸಸಭಾಗತಾಯ ಅಸಙ್ಗಹಿತತಾಪಿ ನತ್ಥೀತಿ ದಸ್ಸೇನ್ತೋ ‘‘ನ ಕೇವಲ’’ನ್ತಿಆದಿಮಾಹ। ಸಙ್ಗಹಿತಾನೇವ ನ ನ ಹೋನ್ತೀತಿ ಯೋಜನಾ। ತೇತಿ ವೇದನಾದಿಕ್ಖನ್ಧತ್ತಯನಿಬ್ಬಾನಸುಖುಮರೂಪಧಮ್ಮಾ। ತೇಹೀತಿ ವಿಞ್ಞಾಣಕ್ಖನ್ಧಚಕ್ಖಾಯತನಾದೀಹಿ। ನ ಕಥಞ್ಚಿ ಸಮ್ಮಿಸ್ಸಾತಿ ಕೇನಚಿಪಿ ಪಕಾರೇನ ನ ಸಮ್ಮಿಸ್ಸಾತಿ ಅಸಮ್ಮಿಸ್ಸತಾಯ ಸಙ್ಗಹಿತತ್ತಾಭಾವಂ ಸಾಧೇತಿ। ರೂಪಕ್ಖನ್ಧೇನ ವಿಯ…ಪೇ॰… ನ ಹೋತೀತಿ ಯಥಾ ರೂಪಕ್ಖನ್ಧೇನ ಸಭಾಗತಾಭಾವತೋ ನಿಬ್ಬಾನಂ ನ ಕೇನಚಿಪಿ ಸಙ್ಗಹಣೇನ ಸಙ್ಗಹಿತಂ, ಏವಂ ವಿಞ್ಞಾಣಕ್ಖನ್ಧಚಕ್ಖಾಯತನಾದೀಹಿ ತಂ ಆಯತನಧಾತುಸಙ್ಗಹೇಹಿ ಸಙ್ಗಹಿತಂ ನ ಹೋತೀತಿ ಖನ್ಧಸಙ್ಗಹಾಭಾವೋ ಪಾಕಟೋ ವುತ್ತೋವಾತಿ ಏವಂ ವುತ್ತಂ।
179. Rūpakkhandhenakhandhasaṅgahena asaṅgahitesūti niddhāraṇe bhummaṃ. Tasmāti yasmā ekadesasabhāgatā samudāyasabhāgatā na hoti, tasmā. Tenāti rūpakkhandhena. Tānīti vedanādikkhandhattayanibbānāni. Yathā ca ekadesavisabhāgatāya na saṅgahitatā, evaṃ ekadesasabhāgatāya asaṅgahitatāpi natthīti dassento ‘‘na kevala’’ntiādimāha. Saṅgahitāneva na na hontīti yojanā. Teti vedanādikkhandhattayanibbānasukhumarūpadhammā. Tehīti viññāṇakkhandhacakkhāyatanādīhi. Na kathañci sammissāti kenacipi pakārena na sammissāti asammissatāya saṅgahitattābhāvaṃ sādheti. Rūpakkhandhena viya…pe… na hotīti yathā rūpakkhandhena sabhāgatābhāvato nibbānaṃ na kenacipi saṅgahaṇena saṅgahitaṃ, evaṃ viññāṇakkhandhacakkhāyatanādīhi taṃ āyatanadhātusaṅgahehi saṅgahitaṃ na hotīti khandhasaṅgahābhāvo pākaṭo vuttovāti evaṃ vuttaṃ.
ಏವರೂಪಾನನ್ತಿ ರೂಪಕ್ಖನ್ಧವಿಞ್ಞಾಣಕ್ಖನ್ಧಚಕ್ಖಾಯತನಾದೀನಂ। ನ ಹಿ ನಿಬ್ಬಾನಂ ಸನ್ಧಾಯ ‘‘ರೂಪಕ್ಖನ್ಧೇನ ವಿಞ್ಞಾಣಕ್ಖನ್ಧೇನ ಚಕ್ಖಾಯತನೇನ ಯೇ ಧಮ್ಮಾ ಖನ್ಧಸಙ್ಗಹೇನ ಅಸಙ್ಗಹಿತಾ, ಆಯತನಧಾತುಸಙ್ಗಹೇನ ಸಙ್ಗಹಿತಾ’’ತಿ ಸಕ್ಕಾ ವತ್ತುಂ। ತೇನ ವುತ್ತಂ ‘‘ಸಙ್ಗಾಹಕತ್ತಾಭಾವತೋ ಏವಾ’’ತಿ। ತಥಾ ‘‘ಅಬ್ಯಾಕತೇಹಿ ಧಮ್ಮೇಹಿ ಯೇ ಧಮ್ಮಾ ಖನ್ಧಸಙ್ಗಹೇನ ಅಸಙ್ಗಹಿತಾ, ಆಯತನಧಾತುಸಙ್ಗಹೇನ ಸಙ್ಗಹಿತಾ’’ತಿಆದಿ ನ ಸಕ್ಕಾ ವತ್ತುಂ ತಾದಿಸಸ್ಸ ಧಮ್ಮಸ್ಸ ಅಭಾವತೋತಿ ಆಹ ‘‘ಸನಿಬ್ಬಾನ…ಪೇ॰… ಭಾವತೋವಾ’’ತಿ। ಅಗ್ಗಹಣಂ ವೇದಿತಬ್ಬನ್ತಿ ಯೋಜನಾ। ತೇನಾಹ ‘‘ನ ಹೀ’’ತಿಆದಿ। ಕಞ್ಚೀತಿ ಕಞ್ಚಿ ಧಮ್ಮಜಾತಂ। ತೇತಿ ಅಬ್ಯಾಕತಧಮ್ಮಾದಯೋ। ಅತ್ತನೋತಿ ಅಬ್ಯಾಕತಧಮ್ಮಾದಿಂ ಸನ್ಧಾಯಾಹ। ಏಕದೇಸೋತಿ ರೂಪಕ್ಖನ್ಧಾದಿ। ಅತ್ತೇಕದೇಸಸಭಾಗೋತಿ ನಿಬ್ಬಾನಂ। ತಞ್ಹಿ ಧಮ್ಮಾಯತನಧಮ್ಮಧಾತುಪರಿಯಾಪನ್ನತಾಯ ತದೇಕದೇಸಸಭಾಗೋ। ಅಸಙ್ಗಹಿತಸಙ್ಗಾಹಕತ್ತಾತಿ ಖನ್ಧಸಙ್ಗಹೇನ ಅಸಙ್ಗಹಿತಾನಂ ಸಞ್ಞಾಕ್ಖನ್ಧಾದೀನಂ ಆಯತನಧಾತುಸಙ್ಗಹೇನ ಸಙ್ಗಾಹಕತ್ತಾತಿ ಅತ್ಥೋ।
