| Library / Tipiṭaka / д̇ибидага • Tipiṭaka / винаяавинижчаяа-дийгаа • Vinayavinicchaya-ṭīkā |
д̇ад̇ияабаарааж̇игагат̇ааван̣н̣анаа
Tatiyapārājikakathāvaṇṇanā
241-2. звамад̇исукуманаяасамаагулам̣ д̣̇уд̇ияабаарааж̇игам̣ д̣̇ассзд̇ваа ид̣̇аани д̇ад̇ияабаарааж̇игам̣ д̣̇ассзд̇умааха ‘‘мануссаж̇аад̇и’’нд̇иаад̣̇и. д̇ад̇т̇а мануссаж̇аад̇инд̇и ж̇ааяад̇ийд̇и ж̇аад̇и, руубааруубабадисанд̇хи, мануссзсу ж̇аад̇и яасса со мануссаж̇аад̇и, мануссаж̇аад̇иго мануссавиг̇г̇аход̇и вуд̇д̇ам̣ ход̇и, д̇ам̣ мануссаж̇аад̇им̣.
241-2. Evamatisukhumanayasamākulaṃ dutiyapārājikaṃ dassetvā idāni tatiyapārājikaṃ dassetumāha ‘‘manussajāti’’ntiādi. Tattha manussajātinti jāyatīti jāti, rūpārūpapaṭisandhi, manussesu jāti yassa so manussajāti, manussajātiko manussaviggahoti vuttaṃ hoti, taṃ manussajātiṃ.
зд̇т̇а жа мануссзсууд̇и гусалаагусаламанасса уссаннад̇д̇аа мануссасан̇каад̇зсу нарзсу. ‘‘яам̣ маад̇угужчисмим̣ батамам̣ жид̇д̇ам̣ уббанна’’нд̇и (баараа. 172) бад̣̇абхааж̇анз вуд̇д̇анаязна маад̇угужчимхи батамам̣ уббаж̇ж̇амаанабадисанд̇хижид̇д̇ан̃жа д̇ам̣самбаяуд̇д̇авзд̣̇анаасан̃н̃аасан̇каарасан̇каад̇аканд̇хад̇д̇аяан̃жа д̇ам̣сахаж̇аад̇аани –
Ettha ca manussesūti kusalākusalamanassa ussannattā manussasaṅkhātesu naresu. ‘‘Yaṃ mātukucchismiṃ paṭhamaṃ cittaṃ uppanna’’nti (pārā. 172) padabhājane vuttanayena mātukucchimhi paṭhamaṃ uppajjamānapaṭisandhicittañca taṃsampayuttavedanāsaññāsaṅkhārasaṅkhātakhandhattayañca taṃsahajātāni –
‘‘д̇илад̇зласса яат̇аа б̣инд̣̇у, саббиман̣д̣о анаавило;
‘‘Tilatelassa yathā bindu, sappimaṇḍo anāvilo;
звам̣ ван̣н̣аббадибхааг̇ам̣, ‘галала’нд̇и бавужжад̇ий’’д̇и. (баараа. адта. 2.172; вибха. адта. 26) –
Evaṃ vaṇṇappaṭibhāgaṃ, ‘kalala’nti pavuccatī’’ti. (pārā. aṭṭha. 2.172; vibha. aṭṭha. 26) –
вуд̇д̇аани ж̇аад̇иун̣н̣ам̣сумхи басаннад̇илад̇злз ваа саббиман̣д̣з ваа од̇аарзд̇ваа угкибид̇ваа вид̇хунид̇з аг̇г̇з ламб̣амаанаб̣инд̣̇уббамаан̣агалаласан̇каад̇аани сабхаавагаанам̣ гааяабхаававад̇т̇уд̣̇асагавасзна д̇им̣са руубаани жа абхаавагаанам̣ гааяавад̇т̇уд̣̇асагавасзна вийсад̇и руубаани жаад̇и аяам̣ наамаруубабадисанд̇хи ид̇ха ‘‘ж̇аад̇ий’’д̇и г̇ахид̇аа. ‘‘яассаа’’д̇и иминаа ан̃н̃абад̣̇зна ‘‘яаава маран̣агаалаа зд̇т̇анд̇арз зсо мануссавиг̇г̇ахо наамаа’’д̇и (баараа. 172) бад̣̇абхааж̇анз вуд̇д̇анаязна батамабхаван̇г̇ад̇о бадтааяа жуд̇ижид̇д̇аасаннабхаван̇г̇абарияанд̇асанд̇аанасан̇каад̇асад̇д̇о г̇ахид̇о. иминаа мануссавиг̇г̇ахасса бадисанд̇хид̇о бадтааяа баарааж̇игавад̇т̇убхаавам̣ д̣̇ассзд̇и.
Vuttāni jātiuṇṇaṃsumhi pasannatilatele vā sappimaṇḍe vā otāretvā ukkhipitvā vidhunite agge lambamānabinduppamāṇakalalasaṅkhātāni sabhāvakānaṃ kāyabhāvavatthudasakavasena tiṃsa rūpāni ca abhāvakānaṃ kāyavatthudasakavasena vīsati rūpāni cāti ayaṃ nāmarūpapaṭisandhi idha ‘‘jātī’’ti gahitā. ‘‘Yassā’’ti iminā aññapadena ‘‘yāva maraṇakālā etthantare eso manussaviggaho nāmā’’ti (pārā. 172) padabhājane vuttanayena paṭhamabhavaṅgato paṭṭhāya cuticittāsannabhavaṅgapariyantasantānasaṅkhātasatto gahito. Iminā manussaviggahassa paṭisandhito paṭṭhāya pārājikavatthubhāvaṃ dasseti.
ж̇аананд̇од̇и ‘‘сад̇д̇о аяа’’нд̇и ж̇аананд̇о. ж̇ийвид̇аа яо вияож̇аязд̇и яо бхигку ж̇ийвид̇инд̣̇рияаа вияож̇зяяа воробзяяа, д̇асса ж̇ийвид̇инд̣̇рияам̣ убажчинд̣̇зяяа убарод̇хзяяаад̇и вуд̇д̇ам̣ ход̇и. д̇знааха бад̣̇абхааж̇анз ‘‘ж̇ийвид̇аа воробзяяаад̇и ж̇ийвид̇инд̣̇рияам̣ убажчинд̣̇ад̇и убарод̇хзд̇ий’’д̇и (баараа. 172).
Jānantoti ‘‘satto aya’’nti jānanto. Jīvitā yo viyojayeti yo bhikkhu jīvitindriyā viyojeyya voropeyya, tassa jīvitindriyaṃ upacchindeyya uparodheyyāti vuttaṃ hoti. Tenāha padabhājane ‘‘jīvitā voropeyyāti jīvitindriyaṃ upacchindati uparodhetī’’ti (pārā. 172).
д̇ан̃жа ж̇ийвид̇инд̣̇рияам̣ руубааруубавасзна д̣̇увид̇хам̣ ход̇и. д̇ад̇т̇а аруубаж̇ийвид̇инд̣̇рияам̣ авиг̇г̇ахад̇д̇аа убаггамависаяам̣ на ход̇и. руубаж̇ийвид̇инд̣̇рияубажчзд̣̇зна бана д̇ад̣̇ааяад̇д̇авуд̇д̇ид̇ааяа д̇ам̣самагааламзва ожчиж̇ж̇амаанад̇ааяа зд̇т̇а сааман̃н̃зна убхаяамби г̇ахзд̇аб̣б̣ам̣. ид̣̇ан̃жа ад̇ийд̇аанааг̇ад̇ам̣ на г̇ахзд̇аб̣б̣ам̣ д̇асса авиж̇ж̇амаанад̇д̇аа. убаггамависаяаарахам̣ бана бажжуббаннамзва г̇ахзд̇аб̣б̣ам̣. д̇ан̃жа кан̣асанд̇ад̇иад̣̇д̇хаавасзна д̇ивид̇хам̣ ход̇и.
Tañca jīvitindriyaṃ rūpārūpavasena duvidhaṃ hoti. Tattha arūpajīvitindriyaṃ aviggahattā upakkamavisayaṃ na hoti. Rūpajīvitindriyupacchedena pana tadāyattavuttitāya taṃsamakālameva occhijjamānatāya ettha sāmaññena ubhayampi gahetabbaṃ. Idañca atītānāgataṃ na gahetabbaṃ tassa avijjamānattā. Upakkamavisayārahaṃ pana paccuppannameva gahetabbaṃ. Tañca khaṇasantatiaddhāvasena tividhaṃ hoti.
д̇ад̇т̇а уббаад̣̇адтид̇ибхан̇г̇авасзна кан̣ад̇д̇аяабарияаабанно бхааво кан̣абажжуббаннам̣ наама. д̇ам̣ сарасабхан̇г̇абхууд̇ад̇д̇аа саяам̣ бхиж̇ж̇амаанам̣ убаггамасаад̇хияам̣ винаасаванд̇ам̣ на ход̇и. аад̇абз тад̇ваа г̇аб̣бхам̣ бавидтасса анд̇хагааравиг̇аманд̇аран̃жа сийд̇зна оварагам̣ бавидтасса висабхааг̇ауд̇усамудтаанзна сийд̇абанууд̣̇анд̇аран̃жа руубасанд̇ад̇и санд̇ад̇ибажжуббаннам̣ наама. бадисанд̇хижуд̇ийнаманд̇араал̣аббавад̇д̇и канд̇хасанд̇ад̇и ад̣̇д̇хаабажжуббаннам̣ наама. имасмим̣ д̣̇ваяз убаггамасамбхаво, д̇ам̣васзна убажчиж̇ж̇амаанам̣ ж̇ийвид̇ам̣ санд̇аанабарихаанибажжаяабхаавад̇о санд̇ад̇иад̣̇д̇хаабажжуббаннад̣̇ваяам̣ яат̇аабарижчиннагааламаббад̇ваа убаггамавасзна анд̇арааязва нируж̇жхад̇и, д̇асмаа санд̇ад̇иад̣̇д̇хаабажжуббаннаруубаж̇ийвид̇инд̣̇рияан̃жа д̇ам̣нирод̇хзна нируж̇жхамаанааруубаж̇ийвид̇инд̣̇рияан̃жаад̇и убхаяам̣ зд̇т̇а ‘‘ж̇ийвид̇аа’’д̇и г̇ахид̇анд̇и взд̣̇ид̇аб̣б̣ам̣. ид̣̇амзва санд̇хааяааха бад̣̇абхааж̇анз ‘‘санд̇ад̇им̣ вигобзд̇ий’’д̇и (баараа. 172).
