| Library / Tipiṭaka / තිපිටක • Tipiṭaka / උදානපාළි • Udānapāḷi |
3. තතියනිබ්‌බානපටිසංයුත්‌තසුත්‌තං
3. Tatiyanibbānapaṭisaṃyuttasuttaṃ
73. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන භගවා භික්‌ඛූ නිබ්‌බානපටිසංයුත්‌තාය ධම්‌මියා කථාය සන්‌දස්‌සෙති සමාදපෙති සමුත්‌තෙජෙති සම්‌පහංසෙති. තෙධ භික්‌ඛූ අට්‌ඨිං කත්‌වා, මනසි කත්‌වා, සබ්‌බං චෙතසො සමන්‌නාහරිත්‌වා, ඔහිතසොතා ධම්‌මං සුණන්‌ති.
73. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhagavā bhikkhū nibbānapaṭisaṃyuttāya dhammiyā kathāya sandasseti samādapeti samuttejeti sampahaṃseti. Tedha bhikkhū aṭṭhiṃ katvā, manasi katvā, sabbaṃ cetaso samannāharitvā, ohitasotā dhammaṃ suṇanti.
අථ ඛො භගවා එතමත්‌ථං විදිත්‌වා තායං වෙලායං ඉමං උදානං උදානෙසි –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘අත්‌ථි, භික්‌ඛවෙ, අජාතං අභූතං අකතං අසඞ්‌ඛතං. නො චෙතං, භික්‌ඛවෙ, අභවිස්‌ස අජාතං අභූතං අකතං අසඞ්‌ඛතං, නයිධ ජාතස්‌ස භූතස්‌ස කතස්‌ස සඞ්‌ඛතස්‌ස නිස්‌සරණං පඤ්‌ඤායෙථ. යස්‌මා ච ඛො, භික්‌ඛවෙ, අත්‌ථි අජාතං අභූතං අකතං අසඞ්‌ඛතං, තස්‌මා ජාතස්‌ස භූතස්‌ස කතස්‌ස සඞ්‌ඛතස්‌ස නිස්‌සරණං පඤ්‌ඤායතී’’ති. තතියං.
‘‘Atthi, bhikkhave, ajātaṃ abhūtaṃ akataṃ asaṅkhataṃ. No cetaṃ, bhikkhave, abhavissa ajātaṃ abhūtaṃ akataṃ asaṅkhataṃ, nayidha jātassa bhūtassa katassa saṅkhatassa nissaraṇaṃ paññāyetha. Yasmā ca kho, bhikkhave, atthi ajātaṃ abhūtaṃ akataṃ asaṅkhataṃ, tasmā jātassa bhūtassa katassa saṅkhatassa nissaraṇaṃ paññāyatī’’ti. Tatiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / උදාන-අට්‌ඨකථා • Udāna-aṭṭhakathā / 3. තතියනිබ්‌බානපටිසංයුත්‌තසුත්‌තවණ්‌ණනා • 3. Tatiyanibbānapaṭisaṃyuttasuttavaṇṇanā
