| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
ততিযপারাজিককথাৰণ্ণনা
Tatiyapārājikakathāvaṇṇanā
২৪১-২. এৰমতিসুখুমনযসমাকুলং দুতিযপারাজিকং দস্সেত্ৰা ইদানি ততিযপারাজিকং দস্সেতুমাহ ‘‘মনুস্সজাতি’’ন্তিআদি। তত্থ মনুস্সজাতিন্তি জাযতীতি জাতি, রূপারূপপটিসন্ধি, মনুস্সেসু জাতি যস্স সো মনুস্সজাতি, মনুস্সজাতিকো মনুস্সৰিগ্গহোতি ৰুত্তং হোতি, তং মনুস্সজাতিং।
241-2. Evamatisukhumanayasamākulaṃ dutiyapārājikaṃ dassetvā idāni tatiyapārājikaṃ dassetumāha ‘‘manussajāti’’ntiādi. Tattha manussajātinti jāyatīti jāti, rūpārūpapaṭisandhi, manussesu jāti yassa so manussajāti, manussajātiko manussaviggahoti vuttaṃ hoti, taṃ manussajātiṃ.
এত্থ চ মনুস্সেসূতি কুসলাকুসলমনস্স উস্সন্নত্তা মনুস্সসঙ্খাতেসু নরেসু। ‘‘যং মাতুকুচ্ছিস্মিং পঠমং চিত্তং উপ্পন্ন’’ন্তি (পারা॰ ১৭২) পদভাজনে ৰুত্তনযেন মাতুকুচ্ছিম্হি পঠমং উপ্পজ্জমানপটিসন্ধিচিত্তঞ্চ তংসম্পযুত্তৰেদনাসঞ্ঞাসঙ্খারসঙ্খাতখন্ধত্তযঞ্চ তংসহজাতানি –
Ettha ca manussesūti kusalākusalamanassa ussannattā manussasaṅkhātesu naresu. ‘‘Yaṃ mātukucchismiṃ paṭhamaṃ cittaṃ uppanna’’nti (pārā. 172) padabhājane vuttanayena mātukucchimhi paṭhamaṃ uppajjamānapaṭisandhicittañca taṃsampayuttavedanāsaññāsaṅkhārasaṅkhātakhandhattayañca taṃsahajātāni –
‘‘তিলতেলস্স যথা বিন্দু, সপ্পিমণ্ডো অনাৰিলো।
‘‘Tilatelassa yathā bindu, sappimaṇḍo anāvilo;
এৰং ৰণ্ণপ্পটিভাগং, ‘কলল’ন্তি পৰুচ্চতী’’তি॥ (পারা॰ অট্ঠ॰ ২.১৭২; ৰিভ॰ অট্ঠ॰ ২৬) –
Evaṃ vaṇṇappaṭibhāgaṃ, ‘kalala’nti pavuccatī’’ti. (pārā. aṭṭha. 2.172; vibha. aṭṭha. 26) –
ৰুত্তানি জাতিউণ্ণংসুম্হি পসন্নতিলতেলে ৰা সপ্পিমণ্ডে ৰা ওতারেত্ৰা উক্খিপিত্ৰা ৰিধুনিতে অগ্গে লম্বমানবিন্দুপ্পমাণকললসঙ্খাতানি সভাৰকানং কাযভাৰৰত্থুদসকৰসেন তিংস রূপানি চ অভাৰকানং কাযৰত্থুদসকৰসেন ৰীসতি রূপানি চাতি অযং নামরূপপটিসন্ধি ইধ ‘‘জাতী’’তি গহিতা। ‘‘যস্সা’’তি ইমিনা অঞ্ঞপদেন ‘‘যাৰ মরণকালা এত্থন্তরে এসো মনুস্সৰিগ্গহো নামা’’তি (পারা॰ ১৭২) পদভাজনে ৰুত্তনযেন পঠমভৰঙ্গতো পট্ঠায চুতিচিত্তাসন্নভৰঙ্গপরিযন্তসন্তানসঙ্খাতসত্তো গহিতো। ইমিনা মনুস্সৰিগ্গহস্স পটিসন্ধিতো পট্ঠায পারাজিকৰত্থুভাৰং দস্সেতি।
Vuttāni jātiuṇṇaṃsumhi pasannatilatele vā sappimaṇḍe vā otāretvā ukkhipitvā vidhunite agge lambamānabinduppamāṇakalalasaṅkhātāni sabhāvakānaṃ kāyabhāvavatthudasakavasena tiṃsa rūpāni ca abhāvakānaṃ kāyavatthudasakavasena vīsati rūpāni cāti ayaṃ nāmarūpapaṭisandhi idha ‘‘jātī’’ti gahitā. ‘‘Yassā’’ti iminā aññapadena ‘‘yāva maraṇakālā etthantare eso manussaviggaho nāmā’’ti (pārā. 172) padabhājane vuttanayena paṭhamabhavaṅgato paṭṭhāya cuticittāsannabhavaṅgapariyantasantānasaṅkhātasatto gahito. Iminā manussaviggahassa paṭisandhito paṭṭhāya pārājikavatthubhāvaṃ dasseti.
জানন্তোতি ‘‘সত্তো অয’’ন্তি জানন্তো। জীৰিতা যো ৰিযোজযেতি যো ভিক্খু জীৰিতিন্দ্রিযা ৰিযোজেয্য ৰোরোপেয্য, তস্স জীৰিতিন্দ্রিযং উপচ্ছিন্দেয্য উপরোধেয্যাতি ৰুত্তং হোতি। তেনাহ পদভাজনে ‘‘জীৰিতা ৰোরোপেয্যাতি জীৰিতিন্দ্রিযং উপচ্ছিন্দতি উপরোধেতী’’তি (পারা॰ ১৭২)।
Jānantoti ‘‘satto aya’’nti jānanto. Jīvitā yo viyojayeti yo bhikkhu jīvitindriyā viyojeyya voropeyya, tassa jīvitindriyaṃ upacchindeyya uparodheyyāti vuttaṃ hoti. Tenāha padabhājane ‘‘jīvitā voropeyyāti jīvitindriyaṃ upacchindati uparodhetī’’ti (pārā. 172).
তঞ্চ জীৰিতিন্দ্রিযং রূপারূপৰসেন দুৰিধং হোতি। তত্থ অরূপজীৰিতিন্দ্রিযং অৰিগ্গহত্তা উপক্কমৰিসযং ন হোতি। রূপজীৰিতিন্দ্রিযুপচ্ছেদেন পন তদাযত্তৰুত্তিতায তংসমকালমেৰ ওচ্ছিজ্জমানতায এত্থ সামঞ্ঞেন উভযম্পি গহেতব্বং। ইদঞ্চ অতীতানাগতং ন গহেতব্বং তস্স অৰিজ্জমানত্তা। উপক্কমৰিসযারহং পন পচ্চুপ্পন্নমেৰ গহেতব্বং। তঞ্চ খণসন্ততিঅদ্ধাৰসেন তিৰিধং হোতি।
Tañca jīvitindriyaṃ rūpārūpavasena duvidhaṃ hoti. Tattha arūpajīvitindriyaṃ aviggahattā upakkamavisayaṃ na hoti. Rūpajīvitindriyupacchedena pana tadāyattavuttitāya taṃsamakālameva occhijjamānatāya ettha sāmaññena ubhayampi gahetabbaṃ. Idañca atītānāgataṃ na gahetabbaṃ tassa avijjamānattā. Upakkamavisayārahaṃ pana paccuppannameva gahetabbaṃ. Tañca khaṇasantatiaddhāvasena tividhaṃ hoti.
তত্থ উপ্পাদট্ঠিতিভঙ্গৰসেন খণত্তযপরিযাপন্নো ভাৰো খণপচ্চুপ্পন্নং নাম। তং সরসভঙ্গভূতত্তা সযং ভিজ্জমানং উপক্কমসাধিযং ৰিনাসৰন্তং ন হোতি। আতপে ঠত্ৰা গব্ভং পৰিট্ঠস্স অন্ধকারৰিগমন্তরঞ্চ সীতেন ওৰরকং পৰিট্ঠস্স ৰিসভাগউতুসমুট্ঠানেন সীতপনূদন্তরঞ্চ রূপসন্ততি সন্ততিপচ্চুপ্পন্নং নাম। পটিসন্ধিচুতীনমন্তরাল়প্পৰত্তি খন্ধসন্ততি অদ্ধাপচ্চুপ্পন্নং নাম। ইমস্মিং দ্ৰযে উপক্কমসম্ভৰো, তংৰসেন উপচ্ছিজ্জমানং জীৰিতং সন্তানপরিহানিপচ্চযভাৰতো সন্ততিঅদ্ধাপচ্চুপ্পন্নদ্ৰযং যথাপরিচ্ছিন্নকালমপ্পত্ৰা উপক্কমৰসেন অন্তরাযেৰ নিরুজ্ঝতি, তস্মা সন্ততিঅদ্ধাপচ্চুপ্পন্নরূপজীৰিতিন্দ্রিযঞ্চ তংনিরোধেন নিরুজ্ঝমানঅরূপজীৰিতিন্দ্রিযঞ্চাতি উভযং এত্থ ‘‘জীৰিতা’’তি গহিতন্তি ৰেদিতব্বং। ইদমেৰ সন্ধাযাহ পদভাজনে ‘‘সন্ততিং ৰিকোপেতী’’তি (পারা॰ ১৭২)।
Tattha uppādaṭṭhitibhaṅgavasena khaṇattayapariyāpanno bhāvo khaṇapaccuppannaṃ nāma. Taṃ sarasabhaṅgabhūtattā sayaṃ bhijjamānaṃ upakkamasādhiyaṃ vināsavantaṃ na hoti. Ātape ṭhatvā gabbhaṃ paviṭṭhassa andhakāravigamantarañca sītena ovarakaṃ paviṭṭhassa visabhāgautusamuṭṭhānena sītapanūdantarañca rūpasantati santatipaccuppannaṃ nāma. Paṭisandhicutīnamantarāḷappavatti khandhasantati addhāpaccuppannaṃ nāma. Imasmiṃ dvaye upakkamasambhavo, taṃvasena upacchijjamānaṃ jīvitaṃ santānaparihānipaccayabhāvato santatiaddhāpaccuppannadvayaṃ yathāparicchinnakālamappatvā upakkamavasena antarāyeva nirujjhati, tasmā santatiaddhāpaccuppannarūpajīvitindriyañca taṃnirodhena nirujjhamānaarūpajīvitindriyañcāti ubhayaṃ ettha ‘‘jīvitā’’ti gahitanti veditabbaṃ. Idameva sandhāyāha padabhājane ‘‘santatiṃ vikopetī’’ti (pārā. 172).