Tattha uppādaṭṭhitibhaṅgavasena khaṇattayapariyāpanno bhāvo khaṇapaccuppannaṃ nāma. Taṃ sarasabhaṅgabhūtattā sayaṃ bhijjamānaṃ upakkamasādhiyaṃ vināsavantaṃ na hoti. Ātape ṭhatvā gabbhaṃ paviṭṭhassa andhakāravigamantarañca sītena ovarakaṃ paviṭṭhassa visabhāgautusamuṭṭhānena sītapanūdantarañca rūpasantati santatipaccuppannaṃ nāma. Paṭisandhicutīnamantarāḷappavatti khandhasantati addhāpaccuppannaṃ nāma. Imasmiṃ dvaye upakkamasambhavo, taṃvasena upacchijjamānaṃ jīvitaṃ santānaparihānipaccayabhāvato santatiaddhāpaccuppannadvayaṃ yathāparicchinnakālamappatvā upakkamavasena antarāyeva nirujjhati, tasmā santatiaddhāpaccuppannarūpajīvitindriyañca taṃnirodhena nirujjhamānaarūpajīvitindriyañcāti ubhayaṃ ettha ‘‘jīvitā’’ti gahitanti veditabbaṃ. Idameva sandhāyāha padabhājane ‘‘santatiṃ vikopetī’’ti (pārā. 172).
имиссаава баан̣аад̇ибаад̇абхаавз аабад̇д̇ибхаавад̇о зд̇т̇а тад̇ваа адтагат̇ааяам̣ (баараа. адта. 2.172) баан̣абаан̣аад̇ибаад̇абаан̣аад̇ибаад̇ийбаан̣аад̇ибаад̇аббаяог̇аанам̣ вибхааг̇о д̣̇ассид̇о. д̇ад̇т̇а баан̣од̇и вохаарад̇о сад̇д̇о, барамад̇т̇ад̇о убажчиж̇ж̇амаанам̣ ж̇ийвид̇инд̣̇рияам̣, д̇ам̣ ‘‘ж̇ийвид̇аа’’д̇и иминаа вуд̇д̇ам̣. баан̣аад̇ибаад̇о наама вад̇хагажзд̇анаа, со жа ‘‘вияож̇аяз’’д̇и иминаа санд̣̇ассид̇о. баан̣аад̇ибаад̇ий наама буг̇г̇ало, со жа ‘‘яо’’д̇и иминаа санд̣̇ассид̇о. баан̣аад̇ибаад̇аббаяог̇о бана –
Imissāva pāṇātipātabhāve āpattibhāvato ettha ṭhatvā aṭṭhakathāyaṃ (pārā. aṭṭha. 2.172) pāṇapāṇātipātapāṇātipātīpāṇātipātappayogānaṃ vibhāgo dassito. Tattha pāṇoti vohārato satto, paramatthato upacchijjamānaṃ jīvitindriyaṃ, taṃ ‘‘jīvitā’’ti iminā vuttaṃ. Pāṇātipāto nāma vadhakacetanā, so ca ‘‘viyojaye’’ti iminā sandassito. Pāṇātipātī nāma puggalo, so ca ‘‘yo’’ti iminā sandassito. Pāṇātipātappayogo pana –
‘‘вуд̇д̇аа баан̣аад̇ибаад̇асса;
‘‘Vuttā pāṇātipātassa;
баяог̇аа ча махзсинаа’’д̇и –
Payogā cha mahesinā’’ti –
аад̣̇инаа наязна ид̇хзва вагкамаанавибхааг̇ад̇д̇аа вагкамаананаязнзва д̣̇адтаб̣б̣о.
Ādinā nayena idheva vakkhamānavibhāgattā vakkhamānanayeneva daṭṭhabbo.
асса сад̇т̇ам̣ нигкибзяяа ваад̇и яож̇анаа. ассаад̇и мануссаж̇аад̇игасса. ‘‘хад̇т̇абаасз’’д̇и баатасзсо. хад̇т̇абаасо наама самийбод̇и. ассаад̇и самийбасамб̣анд̇хз саамиважанам̣. сад̇т̇анд̇и зд̇т̇а ж̇ийвид̇авихим̣ санубагаран̣абхаавзна саммад̇аа д̇хаарааванд̇аасиаад̣̇и жа д̇хаараарахид̇аяадтибхинд̣̇иваалалаг̇ул̣аад̣̇и жа убалагкан̣авасзна г̇ахзд̇аб̣б̣аа. сасад̇и хим̣сад̇ийд̇и сад̇т̇ам̣. д̇знзвааха бад̣̇абхааж̇анз ‘‘асим̣ ваа сад̇д̇им̣ ваа бхинд̣̇иваалам̣ ваа лаг̇ул̣ам̣ ваа баасаан̣ам̣ ваа сад̇т̇ам̣ ваа висам̣ ваа раж̇ж̇ум̣ ваа’’д̇и. ид̇хаавуд̇д̇ам̣ гарабаалигаачуригаад̣̇и самукам̣ ‘‘сад̇т̇ам̣ ваа’’д̇и иминаа сан̇г̇ахид̇ам̣. нигкибзяяаад̇и яат̇аа бхог̇ахзд̇ум̣ лабхад̇и, д̇ат̇аа убанигкибзяяа, ад̇д̇авад̇хааяа ижчид̇агкан̣з яат̇аа г̇ан̣хаад̇и, д̇ат̇аа самийбз д̇знзва жид̇д̇зна табзяяаад̇и вуд̇д̇ам̣ ход̇и. иминаа т̇аавараббаяог̇о санд̣̇ассид̇о.
Assa satthaṃ nikkhipeyya vāti yojanā. Assāti manussajātikassa. ‘‘Hatthapāse’’ti pāṭhaseso. Hatthapāso nāma samīpoti. Assāti samīpasambandhe sāmivacanaṃ. Satthanti ettha jīvitavihiṃ sanupakaraṇabhāvena sammatā dhārāvantaasiādi ca dhārārahitayaṭṭhibhindivālalaguḷādi ca upalakkhaṇavasena gahetabbā. Sasati hiṃsatīti satthaṃ. Tenevāha padabhājane ‘‘asiṃ vā sattiṃ vā bhindivālaṃ vā laguḷaṃ vā pāsāṇaṃ vā satthaṃ vā visaṃ vā rajjuṃ vā’’ti. Idhāvuttaṃ karapālikāchurikādi samukhaṃ ‘‘satthaṃ vā’’ti iminā saṅgahitaṃ. Nikkhipeyyāti yathā bhogahetuṃ labhati, tathā upanikkhipeyya, attavadhāya icchitakkhaṇe yathā gaṇhāti, tathā samīpe teneva cittena ṭhapeyyāti vuttaṃ hoti. Iminā thāvarappayogo sandassito.
маран̣з г̇ун̣ам̣ ваа вад̣̇зяяаад̇и яож̇анаа, маран̣ад̇т̇ааяа маран̣з г̇ун̣ам̣ ван̣н̣зд̇ийд̇и ад̇т̇о. ‘‘ж̇ийвид̇з аад̣̇ийнавам̣ д̣̇ассзд̇и, маран̣з г̇ун̣ам̣ бхан̣ад̇ий’’д̇и (баараа. 172) бад̣̇абхааж̇анз вуд̇д̇ад̇д̇аа ‘‘гим̣ д̇уяхиминаа баабагзна д̣̇уж̇ж̇ийвид̇зна, яо д̇вам̣ на лабхаси бан̣ийд̇абхож̇анаани бхун̃ж̇ид̇у’’мижжаад̣̇инаа наязна маран̣ад̇т̇ааяа ж̇ийвид̇з аван̣н̣ам̣ вад̣̇анд̇о жа ‘‘д̇вам̣ коси убаасага гад̇агаляаан̣о агад̇абаабо, мад̇ам̣ д̇з ж̇ийвид̇аа сзяяо, ид̇о д̇вам̣ гаалагад̇о вивид̇хавихан̇г̇амавигууж̇ид̇з барамасурабхигусумабхуусид̇ад̇аруваранижид̇з барамарад̇игаралал̣ид̇аг̇ад̇ибхаасид̇авилабид̇асураяувад̇иг̇ан̣авижарид̇з варананд̣̇анз ажчараасан̇гхабариваарид̇о вижариссасий’’д̇иаад̣̇инаа наязна маран̣ад̇т̇ааяа маран̣аанисам̣сам̣ д̣̇ассзнд̇о жа ‘‘маран̣з г̇ун̣ам̣ вад̣̇зяяа’’ижжзва вужжад̇и.
Maraṇe guṇaṃ vā vadeyyāti yojanā, maraṇatthāya maraṇe guṇaṃ vaṇṇetīti attho. ‘‘Jīvite ādīnavaṃ dasseti, maraṇe guṇaṃ bhaṇatī’’ti (pārā. 172) padabhājane vuttattā ‘‘kiṃ tuyhiminā pāpakena dujjīvitena, yo tvaṃ na labhasi paṇītabhojanāni bhuñjitu’’miccādinā nayena maraṇatthāya jīvite avaṇṇaṃ vadanto ca ‘‘tvaṃ khosi upāsaka katakalyāṇo akatapāpo, mataṃ te jīvitā seyyo, ito tvaṃ kālakato vividhavihaṅgamavikūjite paramasurabhikusumabhūsitataruvaranicite paramaratikaralaḷitagatibhāsitavilapitasurayuvatigaṇavicarite varanandane accharāsaṅghaparivārito vicarissasī’’tiādinā nayena maraṇatthāya maraṇānisaṃsaṃ dassento ca ‘‘maraṇe guṇaṃ vadeyya’’icceva vuccati.
маран̣уубааяам̣ д̣̇зсзяяаад̇и яож̇анаа. маран̣аад̇хиббааязнзва ‘‘сад̇т̇ам̣ ваа аахара, висам̣ ваа каад̣̇а, раж̇ж̇уяаа ваа уб̣б̣анд̇хид̇ваа гаалан̇гарохий’’д̇и бад̣̇абхааж̇анз вуд̇д̇асад̇т̇ахаран̣аани жа авуд̇д̇амби соб̣бханарагабабаад̇аад̣̇ийсу бабад̇анан̃жаад̇и звамаад̣̇игам̣ маран̣уубааяам̣ аажигкзяяа. ‘‘ход̇и аяамбий’’д̇и бад̣̇ажчзд̣̇о, абийд̇и буб̣б̣з вуд̇д̇ад̣̇ваяам̣ самужжинод̇и. д̣̇взд̇хаа бхиннасилаа вияа асанд̇хзяяова со н̃зяяод̇и д̣̇вид̇хаа бхиннабаасаан̣о вияа бхаг̇авад̇о бадибад̇д̇ибадивзд̇хасаасанад̣̇ваязна со бажжуббаннз ад̇д̇абхаавз санд̇хаад̇умасаггун̣зяяоваад̇и н̃аад̇аб̣б̣од̇и ад̇т̇о.
