| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
৩. ততিযপারাজিকং
3. Tatiyapārājikaṃ
৬৬৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনী সমগ্গেন সঙ্ঘেন উক্খিত্তং অরিট্ঠং ভিক্খুং গদ্ধবাধিপুব্বং অনুৰত্ততি। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা ভিক্খুনী সমগ্গেন সঙ্ঘেন উক্খিত্তং অরিট্ঠং ভিক্খুং গদ্ধবাধিপুব্বং অনুৰত্তিস্সতী’’তি…পে॰… সচ্চং কির, ভিক্খৰে, থুল্লনন্দা ভিক্খুনী সমগ্গেন সঙ্ঘেন উক্খিত্তং অরিট্ঠং ভিক্খুং গদ্ধবাধিপুব্বং অনুৰত্ততীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী সমগ্গেন সঙ্ঘেন উক্খিত্তং অরিট্ঠং ভিক্খুং গদ্ধবাধিপুব্বং অনুৰত্তিস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
668. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī samaggena saṅghena ukkhittaṃ ariṭṭhaṃ bhikkhuṃ gaddhabādhipubbaṃ anuvattati. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā bhikkhunī samaggena saṅghena ukkhittaṃ ariṭṭhaṃ bhikkhuṃ gaddhabādhipubbaṃ anuvattissatī’’ti…pe… saccaṃ kira, bhikkhave, thullanandā bhikkhunī samaggena saṅghena ukkhittaṃ ariṭṭhaṃ bhikkhuṃ gaddhabādhipubbaṃ anuvattatīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī samaggena saṅghena ukkhittaṃ ariṭṭhaṃ bhikkhuṃ gaddhabādhipubbaṃ anuvattissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
৬৬৯. ‘‘যা পন ভিক্খুনী সমগ্গেন সঙ্ঘেন উক্খিত্তং ভিক্খুং ধম্মেন ৰিনযেন সত্থুসাসনেন অনাদরং অপ্পটিকারং অকতসহাযং তমনুৰত্তেয্য, সা ভিক্খুনী ভিক্খুনীহি এৰমস্স ৰচনীযা – ‘এসো খো, অয্যে, ভিক্খু সমগ্গেন সঙ্ঘেন উক্খিত্তো ধম্মেন ৰিনযেন সত্থুসাসনেন অনাদরো অপ্পটিকারো অকতসহাযো, মায্যে, এতং ভিক্খুং অনুৰত্তী’তি। এৰঞ্চ সা ভিক্খুনী ভিক্খুনীহি ৰুচ্চমানা তথেৰ পগ্গণ্হেয্য, সা ভিক্খুনী ভিক্খুনীহি যাৰততিযং সমনুভাসিতব্বা তস্স পটিনিস্সগ্গায। যাৰততিযং চে সমনুভাসিযমানা তং পটিনিস্সজ্জেয্য, ইচ্চেতং কুসলং। নো চে পটিনিস্সজ্জেয্য, অযম্পি পারাজিকা হোতি অসংৰাসা উক্খিত্তানুৰত্তিকা’’তি।
669.‘‘Yā pana bhikkhunī samaggena saṅghena ukkhittaṃ bhikkhuṃ dhammena vinayena satthusāsanena anādaraṃ appaṭikāraṃ akatasahāyaṃ tamanuvatteyya, sā bhikkhunī bhikkhunīhi evamassa vacanīyā – ‘eso kho, ayye, bhikkhu samaggena saṅghena ukkhitto dhammena vinayena satthusāsanena anādaro appaṭikāro akatasahāyo, māyye, etaṃ bhikkhuṃ anuvattī’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya. Yāvatatiyaṃ ce samanubhāsiyamānā taṃ paṭinissajjeyya, iccetaṃ kusalaṃ. No ce paṭinissajjeyya, ayampi pārājikā hoti asaṃvāsā ukkhittānuvattikā’’ti.
৬৭০. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি।
670.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
সমগ্গো নাম সঙ্ঘো সমানসংৰাসকো সমানসীমাযং ঠিতো।
Samaggo nāma saṅgho samānasaṃvāsako samānasīmāyaṃ ṭhito.
উক্খিত্তো নাম আপত্তিযা অদস্সনে ৰা অপ্পটিকম্মে ৰা অপ্পটিনিস্সগ্গে ৰা 1 উক্খিত্তো।
Ukkhitto nāma āpattiyā adassane vā appaṭikamme vā appaṭinissagge vā 2 ukkhitto.
ধম্মেন ৰিনযেনাতি যেন ধম্মেন যেন ৰিনযেন।
Dhammena vinayenāti yena dhammena yena vinayena.
সত্থুসাসনেনাতি জিনসাসনেন বুদ্ধসাসনেন।
Satthusāsanenāti jinasāsanena buddhasāsanena.
অনাদরো নাম সঙ্ঘং ৰা গণং ৰা পুগ্গলং ৰা কম্মং ৰা নাদিযতি।
Anādaro nāma saṅghaṃ vā gaṇaṃ vā puggalaṃ vā kammaṃ vā nādiyati.
অপ্পটিকারো নাম উক্খিত্তো অনোসারিতো।
Appaṭikāro nāma ukkhitto anosārito.
অকতসহাযো নাম সমানসংৰাসকা ভিক্খূ ৰুচ্চন্তি সহাযা। সো তেহি সদ্ধিং নত্থি, তেন ৰুচ্চতি অকতসহাযোতি।
Akatasahāyo nāma samānasaṃvāsakā bhikkhū vuccanti sahāyā. So tehi saddhiṃ natthi, tena vuccati akatasahāyoti.