ইমিস্সাৰ পাণাতিপাতভাৰে আপত্তিভাৰতো এত্থ ঠত্ৰা অট্ঠকথাযং (পারা॰ অট্ঠ॰ ২.১৭২) পাণপাণাতিপাতপাণাতিপাতীপাণাতিপাতপ্পযোগানং ৰিভাগো দস্সিতো। তত্থ পাণোতি ৰোহারতো সত্তো, পরমত্থতো উপচ্ছিজ্জমানং জীৰিতিন্দ্রিযং, তং ‘‘জীৰিতা’’তি ইমিনা ৰুত্তং। পাণাতিপাতো নাম ৰধকচেতনা, সো চ ‘‘ৰিযোজযে’’তি ইমিনা সন্দস্সিতো। পাণাতিপাতী নাম পুগ্গলো, সো চ ‘‘যো’’তি ইমিনা সন্দস্সিতো। পাণাতিপাতপ্পযোগো পন –
Imissāva pāṇātipātabhāve āpattibhāvato ettha ṭhatvā aṭṭhakathāyaṃ (pārā. aṭṭha. 2.172) pāṇapāṇātipātapāṇātipātīpāṇātipātappayogānaṃ vibhāgo dassito. Tattha pāṇoti vohārato satto, paramatthato upacchijjamānaṃ jīvitindriyaṃ, taṃ ‘‘jīvitā’’ti iminā vuttaṃ. Pāṇātipāto nāma vadhakacetanā, so ca ‘‘viyojaye’’ti iminā sandassito. Pāṇātipātī nāma puggalo, so ca ‘‘yo’’ti iminā sandassito. Pāṇātipātappayogo pana –
‘‘ৰুত্তা পাণাতিপাতস্স।
‘‘Vuttā pāṇātipātassa;
পযোগা ছ মহেসিনা’’তি –
Payogā cha mahesinā’’ti –
আদিনা নযেন ইধেৰ ৰক্খমানৰিভাগত্তা ৰক্খমাননযেনেৰ দট্ঠব্বো।
Ādinā nayena idheva vakkhamānavibhāgattā vakkhamānanayeneva daṭṭhabbo.
অস্স সত্থং নিক্খিপেয্য ৰাতি যোজনা। অস্সাতি মনুস্সজাতিকস্স। ‘‘হত্থপাসে’’তি পাঠসেসো। হত্থপাসো নাম সমীপোতি। অস্সাতি সমীপসম্বন্ধে সামিৰচনং। সত্থন্তি এত্থ জীৰিতৰিহিং সনুপকরণভাৰেন সম্মতা ধারাৰন্তঅসিআদি চ ধারারহিতযট্ঠিভিন্দিৰাললগুল়াদি চ উপলক্খণৰসেন গহেতব্বা। সসতি হিংসতীতি সত্থং। তেনেৰাহ পদভাজনে ‘‘অসিং ৰা সত্তিং ৰা ভিন্দিৰালং ৰা লগুল়ং ৰা পাসাণং ৰা সত্থং ৰা ৰিসং ৰা রজ্জুং ৰা’’তি। ইধাৰুত্তং করপালিকাছুরিকাদি সমুখং ‘‘সত্থং ৰা’’তি ইমিনা সঙ্গহিতং। নিক্খিপেয্যাতি যথা ভোগহেতুং লভতি, তথা উপনিক্খিপেয্য, অত্তৰধায ইচ্ছিতক্খণে যথা গণ্হাতি, তথা সমীপে তেনেৰ চিত্তেন ঠপেয্যাতি ৰুত্তং হোতি। ইমিনা থাৰরপ্পযোগো সন্দস্সিতো।
Assa satthaṃ nikkhipeyya vāti yojanā. Assāti manussajātikassa. ‘‘Hatthapāse’’ti pāṭhaseso. Hatthapāso nāma samīpoti. Assāti samīpasambandhe sāmivacanaṃ. Satthanti ettha jīvitavihiṃ sanupakaraṇabhāvena sammatā dhārāvantaasiādi ca dhārārahitayaṭṭhibhindivālalaguḷādi ca upalakkhaṇavasena gahetabbā. Sasati hiṃsatīti satthaṃ. Tenevāha padabhājane ‘‘asiṃ vā sattiṃ vā bhindivālaṃ vā laguḷaṃ vā pāsāṇaṃ vā satthaṃ vā visaṃ vā rajjuṃ vā’’ti. Idhāvuttaṃ karapālikāchurikādi samukhaṃ ‘‘satthaṃ vā’’ti iminā saṅgahitaṃ. Nikkhipeyyāti yathā bhogahetuṃ labhati, tathā upanikkhipeyya, attavadhāya icchitakkhaṇe yathā gaṇhāti, tathā samīpe teneva cittena ṭhapeyyāti vuttaṃ hoti. Iminā thāvarappayogo sandassito.
মরণে গুণং ৰা ৰদেয্যাতি যোজনা, মরণত্থায মরণে গুণং ৰণ্ণেতীতি অত্থো। ‘‘জীৰিতে আদীনৰং দস্সেতি, মরণে গুণং ভণতী’’তি (পারা॰ ১৭২) পদভাজনে ৰুত্তত্তা ‘‘কিং তুয্হিমিনা পাপকেন দুজ্জীৰিতেন, যো ত্ৰং ন লভসি পণীতভোজনানি ভুঞ্জিতু’’মিচ্চাদিনা নযেন মরণত্থায জীৰিতে অৰণ্ণং ৰদন্তো চ ‘‘ত্ৰং খোসি উপাসক কতকল্যাণো অকতপাপো, মতং তে জীৰিতা সেয্যো, ইতো ত্ৰং কালকতো ৰিৰিধৰিহঙ্গমৰিকূজিতে পরমসুরভিকুসুমভূসিততরুৰরনিচিতে পরমরতিকরলল়িতগতিভাসিতৰিলপিতসুরযুৰতিগণৰিচরিতে ৰরনন্দনে অচ্ছরাসঙ্ঘপরিৰারিতো ৰিচরিস্সসী’’তিআদিনা নযেন মরণত্থায মরণানিসংসং দস্সেন্তো চ ‘‘মরণে গুণং ৰদেয্য’’ইচ্চেৰ ৰুচ্চতি।
Maraṇe guṇaṃ vā vadeyyāti yojanā, maraṇatthāya maraṇe guṇaṃ vaṇṇetīti attho. ‘‘Jīvite ādīnavaṃ dasseti, maraṇe guṇaṃ bhaṇatī’’ti (pārā. 172) padabhājane vuttattā ‘‘kiṃ tuyhiminā pāpakena dujjīvitena, yo tvaṃ na labhasi paṇītabhojanāni bhuñjitu’’miccādinā nayena maraṇatthāya jīvite avaṇṇaṃ vadanto ca ‘‘tvaṃ khosi upāsaka katakalyāṇo akatapāpo, mataṃ te jīvitā seyyo, ito tvaṃ kālakato vividhavihaṅgamavikūjite paramasurabhikusumabhūsitataruvaranicite paramaratikaralaḷitagatibhāsitavilapitasurayuvatigaṇavicarite varanandane accharāsaṅghaparivārito vicarissasī’’tiādinā nayena maraṇatthāya maraṇānisaṃsaṃ dassento ca ‘‘maraṇe guṇaṃ vadeyya’’icceva vuccati.
মরণূপাযং দেসেয্যাতি যোজনা। মরণাধিপ্পাযেনেৰ ‘‘সত্থং ৰা আহর, ৰিসং ৰা খাদ, রজ্জুযা ৰা উব্বন্ধিত্ৰা কালঙ্করোহী’’তি পদভাজনে ৰুত্তসত্থহরণানি চ অৰুত্তম্পি সোব্ভনরকপপাতাদীসু পপতনঞ্চাতি এৰমাদিকং মরণূপাযং আচিক্খেয্য। ‘‘হোতি অযম্পী’’তি পদচ্ছেদো, অপীতি পুব্বে ৰুত্তদ্ৰযং সমুচ্চিনোতি। দ্ৰেধা ভিন্নসিলা ৰিয অসন্ধেয্যোৰ সো ঞেয্যোতি দ্ৰিধা ভিন্নপাসাণো ৰিয ভগৰতো পটিপত্তিপটিৰেধসাসনদ্ৰযেন সো পচ্চুপ্পন্নে অত্তভাৰে সন্ধাতুমসক্কুণেয্যোৰাতি ঞাতব্বোতি অত্থো।
Maraṇūpāyaṃ deseyyāti yojanā. Maraṇādhippāyeneva ‘‘satthaṃ vā āhara, visaṃ vā khāda, rajjuyā vā ubbandhitvā kālaṅkarohī’’ti padabhājane vuttasatthaharaṇāni ca avuttampi sobbhanarakapapātādīsu papatanañcāti evamādikaṃ maraṇūpāyaṃ ācikkheyya. ‘‘Hoti ayampī’’ti padacchedo, apīti pubbe vuttadvayaṃ samuccinoti. Dvedhā bhinnasilā viya asandheyyovaso ñeyyoti dvidhā bhinnapāsāṇo viya bhagavato paṭipattipaṭivedhasāsanadvayena so paccuppanne attabhāve sandhātumasakkuṇeyyovāti ñātabboti attho.