Maraṇūpāyaṃ deseyyāti yojanā. Maraṇādhippāyeneva ‘‘satthaṃ vā āhara, visaṃ vā khāda, rajjuyā vā ubbandhitvā kālaṅkarohī’’ti padabhājane vuttasatthaharaṇāni ca avuttampi sobbhanarakapapātādīsu papatanañcāti evamādikaṃ maraṇūpāyaṃ ācikkheyya. ‘‘Hoti ayampī’’ti padacchedo, apīti pubbe vuttadvayaṃ samuccinoti. Dvedhā bhinnasilā viya asandheyyovaso ñeyyoti dvidhā bhinnapāsāṇo viya bhagavato paṭipattipaṭivedhasāsanadvayena so paccuppanne attabhāve sandhātumasakkuṇeyyovāti ñātabboti attho.
243. т̇аавараад̣̇аяод̇и аад̣̇и-сад̣̇д̣̇зна виж̇ж̇аамаяаид̣̇д̇химаяабаяог̇ад̣̇ваяам̣ сан̇г̇ахид̇ам̣.
243.Thāvarādayoti ādi-saddena vijjāmayaiddhimayapayogadvayaṃ saṅgahitaṃ.
244. д̇ад̇т̇аад̇и д̇зсу часу баяог̇зсу. саго хад̇т̇о сахад̇т̇о, д̇зна ниб̣б̣ад̇д̇о саахад̇т̇иго, баяог̇о. ид̇ха хад̇т̇аг̇г̇ахан̣ам̣ убалагкан̣ам̣, д̇асмаа хад̇т̇аад̣̇инаа ад̇д̇ано ан̇г̇абажжан̇г̇зна нибпаад̣̇ид̇о вад̇хаббаяог̇о саахад̇т̇игод̇и взд̣̇ид̇аб̣б̣о.
244.Tatthāti tesu chasu payogesu. Sako hattho sahattho, tena nibbatto sāhatthiko, payogo. Idha hatthaggahaṇaṃ upalakkhaṇaṃ, tasmā hatthādinā attano aṅgapaccaṅgena nipphādito vadhappayogo sāhatthikoti veditabbo.
245. ‘‘д̇вам̣ д̇ам̣ звам̣ бахарид̇ваа маарзхий’’д̇и бхигкуно барасса яам̣ аан̣аабанам̣, аяамаан̣ад̇д̇иго наяод̇и яож̇анаа. аан̣ад̇д̇иго наяод̇и аан̣ад̇д̇иязва аан̣ад̇д̇иго. нзд̇и бавад̇д̇зд̇ийд̇и наяо, баяог̇ассзд̇ам̣ наамам̣.
245. ‘‘Tvaṃ taṃ evaṃ paharitvā mārehī’’ti bhikkhuno parassa yaṃ āṇāpanaṃ, ayamāṇattiko nayoti yojanā. Āṇattiko nayoti āṇattiyeva āṇattiko. Neti pavattetīti nayo, payogassetaṃ nāmaṃ.
246. д̣̇ууранд̇и д̣̇уурадтам̣. гааязна бадиб̣ад̣̇д̇хзнаад̇и зд̇т̇а гааязгад̣̇зсо хад̇т̇аад̣̇и гааяо аваяавз самуд̣̇ааяобажаарад̇о ‘‘г̇аамо д̣̇ад̣дхо’’д̇и яат̇аа. гааяабадиб̣ад̣̇д̇хам̣ жаабаад̣̇игам̣ бадиб̣ад̣̇д̇хам̣ наама буб̣б̣абад̣̇алобзна ‘‘д̣̇звад̣̇ад̇д̇о д̣̇ад̇д̇о’’д̇и яат̇аа. ваа-сад̣̇д̣̇о луд̇д̇анид̣̇д̣̇идто, гааязна ваа гааяабадиб̣ад̣̇д̇хзна ваад̇и вуд̇д̇ам̣ ход̇и, ‘‘усуаад̣̇инибаад̇ана’’нд̇и иминаа самб̣анд̇хо. вид̇хаанам̣ вид̇хи, баяог̇од̇и ад̇т̇о.
246.Dūranti dūraṭṭhaṃ. Kāyena paṭibaddhenāti ettha kāyekadeso hatthādi kāyo avayave samudāyopacārato ‘‘gāmo daḍḍho’’ti yathā. Kāyapaṭibaddhaṃ cāpādikaṃ paṭibaddhaṃ nāma pubbapadalopena ‘‘devadatto datto’’ti yathā. Vā-saddo luttaniddiṭṭho, kāyena vā kāyapaṭibaddhena vāti vuttaṃ hoti, ‘‘usuādinipātana’’nti iminā sambandho. Vidhānaṃ vidhi, payogoti attho.
247. асан̃жааримубааязнаад̇и асан̃жааримзна нижжалзна убааязна. обад̇анд̇и зд̇т̇аад̇и обаад̇о, со аад̣̇и язсам̣ абассзнависабхзсаж̇ж̇асам̣вид̇хаанаад̣̇ийнам̣ д̇з обаад̇аад̣̇аяо, д̇зсам̣ вид̇хаанам̣ обаад̇аад̣̇ивид̇хаанам̣, обаад̇агкан̣анаад̣̇игирияаа.
247.Asañcārimupāyenāti asañcārimena niccalena upāyena. Opatanti etthāti opāto, so ādi yesaṃ apassenavisabhesajjasaṃvidhānādīnaṃ te opātādayo, tesaṃ vidhānaṃ opātādividhānaṃ, opātakkhaṇanādikiriyā.
248. виж̇ж̇ааяаад̇и аат̇аб̣б̣анавзд̣̇ааг̇ад̇амаран̣аманд̇асан̇каад̇авиж̇ж̇ааяа. ж̇аббананд̇и яат̇аа баро на сун̣аад̇и, д̇ат̇аа бунаббунам̣ важанам̣.
248.Vijjāyāti āthabbanavedāgatamaraṇamantasaṅkhātavijjāya. Jappananti yathā paro na suṇāti, tathā punappunaṃ vacanaṃ.
249. мааран̣з самад̇т̇аа яаа гаммавибаагаж̇аа ид̣̇д̇хи, аяам̣ ид̣̇д̇химаяо баяог̇о наамаад̇и самуд̣̇ийрид̇од̇и яож̇анаа. гаммавибаагз ж̇аад̇аа гаммавибаагаж̇аа, ид̣̇д̇хи, яаа ‘‘нааг̇аанам̣ нааг̇ид̣̇д̇хи субан̣н̣аанам̣ субан̣н̣ид̣̇д̇хи яагкаанам̣ яагкид̣̇д̇хий’’д̇иаад̣̇инаа (баараа. адта. 2.172) б̣ахуд̇хаа адтагат̇ааяам̣ вуд̇д̇аа. д̇ад̇т̇а д̣̇идтад̣̇адтапудтависаанам̣ нааг̇аанам̣ д̣̇исваа, д̣ам̣сид̇ваа, пусид̇ваа жа баруубагхаад̇агаран̣з нааг̇ид̣̇д̇хи взд̣̇ид̇аб̣б̣аа. звам̣ сзсаанамби. ид̣̇д̇хиязва ид̣̇д̇химаяо, бхааванаамаяо ид̣̇д̇хиббаяог̇о банзд̇т̇а на г̇ахзд̇аб̣б̣о. вуд̇д̇ан̃хзд̇ам̣ адтагат̇ааяам̣ –
249. Māraṇe samatthā yā kammavipākajā iddhi, ayaṃ iddhimayo payogo nāmāti samudīritoti yojanā. Kammavipāke jātā kammavipākajā, iddhi, yā ‘‘nāgānaṃ nāgiddhi supaṇṇānaṃ supaṇṇiddhi yakkhānaṃ yakkhiddhī’’tiādinā (pārā. aṭṭha. 2.172) bahudhā aṭṭhakathāyaṃ vuttā. Tattha diṭṭhadaṭṭhaphuṭṭhavisānaṃ nāgānaṃ disvā, ḍaṃsitvā, phusitvā ca parūpaghātakaraṇe nāgiddhi veditabbā. Evaṃ sesānampi. Iddhiyeva iddhimayo, bhāvanāmayo iddhippayogo panettha na gahetabbo. Vuttañhetaṃ aṭṭhakathāyaṃ –
‘‘гзжи бана бхааванаамаяид̣̇д̇хияааби баруубагхаад̇агаран̣ам̣ вад̣̇анд̇и. саха баруубагхаад̇агаран̣зна жа аад̣̇ид̇д̇агхаруубари кид̇д̇асса уд̣̇агагхадасса бхзд̣̇анам̣ вияа ид̣̇д̇хивинаасан̃жа ижчанд̇и, д̇ам̣ д̇зсам̣ ижчаамад̇д̇амзва. гасмаа? яасмаа д̇ам̣ гусалавзд̣̇анаавид̇аггабарид̇д̇ад̇д̇игаад̣̇ийхи на самзд̇и. гат̇ам̣? аяан̃хи бхааванаамаяид̣̇д̇хи наама жад̇уд̇т̇аж̇жхаанамаяаа гусалад̇д̇игз гусалаа жзва аб̣яаагад̇аа жа, баан̣аад̇ибаад̇о агусало. взд̣̇анаад̇д̇игз ад̣̇угкамасукасамбаяуд̇д̇аа, баан̣аад̇ибаад̇о д̣̇угкасамбаяуд̇д̇о. вид̇аггад̇д̇игз авид̇аггаавижаараа, баан̣аад̇ибаад̇о савид̇аггасавижааро. барид̇д̇ад̇д̇игз махаг̇г̇ад̇аа, баан̣аад̇ибаад̇о барид̇д̇оязваа’’д̇и (баараа. адта. 2.172).
‘‘Keci pana bhāvanāmayiddhiyāpi parūpaghātakaraṇaṃ vadanti. Saha parūpaghātakaraṇena ca ādittagharūpari khittassa udakaghaṭassa bhedanaṃ viya iddhivināsañca icchanti, taṃ tesaṃ icchāmattameva. Kasmā? Yasmā taṃ kusalavedanāvitakkaparittattikādīhi na sameti. Kathaṃ? Ayañhi bhāvanāmayiddhi nāma catutthajjhānamayā kusalattike kusalā ceva abyākatā ca, pāṇātipāto akusalo. Vedanāttike adukkhamasukhasampayuttā, pāṇātipāto dukkhasampayutto. Vitakkattike avitakkaavicārā, pāṇātipāto savitakkasavicāro. Parittattike mahaggatā, pāṇātipāto parittoyevā’’ti (pārā. aṭṭha. 2.172).
