| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. ததியஓவாத³ஸுத்தங்
8. Tatiyaovādasuttaṃ
151. ராஜக³ஹே கலந்த³கனிவாபே 1. அத² கோ² ஆயஸ்மா மஹாகஸ்ஸபோ யேன ப⁴க³வா தேனுபஸங்கமி ; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் மஹாகஸ்ஸபங் ப⁴க³வா ஏதத³வோச – ‘‘ஓவத³, கஸ்ஸப, பி⁴க்கூ²; கரோஹி, கஸ்ஸப, பி⁴க்கூ²னங் த⁴ம்மிங் கத²ங். அஹங் வா, கஸ்ஸப, பி⁴க்கூ²னங் ஓவதெ³ய்யங் த்வங் வா; அஹங் வா பி⁴க்கூ²னங் த⁴ம்மிங் கத²ங் கரெய்யங் த்வங் வா’’தி.
151. Rājagahe kalandakanivāpe 2. Atha kho āyasmā mahākassapo yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ mahākassapaṃ bhagavā etadavoca – ‘‘ovada, kassapa, bhikkhū; karohi, kassapa, bhikkhūnaṃ dhammiṃ kathaṃ. Ahaṃ vā, kassapa, bhikkhūnaṃ ovadeyyaṃ tvaṃ vā; ahaṃ vā bhikkhūnaṃ dhammiṃ kathaṃ kareyyaṃ tvaṃ vā’’ti.
‘‘து³ப்³ப³சா கோ², ப⁴ந்தே, ஏதரஹி பி⁴க்கூ², தோ³வசஸ்ஸகரணேஹி த⁴ம்மேஹி ஸமன்னாக³தா, அக்க²மா, அப்பத³க்கி²ணக்³கா³ஹினோ அனுஸாஸனீ’’ந்தி. ‘‘ததா² ஹி பன, கஸ்ஸப, புப்³பே³ தே²ரா பி⁴க்கூ² ஆரஞ்ஞிகா சேவ அஹேஸுங் ஆரஞ்ஞிகத்தஸ்ஸ ச வண்ணவாதி³னோ, பிண்ட³பாதிகா சேவ அஹேஸுங் பிண்ட³பாதிகத்தஸ்ஸ ச வண்ணவாதி³னோ , பங்ஸுகூலிகா சேவ அஹேஸுங் பங்ஸுகூலிகத்தஸ்ஸ ச வண்ணவாதி³னோ, தேசீவரிகா சேவ அஹேஸுங் தேசீவரிகத்தஸ்ஸ ச வண்ணவாதி³னோ, அப்பிச்சா² சேவ அஹேஸுங் அப்பிச்ச²தாய ச வண்ணவாதி³னோ, ஸந்துட்டா² சேவ அஹேஸுங் ஸந்துட்டி²யா ச வண்ணவாதி³னோ, பவிவித்தா சேவ அஹேஸுங் பவிவேகஸ்ஸ ச வண்ணவாதி³னோ, அஸங்ஸட்டா² சேவ அஹேஸுங் அஸங்ஸக்³க³ஸ்ஸ ச வண்ணவாதி³னோ, ஆரத்³த⁴வீரியா சேவ அஹேஸுங் வீரியாரம்ப⁴ஸ்ஸ ச வண்ணவாதி³னோ.
‘‘Dubbacā kho, bhante, etarahi bhikkhū, dovacassakaraṇehi dhammehi samannāgatā, akkhamā, appadakkhiṇaggāhino anusāsanī’’nti. ‘‘Tathā hi pana, kassapa, pubbe therā bhikkhū āraññikā ceva ahesuṃ āraññikattassa ca vaṇṇavādino, piṇḍapātikā ceva ahesuṃ piṇḍapātikattassa ca vaṇṇavādino , paṃsukūlikā ceva ahesuṃ paṃsukūlikattassa ca vaṇṇavādino, tecīvarikā ceva ahesuṃ tecīvarikattassa ca vaṇṇavādino, appicchā ceva ahesuṃ appicchatāya ca vaṇṇavādino, santuṭṭhā ceva ahesuṃ santuṭṭhiyā ca vaṇṇavādino, pavivittā ceva ahesuṃ pavivekassa ca vaṇṇavādino, asaṃsaṭṭhā ceva ahesuṃ asaṃsaggassa ca vaṇṇavādino, āraddhavīriyā ceva ahesuṃ vīriyārambhassa ca vaṇṇavādino.