২৪৩. থাৰরাদযোতি আদি-সদ্দেন ৰিজ্জামযইদ্ধিমযপযোগদ্ৰযং সঙ্গহিতং।
243.Thāvarādayoti ādi-saddena vijjāmayaiddhimayapayogadvayaṃ saṅgahitaṃ.
২৪৪. তত্থাতি তেসু ছসু পযোগেসু। সকো হত্থো সহত্থো, তেন নিব্বত্তো সাহত্থিকো, পযোগো। ইধ হত্থগ্গহণং উপলক্খণং, তস্মা হত্থাদিনা অত্তনো অঙ্গপচ্চঙ্গেন নিপ্ফাদিতো ৰধপ্পযোগো সাহত্থিকোতি ৰেদিতব্বো।
244.Tatthāti tesu chasu payogesu. Sako hattho sahattho, tena nibbatto sāhatthiko, payogo. Idha hatthaggahaṇaṃ upalakkhaṇaṃ, tasmā hatthādinā attano aṅgapaccaṅgena nipphādito vadhappayogo sāhatthikoti veditabbo.
২৪৫. ‘‘ত্ৰং তং এৰং পহরিত্ৰা মারেহী’’তি ভিক্খুনো পরস্স যং আণাপনং, অযমাণত্তিকো নযোতি যোজনা। আণত্তিকো নযোতি আণত্তিযেৰ আণত্তিকো। নেতি পৰত্তেতীতি নযো, পযোগস্সেতং নামং।
245. ‘‘Tvaṃ taṃ evaṃ paharitvā mārehī’’ti bhikkhuno parassa yaṃ āṇāpanaṃ, ayamāṇattiko nayoti yojanā. Āṇattiko nayoti āṇattiyeva āṇattiko. Neti pavattetīti nayo, payogassetaṃ nāmaṃ.
২৪৬. দূরন্তি দূরট্ঠং। কাযেন পটিবদ্ধেনাতি এত্থ কাযেকদেসো হত্থাদি কাযো অৰযৰে সমুদাযোপচারতো ‘‘গামো দড্ঢো’’তি যথা। কাযপটিবদ্ধং চাপাদিকং পটিবদ্ধং নাম পুব্বপদলোপেন ‘‘দেৰদত্তো দত্তো’’তি যথা। ৰা-সদ্দো লুত্তনিদ্দিট্ঠো, কাযেন ৰা কাযপটিবদ্ধেন ৰাতি ৰুত্তং হোতি, ‘‘উসুআদিনিপাতন’’ন্তি ইমিনা সম্বন্ধো। ৰিধানং ৰিধি, পযোগোতি অত্থো।
246.Dūranti dūraṭṭhaṃ. Kāyena paṭibaddhenāti ettha kāyekadeso hatthādi kāyo avayave samudāyopacārato ‘‘gāmo daḍḍho’’ti yathā. Kāyapaṭibaddhaṃ cāpādikaṃ paṭibaddhaṃ nāma pubbapadalopena ‘‘devadatto datto’’ti yathā. Vā-saddo luttaniddiṭṭho, kāyena vā kāyapaṭibaddhena vāti vuttaṃ hoti, ‘‘usuādinipātana’’nti iminā sambandho. Vidhānaṃ vidhi, payogoti attho.
২৪৭. অসঞ্চারিমুপাযেনাতি অসঞ্চারিমেন নিচ্চলেন উপাযেন। ওপতন্তি এত্থাতি ওপাতো, সো আদি যেসং অপস্সেনৰিসভেসজ্জসংৰিধানাদীনং তে ওপাতাদযো, তেসং ৰিধানং ওপাতাদিৰিধানং, ওপাতক্খণনাদিকিরিযা।
247.Asañcārimupāyenāti asañcārimena niccalena upāyena. Opatanti etthāti opāto, so ādi yesaṃ apassenavisabhesajjasaṃvidhānādīnaṃ te opātādayo, tesaṃ vidhānaṃ opātādividhānaṃ, opātakkhaṇanādikiriyā.
২৪৮. ৰিজ্জাযাতি আথব্বনৰেদাগতমরণমন্তসঙ্খাতৰিজ্জায। জপ্পনন্তি যথা পরো ন সুণাতি, তথা পুনপ্পুনং ৰচনং।
248.Vijjāyāti āthabbanavedāgatamaraṇamantasaṅkhātavijjāya. Jappananti yathā paro na suṇāti, tathā punappunaṃ vacanaṃ.
২৪৯. মারণে সমত্থা যা কম্মৰিপাকজা ইদ্ধি, অযং ইদ্ধিমযো পযোগো নামাতি সমুদীরিতোতি যোজনা। কম্মৰিপাকে জাতা কম্মৰিপাকজা, ইদ্ধি, যা ‘‘নাগানং নাগিদ্ধি সুপণ্ণানং সুপণ্ণিদ্ধি যক্খানং যক্খিদ্ধী’’তিআদিনা (পারা॰ অট্ঠ॰ ২.১৭২) বহুধা অট্ঠকথাযং ৰুত্তা। তত্থ দিট্ঠদট্ঠফুট্ঠৰিসানং নাগানং দিস্ৰা, ডংসিত্ৰা, ফুসিত্ৰা চ পরূপঘাতকরণে নাগিদ্ধি ৰেদিতব্বা। এৰং সেসানম্পি। ইদ্ধিযেৰ ইদ্ধিমযো, ভাৰনামযো ইদ্ধিপ্পযোগো পনেত্থ ন গহেতব্বো। ৰুত্তঞ্হেতং অট্ঠকথাযং –
249. Māraṇe samatthā yā kammavipākajā iddhi, ayaṃ iddhimayo payogo nāmāti samudīritoti yojanā. Kammavipāke jātā kammavipākajā, iddhi, yā ‘‘nāgānaṃ nāgiddhi supaṇṇānaṃ supaṇṇiddhi yakkhānaṃ yakkhiddhī’’tiādinā (pārā. aṭṭha. 2.172) bahudhā aṭṭhakathāyaṃ vuttā. Tattha diṭṭhadaṭṭhaphuṭṭhavisānaṃ nāgānaṃ disvā, ḍaṃsitvā, phusitvā ca parūpaghātakaraṇe nāgiddhi veditabbā. Evaṃ sesānampi. Iddhiyeva iddhimayo, bhāvanāmayo iddhippayogo panettha na gahetabbo. Vuttañhetaṃ aṭṭhakathāyaṃ –
‘‘কেচি পন ভাৰনামযিদ্ধিযাপি পরূপঘাতকরণং ৰদন্তি। সহ পরূপঘাতকরণেন চ আদিত্তঘরূপরি খিত্তস্স উদকঘটস্স ভেদনং ৰিয ইদ্ধিৰিনাসঞ্চ ইচ্ছন্তি, তং তেসং ইচ্ছামত্তমেৰ। কস্মা? যস্মা তং কুসলৰেদনাৰিতক্কপরিত্তত্তিকাদীহি ন সমেতি। কথং? অযঞ্হি ভাৰনামযিদ্ধি নাম চতুত্থজ্ঝানমযা কুসলত্তিকে কুসলা চেৰ অব্যাকতা চ, পাণাতিপাতো অকুসলো। ৰেদনাত্তিকে অদুক্খমসুখসম্পযুত্তা, পাণাতিপাতো দুক্খসম্পযুত্তো। ৰিতক্কত্তিকে অৰিতক্কঅৰিচারা, পাণাতিপাতো সৰিতক্কসৰিচারো। পরিত্তত্তিকে মহগ্গতা, পাণাতিপাতো পরিত্তোযেৰা’’তি (পারা॰ অট্ঠ॰ ২.১৭২)।
‘‘Keci pana bhāvanāmayiddhiyāpi parūpaghātakaraṇaṃ vadanti. Saha parūpaghātakaraṇena ca ādittagharūpari khittassa udakaghaṭassa bhedanaṃ viya iddhivināsañca icchanti, taṃ tesaṃ icchāmattameva. Kasmā? Yasmā taṃ kusalavedanāvitakkaparittattikādīhi na sameti. Kathaṃ? Ayañhi bhāvanāmayiddhi nāma catutthajjhānamayā kusalattike kusalā ceva abyākatā ca, pāṇātipāto akusalo. Vedanāttike adukkhamasukhasampayuttā, pāṇātipāto dukkhasampayutto. Vitakkattike avitakkaavicārā, pāṇātipāto savitakkasavicāro. Parittattike mahaggatā, pāṇātipāto parittoyevā’’ti (pārā. aṭṭha. 2.172).