250. д̇ад̇т̇аад̇и д̇зсу чаб̣б̣ид̇хзсу баяог̇зсу. уд̣̇д̣̇зсобийд̇и уд̣̇д̣̇исанам̣ уд̣̇д̣̇зсо, д̇ам̣сахид̇о баяог̇оби уд̣̇д̣̇зсод̇и вуд̇д̇ам̣ ход̇и ‘‘гунд̇з бавзсзхий’’д̇и яат̇аа. звам̣ вад̇д̇аб̣б̣ад̇ааяа жа ануд̣̇д̣̇зсод̇и д̇аб̣б̣ибарийд̇аважанамзва н̃аабаганд̇и взд̣̇ид̇аб̣б̣ам̣. зд̇т̇а згзго уд̣̇д̣̇зсоби ануд̣̇д̣̇зсоби ход̇ийд̇и д̇зсамаяам̣ бхзд̣̇о бана д̣̇увид̇хо ход̇ийд̇и барид̣̇ийбид̇од̇и яож̇анаа. имзсу часу баяог̇зсвзва згзгассзва уд̣̇д̣̇иссаануд̣̇д̣̇иссагирияамаанад̇ааяа д̣̇увид̇хабхаавад̇о д̇зсам̣ д̣̇ваад̣̇асавид̇хо бхзд̣̇о бад̣̇абхааж̇анз жа адтагат̇ааяа жа д̣̇ийбид̇о, д̇ад̇т̇а винижчаяамид̣̇аани д̣̇ассаяиссаамийд̇и ад̇хиббааяо.
250.Tatthāti tesu chabbidhesu payogesu. Uddesopīti uddisanaṃ uddeso, taṃsahito payogopi uddesoti vuttaṃ hoti ‘‘kunte pavesehī’’ti yathā. Evaṃ vattabbatāya ca anuddesoti tabbiparītavacanameva ñāpakanti veditabbaṃ. Ettha ekeko uddesopi anuddesopi hotīti tesamayaṃ bhedo pana duvidho hotīti paridīpitoti yojanā. Imesu chasu payogesveva ekekasseva uddissānuddissakiriyamānatāya duvidhabhāvato tesaṃ dvādasavidho bhedo padabhājane ca aṭṭhakathāya ca dīpito, tattha vinicchayamidāni dassayissāmīti adhippāyo.
251. б̣ахуусубийд̇и мануссзсу б̣ахуусуби. д̇зна гаммзнаад̇и бахаарад̣̇аанасан̇каад̇зна гаммзна. б̣аж̇жхад̇ийд̇и абааяам̣ нзд̇ум̣ гаммабаасзна гамманд̇арам̣ ниваарзд̇ваа б̣аж̇жхад̇ийд̇и ад̇т̇о.
251.Bahūsupīti manussesu bahūsupi. Tena kammenāti pahāradānasaṅkhātena kammena. Bajjhatīti apāyaṃ netuṃ kammapāsena kammantaraṃ nivāretvā bajjhatīti attho.
252. бахаарзбийд̇и бахаран̣зби. д̣̇зхинод̇и мануссавиг̇г̇ахасса. д̇ассаад̇и бахадасса.
252.Pahārepīti paharaṇepi. Dehinoti manussaviggahassa. Tassāti pahaṭassa.
253. бахадамад̇д̇з ваад̇и бахадагкан̣з ваа. бажчаад̇и д̇аббажжаяаа гааланд̇арз ваа. убхаяат̇ааби жа мад̇зд̇и д̣̇виннам̣ аагаараанаман̃н̃ад̇арзна мад̇зби. ханд̇аа вад̇хаго. бахадамад̇д̇асминд̇и д̇асмим̣ маран̣аарахабахаарасса лад̣̇д̇хагкан̣зязва, маран̣ад̇о буб̣б̣абхааг̇зязваад̇и мад̇д̇асад̣̇д̣̇зна д̣̇ийбзд̇и. маран̣ад̇т̇ааяа жа ан̃н̃ад̇т̇ааяа жа д̣̇иннзсу анзгзсу бахаарзсу маран̣ад̇т̇ааяа д̣̇иннаббахаарзнзва яад̣̇аа гад̣̇аажи мариссад̇и, бахаарад̣̇аанагкан̣зязва баарааж̇игам̣ ход̇и. амаран̣аад̇хиббааязна д̣̇иннаббахаараб̣алзна жз марзяяа, на ход̇ийд̇и вуд̇д̇ам̣ ход̇ийд̇и.
253.Pahaṭamatte vāti pahaṭakkhaṇe vā. Pacchāti tappaccayā kālantare vā. Ubhayathāpi ca mateti dvinnaṃ ākārānamaññatarena matepi. Hantā vadhako. Pahaṭamattasminti tasmiṃ maraṇārahapahārassa laddhakkhaṇeyeva, maraṇato pubbabhāgeyevāti mattasaddena dīpeti. Maraṇatthāya ca aññatthāya ca dinnesu anekesu pahāresu maraṇatthāya dinnappahāreneva yadā kadāci marissati, pahāradānakkhaṇeyeva pārājikaṃ hoti. Amaraṇādhippāyena dinnappahārabalena ce mareyya, na hotīti vuttaṃ hotīti.
254. д̣̇вз баяог̇аад̇и уд̣̇д̣̇иссаануд̣̇д̣̇иссагирияаабхзд̣̇абхиннаа саахад̇т̇игаан̣ад̇д̇игаа д̣̇вз баяог̇аа.
254.Dve payogāti uddissānuddissakiriyābhedabhinnā sāhatthikāṇattikā dve payogā.
255. гаран̣ассаад̇и гирияааяа. висзсод̇и наанад̇д̇ам̣. аан̣ад̇д̇инияаамагаад̇и аан̣ад̇д̇им̣ нияаамзнд̇и вавад̇т̇аабзнд̇ийд̇и аан̣ад̇д̇инияаамагаа.
255.Karaṇassāti kiriyāya. Visesoti nānattaṃ. Āṇattiniyāmakāti āṇattiṃ niyāmenti vavatthāpentīti āṇattiniyāmakā.
256. д̇ад̇т̇аад̇и д̇зсу аан̣ад̇д̇инияаамагзсу часу аагаарзсу. яоб̣б̣анаад̣̇и жаад̇и аад̣̇и-сад̣̇д̣̇зна т̇ааварияаманд̣̇акид̣д̣авуд̣̇д̇хаад̣̇иавад̇т̇аависзсо сан̇г̇ахид̇о.
256.Tatthāti tesu āṇattiniyāmakesu chasu ākāresu. Yobbanādi cāti ādi-saddena thāvariyamandakhiḍḍavuddhādiavatthāviseso saṅgahito.
257. яам̣ маад̇игааяа нид̣̇д̣̇идтам̣ сад̇т̇ам̣, д̇ам̣ гад̇амам̣?. сад̇д̇амааран̣анд̇и сад̇д̇з маарзнд̇и зд̇знаад̇и сад̇д̇амааран̣ам̣, асиаад̣̇ивад̇хобагаран̣ам̣.
257. Yaṃ mātikāya niddiṭṭhaṃ satthaṃ, taṃ katamaṃ?. Sattamāraṇanti satte mārenti etenāti sattamāraṇaṃ, asiādivadhopakaraṇaṃ.
258. виж̇жхананд̇и усуаад̣̇ийхи виж̇жханам̣. бхзд̣̇ананд̇и гагажаад̣̇ийхи д̣̇вид̇хаагаран̣ам̣. чзд̣̇ананд̇и каг̇г̇аад̣̇ийхи д̣̇вид̇хаагаран̣ам̣. д̇аал̣ананд̇и муг̇г̇араад̣̇ийхи аагхаад̇анам̣. звамаад̣̇ивид̇ход̇и звамаад̣̇иббагааро. анзгод̇и б̣ахуго бхзд̣̇о. гаран̣асса висзсо гирияаависзсод̇и ад̇т̇о.
258.Vijjhananti usuādīhi vijjhanaṃ. Bhedananti kakacādīhi dvidhākaraṇaṃ. Chedananti khaggādīhi dvidhākaraṇaṃ. Tāḷananti muggarādīhi āghātanaṃ. Evamādividhoti evamādippakāro. Anekoti bahuko bhedo. Karaṇassa viseso kiriyāvisesoti attho.
259-60. ‘‘бурад̇о бахарид̇ваана маарзхий’’д̇и яо бхаасид̇о аан̣аабагзна, д̇зна аан̣ад̇д̇зна бажчад̇о…бз… маарид̇зд̇и яож̇анаа. вад̇т̇аан̣ад̇д̇и висан̇гзд̇аад̇и зд̇т̇а ‘‘яам̣ ‘маарзхий’д̇и…бз… д̇ад̇о’’д̇и вад̇т̇увисан̇гзд̇о д̣̇ассид̇о. ‘‘бурад̇о…бз… маарид̇з’’д̇и аан̣ад̇д̇ивисан̇гзд̇о д̣̇ассид̇о. мууладтод̇и аан̣аабаго. мууланд̇и хи буб̣б̣агирияаануруубам̣ аан̣аабанам̣, д̇ад̇т̇а тид̇од̇и мууладто.
259-60. ‘‘Purato paharitvāna mārehī’’ti yo bhāsito āṇāpakena, tena āṇattena pacchato…pe… māriteti yojanā. Vatthāṇatti visaṅketāti ettha ‘‘yaṃ ‘mārehī’ti…pe… tato’’ti vatthuvisaṅketo dassito. ‘‘Purato…pe… mārite’’ti āṇattivisaṅketo dassito. Mūlaṭṭhoti āṇāpako. Mūlanti hi pubbakiriyānurūpaṃ āṇāpanaṃ, tattha ṭhitoti mūlaṭṭho.
261. иминаа висан̇гзд̇з аан̣аабагасса анаабад̇д̇им̣ д̣̇ассзд̇ваа сан̇гзд̇з авираад̇хид̇з убхиннамби баарааж̇игам̣ д̣̇ассзд̇умааха ‘‘вад̇т̇у’’нд̇иаад̣̇и. д̇ам̣ вад̇т̇ум̣ авираж̇жхид̇ваа маарид̇з убхаязсам̣…бз… уд̣̇ийрид̇о, яат̇аан̣ад̇д̇и жа маарид̇з…бз… уд̣̇ийрид̇од̇и яож̇анаа. маарид̇з вад̇т̇усминд̇и саамад̇т̇ияаа лаб̣бхад̇и. убхаязсанд̇и аан̣аабагааан̣ад̇д̇аанам̣. яат̇аагааланд̇и аан̣аабагасса аан̣ад̇д̇игкан̣ам̣, аан̣ад̇д̇асса мааран̣агкан̣ан̃жа анад̇иггамид̇ваа. б̣анд̇ханам̣ б̣анд̇хо, гаммунаа б̣анд̇хо гаммаб̣анд̇хо. ат̇а ваа б̣аж̇жхад̇и зд̇знаад̇и б̣анд̇хо, гаммамзва б̣анд̇хо гаммаб̣анд̇хо.