‘‘தத்ர யோ ஹோதி பி⁴க்கு² ஆரஞ்ஞிகோ சேவ ஆரஞ்ஞிகத்தஸ்ஸ ச வண்ணவாதீ³, பிண்ட³பாதிகோ சேவ பிண்ட³பாதிகத்தஸ்ஸ ச வண்ணவாதீ³, பங்ஸுகூலிகோ சேவ பங்ஸுகூலிகத்தஸ்ஸ ச வண்ணவாதீ³, தேசீவரிகோ சேவ தேசீவரிகத்தஸ்ஸ ச வண்ணவாதீ³, அப்பிச்சோ² சேவ அப்பிச்ச²தாய ச வண்ணவாதீ³, ஸந்துட்டோ² சேவ ஸந்துட்டி²யா ச வண்ணவாதீ³, பவிவித்தோ சேவ பவிவேகஸ்ஸ ச வண்ணவாதீ³, அஸங்ஸட்டோ² சேவ அஸங்ஸக்³க³ஸ்ஸ ச வண்ணவாதீ³, ஆரத்³த⁴வீரியோ சேவ வீரியாரம்ப⁴ஸ்ஸ ச வண்ணவாதீ³, தங் தே²ரா பி⁴க்கூ² ஆஸனேன நிமந்தெந்தி – ‘ஏஹி, பி⁴க்கு², கோ நாமாயங் பி⁴க்கு², ப⁴த்³த³கோ வதாயங் பி⁴க்கு², ஸிக்கா²காமோ வதாயங் பி⁴க்கு²; ஏஹி, பி⁴க்கு², இத³ங் ஆஸனங் நிஸீதா³ஹீ’’’தி.
‘‘Tatra yo hoti bhikkhu āraññiko ceva āraññikattassa ca vaṇṇavādī, piṇḍapātiko ceva piṇḍapātikattassa ca vaṇṇavādī, paṃsukūliko ceva paṃsukūlikattassa ca vaṇṇavādī, tecīvariko ceva tecīvarikattassa ca vaṇṇavādī, appiccho ceva appicchatāya ca vaṇṇavādī, santuṭṭho ceva santuṭṭhiyā ca vaṇṇavādī, pavivitto ceva pavivekassa ca vaṇṇavādī, asaṃsaṭṭho ceva asaṃsaggassa ca vaṇṇavādī, āraddhavīriyo ceva vīriyārambhassa ca vaṇṇavādī, taṃ therā bhikkhū āsanena nimantenti – ‘ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sikkhākāmo vatāyaṃ bhikkhu; ehi, bhikkhu, idaṃ āsanaṃ nisīdāhī’’’ti.
‘‘தத்ர, கஸ்ஸப, நவானங் பி⁴க்கூ²னங் ஏவங் ஹோதி – ‘யோ கிர ஸோ ஹோதி பி⁴க்கு² ஆரஞ்ஞிகோ சேவ ஆரஞ்ஞிகத்தஸ்ஸ ச வண்ணவாதீ³, பிண்ட³பாதிகோ சேவ…பே॰… பங்ஸுகூலிகோ சேவ… தேசீவரிகோ சேவ… அப்பிச்சோ² சேவ… ஸந்துட்டோ² சேவ… பவிவித்தோ சேவ… அஸங்ஸட்டோ² சேவ… ஆரத்³த⁴வீரியோ சேவ வீரியாரம்ப⁴ஸ்ஸ ச வண்ணவாதீ³, தங் தே²ரா பி⁴க்கூ² ஆஸனேன நிமந்தெந்தி – ஏஹி, பி⁴க்கு², கோ நாமாயங் பி⁴க்கு², ப⁴த்³த³கோ வதாயங் பி⁴க்கு², ஸிக்கா²காமோ வதாயங் பி⁴க்கு²; ஏஹி, பி⁴க்கு², இத³ங் ஆஸனங் நிஸீதா³ஹீ’தி. தே தத²த்தாய படிபஜ்ஜந்தி; தேஸங் தங் ஹோதி தீ³க⁴ரத்தங் ஹிதாய ஸுகா²ய.