২৫০. তত্থাতি তেসু ছব্বিধেসু পযোগেসু। উদ্দেসোপীতি উদ্দিসনং উদ্দেসো, তংসহিতো পযোগোপি উদ্দেসোতি ৰুত্তং হোতি ‘‘কুন্তে পৰেসেহী’’তি যথা। এৰং ৰত্তব্বতায চ অনুদ্দেসোতি তব্বিপরীতৰচনমেৰ ঞাপকন্তি ৰেদিতব্বং। এত্থ একেকো উদ্দেসোপি অনুদ্দেসোপি হোতীতি তেসমযং ভেদো পন দুৰিধো হোতীতি পরিদীপিতোতি যোজনা। ইমেসু ছসু পযোগেস্ৰেৰ একেকস্সেৰ উদ্দিস্সানুদ্দিস্সকিরিযমানতায দুৰিধভাৰতো তেসং দ্ৰাদসৰিধো ভেদো পদভাজনে চ অট্ঠকথায চ দীপিতো, তত্থ ৰিনিচ্ছযমিদানি দস্সযিস্সামীতি অধিপ্পাযো।
250.Tatthāti tesu chabbidhesu payogesu. Uddesopīti uddisanaṃ uddeso, taṃsahito payogopi uddesoti vuttaṃ hoti ‘‘kunte pavesehī’’ti yathā. Evaṃ vattabbatāya ca anuddesoti tabbiparītavacanameva ñāpakanti veditabbaṃ. Ettha ekeko uddesopi anuddesopi hotīti tesamayaṃ bhedo pana duvidho hotīti paridīpitoti yojanā. Imesu chasu payogesveva ekekasseva uddissānuddissakiriyamānatāya duvidhabhāvato tesaṃ dvādasavidho bhedo padabhājane ca aṭṭhakathāya ca dīpito, tattha vinicchayamidāni dassayissāmīti adhippāyo.
২৫১. বহূসুপীতি মনুস্সেসু বহূসুপি। তেন কম্মেনাতি পহারদানসঙ্খাতেন কম্মেন। বজ্ঝতীতি অপাযং নেতুং কম্মপাসেন কম্মন্তরং নিৰারেত্ৰা বজ্ঝতীতি অত্থো।
251.Bahūsupīti manussesu bahūsupi. Tena kammenāti pahāradānasaṅkhātena kammena. Bajjhatīti apāyaṃ netuṃ kammapāsena kammantaraṃ nivāretvā bajjhatīti attho.
২৫২. পহারেপীতি পহরণেপি। দেহিনোতি মনুস্সৰিগ্গহস্স। তস্সাতি পহটস্স।
252.Pahārepīti paharaṇepi. Dehinoti manussaviggahassa. Tassāti pahaṭassa.
২৫৩. পহটমত্তে ৰাতি পহটক্খণে ৰা। পচ্ছাতি তপ্পচ্চযা কালন্তরে ৰা। উভযথাপি চ মতেতি দ্ৰিন্নং আকারানমঞ্ঞতরেন মতেপি। হন্তা ৰধকো। পহটমত্তস্মিন্তি তস্মিং মরণারহপহারস্স লদ্ধক্খণেযেৰ, মরণতো পুব্বভাগেযেৰাতি মত্তসদ্দেন দীপেতি। মরণত্থায চ অঞ্ঞত্থায চ দিন্নেসু অনেকেসু পহারেসু মরণত্থায দিন্নপ্পহারেনেৰ যদা কদাচি মরিস্সতি, পহারদানক্খণেযেৰ পারাজিকং হোতি। অমরণাধিপ্পাযেন দিন্নপ্পহারবলেন চে মরেয্য, ন হোতীতি ৰুত্তং হোতীতি।
253.Pahaṭamatte vāti pahaṭakkhaṇe vā. Pacchāti tappaccayā kālantare vā. Ubhayathāpi ca mateti dvinnaṃ ākārānamaññatarena matepi. Hantā vadhako. Pahaṭamattasminti tasmiṃ maraṇārahapahārassa laddhakkhaṇeyeva, maraṇato pubbabhāgeyevāti mattasaddena dīpeti. Maraṇatthāya ca aññatthāya ca dinnesu anekesu pahāresu maraṇatthāya dinnappahāreneva yadā kadāci marissati, pahāradānakkhaṇeyeva pārājikaṃ hoti. Amaraṇādhippāyena dinnappahārabalena ce mareyya, na hotīti vuttaṃ hotīti.
২৫৪. দ্ৰে পযোগাতি উদ্দিস্সানুদ্দিস্সকিরিযাভেদভিন্না সাহত্থিকাণত্তিকা দ্ৰে পযোগা।
254.Dve payogāti uddissānuddissakiriyābhedabhinnā sāhatthikāṇattikā dve payogā.
২৫৫. করণস্সাতি কিরিযায। ৰিসেসোতি নানত্তং। আণত্তিনিযামকাতি আণত্তিং নিযামেন্তি ৰৰত্থাপেন্তীতি আণত্তিনিযামকা।
255.Karaṇassāti kiriyāya. Visesoti nānattaṃ. Āṇattiniyāmakāti āṇattiṃ niyāmenti vavatthāpentīti āṇattiniyāmakā.
২৫৬. তত্থাতি তেসু আণত্তিনিযামকেসু ছসু আকারেসু। যোব্বনাদি চাতি আদি-সদ্দেন থাৰরিযমন্দখিড্ডৰুদ্ধাদিঅৰত্থাৰিসেসো সঙ্গহিতো।
256.Tatthāti tesu āṇattiniyāmakesu chasu ākāresu. Yobbanādi cāti ādi-saddena thāvariyamandakhiḍḍavuddhādiavatthāviseso saṅgahito.
২৫৭. যং মাতিকায নিদ্দিট্ঠং সত্থং, তং কতমং?। সত্তমারণন্তি সত্তে মারেন্তি এতেনাতি সত্তমারণং, অসিআদিৰধোপকরণং।
257. Yaṃ mātikāya niddiṭṭhaṃ satthaṃ, taṃ katamaṃ?. Sattamāraṇanti satte mārenti etenāti sattamāraṇaṃ, asiādivadhopakaraṇaṃ.
২৫৮. ৰিজ্ঝনন্তি উসুআদীহি ৰিজ্ঝনং। ভেদনন্তি ককচাদীহি দ্ৰিধাকরণং। ছেদনন্তি খগ্গাদীহি দ্ৰিধাকরণং। তাল়নন্তি মুগ্গরাদীহি আঘাতনং। এৰমাদিৰিধোতি এৰমাদিপ্পকারো। অনেকোতি বহুকো ভেদো। করণস্স ৰিসেসো কিরিযাৰিসেসোতি অত্থো।
258.Vijjhananti usuādīhi vijjhanaṃ. Bhedananti kakacādīhi dvidhākaraṇaṃ. Chedananti khaggādīhi dvidhākaraṇaṃ. Tāḷananti muggarādīhi āghātanaṃ. Evamādividhoti evamādippakāro. Anekoti bahuko bhedo. Karaṇassa viseso kiriyāvisesoti attho.
২৫৯-৬০. ‘‘পুরতো পহরিত্ৰান মারেহী’’তি যো ভাসিতো আণাপকেন, তেন আণত্তেন পচ্ছতো…পে॰… মারিতেতি যোজনা। ৰত্থাণত্তি ৰিসঙ্কেতাতি এত্থ ‘‘যং ‘মারেহী’তি…পে॰… ততো’’তি ৰত্থুৰিসঙ্কেতো দস্সিতো। ‘‘পুরতো…পে॰… মারিতে’’তি আণত্তিৰিসঙ্কেতো দস্সিতো। মূলট্ঠোতি আণাপকো। মূলন্তি হি পুব্বকিরিযানুরূপং আণাপনং, তত্থ ঠিতোতি মূলট্ঠো।
259-60. ‘‘Purato paharitvāna mārehī’’ti yo bhāsito āṇāpakena, tena āṇattena pacchato…pe… māriteti yojanā. Vatthāṇatti visaṅketāti ettha ‘‘yaṃ ‘mārehī’ti…pe… tato’’ti vatthuvisaṅketo dassito. ‘‘Purato…pe… mārite’’ti āṇattivisaṅketo dassito. Mūlaṭṭhoti āṇāpako. Mūlanti hi pubbakiriyānurūpaṃ āṇāpanaṃ, tattha ṭhitoti mūlaṭṭho.
২৬১. ইমিনা ৰিসঙ্কেতে আণাপকস্স অনাপত্তিং দস্সেত্ৰা সঙ্কেতে অৰিরাধিতে উভিন্নম্পি পারাজিকং দস্সেতুমাহ ‘‘ৰত্থু’’ন্তিআদি। তং ৰত্থুং অৰিরজ্ঝিত্ৰা মারিতে উভযেসং…পে॰… উদীরিতো, যথাণত্তি চ মারিতে…পে॰… উদীরিতোতি যোজনা। মারিতে ৰত্থুস্মিন্তি সামত্থিযা লব্ভতি। উভযেসন্তি আণাপকআণত্তানং। যথাকালন্তি আণাপকস্স আণত্তিক্খণং, আণত্তস্স মারণক্খণঞ্চ অনতিক্কমিত্ৰা। বন্ধনং বন্ধো, কম্মুনা বন্ধো কম্মবন্ধো। অথ ৰা বজ্ঝতি এতেনাতি বন্ধো, কম্মমেৰ বন্ধো কম্মবন্ধো।
261. Iminā visaṅkete āṇāpakassa anāpattiṃ dassetvā saṅkete avirādhite ubhinnampi pārājikaṃ dassetumāha ‘‘vatthu’’ntiādi. Taṃ vatthuṃ avirajjhitvā mārite ubhayesaṃ…pe… udīrito, yathāṇatti ca mārite…pe… udīritoti yojanā. Mārite vatthusminti sāmatthiyā labbhati. Ubhayesanti āṇāpakaāṇattānaṃ. Yathākālanti āṇāpakassa āṇattikkhaṇaṃ, āṇattassa māraṇakkhaṇañca anatikkamitvā. Bandhanaṃ bandho, kammunā bandho kammabandho. Atha vā bajjhati etenāti bandho, kammameva bandho kammabandho.