261. Iminā visaṅkete āṇāpakassa anāpattiṃ dassetvā saṅkete avirādhite ubhinnampi pārājikaṃ dassetumāha ‘‘vatthu’’ntiādi. Taṃ vatthuṃ avirajjhitvā mārite ubhayesaṃ…pe… udīrito, yathāṇatti ca mārite…pe… udīritoti yojanā. Mārite vatthusminti sāmatthiyā labbhati. Ubhayesanti āṇāpakaāṇattānaṃ. Yathākālanti āṇāpakassa āṇattikkhaṇaṃ, āṇattassa māraṇakkhaṇañca anatikkamitvā. Bandhanaṃ bandho, kammunā bandho kammabandho. Atha vā bajjhati etenāti bandho, kammameva bandho kammabandho.
264. висан̇гзд̇о наад̇и висан̇гзд̇о над̇т̇и, д̣̇виннамби яат̇аагаалабарижчзд̣̇ам̣ гаммаб̣анд̇хоязваад̇и ад̇т̇о.
264.Visaṅketo nāti visaṅketo natthi, dvinnampi yathākālaparicchedaṃ kammabandhoyevāti attho.
265. саб̣б̣асод̇и саб̣б̣зсу гаалабхзд̣̇зсу, саб̣б̣асо взд̣̇ид̇аб̣б̣од̇и ваа самб̣анд̇хо. саб̣б̣асод̇и саб̣б̣аббагаарзна. вибхаавинаад̇и бан̣д̣ид̇зна. со хи ад̇т̇ам̣ вибхаавзд̇ийд̇и д̇ат̇аа вуд̇д̇о.
265.Sabbasoti sabbesu kālabhedesu, sabbaso veditabboti vā sambandho. Sabbasoti sabbappakārena. Vibhāvināti paṇḍitena. So hi atthaṃ vibhāvetīti tathā vutto.
266-7-8. ‘‘имам̣ г̇аамз тид̇а’’нд̇и ид̣̇ам̣ д̇ам̣ сан̃ж̇аанид̇ум̣ вуд̇д̇ам̣, на мааран̣агкан̣адтаананияамад̇т̇ааяаад̇и ‘‘яад̇т̇а гад̇т̇ажи тид̇а’’нд̇и вад̇вааби ‘‘над̇т̇и д̇асса висан̇гзд̇о’’д̇и ааха. д̇ассаад̇и аан̣аабагасса. ‘‘д̇ад̇т̇аа’’д̇и ваа баато, д̇ассам̣ аан̣ад̇д̇ияанд̇и ад̇т̇о. ‘‘г̇аамзязва тид̇ам̣ взрим̣ маарзхий’’д̇и саавад̇хааран̣ам̣ аан̣ад̇д̇о ванз жз тид̇ам̣ маарзд̇и ваа ‘‘ванзязва тид̇ам̣ взрим̣ маарзхий’’д̇и саавад̇хааран̣ам̣ вуд̇д̇о г̇аамз тид̇ам̣ жз маарзд̇и ваад̇и яож̇анаа. ‘‘бхигкунаа саавад̇хааран̣а’’нд̇и жа бод̇т̇агзсу ликанд̇и, д̇ам̣ аг̇г̇ахзд̇ваа ‘‘ванз ваа саавад̇хааран̣а’’нд̇и баатоязва г̇ахзд̇аб̣б̣о. виг̇ад̇о сан̇гзд̇о аан̣ад̇д̇инияаамо зд̇т̇аад̇и висан̇гзд̇о.
266-7-8.‘‘Imaṃ gāme ṭhita’’nti idaṃ taṃ sañjānituṃ vuttaṃ, na māraṇakkhaṇaṭṭhānaniyamatthāyāti ‘‘yattha katthaci ṭhita’’nti vatvāpi ‘‘natthi tassa visaṅketo’’ti āha. Tassāti āṇāpakassa. ‘‘Tatthā’’ti vā pāṭho, tassaṃ āṇattiyanti attho. ‘‘Gāmeyeva ṭhitaṃ veriṃ mārehī’’ti sāvadhāraṇaṃ āṇatto vane ce ṭhitaṃ māreti vā ‘‘vaneyeva ṭhitaṃ veriṃ mārehī’’ti sāvadhāraṇaṃ vutto gāme ṭhitaṃ ce māreti vāti yojanā. ‘‘Bhikkhunā sāvadhāraṇa’’nti ca potthakesu likhanti, taṃ aggahetvā ‘‘vane vāsāvadhāraṇa’’nti pāṭhoyeva gahetabbo. Vigato saṅketo āṇattiniyāmo etthāti visaṅketo.
269. саб̣б̣ад̣̇зсзсууд̇и г̇аамаванаан̇г̇ан̣аг̇зхаад̣̇ийсу саб̣б̣зсу таанзсу. бхзд̣̇ад̇од̇и наанад̇д̇ад̇о.
269.Sabbadesesūti gāmavanaaṅgaṇagehādīsu sabbesu ṭhānesu. Bhedatoti nānattato.
270. ‘‘сад̇т̇зна бана маарзхий’’д̇и язна гзнажи яо аан̣ад̇д̇о, д̇зна язна гзнажи сад̇т̇зна маарид̇з висан̇гзд̇о над̇т̇ийд̇и яож̇анаа.
270. ‘‘Satthena pana mārehī’’ti yena kenaci yo āṇatto, tena yena kenaci satthena mārite visaṅketo natthīti yojanā.
271-2. иминаа ваасинаа хийд̇и зд̇т̇а хийд̇и бад̣̇абууран̣з. ‘‘иминаа асинаа маарзяяаа’’д̇и вуд̇д̇о ан̃н̃зна асинаа маарзд̇и ваа ‘‘д̇вам̣ имасса асисса зд̇ааяа д̇хаарааяа маараяа’’ ид̇и вуд̇д̇о д̇ам̣ взрим̣ сажз ид̇арааяа д̇хаарааяа маарзд̇и ваа т̇арунаа маарзд̇и ваа д̇ун̣д̣зна маарзд̇и ваа, д̇ат̇аа маарид̇з висан̇гзд̇оязва ход̇ийд̇и яож̇анаа. т̇арунаад̇и каг̇г̇амудтинаа. д̇ун̣д̣знаад̇и каг̇г̇ад̇ун̣д̣зна. ‘‘висан̇гзд̇оваа’’д̇и сан̇гзд̇авираад̇хзнзва баарааж̇игам̣ на ход̇ийд̇и д̣̇ассанабад̣̇амзд̇ам̣.
271-2.Iminā vāsinā hīti ettha hīti padapūraṇe. ‘‘Iminā asinā māreyyā’’ti vutto aññena asinā māreti vā ‘‘tvaṃ imassa asissa etāya dhārāya māraya’’ iti vutto taṃ veriṃ sace itarāya dhārāya māreti vā tharunā māreti vā tuṇḍena māreti vā, tathā mārite visaṅketoyeva hotīti yojanā. Tharunāti khaggamuṭṭhinā. Tuṇḍenāti khaggatuṇḍena. ‘‘Visaṅketovā’’ti saṅketavirādheneva pārājikaṃ na hotīti dassanapadametaṃ.
273. саб̣б̣аавуд̇хагаж̇аад̇исууд̇и ид̇хаавуд̇д̇агарабаалигаачуригаад̣̇исаб̣б̣абахаран̣асааман̃н̃зсу. висзсад̇од̇и бхзд̣̇ад̇о.
273.Sabbāvudhakajātisūti idhāvuttakarapālikāchurikādisabbapaharaṇasāmaññesu. Visesatoti bhedato.
274. барзнаад̇и бхигкунаа. сод̇и аан̣ад̇д̇о. нисиннам̣ нам̣ маарзд̇и, висан̇гзд̇о на виж̇ж̇ад̇ийд̇и ‘‘г̇ажчанд̇амзва маарзхий’’д̇и саавад̇хааран̣ам̣ авуд̇д̇ад̇д̇аа ‘‘нисинноби соязваа’’д̇и д̇ам̣ маарзнд̇асса висан̇гзд̇о на ход̇и, авад̇хааран̣ам̣ анд̇арзна гат̇анам̣ д̇ам̣ сан̃ж̇аанаабзд̇ум̣ вужжад̇ийд̇и ирияаабат̇анияаамагам̣ на ход̇ийд̇и ад̇хиббааяо.
274.Parenāti bhikkhunā. Soti āṇatto. Nisinnaṃ naṃ māreti, visaṅketo na vijjatīti ‘‘gacchantameva mārehī’’ti sāvadhāraṇaṃ avuttattā ‘‘nisinnopi soyevā’’ti taṃ mārentassa visaṅketo na hoti, avadhāraṇaṃ antarena kathanaṃ taṃ sañjānāpetuṃ vuccatīti iriyāpathaniyāmakaṃ na hotīti adhippāyo.
275-6. асад̇и саавад̇хааран̣з висан̇гзд̇аабхаавам̣ д̣̇ассзд̇ваа ид̣̇аани саавад̇хааран̣з ирияаабат̇анд̇арзсу висан̇гзд̇ам̣ д̣̇ассзд̇умааха ‘‘нисиннам̣язваа’’д̇иаад̣̇и. ‘‘нисиннам̣язва маарзхий’’д̇и вуд̇д̇о г̇ажчанд̇ам̣ маарзд̇и, висан̇гзд̇анд̇и н̃аад̇аб̣б̣ам̣. ‘‘г̇ажчанд̇ам̣язва маарзхий’’д̇и вуд̇д̇о нисиннам̣ маарзд̇и, висан̇гзд̇анд̇и н̃аад̇аб̣б̣анд̇и яож̇анаа. имамзва яож̇анааггамам̣ санд̇хааяааха ‘‘яат̇ааггама’’нд̇и.
275-6. Asati sāvadhāraṇe visaṅketābhāvaṃ dassetvā idāni sāvadhāraṇe iriyāpathantaresu visaṅketaṃ dassetumāha ‘‘nisinnaṃyevā’’tiādi. ‘‘Nisinnaṃyeva mārehī’’ti vutto gacchantaṃ māreti, visaṅketanti ñātabbaṃ. ‘‘Gacchantaṃyeva mārehī’’ti vutto nisinnaṃ māreti, visaṅketanti ñātabbanti yojanā. Imameva yojanākkamaṃ sandhāyāha ‘‘yathākkama’’nti.
277. виж̇жхид̇ваад̇и сараад̣̇ийхи виж̇жхид̇ваа.
277.Vijjhitvāti sarādīhi vijjhitvā.
278. чинд̣̇ид̇ваад̇и асиаад̣̇ийхи чинд̣̇ид̇ваа. буна сод̇и баяог̇о.
278.Chinditvāti asiādīhi chinditvā. Puna soti payogo.
279. гаран̣зсууд̇и виж̇жханаад̣̇игирияаависзсзсу.
279.Karaṇesūti vijjhanādikiriyāvisesesu.
