| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၉. တတိယပာပဓမ္မသုတ္တံ
9. Tatiyapāpadhammasuttaṃ
၂၀၉. ‘‘ပာပဓမ္မဉ္စ ဝော, ဘိက္ခဝေ, ဒေသေသ္သာမိ, ပာပဓမ္မေန ပာပဓမ္မတရဉ္စ; ကလ္ယာဏဓမ္မဉ္စ, ကလ္ယာဏဓမ္မေန ကလ္ယာဏဓမ္မတရဉ္စ။ တံ သုဏာထ။ပေ.။။
209. ‘‘Pāpadhammañca vo, bhikkhave, desessāmi, pāpadhammena pāpadhammatarañca; kalyāṇadhammañca, kalyāṇadhammena kalyāṇadhammatarañca. Taṃ suṇātha…pe….
‘‘ကတမော စ, ဘိက္ခဝေ, ပာပဓမ္မော? ဣဓ, ဘိက္ခဝေ, ဧကစ္စော ပာဏာတိပာတီ ဟောတိ။ပေ.။ မိစ္ဆာဒိဋ္ဌိကော ဟောတိ။ အယံ ဝုစ္စတိ, ဘိက္ခဝေ, ပာပဓမ္မော။
‘‘Katamo ca, bhikkhave, pāpadhammo? Idha, bhikkhave, ekacco pāṇātipātī hoti…pe… micchādiṭṭhiko hoti. Ayaṃ vuccati, bhikkhave, pāpadhammo.
‘‘ကတမော စ, ဘိက္ခဝေ, ပာပဓမ္မေန ပာပဓမ္မတရော? ဣဓ ဘိက္ခဝေ, ဧကစ္စော အတ္တနာ စ ပာဏာတိပာတီ ဟောတိ, ပရဉ္စ ပာဏာတိပာတေ သမာဒပေတိ။ပေ.။ အတ္တနာ စ မိစ္ဆာဒိဋ္ဌိကော ဟောတိ, ပရဉ္စ မိစ္ဆာဒိဋ္ဌိယာ သမာဒပေတိ။ အယံ ဝုစ္စတိ, ဘိက္ခဝေ, ပာပဓမ္မေန ပာပဓမ္မတရော။
‘‘Katamo ca, bhikkhave, pāpadhammena pāpadhammataro? Idha bhikkhave, ekacco attanā ca pāṇātipātī hoti, parañca pāṇātipāte samādapeti…pe… attanā ca micchādiṭṭhiko hoti, parañca micchādiṭṭhiyā samādapeti. Ayaṃ vuccati, bhikkhave, pāpadhammena pāpadhammataro.
‘‘ကတမော စ, ဘိက္ခဝေ, ကလ္ယာဏဓမ္မော? ဣဓ, ဘိက္ခဝေ, ဧကစ္စော ပာဏာတိပာတာ ပဋိဝိရတော ဟောတိ။ပေ.။ သမ္မာဒိဋ္ဌိကော ဟောတိ။ အယံ ဝုစ္စတိ, ဘိက္ခဝေ, ကလ္ယာဏဓမ္မော။
‘‘Katamo ca, bhikkhave, kalyāṇadhammo? Idha, bhikkhave, ekacco pāṇātipātā paṭivirato hoti…pe… sammādiṭṭhiko hoti. Ayaṃ vuccati, bhikkhave, kalyāṇadhammo.
‘‘ကတမော စ, ဘိက္ခဝေ, ကလ္ယာဏဓမ္မေန ကလ္ယာဏဓမ္မတရော? ဣဓ, ဘိက္ခဝေ, ဧကစ္စော အတ္တနာ စ ပာဏာတိပာတာ ပဋိဝိရတော ဟောတိ, ပရဉ္စ ပာဏာတိပာတာ ဝေရမဏိယာ သမာဒပေတိ။ပေ.။ အတ္တနာ စ သမ္မာဒိဋ္ဌိကော ဟောတိ, ပရဉ္စ သမ္မာဒိဋ္ဌိယာ သမာဒပေတိ။ အယံ ဝုစ္စတိ, ဘိက္ခဝေ, ကလ္ယာဏဓမ္မေန ကလ္ယာဏဓမ္မတရော’’တိ။ နဝမံ။
‘‘Katamo ca, bhikkhave, kalyāṇadhammena kalyāṇadhammataro? Idha, bhikkhave, ekacco attanā ca pāṇātipātā paṭivirato hoti, parañca pāṇātipātā veramaṇiyā samādapeti…pe… attanā ca sammādiṭṭhiko hoti, parañca sammādiṭṭhiyā samādapeti. Ayaṃ vuccati, bhikkhave, kalyāṇadhammena kalyāṇadhammataro’’ti. Navamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၇-၁၀. ပာပဓမ္မသုတ္တစတုက္ကဝဏ္ဏနာ • 7-10. Pāpadhammasuttacatukkavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၁၀. သိက္ခာပဒသုတ္တာဒိဝဏ္ဏနာ • 1-10. Sikkhāpadasuttādivaṇṇanā
