| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
11. තතියපබ්‌බතසුත්‌තං
11. Tatiyapabbatasuttaṃ
84. සාවත්‌ථියං විහරති…පෙ.… ‘‘සෙය්‍යථාපි , භික්‌ඛවෙ, පුරිසො සිනෙරුස්‌ස පබ්‌බතරාජස්‌ස සත්‌ත මුග්‌ගමත්‌තියො පාසාණසක්‌ඛරා උපනික්‌ඛිපෙය්‍ය. තං කිං මඤ්‌ඤථ, භික්‌ඛවෙ, කතමං නු ඛො බහුතරං, යා වා සත්‌ත මුග්‌ගමත්‌තියො පාසාණසක්‌ඛරා උපනික්‌ඛිත්‌තා යො වා සිනෙරු 1 පබ්‌බතරාජා’’ති?
84. Sāvatthiyaṃ viharati…pe… ‘‘seyyathāpi , bhikkhave, puriso sinerussa pabbatarājassa satta muggamattiyo pāsāṇasakkharā upanikkhipeyya. Taṃ kiṃ maññatha, bhikkhave, katamaṃ nu kho bahutaraṃ, yā vā satta muggamattiyo pāsāṇasakkharā upanikkhittā yo vā sineru 2 pabbatarājā’’ti?
‘‘එතදෙව, භන්‌තෙ, බහුතරං යදිදං සිනෙරු පබ්‌බතරාජා; අප්‌පමත්‌තිකා සත්‌ත මුග්‌ගමත්‌තියො පාසාණසක්‌ඛරා උපනික්‌ඛිත්‌තා. නෙව සතිමං කලං උපෙන්‌ති න සහස්‌සිමං කලං උපෙන්‌ති න සතසහස්‌සිමං කලං උපෙන්‌ති සිනෙරුං පබ්‌බතරාජානං උපනිධාය සත්‌ත මුග්‌ගමත්‌තියො පාසාණසක්‌ඛරා උපනික්‌ඛිත්‌තා’’ති. ‘‘එවමෙව ඛො, භික්‌ඛවෙ, අරියසාවකස්‌ස දිට්‌ඨිසම්‌පන්‌නස්‌ස පුග්‌ගලස්‌ස අධිගමං උපනිධාය අඤ්‌ඤතිත්‌ථියසමණබ්‍රාහ්‌මණපරිබ්‌බාජකානං අධිගමො නෙව සතිමං කලං උපෙති න සහස්‌සිමං කලං උපෙති න සතසහස්‌සිමං කලං උපෙති. එවං මහාධිගමො, භික්‌ඛවෙ, දිට්‌ඨිසම්‌පන්‌නො පුග්‌ගලො, එවං මහාභිඤ්‌ඤො’’ති. එකාදසමං.
‘‘Etadeva, bhante, bahutaraṃ yadidaṃ sineru pabbatarājā; appamattikā satta muggamattiyo pāsāṇasakkharā upanikkhittā. Neva satimaṃ kalaṃ upenti na sahassimaṃ kalaṃ upenti na satasahassimaṃ kalaṃ upenti sineruṃ pabbatarājānaṃ upanidhāya satta muggamattiyo pāsāṇasakkharā upanikkhittā’’ti. ‘‘Evameva kho, bhikkhave, ariyasāvakassa diṭṭhisampannassa puggalassa adhigamaṃ upanidhāya aññatitthiyasamaṇabrāhmaṇaparibbājakānaṃ adhigamo neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti. Evaṃ mahādhigamo, bhikkhave, diṭṭhisampanno puggalo, evaṃ mahābhiñño’’ti. Ekādasamaṃ.
අභිසමයසංයුත්‌තං සමත්‌තං.
Abhisamayasaṃyuttaṃ samattaṃ.
තස්‌සුද්‌දානං –
Tassuddānaṃ –
නඛසිඛා පොක්‌ඛරණී, සම්‌භෙජ්‌ජඋදකෙ ච ද්‌වෙ;
Nakhasikhā pokkharaṇī, sambhejjaudake ca dve;
ද්‌වෙ පථවී ද්‌වෙ සමුද්‌දා, තයො ච පබ්‌බතූපමාති.
Dve pathavī dve samuddā, tayo ca pabbatūpamāti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. පථවීසුත්‌තාදිවණ්‌ණනා • 5. Pathavīsuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 4. පථවීසුත්‌තාදිවණ්‌ණනා • 4. Pathavīsuttādivaṇṇanā