২৬৪. ৰিসঙ্কেতো নাতি ৰিসঙ্কেতো নত্থি, দ্ৰিন্নম্পি যথাকালপরিচ্ছেদং কম্মবন্ধোযেৰাতি অত্থো।
264.Visaṅketo nāti visaṅketo natthi, dvinnampi yathākālaparicchedaṃ kammabandhoyevāti attho.
২৬৫. সব্বসোতি সব্বেসু কালভেদেসু, সব্বসো ৰেদিতব্বোতি ৰা সম্বন্ধো। সব্বসোতি সব্বপ্পকারেন। ৰিভাৰিনাতি পণ্ডিতেন। সো হি অত্থং ৰিভাৰেতীতি তথা ৰুত্তো।
265.Sabbasoti sabbesu kālabhedesu, sabbaso veditabboti vā sambandho. Sabbasoti sabbappakārena. Vibhāvināti paṇḍitena. So hi atthaṃ vibhāvetīti tathā vutto.
২৬৬-৭-৮. ‘‘ইমং গামে ঠিত’’ন্তি ইদং তং সঞ্জানিতুং ৰুত্তং, ন মারণক্খণট্ঠাননিযমত্থাযাতি ‘‘যত্থ কত্থচি ঠিত’’ন্তি ৰত্ৰাপি ‘‘নত্থি তস্স ৰিসঙ্কেতো’’তি আহ। তস্সাতি আণাপকস্স। ‘‘তত্থা’’তি ৰা পাঠো, তস্সং আণত্তিযন্তি অত্থো। ‘‘গামেযেৰ ঠিতং ৰেরিং মারেহী’’তি সাৰধারণং আণত্তো ৰনে চে ঠিতং মারেতি ৰা ‘‘ৰনেযেৰ ঠিতং ৰেরিং মারেহী’’তি সাৰধারণং ৰুত্তো গামে ঠিতং চে মারেতি ৰাতি যোজনা। ‘‘ভিক্খুনা সাৰধারণ’’ন্তি চ পোত্থকেসু লিখন্তি, তং অগ্গহেত্ৰা ‘‘ৰনে ৰা সাৰধারণ’’ন্তি পাঠোযেৰ গহেতব্বো। ৰিগতো সঙ্কেতো আণত্তিনিযামো এত্থাতি ৰিসঙ্কেতো।
266-7-8.‘‘Imaṃ gāme ṭhita’’nti idaṃ taṃ sañjānituṃ vuttaṃ, na māraṇakkhaṇaṭṭhānaniyamatthāyāti ‘‘yattha katthaci ṭhita’’nti vatvāpi ‘‘natthi tassa visaṅketo’’ti āha. Tassāti āṇāpakassa. ‘‘Tatthā’’ti vā pāṭho, tassaṃ āṇattiyanti attho. ‘‘Gāmeyeva ṭhitaṃ veriṃ mārehī’’ti sāvadhāraṇaṃ āṇatto vane ce ṭhitaṃ māreti vā ‘‘vaneyeva ṭhitaṃ veriṃ mārehī’’ti sāvadhāraṇaṃ vutto gāme ṭhitaṃ ce māreti vāti yojanā. ‘‘Bhikkhunā sāvadhāraṇa’’nti ca potthakesu likhanti, taṃ aggahetvā ‘‘vane vāsāvadhāraṇa’’nti pāṭhoyeva gahetabbo. Vigato saṅketo āṇattiniyāmo etthāti visaṅketo.
২৬৯. সব্বদেসেসূতি গামৰনঅঙ্গণগেহাদীসু সব্বেসু ঠানেসু। ভেদতোতি নানত্ততো।
269.Sabbadesesūti gāmavanaaṅgaṇagehādīsu sabbesu ṭhānesu. Bhedatoti nānattato.
২৭০. ‘‘সত্থেন পন মারেহী’’তি যেন কেনচি যো আণত্তো, তেন যেন কেনচি সত্থেন মারিতে ৰিসঙ্কেতো নত্থীতি যোজনা।
270. ‘‘Satthena pana mārehī’’ti yena kenaci yo āṇatto, tena yena kenaci satthena mārite visaṅketo natthīti yojanā.
২৭১-২. ইমিনা ৰাসিনা হীতি এত্থ হীতি পদপূরণে। ‘‘ইমিনা অসিনা মারেয্যা’’তি ৰুত্তো অঞ্ঞেন অসিনা মারেতি ৰা ‘‘ত্ৰং ইমস্স অসিস্স এতায ধারায মারয’’ ইতি ৰুত্তো তং ৰেরিং সচে ইতরায ধারায মারেতি ৰা থরুনা মারেতি ৰা তুণ্ডেন মারেতি ৰা, তথা মারিতে ৰিসঙ্কেতোযেৰ হোতীতি যোজনা। থরুনাতি খগ্গমুট্ঠিনা। তুণ্ডেনাতি খগ্গতুণ্ডেন। ‘‘ৰিসঙ্কেতোৰা’’তি সঙ্কেতৰিরাধেনেৰ পারাজিকং ন হোতীতি দস্সনপদমেতং।
271-2.Iminā vāsinā hīti ettha hīti padapūraṇe. ‘‘Iminā asinā māreyyā’’ti vutto aññena asinā māreti vā ‘‘tvaṃ imassa asissa etāya dhārāya māraya’’ iti vutto taṃ veriṃ sace itarāya dhārāya māreti vā tharunā māreti vā tuṇḍena māreti vā, tathā mārite visaṅketoyeva hotīti yojanā. Tharunāti khaggamuṭṭhinā. Tuṇḍenāti khaggatuṇḍena. ‘‘Visaṅketovā’’ti saṅketavirādheneva pārājikaṃ na hotīti dassanapadametaṃ.
২৭৩. সব্বাৰুধকজাতিসূতি ইধাৰুত্তকরপালিকাছুরিকাদিসব্বপহরণসামঞ্ঞেসু। ৰিসেসতোতি ভেদতো।
273.Sabbāvudhakajātisūti idhāvuttakarapālikāchurikādisabbapaharaṇasāmaññesu. Visesatoti bhedato.
২৭৪. পরেনাতি ভিক্খুনা। সোতি আণত্তো। নিসিন্নং নং মারেতি, ৰিসঙ্কেতো ন ৰিজ্জতীতি ‘‘গচ্ছন্তমেৰ মারেহী’’তি সাৰধারণং অৰুত্তত্তা ‘‘নিসিন্নোপি সোযেৰা’’তি তং মারেন্তস্স ৰিসঙ্কেতো ন হোতি, অৰধারণং অন্তরেন কথনং তং সঞ্জানাপেতুং ৰুচ্চতীতি ইরিযাপথনিযামকং ন হোতীতি অধিপ্পাযো।
274.Parenāti bhikkhunā. Soti āṇatto. Nisinnaṃ naṃ māreti, visaṅketo na vijjatīti ‘‘gacchantameva mārehī’’ti sāvadhāraṇaṃ avuttattā ‘‘nisinnopi soyevā’’ti taṃ mārentassa visaṅketo na hoti, avadhāraṇaṃ antarena kathanaṃ taṃ sañjānāpetuṃ vuccatīti iriyāpathaniyāmakaṃ na hotīti adhippāyo.
২৭৫-৬. অসতি সাৰধারণে ৰিসঙ্কেতাভাৰং দস্সেত্ৰা ইদানি সাৰধারণে ইরিযাপথন্তরেসু ৰিসঙ্কেতং দস্সেতুমাহ ‘‘নিসিন্নংযেৰা’’তিআদি। ‘‘নিসিন্নংযেৰ মারেহী’’তি ৰুত্তো গচ্ছন্তং মারেতি, ৰিসঙ্কেতন্তি ঞাতব্বং। ‘‘গচ্ছন্তংযেৰ মারেহী’’তি ৰুত্তো নিসিন্নং মারেতি, ৰিসঙ্কেতন্তি ঞাতব্বন্তি যোজনা। ইমমেৰ যোজনাক্কমং সন্ধাযাহ ‘‘যথাক্কম’’ন্তি।
275-6. Asati sāvadhāraṇe visaṅketābhāvaṃ dassetvā idāni sāvadhāraṇe iriyāpathantaresu visaṅketaṃ dassetumāha ‘‘nisinnaṃyevā’’tiādi. ‘‘Nisinnaṃyeva mārehī’’ti vutto gacchantaṃ māreti, visaṅketanti ñātabbaṃ. ‘‘Gacchantaṃyeva mārehī’’ti vutto nisinnaṃ māreti, visaṅketanti ñātabbanti yojanā. Imameva yojanākkamaṃ sandhāyāha ‘‘yathākkama’’nti.
২৭৭. ৰিজ্ঝিত্ৰাতি সরাদীহি ৰিজ্ঝিত্ৰা।
277.Vijjhitvāti sarādīhi vijjhitvā.
২৭৮. ছিন্দিত্ৰাতি অসিআদীহি ছিন্দিত্ৰা। পুন সোতি পযোগো।
278.Chinditvāti asiādīhi chinditvā. Puna soti payogo.
২৭৯. করণেসূতি ৰিজ্ঝনাদিকিরিযাৰিসেসেসু।
279.Karaṇesūti vijjhanādikiriyāvisesesu.