280-1. зд̇д̇аавад̇аа аан̣ад̇д̇инияаамаганид̣̇д̣̇зсам̣ д̣̇ассзд̇ваа ид̣̇аани д̣̇ийгхаад̣̇илин̇г̇авасзнааби самбхаванд̇ам̣ висан̇гзд̇ам̣ д̣̇ассзд̇умааха ‘‘д̣̇ийгха’’нд̇иаад̣̇и. ‘‘д̣̇ийгхам̣…бз… т̇уулам̣ маарзхийд̇и анияамзд̇ваа аан̣аабзд̇ий’’д̇и (баараа. адта. 2.174) адтагат̇ааважанад̇о зва-гаарам̣ винаа ‘‘д̣̇ийгхам̣ маарзхий’’д̇и анияамзд̇ваа гзнажи яо аан̣ад̇д̇о ход̇и, соби аан̣ад̇д̇о яам̣ гин̃жи д̇аад̣̇исам̣ сажз маарзд̇и, над̇т̇и д̇ад̇т̇а висан̇гзд̇о, убхиннамби барааж̇аяод̇и яож̇анаа. звам̣ ‘‘расса’’нд̇иаад̣̇исаб̣б̣абад̣̇зхиби бажжзгам̣ яож̇анаа гаад̇аб̣б̣аа. анияамзд̇ваад̇и висан̇гзд̇аабхаавасса хзд̇уд̣̇ассанам̣. звагааро ваагяаалан̇гааро. д̇ад̇т̇аад̇и аан̣ад̇д̇игаббаяог̇з. ‘‘убхиннамби барааж̇аяо’’д̇и вуд̇д̇ад̇д̇аа аан̣аабагам̣ винаа ан̃н̃ам̣ яат̇аавуд̇д̇агкан̣ам̣ мануссавиг̇г̇ахам̣ ‘‘яам̣ гин̃жи д̇аад̣̇иса’’нд̇и иминаа д̣̇ассзд̇и.
280-1. Ettāvatā āṇattiniyāmakaniddesaṃ dassetvā idāni dīghādiliṅgavasenāpi sambhavantaṃ visaṅketaṃ dassetumāha ‘‘dīgha’’ntiādi. ‘‘Dīghaṃ…pe… thūlaṃ mārehīti aniyametvā āṇāpetī’’ti (pārā. aṭṭha. 2.174) aṭṭhakathāvacanato eva-kāraṃ vinā ‘‘dīghaṃ mārehī’’ti aniyametvā kenaci yo āṇatto hoti, sopi āṇatto yaṃ kiñci tādisaṃ sace māreti, natthi tattha visaṅketo, ubhinnampi parājayoti yojanā. Evaṃ ‘‘rassa’’ntiādisabbapadehipi paccekaṃ yojanā kātabbā. Aniyametvāti visaṅketābhāvassa hetudassanaṃ. Evakāro vākyālaṅkāro. Tatthāti āṇattikappayoge. ‘‘Ubhinnampi parājayo’’ti vuttattā āṇāpakaṃ vinā aññaṃ yathāvuttakkhaṇaṃ manussaviggahaṃ ‘‘yaṃ kiñci tādisa’’nti iminā dasseti.
сажз аан̣аабаго аан̣аабзд̇ваа ад̇д̇аанамзва маарзд̇и, аан̣аабаго д̣̇уггадам̣ аабаж̇ж̇ид̇ваа марад̇и, аан̣ад̇д̇асса баарааж̇игам̣. аан̣аабагзна ад̇д̇аанамуд̣̇д̣̇исса аан̣ад̇д̇ияаа гад̇ааяа аан̣ад̇д̇о аж̇аанид̇ваа д̇аад̣̇исам̣ ан̃н̃ам̣ маарзд̇и, огаасасса анияамид̇ад̇д̇аа аан̣аабаго мужжад̇и, ид̇аро гаммунаа б̣аж̇жхад̇и. яад̣̇и ‘‘амугасмим̣ рад̇д̇идтаанз ваа д̣̇иваадтаанз ваа нисиннам̣ ийд̣̇исам̣ маарзхий’’д̇и огаасам̣ нияамзд̇ваа аан̣аабзд̇и, д̇ад̇т̇а аан̣аабагад̇о ан̃н̃асмим̣ маарид̇з убхиннамби баарааж̇игам̣. д̇ад̇о б̣ахи маарид̇з вад̇хагассзва гаммаб̣анд̇хо. аан̣аабаго ад̇д̇аанамзва уд̣̇д̣̇исса аан̣аабзд̇и, ид̇аро жа д̇амзва д̇ад̇т̇а маарзд̇и, аан̣аабагасса д̣̇уггадам̣, аан̣ад̇д̇асса баарааж̇игам̣. сажз ан̃н̃ад̇т̇а маарзд̇и, мууладто мужжад̇и. аж̇аанид̇ваа ан̃н̃ам̣ д̇ад̇т̇а ваа ан̃н̃ад̇т̇а ваа маарзд̇и, вад̇хаго баарааж̇игам̣ аабаж̇ж̇ад̇и, мууладто мужжад̇и. аананд̇арияавад̇т̇умхи аананд̇ариязна сад̣̇д̇хим̣ яож̇зд̇аб̣б̣ам̣.
Sace āṇāpako āṇāpetvā attānameva māreti, āṇāpako dukkaṭaṃ āpajjitvā marati, āṇattassa pārājikaṃ. Āṇāpakena attānamuddissa āṇattiyā katāya āṇatto ajānitvā tādisaṃ aññaṃ māreti, okāsassa aniyamitattā āṇāpako muccati, itaro kammunā bajjhati. Yadi ‘‘amukasmiṃ rattiṭṭhāne vā divāṭṭhāne vā nisinnaṃ īdisaṃ mārehī’’ti okāsaṃ niyametvā āṇāpeti, tattha āṇāpakato aññasmiṃ mārite ubhinnampi pārājikaṃ. Tato bahi mārite vadhakasseva kammabandho. Āṇāpako attānameva uddissa āṇāpeti, itaro ca tameva tattha māreti, āṇāpakassa dukkaṭaṃ, āṇattassa pārājikaṃ. Sace aññattha māreti, mūlaṭṭho muccati. Ajānitvā aññaṃ tattha vā aññattha vā māreti, vadhako pārājikaṃ āpajjati, mūlaṭṭho muccati. Ānantariyavatthumhi ānantariyena saddhiṃ yojetabbaṃ.
282. яо мануссам̣ ган̃жи уд̣̇д̣̇исса сажз обаад̇ам̣ кан̣ад̇и, д̇ат̇аа обаад̇ам̣ кан̣анд̇асса д̇асса д̣̇уггадам̣ наама аабад̇д̇и ход̇ийд̇и аж̇жхаахаараяож̇анаа. яож̇анаа жа наамзсаа яат̇ааруд̇аяож̇анаа, аж̇жхаахаараяож̇анаад̇и д̣̇увид̇хаа. д̇ад̇т̇а баатааг̇ад̇абад̣̇аанамзва яож̇анаа яат̇ааруд̇аяож̇анаа, уунабууран̣ад̇т̇амаж̇жхаахаарабад̣̇зхи саха баатааг̇ад̇абад̣̇аанам̣ яож̇анаа аж̇жхаахаараяож̇анаад̇и взд̣̇ид̇аб̣б̣аа. ‘‘кан̣анд̇асса жа обаад̇а’’нд̇и бод̇т̇агзсу баато д̣̇иссад̇и. ‘‘кан̣анд̇асса д̇ат̇обаад̇а’нд̇и баато сунд̣̇аро’’д̇и ниссанд̣̇зхз вуд̇д̇ам̣. ‘‘аавааданд̇и зд̇асса ‘обаад̇а’нд̇и барияааяо’’д̇и жа вуд̇д̇ам̣. д̇ад̇оби –
282. Yo manussaṃ kañci uddissa sace opātaṃ khaṇati, tathā opātaṃ khaṇantassa tassa dukkaṭaṃ nāma āpatti hotīti ajjhāhārayojanā. Yojanā ca nāmesā yathārutayojanā, ajjhāhārayojanāti duvidhā. Tattha pāṭhāgatapadānameva yojanā yathārutayojanā, ūnapūraṇatthamajjhāhārapadehi saha pāṭhāgatapadānaṃ yojanā ajjhāhārayojanāti veditabbā. ‘‘Khaṇantassaca opāta’’nti potthakesu pāṭho dissati. ‘‘Khaṇantassa tathopāta’nti pāṭho sundaro’’ti nissandehe vuttaṃ. ‘‘Āvāṭanti etassa ‘opāta’nti pariyāyo’’ti ca vuttaṃ. Tatopi –
‘‘мануссам̣ ган̃жи уд̣̇д̣̇исса;
‘‘Manussaṃ kañci uddissa;
яо жз кан̣ад̇иваадагам̣;
Yo ce khaṇativāṭakaṃ;
кан̣ад̇о д̇ам̣ д̇ат̇аа д̇асса;
Khaṇato taṃ tathā tassa;
ход̇и аабад̇д̇и д̣̇уггада’’нд̇и. –
Hoti āpatti dukkaṭa’’nti. –
баато сунд̣̇арад̇аро. ж̇аад̇абат̇авим̣ кан̣анд̇асса баарааж̇игабаяог̇ад̇д̇аа баяог̇аг̇ан̣анааяа д̣̇уггадам̣.
Pāṭho sundarataro. Jātapathaviṃ khaṇantassa pārājikapayogattā payogagaṇanāya dukkaṭaṃ.
283. д̇ад̇т̇аад̇и д̇асмим̣ ааваадз. д̇ассаад̇и бад̇ид̇асса мануссавиг̇г̇ахасса. д̣̇угкассуббад̇д̇ияаад̇и д̣̇угкуббад̇д̇ихзд̇у. д̇ассаад̇и язна ааваадо кад̇о, д̇асса бхигкуно. бад̇ид̇ваа со жз марад̇и, д̇асмим̣ мад̇з д̇асса бхигкуно баарааж̇игам̣ бхавзд̇и яож̇анаа.
283.Tatthāti tasmiṃ āvāṭe. Tassāti patitassa manussaviggahassa. Dukkhassuppattiyāti dukkhuppattihetu. Tassāti yena āvāṭo khato, tassa bhikkhuno. Patitvā so ce marati, tasmiṃ mate tassa bhikkhuno pārājikaṃ bhaveti yojanā.
284. ан̃н̃асминд̇и яам̣ самуд̣̇д̣̇исса ааваадо кад̇о, д̇ад̇о ан̃н̃асмим̣. ануд̣̇д̣̇иссаганд̇и гирияаависзсанам̣, ануд̣̇д̣̇иссагам̣ гад̇ваад̇и ад̇т̇о. обаад̇ависзсанам̣ жз, ‘‘ануд̣̇д̣̇иссаго обаад̇о’’д̇и бад̣̇ажчзд̣̇о. ‘‘аг̇г̇амагкааяад̇ий’’д̇иаад̣̇ийсу (сам̣. ни. 5.139; а. ни. 4.34; 10.15; ид̇иву. 90; нзд̇д̇и. 170) вияа о-гаарадтаанз а-гааро, ма-гаарааг̇амо жа д̣̇адтаб̣б̣о, анод̣̇иссаго обаад̇о кад̇о ход̇ийд̇и ад̇т̇о.