‘‘Tatra, kassapa, navānaṃ bhikkhūnaṃ evaṃ hoti – ‘yo kira so hoti bhikkhu āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī, taṃ therā bhikkhū āsanena nimantenti – ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sikkhākāmo vatāyaṃ bhikkhu; ehi, bhikkhu, idaṃ āsanaṃ nisīdāhī’ti. Te tathattāya paṭipajjanti; tesaṃ taṃ hoti dīgharattaṃ hitāya sukhāya.
‘‘ஏதரஹி பன, கஸ்ஸப, தே²ரா பி⁴க்கூ² ந சேவ ஆரஞ்ஞிகா ந ச ஆரஞ்ஞிகத்தஸ்ஸ வண்ணவாதி³னோ, ந சேவ பிண்ட³பாதிகா ந ச பிண்ட³பாதிகத்தஸ்ஸ வண்ணவாதி³னோ, ந சேவ பங்ஸுகூலிகா ந ச பங்ஸுகூலிகத்தஸ்ஸ வண்ணவாதி³னோ, ந சேவ தேசீவரிகா ந ச தேசீவரிகத்தஸ்ஸ வண்ணவாதி³னோ, ந சேவ அப்பிச்சா² ந ச அப்பிச்ச²தாய வண்ணவாதி³னோ, ந சேவ ஸந்துட்டா² ந ச ஸந்துட்டி²யா வண்ணவாதி³னோ, ந சேவ பவிவித்தா ந ச பவிவேகஸ்ஸ வண்ணவாதி³னோ, ந சேவ அஸங்ஸட்டா² ந ச அஸங்ஸக்³க³ஸ்ஸ வண்ணவாதி³னோ , ந சேவ ஆரத்³த⁴வீரியா ந ச வீரியாரம்ப⁴ஸ்ஸ வண்ணவாதி³னோ.
‘‘Etarahi pana, kassapa, therā bhikkhū na ceva āraññikā na ca āraññikattassa vaṇṇavādino, na ceva piṇḍapātikā na ca piṇḍapātikattassa vaṇṇavādino, na ceva paṃsukūlikā na ca paṃsukūlikattassa vaṇṇavādino, na ceva tecīvarikā na ca tecīvarikattassa vaṇṇavādino, na ceva appicchā na ca appicchatāya vaṇṇavādino, na ceva santuṭṭhā na ca santuṭṭhiyā vaṇṇavādino, na ceva pavivittā na ca pavivekassa vaṇṇavādino, na ceva asaṃsaṭṭhā na ca asaṃsaggassa vaṇṇavādino , na ceva āraddhavīriyā na ca vīriyārambhassa vaṇṇavādino.
‘‘தத்ர யோ ஹோதி பி⁴க்கு² ஞாதோ யஸஸ்ஸீ லாபீ⁴ சீவர-பிண்ட³பாத-ஸேனாஸனகி³லானப்பச்சயபே⁴ஸஜ்ஜபரிக்கா²ரானங் தங் தே²ரா பி⁴க்கூ² ஆஸனேன நிமந்தெந்தி – ‘ஏஹி, பி⁴க்கு², கோ நாமாயங் பி⁴க்கு², ப⁴த்³த³கோ வதாயங் பி⁴க்கு², ஸப்³ரஹ்மசாரிகாமோ வதாயங் பி⁴க்கு²; ஏஹி, பி⁴க்கு², இத³ங் ஆஸனங் நிஸீதா³ஹீ’’’தி.