২৮০-১. এত্তাৰতা আণত্তিনিযামকনিদ্দেসং দস্সেত্ৰা ইদানি দীঘাদিলিঙ্গৰসেনাপি সম্ভৰন্তং ৰিসঙ্কেতং দস্সেতুমাহ ‘‘দীঘ’’ন্তিআদি। ‘‘দীঘং…পে॰… থূলং মারেহীতি অনিযমেত্ৰা আণাপেতী’’তি (পারা॰ অট্ঠ॰ ২.১৭৪) অট্ঠকথাৰচনতো এৰ-কারং ৰিনা ‘‘দীঘং মারেহী’’তি অনিযমেত্ৰা কেনচি যো আণত্তো হোতি, সোপি আণত্তো যং কিঞ্চি তাদিসং সচে মারেতি, নত্থি তত্থ ৰিসঙ্কেতো, উভিন্নম্পি পরাজযোতি যোজনা। এৰং ‘‘রস্স’’ন্তিআদিসব্বপদেহিপি পচ্চেকং যোজনা কাতব্বা। অনিযমেত্ৰাতি ৰিসঙ্কেতাভাৰস্স হেতুদস্সনং। এৰকারো ৰাক্যালঙ্কারো। তত্থাতি আণত্তিকপ্পযোগে। ‘‘উভিন্নম্পি পরাজযো’’তি ৰুত্তত্তা আণাপকং ৰিনা অঞ্ঞং যথাৰুত্তক্খণং মনুস্সৰিগ্গহং ‘‘যং কিঞ্চি তাদিস’’ন্তি ইমিনা দস্সেতি।
280-1. Ettāvatā āṇattiniyāmakaniddesaṃ dassetvā idāni dīghādiliṅgavasenāpi sambhavantaṃ visaṅketaṃ dassetumāha ‘‘dīgha’’ntiādi. ‘‘Dīghaṃ…pe… thūlaṃ mārehīti aniyametvā āṇāpetī’’ti (pārā. aṭṭha. 2.174) aṭṭhakathāvacanato eva-kāraṃ vinā ‘‘dīghaṃ mārehī’’ti aniyametvā kenaci yo āṇatto hoti, sopi āṇatto yaṃ kiñci tādisaṃ sace māreti, natthi tattha visaṅketo, ubhinnampi parājayoti yojanā. Evaṃ ‘‘rassa’’ntiādisabbapadehipi paccekaṃ yojanā kātabbā. Aniyametvāti visaṅketābhāvassa hetudassanaṃ. Evakāro vākyālaṅkāro. Tatthāti āṇattikappayoge. ‘‘Ubhinnampi parājayo’’ti vuttattā āṇāpakaṃ vinā aññaṃ yathāvuttakkhaṇaṃ manussaviggahaṃ ‘‘yaṃ kiñci tādisa’’nti iminā dasseti.
সচে আণাপকো আণাপেত্ৰা অত্তানমেৰ মারেতি, আণাপকো দুক্কটং আপজ্জিত্ৰা মরতি, আণত্তস্স পারাজিকং। আণাপকেন অত্তানমুদ্দিস্স আণত্তিযা কতায আণত্তো অজানিত্ৰা তাদিসং অঞ্ঞং মারেতি, ওকাসস্স অনিযমিতত্তা আণাপকো মুচ্চতি, ইতরো কম্মুনা বজ্ঝতি। যদি ‘‘অমুকস্মিং রত্তিট্ঠানে ৰা দিৰাট্ঠানে ৰা নিসিন্নং ঈদিসং মারেহী’’তি ওকাসং নিযমেত্ৰা আণাপেতি, তত্থ আণাপকতো অঞ্ঞস্মিং মারিতে উভিন্নম্পি পারাজিকং। ততো বহি মারিতে ৰধকস্সেৰ কম্মবন্ধো। আণাপকো অত্তানমেৰ উদ্দিস্স আণাপেতি, ইতরো চ তমেৰ তত্থ মারেতি, আণাপকস্স দুক্কটং, আণত্তস্স পারাজিকং। সচে অঞ্ঞত্থ মারেতি, মূলট্ঠো মুচ্চতি। অজানিত্ৰা অঞ্ঞং তত্থ ৰা অঞ্ঞত্থ ৰা মারেতি, ৰধকো পারাজিকং আপজ্জতি, মূলট্ঠো মুচ্চতি। আনন্তরিযৰত্থুম্হি আনন্তরিযেন সদ্ধিং যোজেতব্বং।
Sace āṇāpako āṇāpetvā attānameva māreti, āṇāpako dukkaṭaṃ āpajjitvā marati, āṇattassa pārājikaṃ. Āṇāpakena attānamuddissa āṇattiyā katāya āṇatto ajānitvā tādisaṃ aññaṃ māreti, okāsassa aniyamitattā āṇāpako muccati, itaro kammunā bajjhati. Yadi ‘‘amukasmiṃ rattiṭṭhāne vā divāṭṭhāne vā nisinnaṃ īdisaṃ mārehī’’ti okāsaṃ niyametvā āṇāpeti, tattha āṇāpakato aññasmiṃ mārite ubhinnampi pārājikaṃ. Tato bahi mārite vadhakasseva kammabandho. Āṇāpako attānameva uddissa āṇāpeti, itaro ca tameva tattha māreti, āṇāpakassa dukkaṭaṃ, āṇattassa pārājikaṃ. Sace aññattha māreti, mūlaṭṭho muccati. Ajānitvā aññaṃ tattha vā aññattha vā māreti, vadhako pārājikaṃ āpajjati, mūlaṭṭho muccati. Ānantariyavatthumhi ānantariyena saddhiṃ yojetabbaṃ.
২৮২. যো মনুস্সং কঞ্চি উদ্দিস্স সচে ওপাতং খণতি, তথা ওপাতং খণন্তস্স তস্স দুক্কটং নাম আপত্তি হোতীতি অজ্ঝাহারযোজনা। যোজনা চ নামেসা যথারুতযোজনা, অজ্ঝাহারযোজনাতি দুৰিধা। তত্থ পাঠাগতপদানমেৰ যোজনা যথারুতযোজনা, ঊনপূরণত্থমজ্ঝাহারপদেহি সহ পাঠাগতপদানং যোজনা অজ্ঝাহারযোজনাতি ৰেদিতব্বা। ‘‘খণন্তস্স চ ওপাত’’ন্তি পোত্থকেসু পাঠো দিস্সতি। ‘‘খণন্তস্স তথোপাত’ন্তি পাঠো সুন্দরো’’তি নিস্সন্দেহে ৰুত্তং। ‘‘আৰাটন্তি এতস্স ‘ওপাত’ন্তি পরিযাযো’’তি চ ৰুত্তং। ততোপি –
282. Yo manussaṃ kañci uddissa sace opātaṃ khaṇati, tathā opātaṃ khaṇantassa tassa dukkaṭaṃ nāma āpatti hotīti ajjhāhārayojanā. Yojanā ca nāmesā yathārutayojanā, ajjhāhārayojanāti duvidhā. Tattha pāṭhāgatapadānameva yojanā yathārutayojanā, ūnapūraṇatthamajjhāhārapadehi saha pāṭhāgatapadānaṃ yojanā ajjhāhārayojanāti veditabbā. ‘‘Khaṇantassaca opāta’’nti potthakesu pāṭho dissati. ‘‘Khaṇantassa tathopāta’nti pāṭho sundaro’’ti nissandehe vuttaṃ. ‘‘Āvāṭanti etassa ‘opāta’nti pariyāyo’’ti ca vuttaṃ. Tatopi –
‘‘মনুস্সং কঞ্চি উদ্দিস্স।
‘‘Manussaṃ kañci uddissa;
যো চে খণতিৰাটকং।
Yo ce khaṇativāṭakaṃ;
খণতো তং তথা তস্স।
Khaṇato taṃ tathā tassa;
হোতি আপত্তি দুক্কট’’ন্তি॥ –
Hoti āpatti dukkaṭa’’nti. –
পাঠো সুন্দরতরো। জাতপথৰিং খণন্তস্স পারাজিকপযোগত্তা পযোগগণনায দুক্কটং।
Pāṭho sundarataro. Jātapathaviṃ khaṇantassa pārājikapayogattā payogagaṇanāya dukkaṭaṃ.
২৮৩. তত্থাতি তস্মিং আৰাটে। তস্সাতি পতিতস্স মনুস্সৰিগ্গহস্স। দুক্খস্সুপ্পত্তিযাতি দুক্খুপ্পত্তিহেতু। তস্সাতি যেন আৰাটো খতো, তস্স ভিক্খুনো। পতিত্ৰা সো চে মরতি, তস্মিং মতে তস্স ভিক্খুনো পারাজিকং ভৰেতি যোজনা।
283.Tatthāti tasmiṃ āvāṭe. Tassāti patitassa manussaviggahassa. Dukkhassuppattiyāti dukkhuppattihetu. Tassāti yena āvāṭo khato, tassa bhikkhuno. Patitvā so ce marati, tasmiṃ mate tassa bhikkhuno pārājikaṃ bhaveti yojanā.
২৮৪. অঞ্ঞস্মিন্তি যং সমুদ্দিস্স আৰাটো খতো, ততো অঞ্ঞস্মিং। অনুদ্দিস্সকন্তি কিরিযাৰিসেসনং, অনুদ্দিস্সকং কত্ৰাতি অত্থো। ওপাতৰিসেসনং চে, ‘‘অনুদ্দিস্সকো ওপাতো’’তি পদচ্ছেদো। ‘‘অগ্গমক্খাযতী’’তিআদীসু (সং॰ নি॰ ৫.১৩৯; অ॰ নি॰ ৪.৩৪; ১০.১৫; ইতিৰু॰ ৯০; নেত্তি॰ ১৭০) ৰিয ও-কারট্ঠানে অ-কারো, ম-কারাগমো চ দট্ঠব্বো, অনোদিস্সকো ওপাতো খতো হোতীতি অত্থো।
284.Aññasminti yaṃ samuddissa āvāṭo khato, tato aññasmiṃ. Anuddissakanti kiriyāvisesanaṃ, anuddissakaṃ katvāti attho. Opātavisesanaṃ ce, ‘‘anuddissako opāto’’ti padacchedo. ‘‘Aggamakkhāyatī’’tiādīsu (saṃ. ni. 5.139; a. ni. 4.34; 10.15; itivu. 90; netti. 170) viya o-kāraṭṭhāne a-kāro, ma-kārāgamo ca daṭṭhabbo, anodissako opāto khato hotīti attho.