Evarūpānanti rūpakkhandhaviññāṇakkhandhacakkhāyatanādīnaṃ. Na hi nibbānaṃ sandhāya ‘‘rūpakkhandhena viññāṇakkhandhena cakkhāyatanena ye dhammā khandhasaṅgahena asaṅgahitā, āyatanadhātusaṅgahena saṅgahitā’’ti sakkā vattuṃ. Tena vuttaṃ ‘‘saṅgāhakattābhāvato evā’’ti. Tathā ‘‘abyākatehi dhammehi ye dhammā khandhasaṅgahena asaṅgahitā, āyatanadhātusaṅgahena saṅgahitā’’tiādi na sakkā vattuṃ tādisassa dhammassa abhāvatoti āha ‘‘sanibbāna…pe… bhāvatovā’’ti. Aggahaṇaṃ veditabbanti yojanā. Tenāha ‘‘na hī’’tiādi. Kañcīti kañci dhammajātaṃ. Teti abyākatadhammādayo. Attanoti abyākatadhammādiṃ sandhāyāha. Ekadesoti rūpakkhandhādi. Attekadesasabhāgoti nibbānaṃ. Tañhi dhammāyatanadhammadhātupariyāpannatāya tadekadesasabhāgo. Asaṅgahitasaṅgāhakattāti khandhasaṅgahena asaṅgahitānaṃ saññākkhandhādīnaṃ āyatanadhātusaṅgahena saṅgāhakattāti attho.
ವಿಸಭಾಗಕ್ಖನ್ಧನಿಬ್ಬಾನಸಮುದಾಯತ್ತಾ ಖನ್ಧಸಙ್ಗಹೇನ ಧಮ್ಮಾಯತನೇನ ನ ಕೋಚಿ ಧಮ್ಮೋ ಸಙ್ಗಹಿತೋ ಅತ್ಥೀತಿ ಯೋಜನಾ। ಏತಸ್ಸಾತಿ ‘‘ಧಮ್ಮಾಯತನೇನ ಸಙ್ಗಹಿತಾ’’ತಿ ಏತಸ್ಸ ಪದಸ್ಸ ಧಮ್ಮಾಯತನಗಣನೇನ ಸಙ್ಗಹಿತಾತಿ ಅತ್ಥೋ। ಓಳಾರಿಕರೂಪಸಮ್ಮಿಸ್ಸಂ ಧಮ್ಮಾಯತನೇಕದೇಸಂ।
Visabhāgakkhandhanibbānasamudāyattā khandhasaṅgahena dhammāyatanena na koci dhammo saṅgahito atthīti yojanā. Etassāti ‘‘dhammāyatanena saṅgahitā’’ti etassa padassa dhammāyatanagaṇanena saṅgahitāti attho. Oḷārikarūpasammissaṃ dhammāyatanekadesaṃ.
ತತಿಯನಯಅಸಙ್ಗಹಿತೇನಸಙ್ಗಹಿತಪದವಣ್ಣನಾ ನಿಟ್ಠಿತಾ।
Tatiyanayaasaṅgahitenasaṅgahitapadavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಧಾತುಕಥಾಪಾಳಿ • Dhātukathāpāḷi / ೩. ಅಸಙ್ಗಹಿತೇನಸಙ್ಗಹಿತಪದನಿದ್ದೇಸೋ • 3. Asaṅgahitenasaṅgahitapadaniddeso
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೩. ತತಿಯನಯೋ ಅಸಙ್ಗಹಿತೇನಸಙ್ಗಹಿತಪದವಣ್ಣನಾ • 3. Tatiyanayo asaṅgahitenasaṅgahitapadavaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೩. ತತಿಯನಯೋ ಅಸಙ್ಗಹಿತೇನಸಙ್ಗಹಿತಪದವಣ್ಣನಾ • 3. Tatiyanayo asaṅgahitenasaṅgahitapadavaṇṇanā