284.Aññasminti yaṃ samuddissa āvāṭo khato, tato aññasmiṃ. Anuddissakanti kiriyāvisesanaṃ, anuddissakaṃ katvāti attho. Opātavisesanaṃ ce, ‘‘anuddissako opāto’’ti padacchedo. ‘‘Aggamakkhāyatī’’tiādīsu (saṃ. ni. 5.139; a. ni. 4.34; 10.15; itivu. 90; netti. 170) viya o-kāraṭṭhāne a-kāro, ma-kārāgamo ca daṭṭhabbo, anodissako opāto khato hotīti attho.
285. ‘‘зд̇т̇а бад̇ид̇ваа яо гожи марад̇уу’’д̇и анод̣̇иссаго обаад̇о сажз кад̇о ход̇и, яад̇д̇агаа нибад̇ид̇ваа маранд̇и жз, асса д̇ад̇д̇агаа д̣̇осаа хонд̇ийд̇и яож̇анаа. ‘‘яо гожий’’д̇и иминаа ад̇д̇ано маад̇аабид̇аро жа сан̇г̇ахид̇аа. д̣̇осаад̇и гаммаб̣анд̇хад̣̇осаа, баарааж̇игам̣ бана згамзва. ассаад̇и язна анод̣̇исса обаад̇о кад̇о, д̇асса.
285. ‘‘Ettha patitvā yo koci maratū’’ti anodissako opāto sace khato hoti, yattakā nipatitvā maranti ce, assa tattakā dosā hontīti yojanā. ‘‘Yo kocī’’ti iminā attano mātāpitaro ca saṅgahitā. Dosāti kammabandhadosā, pārājikaṃ pana ekameva. Assāti yena anodissa opāto khato, tassa.
286. аананд̇арияавад̇т̇усмим̣ мад̇зд̇и баатасзсо, ‘‘д̇ад̇т̇а бад̇ид̇ваа’’д̇и ад̇хигааро, араханд̇з, маад̇ари, бид̇ари жа д̇асмим̣ бад̇ид̇ваа мад̇з гаалагад̇зд̇и ад̇т̇о. аананд̇арияаганд̇и зд̇т̇а сагад̇т̇з, гужчид̇з , сан̃н̃ааяам̣ ваа га-бажжаяо д̣̇адтаб̣б̣о. ‘‘д̇ат̇аа’’д̇и иминаа ‘‘аананд̇арияавад̇т̇усми’’нд̇и имасмим̣ самаасабад̣̇з аваяавабхууд̇амби ‘‘вад̇т̇усми’’нд̇и ид̣̇ан̃жа ‘‘д̇ад̇т̇а бад̇ид̇ваа мад̇з’’д̇и ид̣̇ан̃жа аагад̣дхад̇и. т̇уллажжаяаад̣̇ийнам̣ вад̇т̇усмим̣ д̇ад̇т̇а бад̇ид̇ваа мад̇з т̇уллажжаяаад̣̇аяо хонд̇ийд̇и яож̇анаа. д̇асмим̣ ааваадз бад̇ид̇ваа яагкаад̣̇ийсу мад̇зсу, баарааж̇игавад̇т̇уно д̣̇угкуббад̇д̇ияан̃жа т̇уллажжаяам̣, мануссавиг̇г̇ахз мад̇з баарааж̇игам̣, д̇иражчаанз мад̇з баажид̇д̇ияанд̇и вуд̇д̇ам̣ ход̇и.
286.Ānantariyavatthusmiṃ mateti pāṭhaseso, ‘‘tattha patitvā’’ti adhikāro, arahante, mātari, pitari ca tasmiṃ patitvā mate kālakateti attho. Ānantariyakanti ettha sakatthe, kucchite , saññāyaṃ vā ka-paccayo daṭṭhabbo. ‘‘Tathā’’ti iminā ‘‘ānantariyavatthusmi’’nti imasmiṃ samāsapade avayavabhūtampi ‘‘vatthusmi’’nti idañca ‘‘tattha patitvā mate’’ti idañca ākaḍḍhati. Thullaccayādīnaṃ vatthusmiṃ tattha patitvā mate thullaccayādayo hontīti yojanā. Tasmiṃ āvāṭe patitvā yakkhādīsu matesu, pārājikavatthuno dukkhuppattiyañca thullaccayaṃ, manussaviggahe mate pārājikaṃ, tiracchāne mate pācittiyanti vuttaṃ hoti.
287. баан̣аад̇ибаад̇аа д̣̇взд̇и д̣̇виннам̣ мад̇ад̇д̇аа д̣̇вз баан̣аад̇ибаад̇аа, згзна баарааж̇игам̣, ид̇арзна гаммаб̣анд̇хоязва. зговзгзгад̇хам̣санзд̇и маад̇у ваа д̣̇аарагасса ваа маран̣з зго баан̣аад̇ибаад̇ова.
287.Pāṇātipātā dveti dvinnaṃ matattā dve pāṇātipātā, ekena pārājikaṃ, itarena kammabandhoyeva. Ekovekekadhaṃsaneti mātu vā dārakassa vā maraṇe eko pāṇātipātova.
288. жорзхи ануб̣ад̣̇д̇хо зд̇т̇а ааваадз бад̇ид̇ваа мариссад̇и жз, обаад̇акан̣агассзва баарааж̇игам̣ ход̇и гираад̇и яож̇анаа. гираад̇и ануссаванз аружисуужагам̣.
288. Corehi anubaddho ettha āvāṭe patitvā marissati ce, opātakhaṇakasseva pārājikaṃ hoti kirāti yojanā. Kirāti anussavane arucisūcakaṃ.
289-90. взрино бхигкуд̇о ан̃н̃з взрибуг̇г̇алаа. д̇ад̇т̇а д̇асмим̣ обаад̇з сажз мануссам̣ баад̇зд̇ваа маарзнд̇и, д̇ат̇аа взрино д̇ад̇т̇а саяамзва бад̇ид̇ам̣ мануссам̣ б̣ахи нийхарид̇ваа сажз маарзнд̇и, д̇ад̇т̇а обабаад̇игаа мануссаа обаад̇з ниб̣б̣ад̇д̇ид̇ваа д̇ад̇о нигканд̇ум̣ асаггонд̇аа мад̇аа жз сияум̣, саб̣б̣ад̇т̇а жа яат̇аавуд̇д̇асаб̣б̣аваарзсу обаад̇акан̣агассзва барааж̇аяод̇и яож̇анаа. ниб̣б̣ад̇д̇ид̇ваа хийд̇и зд̇т̇а хийд̇и бад̣̇абууран̣з. яад̇т̇а яад̇т̇а нибаад̇асад̣̇д̣̇аанам̣ ад̇т̇о на д̣̇ассид̇о, д̇ад̇т̇а д̇ад̇т̇а бад̣̇абууран̣амад̇д̇ад̇аа взд̣̇ид̇аб̣б̣аа.
289-90.Verino bhikkhuto aññe veripuggalā. Tattha tasmiṃ opāte sace manussaṃ pātetvā mārenti, tathā verino tattha sayameva patitaṃ manussaṃ bahi nīharitvā sace mārenti, tattha opapātikā manussā opāte nibbattitvā tato nikkhantuṃ asakkontā matā ce siyuṃ, sabbattha ca yathāvuttasabbavāresu opātakhaṇakasseva parājayoti yojanā. Nibbattitvā hīti ettha hīti padapūraṇe. Yattha yattha nipātasaddānaṃ attho na dassito, tattha tattha padapūraṇamattatā veditabbā.
291. яагкаад̣̇аяод̇и аад̣̇и-сад̣̇д̣̇зна д̇иражчаанаанам̣ сан̇г̇ахо. вад̇т̇увасаад̇и т̇уллажжаяабаажид̇д̇ияаанам̣ вад̇т̇убхууд̇аяагкад̇иражчаанаанам̣ васаа. т̇уллажжаяаад̣̇аяод̇и аад̣̇и-сад̣̇д̣̇зна баажид̇д̇ияасан̇г̇ахо.
291.Yakkhādayoti ādi-saddena tiracchānānaṃ saṅgaho. Vatthuvasāti thullaccayapācittiyānaṃ vatthubhūtayakkhatiracchānānaṃ vasā. Thullaccayādayoti ādi-saddena pācittiyasaṅgaho.
293. аяам̣ наяод̇и ‘‘анаабад̇д̇ий’’д̇и яат̇аавуд̇д̇о наяо.
293.Ayaṃnayoti ‘‘anāpattī’’ti yathāvutto nayo.
294-5. б̣аж̇жханд̇ийд̇и сажз авассам̣ б̣аж̇жханд̇и. д̇ад̇т̇аад̇и д̇асмим̣ баасз. ‘‘хад̇т̇ад̇о муд̇д̇амад̇д̇асми’’нд̇и иминаа баяог̇асса ад̇т̇асаад̇хагад̇ам̣ д̣̇ийбзд̇и.
294-5.Bajjhantīti sace avassaṃ bajjhanti. Tatthāti tasmiṃ pāse. ‘‘Hatthato muttamattasmi’’nti iminā payogassa atthasādhakataṃ dīpeti.
296. яам̣ бана уд̣̇д̣̇исса баасо од̣д̣ид̇о, д̇ад̇о ан̃н̃асса б̣анд̇ханз д̇у анаабад̇д̇и багаасид̇аад̇и яож̇анаа.
296. Yaṃ pana uddissa pāso oḍḍito, tato aññassa bandhane tu anāpatti pakāsitāti yojanā.
297. муд̇хаа ваабийд̇и амуулзна вааби. мууладтассзваад̇и баасагаарагассзва. гаммаб̣анд̇ход̇и баан̣аад̇ибаад̇о. б̣аж̇жхад̇и зд̇знаад̇и б̣анд̇хо, гаммамзва б̣анд̇хо гаммаб̣анд̇хо. баарааж̇игамад̇д̇з вад̇д̇аб̣б̣зби яаава со вад̇д̇ад̇и, д̇аава д̇ад̇т̇а б̣аж̇жхид̇ваа мад̇асад̇д̇зсу батамамад̇асса васзна баарааж̇игам̣, авасзсаанам̣ баан̣аад̇ибаад̇асан̇каад̇асса агусалараасино самбхавад̇о д̇ам̣ саб̣б̣ам̣ сан̇г̇ахзд̇ваа сааман̃н̃зна д̣̇ваяамби д̣̇ассзд̇умааха ‘‘гаммаб̣анд̇хо’’д̇и.