২৮৫. ‘‘এত্থ পতিত্ৰা যো কোচি মরতূ’’তি অনোদিস্সকো ওপাতো সচে খতো হোতি, যত্তকা নিপতিত্ৰা মরন্তি চে, অস্স তত্তকা দোসা হোন্তীতি যোজনা। ‘‘যো কোচী’’তি ইমিনা অত্তনো মাতাপিতরো চ সঙ্গহিতা। দোসাতি কম্মবন্ধদোসা, পারাজিকং পন একমেৰ। অস্সাতি যেন অনোদিস্স ওপাতো খতো, তস্স।
285. ‘‘Ettha patitvā yo koci maratū’’ti anodissako opāto sace khato hoti, yattakā nipatitvā maranti ce, assa tattakā dosā hontīti yojanā. ‘‘Yo kocī’’ti iminā attano mātāpitaro ca saṅgahitā. Dosāti kammabandhadosā, pārājikaṃ pana ekameva. Assāti yena anodissa opāto khato, tassa.
২৮৬. আনন্তরিযৰত্থুস্মিং মতেতি পাঠসেসো, ‘‘তত্থ পতিত্ৰা’’তি অধিকারো, অরহন্তে, মাতরি, পিতরি চ তস্মিং পতিত্ৰা মতে কালকতেতি অত্থো। আনন্তরিযকন্তি এত্থ সকত্থে, কুচ্ছিতে , সঞ্ঞাযং ৰা ক-পচ্চযো দট্ঠব্বো। ‘‘তথা’’তি ইমিনা ‘‘আনন্তরিযৰত্থুস্মি’’ন্তি ইমস্মিং সমাসপদে অৰযৰভূতম্পি ‘‘ৰত্থুস্মি’’ন্তি ইদঞ্চ ‘‘তত্থ পতিত্ৰা মতে’’তি ইদঞ্চ আকড্ঢতি। থুল্লচ্চযাদীনং ৰত্থুস্মিং তত্থ পতিত্ৰা মতে থুল্লচ্চযাদযো হোন্তীতি যোজনা। তস্মিং আৰাটে পতিত্ৰা যক্খাদীসু মতেসু, পারাজিকৰত্থুনো দুক্খুপ্পত্তিযঞ্চ থুল্লচ্চযং, মনুস্সৰিগ্গহে মতে পারাজিকং, তিরচ্ছানে মতে পাচিত্তিযন্তি ৰুত্তং হোতি।
286.Ānantariyavatthusmiṃ mateti pāṭhaseso, ‘‘tattha patitvā’’ti adhikāro, arahante, mātari, pitari ca tasmiṃ patitvā mate kālakateti attho. Ānantariyakanti ettha sakatthe, kucchite , saññāyaṃ vā ka-paccayo daṭṭhabbo. ‘‘Tathā’’ti iminā ‘‘ānantariyavatthusmi’’nti imasmiṃ samāsapade avayavabhūtampi ‘‘vatthusmi’’nti idañca ‘‘tattha patitvā mate’’ti idañca ākaḍḍhati. Thullaccayādīnaṃ vatthusmiṃ tattha patitvā mate thullaccayādayo hontīti yojanā. Tasmiṃ āvāṭe patitvā yakkhādīsu matesu, pārājikavatthuno dukkhuppattiyañca thullaccayaṃ, manussaviggahe mate pārājikaṃ, tiracchāne mate pācittiyanti vuttaṃ hoti.
২৮৭. পাণাতিপাতা দ্ৰেতি দ্ৰিন্নং মতত্তা দ্ৰে পাণাতিপাতা, একেন পারাজিকং, ইতরেন কম্মবন্ধোযেৰ। একোৰেকেকধংসনেতি মাতু ৰা দারকস্স ৰা মরণে একো পাণাতিপাতোৰ।
287.Pāṇātipātā dveti dvinnaṃ matattā dve pāṇātipātā, ekena pārājikaṃ, itarena kammabandhoyeva. Ekovekekadhaṃsaneti mātu vā dārakassa vā maraṇe eko pāṇātipātova.
২৮৮. চোরেহি অনুবদ্ধো এত্থ আৰাটে পতিত্ৰা মরিস্সতি চে, ওপাতখণকস্সেৰ পারাজিকং হোতি কিরাতি যোজনা। কিরাতি অনুস্সৰনে অরুচিসূচকং।
288. Corehi anubaddho ettha āvāṭe patitvā marissati ce, opātakhaṇakasseva pārājikaṃ hoti kirāti yojanā. Kirāti anussavane arucisūcakaṃ.
২৮৯-৯০. ৰেরিনো ভিক্খুতো অঞ্ঞে ৰেরিপুগ্গলা। তত্থ তস্মিং ওপাতে সচে মনুস্সং পাতেত্ৰা মারেন্তি, তথা ৰেরিনো তত্থ সযমেৰ পতিতং মনুস্সং বহি নীহরিত্ৰা সচে মারেন্তি, তত্থ ওপপাতিকা মনুস্সা ওপাতে নিব্বত্তিত্ৰা ততো নিক্খন্তুং অসক্কোন্তা মতা চে সিযুং, সব্বত্থ চ যথাৰুত্তসব্বৰারেসু ওপাতখণকস্সেৰ পরাজযোতি যোজনা। নিব্বত্তিত্ৰা হীতি এত্থ হীতি পদপূরণে। যত্থ যত্থ নিপাতসদ্দানং অত্থো ন দস্সিতো, তত্থ তত্থ পদপূরণমত্ততা ৰেদিতব্বা।
289-90.Verino bhikkhuto aññe veripuggalā. Tattha tasmiṃ opāte sace manussaṃ pātetvā mārenti, tathā verino tattha sayameva patitaṃ manussaṃ bahi nīharitvā sace mārenti, tattha opapātikā manussā opāte nibbattitvā tato nikkhantuṃ asakkontā matā ce siyuṃ, sabbattha ca yathāvuttasabbavāresu opātakhaṇakasseva parājayoti yojanā. Nibbattitvā hīti ettha hīti padapūraṇe. Yattha yattha nipātasaddānaṃ attho na dassito, tattha tattha padapūraṇamattatā veditabbā.
২৯১. যক্খাদযোতি আদি-সদ্দেন তিরচ্ছানানং সঙ্গহো। ৰত্থুৰসাতি থুল্লচ্চযপাচিত্তিযানং ৰত্থুভূতযক্খতিরচ্ছানানং ৰসা। থুল্লচ্চযাদযোতি আদি-সদ্দেন পাচিত্তিযসঙ্গহো।
291.Yakkhādayoti ādi-saddena tiracchānānaṃ saṅgaho. Vatthuvasāti thullaccayapācittiyānaṃ vatthubhūtayakkhatiracchānānaṃ vasā. Thullaccayādayoti ādi-saddena pācittiyasaṅgaho.
২৯৩. অযং নযোতি ‘‘অনাপত্তী’’তি যথাৰুত্তো নযো।
293.Ayaṃnayoti ‘‘anāpattī’’ti yathāvutto nayo.
২৯৪-৫. বজ্ঝন্তীতি সচে অৰস্সং বজ্ঝন্তি। তত্থাতি তস্মিং পাসে। ‘‘হত্থতো মুত্তমত্তস্মি’’ন্তি ইমিনা পযোগস্স অত্থসাধকতং দীপেতি।
294-5.Bajjhantīti sace avassaṃ bajjhanti. Tatthāti tasmiṃ pāse. ‘‘Hatthato muttamattasmi’’nti iminā payogassa atthasādhakataṃ dīpeti.
২৯৬. যং পন উদ্দিস্স পাসো ওড্ডিতো, ততো অঞ্ঞস্স বন্ধনে তু অনাপত্তি পকাসিতাতি যোজনা।
296. Yaṃ pana uddissa pāso oḍḍito, tato aññassa bandhane tu anāpatti pakāsitāti yojanā.
২৯৭. মুধা ৰাপীতি অমূলেন ৰাপি। মূলট্ঠস্সেৰাতি পাসকারকস্সেৰ। কম্মবন্ধোতি পাণাতিপাতো। বজ্ঝতি এতেনাতি বন্ধো, কম্মমেৰ বন্ধো কম্মবন্ধো। পারাজিকমত্তে ৰত্তব্বেপি যাৰ সো ৰত্ততি, তাৰ তত্থ বজ্ঝিত্ৰা মতসত্তেসু পঠমমতস্স ৰসেন পারাজিকং, অৰসেসানং পাণাতিপাতসঙ্খাতস্স অকুসলরাসিনো সম্ভৰতো তং সব্বং সঙ্গহেত্ৰা সামঞ্ঞেন দ্ৰযম্পি দস্সেতুমাহ ‘‘কম্মবন্ধো’’তি।
297.Mudhā vāpīti amūlena vāpi. Mūlaṭṭhassevāti pāsakārakasseva. Kammabandhoti pāṇātipāto. Bajjhati etenāti bandho, kammameva bandho kammabandho. Pārājikamatte vattabbepi yāva so vattati, tāva tattha bajjhitvā matasattesu paṭhamamatassa vasena pārājikaṃ, avasesānaṃ pāṇātipātasaṅkhātassa akusalarāsino sambhavato taṃ sabbaṃ saṅgahetvā sāmaññena dvayampi dassetumāha ‘‘kammabandho’’ti.