‘‘Tatra yo hoti bhikkhu ñāto yasassī lābhī cīvara-piṇḍapāta-senāsanagilānappaccayabhesajjaparikkhārānaṃ taṃ therā bhikkhū āsanena nimantenti – ‘ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sabrahmacārikāmo vatāyaṃ bhikkhu; ehi, bhikkhu, idaṃ āsanaṃ nisīdāhī’’’ti.
‘‘தத்ர, கஸ்ஸப, நவானங் பி⁴க்கூ²னங் ஏவங் ஹோதி – ‘யோ கிர ஸோ ஹோதி பி⁴க்கு² ஞாதோ யஸஸ்ஸீ லாபீ⁴ சீவர-பிண்ட³பாத-ஸேனாஸன-கி³லானப்பச்சயபே⁴ஸஜ்ஜபரிக்கா²ரானங் தங் தே²ரா பி⁴க்கூ² ஆஸனேன நிமந்தெந்தி – ஏஹி, பி⁴க்கு², கோ நாமாயங் பி⁴க்கு², ப⁴த்³த³கோ வதாயங் பி⁴க்கு², ஸப்³ரஹ்மசாரிகாமோ வதாயங் பி⁴க்கு²; ஏஹி, பி⁴க்கு², இத³ங் ஆஸனங் நிஸீதா³ஹீ’தி. தே தத²த்தாய படிபஜ்ஜந்தி. தேஸங் தங் ஹோதி தீ³க⁴ரத்தங் அஹிதாய து³க்கா²ய. யஞ்ஹி தங், கஸ்ஸப, ஸம்மா வத³மானோ வதெ³ய்ய – ‘உபத்³து³தா ப்³ரஹ்மசாரீ ப்³ரஹ்மசாரூபத்³த³வேன அபி⁴பத்த²னா 3 ப்³ரஹ்மசாரீ ப்³ரஹ்மசாரிஅபி⁴பத்த²னேனா’தி 4, ஏதரஹி தங், கஸ்ஸப, ஸம்மா வத³மானோ வதெ³ய்ய – ‘உபத்³து³தா ப்³ரஹ்மசாரீ ப்³ரஹ்மசாரூபத்³த³வேன அபி⁴பத்த²னா ப்³ரஹ்மசாரீ ப்³ரஹ்மசாரிஅபி⁴பத்த²னேனா’’’தி. அட்ட²மங்.
‘‘Tatra, kassapa, navānaṃ bhikkhūnaṃ evaṃ hoti – ‘yo kira so hoti bhikkhu ñāto yasassī lābhī cīvara-piṇḍapāta-senāsana-gilānappaccayabhesajjaparikkhārānaṃ taṃ therā bhikkhū āsanena nimantenti – ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sabrahmacārikāmo vatāyaṃ bhikkhu; ehi, bhikkhu, idaṃ āsanaṃ nisīdāhī’ti. Te tathattāya paṭipajjanti. Tesaṃ taṃ hoti dīgharattaṃ ahitāya dukkhāya. Yañhi taṃ, kassapa, sammā vadamāno vadeyya – ‘upaddutā brahmacārī brahmacārūpaddavena abhipatthanā 5 brahmacārī brahmacāriabhipatthanenā’ti 6, etarahi taṃ, kassapa, sammā vadamāno vadeyya – ‘upaddutā brahmacārī brahmacārūpaddavena abhipatthanā brahmacārī brahmacāriabhipatthanenā’’’ti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. ததியஓவாத³ஸுத்தவண்ணனா • 8. Tatiyaovādasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. ததியஓவாத³ஸுத்தவண்ணனா • 8. Tatiyaovādasuttavaṇṇanā