297.Mudhā vāpīti amūlena vāpi. Mūlaṭṭhassevāti pāsakārakasseva. Kammabandhoti pāṇātipāto. Bajjhati etenāti bandho, kammameva bandho kammabandho. Pārājikamatte vattabbepi yāva so vattati, tāva tattha bajjhitvā matasattesu paṭhamamatassa vasena pārājikaṃ, avasesānaṃ pāṇātipātasaṅkhātassa akusalarāsino sambhavato taṃ sabbaṃ saṅgahetvā sāmaññena dvayampi dassetumāha ‘‘kammabandho’’ti.
298. ‘‘сажз язна лад̣̇д̇хо, со уг̇г̇ал̣ид̇ам̣ ваа баасам̣ сан̣табзд̇и, д̇асса бассзна ваа г̇ажчанд̇з д̣̇исваа вад̇им̣ гад̇ваа саммукз бавзсзд̇и, т̇ад̣̇д̇хад̇арам̣ ваа баасаяадтим̣ табзд̇и, д̣̇ал̣хад̇арам̣ ваа баасараж̇ж̇ум̣ б̣анд̇хад̇и, т̇ирад̇арам̣ ваа каан̣угам̣ аагодзд̇ий’’д̇и (баараа. адта. 2.176) адтагат̇ааг̇ад̇ам̣ винижчаяам̣ сан̇г̇ахид̇умааха ‘‘баасамуг̇г̇ал̣ид̇амби ваа’’д̇и. зд̇т̇а авуд̇д̇асамужжаяад̇т̇зна би-сад̣̇д̣̇зна ‘‘сан̣табзд̇ий’’д̇иаад̣̇игаа ‘‘б̣анд̇хад̇ий’’д̇и д̣̇ассид̇агирияаавасаанаа баяог̇аа д̣̇ассид̇аа. т̇ирам̣ ваабийд̇и зд̇т̇а аби-сад̣̇д̣̇о адтагат̇ааяа авасидтам̣ ‘‘каан̣угам̣ аагодзд̇ий’’д̇и гирияам̣ самужжинод̇и убхаяад̇т̇аби багааранд̇аравигаббад̇т̇ад̇д̇аад̇и г̇ахзд̇аб̣б̣аа. званд̇и звам̣ сад̇и. язна баасо лад̣̇д̇хо, д̇знааби звам̣ баасз гад̇ависзсз сад̇ийд̇и вуд̇д̇ам̣ ход̇и. убхиннанд̇и баасагаарагасса жа ид̣̇аани лабхид̇ваа бадиж̇аг̇г̇анд̇асса жаад̇и убхаязсам̣.
298. ‘‘Sace yena laddho, so uggaḷitaṃ vā pāsaṃ saṇṭhapeti, tassa passena vā gacchante disvā vatiṃ katvā sammukhe paveseti, thaddhataraṃ vā pāsayaṭṭhiṃ ṭhapeti, daḷhataraṃ vā pāsarajjuṃ bandhati, thirataraṃ vā khāṇukaṃ ākoṭetī’’ti (pārā. aṭṭha. 2.176) aṭṭhakathāgataṃ vinicchayaṃ saṅgahitumāha ‘‘pāsamuggaḷitampi vā’’ti. Ettha avuttasamuccayatthena pi-saddena ‘‘saṇṭhapetī’’tiādikā ‘‘bandhatī’’ti dassitakiriyāvasānā payogā dassitā. Thiraṃ vāpīti ettha api-saddo aṭṭhakathāya avasiṭṭhaṃ ‘‘khāṇukaṃ ākoṭetī’’ti kiriyaṃ samuccinoti ubhayatthapi pakārantaravikappatthattāti gahetabbā. Evanti evaṃ sati. Yena pāso laddho, tenāpi evaṃ pāse katavisese satīti vuttaṃ hoti. Ubhinnanti pāsakārakassa ca idāni labhitvā paṭijaggantassa cāti ubhayesaṃ.
299-300. яод̇и баасагаараго, лад̣̇д̇хабаасагод̇и имзсам̣ яо гожи. уг̇г̇ал̣аабзд̇ваад̇и вигхаадзд̇ваа, яат̇аа д̇ад̇т̇а баан̣ино на б̣аж̇жханд̇и, звам̣ гад̇ваад̇и ад̇т̇о. д̇ад̇т̇а жаад̇и буна сан̣табид̇з баасз жа. го вимужжад̇и? язна лад̣̇д̇хо, со.
299-300.Yoti pāsakārako, laddhapāsakoti imesaṃ yo koci. Uggaḷāpetvāti vighāṭetvā, yathā tattha pāṇino na bajjhanti, evaṃ katvāti attho. Tattha cāti puna saṇṭhapite pāse ca. Ko vimuccati? Yena laddho, so.
301-2. г̇обзд̇ваад̇и г̇обанахзд̇у могко на ход̇ийд̇и яож̇анаа. ‘‘сийхам̣ д̣̇исваа бхаяам̣ ход̇ий’’д̇иаад̣̇ийсу вияа хзд̇умхи д̇ваа-бажжаяо д̣̇адтаб̣б̣о. д̇аман̃н̃о…бз… на жа мужжад̇ийд̇и зд̇т̇а на жаад̇и нзва. наасзд̇ваа саб̣б̣асо ваад̇и со яат̇аа яасса гассажи сад̇д̇асса винаасобагаран̣ам̣ на ход̇и, д̇ат̇аа чинд̣̇анаад̣̇ийхи наасзд̇ваа. д̇ам̣ баасаяадтим̣. го вимужжад̇и? баасагаараго.
301-2.Gopetvāti gopanahetu mokkho na hotīti yojanā. ‘‘Sīhaṃ disvā bhayaṃ hotī’’tiādīsu viya hetumhi tvā-paccayo daṭṭhabbo. Tamañño…pe… na ca muccatīti ettha na cāti neva. Nāsetvā sabbaso vāti so yathā yassa kassaci sattassa vināsopakaraṇaṃ na hoti, tathā chindanādīhi nāsetvā. Taṃ pāsayaṭṭhiṃ. Ko vimuccati? Pāsakārako.
303. суулам̣ робзнд̇ассаад̇и суулам̣ никан̣анд̇асса. саж̇ж̇знд̇ассаад̇и сан̣табзнд̇асса.
303.Sūlaṃropentassāti sūlaṃ nikhaṇantassa. Sajjentassāti saṇṭhapentassa.
304. асан̃жижжаад̇и зд̇т̇а ‘‘гад̇зна баяог̇знаа’’д̇и баатасзсо, ‘‘мад̇зби анаабад̇д̇ий’’д̇и зд̇зхи самб̣анд̇хо. ‘‘иминаахам̣ убаггамзна имам̣ маарзссаамий’’д̇и ажзд̇зд̇ваа абагаббзд̇ваа авад̇хагажзд̇ано худ̇ваа гад̇зна ан̃н̃ад̇т̇игзнаби убаггамзна барз мад̇зби аабад̇д̇и над̇т̇ийд̇и ад̇т̇о, мусалуссаабанаад̣̇ивад̇т̇уусу (баараа. 180) вияа аяам̣ сад̇д̇од̇исан̃н̃ий худ̇ваа ‘‘иминаа убаггамзна имам̣ маарзссаамий’’д̇и вийд̇иггамасамудтаабагажзд̇анаасамбаяуд̇д̇авигаббарахид̇о худ̇ваа ан̃н̃ад̇т̇игзна баяог̇зна мануссз мад̇зби баарааж̇игам̣ над̇т̇ийд̇и вуд̇д̇ам̣ ход̇и.
304.Asañciccāti ettha ‘‘katena payogenā’’ti pāṭhaseso, ‘‘matepi anāpattī’’ti etehi sambandho. ‘‘Imināhaṃ upakkamena imaṃ māressāmī’’ti acetetvā apakappetvā avadhakacetano hutvā katena aññatthikenapi upakkamena pare matepi āpatti natthīti attho, musalussāpanādivatthūsu (pārā. 180) viya ayaṃ sattotisaññī hutvā ‘‘iminā upakkamena imaṃ māressāmī’’ti vītikkamasamuṭṭhāpakacetanāsampayuttavikapparahito hutvā aññatthikena payogena manusse matepi pārājikaṃ natthīti vuttaṃ hoti.
аж̇аананд̇ассаад̇и ‘‘иминаа аяам̣ мариссад̇ий’’д̇и аж̇аананд̇асса убаггамзна барз мад̇зби анаабад̇д̇и, висаг̇ад̇абин̣д̣абаад̇авад̇т̇умхи (баараа. 181) вияа ‘‘ид̣̇ам̣ гааран̣а’’нд̇и аж̇аанид̇ваа гад̇зна мануссз мад̇зби анаабад̇д̇ийд̇и вуд̇д̇ам̣ ход̇и. ‘‘д̇ат̇аа’’д̇и иминаа ‘‘анаабад̇д̇ий’’д̇и аагад̣дхад̇и. амаран̣ажид̇д̇асса амаран̣ижчаасахид̇ажид̇д̇асса убаггамзна барз мад̇зби анаабад̇д̇и вуд̣̇д̇хабаб̣б̣аж̇ид̇аад̣̇ивад̇т̇уусу (баараа. 180) вияаад̇и ад̇т̇о. уммад̇д̇агаад̣̇аяо вуд̇д̇асаруубааязва.
Ajānantassāti ‘‘iminā ayaṃ marissatī’’ti ajānantassa upakkamena pare matepi anāpatti, visagatapiṇḍapātavatthumhi (pārā. 181) viya ‘‘idaṃ kāraṇa’’nti ajānitvā katena manusse matepi anāpattīti vuttaṃ hoti. ‘‘Tathā’’ti iminā ‘‘anāpattī’’ti ākaḍḍhati. Amaraṇacittassa amaraṇicchāsahitacittassa upakkamena pare matepi anāpatti vuddhapabbajitādivatthūsu (pārā. 180) viyāti attho. Ummattakādayo vuttasarūpāyeva.
305. ‘‘мануссабаан̣имхий’’д̇и иминаа мануссабхааво ан̇г̇абхаавзна д̣̇ассид̇о. ‘‘сажасса жид̇д̇ам̣ маран̣уубасам̣хид̇а’’нд̇и иминаа маран̣уубасам̣хид̇ажид̇д̇ад̇аа д̣̇ассид̇аа.
305.‘‘Manussapāṇimhī’’ti iminā manussabhāvo aṅgabhāvena dassito. ‘‘Sacassa cittaṃ maraṇūpasaṃhita’’nti iminā maraṇūpasaṃhitacittatā dassitā.
ид̇и винаяад̇т̇асаарасанд̣̇ийбанияаа
Iti vinayatthasārasandīpaniyā
винаяавинижчаяаван̣н̣анааяа
Vinayavinicchayavaṇṇanāya
д̇ад̇ияабаарааж̇игагат̇ааван̣н̣анаа нидтид̇аа.
Tatiyapārājikakathāvaṇṇanā niṭṭhitā.