২৯৮. ‘‘সচে যেন লদ্ধো, সো উগ্গল়িতং ৰা পাসং সণ্ঠপেতি, তস্স পস্সেন ৰা গচ্ছন্তে দিস্ৰা ৰতিং কত্ৰা সম্মুখে পৰেসেতি, থদ্ধতরং ৰা পাসযট্ঠিং ঠপেতি, দল়্হতরং ৰা পাসরজ্জুং বন্ধতি, থিরতরং ৰা খাণুকং আকোটেতী’’তি (পারা॰ অট্ঠ॰ ২.১৭৬) অট্ঠকথাগতং ৰিনিচ্ছযং সঙ্গহিতুমাহ ‘‘পাসমুগ্গল়িতম্পি ৰা’’তি। এত্থ অৰুত্তসমুচ্চযত্থেন পি-সদ্দেন ‘‘সণ্ঠপেতী’’তিআদিকা ‘‘বন্ধতী’’তি দস্সিতকিরিযাৰসানা পযোগা দস্সিতা। থিরং ৰাপীতি এত্থ অপি-সদ্দো অট্ঠকথায অৰসিট্ঠং ‘‘খাণুকং আকোটেতী’’তি কিরিযং সমুচ্চিনোতি উভযত্থপি পকারন্তরৰিকপ্পত্থত্তাতি গহেতব্বা। এৰন্তি এৰং সতি। যেন পাসো লদ্ধো, তেনাপি এৰং পাসে কতৰিসেসে সতীতি ৰুত্তং হোতি। উভিন্নন্তি পাসকারকস্স চ ইদানি লভিত্ৰা পটিজগ্গন্তস্স চাতি উভযেসং।
298. ‘‘Sace yena laddho, so uggaḷitaṃ vā pāsaṃ saṇṭhapeti, tassa passena vā gacchante disvā vatiṃ katvā sammukhe paveseti, thaddhataraṃ vā pāsayaṭṭhiṃ ṭhapeti, daḷhataraṃ vā pāsarajjuṃ bandhati, thirataraṃ vā khāṇukaṃ ākoṭetī’’ti (pārā. aṭṭha. 2.176) aṭṭhakathāgataṃ vinicchayaṃ saṅgahitumāha ‘‘pāsamuggaḷitampi vā’’ti. Ettha avuttasamuccayatthena pi-saddena ‘‘saṇṭhapetī’’tiādikā ‘‘bandhatī’’ti dassitakiriyāvasānā payogā dassitā. Thiraṃ vāpīti ettha api-saddo aṭṭhakathāya avasiṭṭhaṃ ‘‘khāṇukaṃ ākoṭetī’’ti kiriyaṃ samuccinoti ubhayatthapi pakārantaravikappatthattāti gahetabbā. Evanti evaṃ sati. Yena pāso laddho, tenāpi evaṃ pāse katavisese satīti vuttaṃ hoti. Ubhinnanti pāsakārakassa ca idāni labhitvā paṭijaggantassa cāti ubhayesaṃ.
২৯৯-৩০০. যোতি পাসকারকো, লদ্ধপাসকোতি ইমেসং যো কোচি। উগ্গল়াপেত্ৰাতি ৰিঘাটেত্ৰা, যথা তত্থ পাণিনো ন বজ্ঝন্তি, এৰং কত্ৰাতি অত্থো। তত্থ চাতি পুন সণ্ঠপিতে পাসে চ। কো ৰিমুচ্চতি? যেন লদ্ধো, সো।
299-300.Yoti pāsakārako, laddhapāsakoti imesaṃ yo koci. Uggaḷāpetvāti vighāṭetvā, yathā tattha pāṇino na bajjhanti, evaṃ katvāti attho. Tattha cāti puna saṇṭhapite pāse ca. Ko vimuccati? Yena laddho, so.
৩০১-২. গোপেত্ৰাতি গোপনহেতু মোক্খো ন হোতীতি যোজনা। ‘‘সীহং দিস্ৰা ভযং হোতী’’তিআদীসু ৰিয হেতুম্হি ত্ৰা-পচ্চযো দট্ঠব্বো। তমঞ্ঞো…পে॰… ন চ মুচ্চতীতি এত্থ ন চাতি নেৰ। নাসেত্ৰা সব্বসো ৰাতি সো যথা যস্স কস্সচি সত্তস্স ৰিনাসোপকরণং ন হোতি, তথা ছিন্দনাদীহি নাসেত্ৰা। তং পাসযট্ঠিং। কো ৰিমুচ্চতি? পাসকারকো।
301-2.Gopetvāti gopanahetu mokkho na hotīti yojanā. ‘‘Sīhaṃ disvā bhayaṃ hotī’’tiādīsu viya hetumhi tvā-paccayo daṭṭhabbo. Tamañño…pe… na ca muccatīti ettha na cāti neva. Nāsetvā sabbaso vāti so yathā yassa kassaci sattassa vināsopakaraṇaṃ na hoti, tathā chindanādīhi nāsetvā. Taṃ pāsayaṭṭhiṃ. Ko vimuccati? Pāsakārako.
৩০৩. সূলং রোপেন্তস্সাতি সূলং নিখণন্তস্স। সজ্জেন্তস্সাতি সণ্ঠপেন্তস্স।
303.Sūlaṃropentassāti sūlaṃ nikhaṇantassa. Sajjentassāti saṇṭhapentassa.
৩০৪. অসঞ্চিচ্চাতি এত্থ ‘‘কতেন পযোগেনা’’তি পাঠসেসো, ‘‘মতেপি অনাপত্তী’’তি এতেহি সম্বন্ধো। ‘‘ইমিনাহং উপক্কমেন ইমং মারেস্সামী’’তি অচেতেত্ৰা অপকপ্পেত্ৰা অৰধকচেতনো হুত্ৰা কতেন অঞ্ঞত্থিকেনপি উপক্কমেন পরে মতেপি আপত্তি নত্থীতি অত্থো, মুসলুস্সাপনাদিৰত্থূসু (পারা॰ ১৮০) ৰিয অযং সত্তোতিসঞ্ঞী হুত্ৰা ‘‘ইমিনা উপক্কমেন ইমং মারেস্সামী’’তি ৰীতিক্কমসমুট্ঠাপকচেতনাসম্পযুত্তৰিকপ্পরহিতো হুত্ৰা অঞ্ঞত্থিকেন পযোগেন মনুস্সে মতেপি পারাজিকং নত্থীতি ৰুত্তং হোতি।
304.Asañciccāti ettha ‘‘katena payogenā’’ti pāṭhaseso, ‘‘matepi anāpattī’’ti etehi sambandho. ‘‘Imināhaṃ upakkamena imaṃ māressāmī’’ti acetetvā apakappetvā avadhakacetano hutvā katena aññatthikenapi upakkamena pare matepi āpatti natthīti attho, musalussāpanādivatthūsu (pārā. 180) viya ayaṃ sattotisaññī hutvā ‘‘iminā upakkamena imaṃ māressāmī’’ti vītikkamasamuṭṭhāpakacetanāsampayuttavikapparahito hutvā aññatthikena payogena manusse matepi pārājikaṃ natthīti vuttaṃ hoti.
অজানন্তস্সাতি ‘‘ইমিনা অযং মরিস্সতী’’তি অজানন্তস্স উপক্কমেন পরে মতেপি অনাপত্তি, ৰিসগতপিণ্ডপাতৰত্থুম্হি (পারা॰ ১৮১) ৰিয ‘‘ইদং কারণ’’ন্তি অজানিত্ৰা কতেন মনুস্সে মতেপি অনাপত্তীতি ৰুত্তং হোতি। ‘‘তথা’’তি ইমিনা ‘‘অনাপত্তী’’তি আকড্ঢতি। অমরণচিত্তস্স অমরণিচ্ছাসহিতচিত্তস্স উপক্কমেন পরে মতেপি অনাপত্তি ৰুদ্ধপব্বজিতাদিৰত্থূসু (পারা॰ ১৮০) ৰিযাতি অত্থো। উম্মত্তকাদযো ৰুত্তসরূপাযেৰ।
Ajānantassāti ‘‘iminā ayaṃ marissatī’’ti ajānantassa upakkamena pare matepi anāpatti, visagatapiṇḍapātavatthumhi (pārā. 181) viya ‘‘idaṃ kāraṇa’’nti ajānitvā katena manusse matepi anāpattīti vuttaṃ hoti. ‘‘Tathā’’ti iminā ‘‘anāpattī’’ti ākaḍḍhati. Amaraṇacittassa amaraṇicchāsahitacittassa upakkamena pare matepi anāpatti vuddhapabbajitādivatthūsu (pārā. 180) viyāti attho. Ummattakādayo vuttasarūpāyeva.
৩০৫. ‘‘মনুস্সপাণিম্হী’’তি ইমিনা মনুস্সভাৰো অঙ্গভাৰেন দস্সিতো। ‘‘সচস্স চিত্তং মরণূপসংহিত’’ন্তি ইমিনা মরণূপসংহিতচিত্ততা দস্সিতা।
305.‘‘Manussapāṇimhī’’ti iminā manussabhāvo aṅgabhāvena dassito. ‘‘Sacassa cittaṃ maraṇūpasaṃhita’’nti iminā maraṇūpasaṃhitacittatā dassitā.
ইতি ৰিনযত্থসারসন্দীপনিযা
Iti vinayatthasārasandīpaniyā
ৰিনযৰিনিচ্ছযৰণ্ণনায
Vinayavinicchayavaṇṇanāya
ততিযপারাজিককথাৰণ্ণনা নিট্ঠিতা।
Tatiyapārājikakathāvaṇṇanā niṭṭhitā.
