| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১১. ততিযপব্বতসুত্তং
11. Tatiyapabbatasuttaṃ
৮৪. সাৰত্থিযং ৰিহরতি…পে॰… ‘‘সেয্যথাপি , ভিক্খৰে, পুরিসো সিনেরুস্স পব্বতরাজস্স সত্ত মুগ্গমত্তিযো পাসাণসক্খরা উপনিক্খিপেয্য। তং কিং মঞ্ঞথ, ভিক্খৰে, কতমং নু খো বহুতরং, যা ৰা সত্ত মুগ্গমত্তিযো পাসাণসক্খরা উপনিক্খিত্তা যো ৰা সিনেরু 1 পব্বতরাজা’’তি?
84. Sāvatthiyaṃ viharati…pe… ‘‘seyyathāpi , bhikkhave, puriso sinerussa pabbatarājassa satta muggamattiyo pāsāṇasakkharā upanikkhipeyya. Taṃ kiṃ maññatha, bhikkhave, katamaṃ nu kho bahutaraṃ, yā vā satta muggamattiyo pāsāṇasakkharā upanikkhittā yo vā sineru 2 pabbatarājā’’ti?
‘‘এতদেৰ, ভন্তে, বহুতরং যদিদং সিনেরু পব্বতরাজা; অপ্পমত্তিকা সত্ত মুগ্গমত্তিযো পাসাণসক্খরা উপনিক্খিত্তা। নেৰ সতিমং কলং উপেন্তি ন সহস্সিমং কলং উপেন্তি ন সতসহস্সিমং কলং উপেন্তি সিনেরুং পব্বতরাজানং উপনিধায সত্ত মুগ্গমত্তিযো পাসাণসক্খরা উপনিক্খিত্তা’’তি। ‘‘এৰমেৰ খো, ভিক্খৰে, অরিযসাৰকস্স দিট্ঠিসম্পন্নস্স পুগ্গলস্স অধিগমং উপনিধায অঞ্ঞতিত্থিযসমণব্রাহ্মণপরিব্বাজকানং অধিগমো নেৰ সতিমং কলং উপেতি ন সহস্সিমং কলং উপেতি ন সতসহস্সিমং কলং উপেতি। এৰং মহাধিগমো, ভিক্খৰে, দিট্ঠিসম্পন্নো পুগ্গলো, এৰং মহাভিঞ্ঞো’’তি। একাদসমং।
‘‘Etadeva, bhante, bahutaraṃ yadidaṃ sineru pabbatarājā; appamattikā satta muggamattiyo pāsāṇasakkharā upanikkhittā. Neva satimaṃ kalaṃ upenti na sahassimaṃ kalaṃ upenti na satasahassimaṃ kalaṃ upenti sineruṃ pabbatarājānaṃ upanidhāya satta muggamattiyo pāsāṇasakkharā upanikkhittā’’ti. ‘‘Evameva kho, bhikkhave, ariyasāvakassa diṭṭhisampannassa puggalassa adhigamaṃ upanidhāya aññatitthiyasamaṇabrāhmaṇaparibbājakānaṃ adhigamo neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti. Evaṃ mahādhigamo, bhikkhave, diṭṭhisampanno puggalo, evaṃ mahābhiñño’’ti. Ekādasamaṃ.
অভিসমযসংযুত্তং সমত্তং।
Abhisamayasaṃyuttaṃ samattaṃ.
তস্সুদ্দানং –
Tassuddānaṃ –
নখসিখা পোক্খরণী, সম্ভেজ্জউদকে চ দ্ৰে।
Nakhasikhā pokkharaṇī, sambhejjaudake ca dve;
দ্ৰে পথৰী দ্ৰে সমুদ্দা, তযো চ পব্বতূপমাতি॥
Dve pathavī dve samuddā, tayo ca pabbatūpamāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. পথৰীসুত্তাদিৰণ্ণনা • 5. Pathavīsuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. পথৰীসুত্তাদিৰণ্ণনা • 4. Pathavīsuttādivaṇṇanā