তমনুৰত্তেয্যাতি যংদিট্ঠিকো সো হোতি যংখন্তিকো যংরুচিকো, সাপি তংদিট্ঠিকা হোতি তংখন্তিকা তংরুচিকা।
Tamanuvatteyyāti yaṃdiṭṭhiko so hoti yaṃkhantiko yaṃruciko, sāpi taṃdiṭṭhikā hoti taṃkhantikā taṃrucikā.
সা ভিক্খুনীতি যা সা উক্খিত্তানুৰত্তিকা ভিক্খুনী।
Sā bhikkhunīti yā sā ukkhittānuvattikā bhikkhunī.
ভিক্খুনীহীতি অঞ্ঞাহি ভিক্খুনীহি। যা পস্সন্তি যা সুণন্তি তাহি ৰত্তব্বা – ‘‘এসো খো, অয্যে, ভিক্খু সমগ্গেন সঙ্ঘেন উক্খিত্তো ধম্মেন ৰিনযেন সত্থুসাসনেন অনাদরো অপ্পটিকারো অকতসহাযো। মায্যে, এতং ভিক্খুং অনুৰত্তী’’তি। দুতিযম্পি ৰত্তব্বা। ততিযম্পি ৰত্তব্বা। সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স। সুত্ৰা ন ৰদন্তি, আপত্তি দুক্কটস্স। সা ভিক্খুনী সঙ্ঘমজ্ঝম্পি আকড্ঢিত্ৰা ৰত্তব্বা – ‘‘এসো খো, অয্যে, ভিক্খু সমগ্গেন সঙ্ঘেন উক্খিত্তো ধম্মেন ৰিনযেন সত্থুসাসনেন অনাদরো অপ্পটিকারো অকতসহাযো। মায্যে, এতং ভিক্খুং অনুৰত্তী’’তি। দুতিযম্পি ৰত্তব্বা। ততিযম্পি ৰত্তব্বা। সচে পটিনিস্সজ্জতি, ইচ্চেতং কুসলং। নো চে পটিনিস্সজ্জতি, আপত্তি দুক্কটস্স। সা ভিক্খুনী সমনুভাসিতব্বা। এৰঞ্চ পন, ভিক্খৰে, সমনুভাসিতব্বা। ব্যত্তায ভিক্খুনিযা পটিবলায সঙ্ঘো ঞাপেতব্বো –
Bhikkhunīhīti aññāhi bhikkhunīhi. Yā passanti yā suṇanti tāhi vattabbā – ‘‘eso kho, ayye, bhikkhu samaggena saṅghena ukkhitto dhammena vinayena satthusāsanena anādaro appaṭikāro akatasahāyo. Māyye, etaṃ bhikkhuṃ anuvattī’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sutvā na vadanti, āpatti dukkaṭassa. Sā bhikkhunī saṅghamajjhampi ākaḍḍhitvā vattabbā – ‘‘eso kho, ayye, bhikkhu samaggena saṅghena ukkhitto dhammena vinayena satthusāsanena anādaro appaṭikāro akatasahāyo. Māyye, etaṃ bhikkhuṃ anuvattī’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ. No ce paṭinissajjati, āpatti dukkaṭassa. Sā bhikkhunī samanubhāsitabbā. Evañca pana, bhikkhave, samanubhāsitabbā. Byattāya bhikkhuniyā paṭibalāya saṅgho ñāpetabbo –
৬৭১. ‘‘সুণাতু মে, অয্যে, সঙ্ঘো। অযং ইত্থন্নামা ভিক্খুনী সমগ্গেন সঙ্ঘেন উক্খিত্তং ভিক্খুং ধম্মেন ৰিনযেন সত্থুসাসনেন অনাদরং অপ্পটিকারং অকতসহাযং তমনুৰত্ততি, সা তং ৰত্থুং ন পটিনিস্সজ্জতি। যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুনিং সমনুভাসেয্য তস্স ৰত্থুস্স পটিনিস্সগ্গায। এসা ঞত্তি।
671. ‘‘Suṇātu me, ayye, saṅgho. Ayaṃ itthannāmā bhikkhunī samaggena saṅghena ukkhittaṃ bhikkhuṃ dhammena vinayena satthusāsanena anādaraṃ appaṭikāraṃ akatasahāyaṃ tamanuvattati, sā taṃ vatthuṃ na paṭinissajjati. Yadi saṅghassa pattakallaṃ, saṅgho itthannāmaṃ bhikkhuniṃ samanubhāseyya tassa vatthussa paṭinissaggāya. Esā ñatti.
‘‘সুণাতু মে, অয্যে, সঙ্ঘো। অযং ইত্থন্নামা ভিক্খুনী সমগ্গেন সঙ্ঘেন উক্খিত্তং ভিক্খুং ধম্মেন ৰিনযেন সত্থুসাসনেন অনাদরং অপ্পটিকারং অকতসহাযং তমনুৰত্ততি। সা তং ৰত্থুং ন পটিনিস্সজ্জতি। সঙ্ঘো ইত্থন্নামং ভিক্খুনিং সমনুভাসতি তস্স ৰত্থুস্স পটিনিস্সগ্গায। যস্সা অয্যায খমতি ইত্থন্নামায ভিক্খুনিযা সমনুভাসনা তস্স ৰত্থুস্স পটিনিস্সগ্গায, সা তুণ্হস্স; যস্সা নক্খমতি, সা ভাসেয্য।
‘‘Suṇātu me, ayye, saṅgho. Ayaṃ itthannāmā bhikkhunī samaggena saṅghena ukkhittaṃ bhikkhuṃ dhammena vinayena satthusāsanena anādaraṃ appaṭikāraṃ akatasahāyaṃ tamanuvattati. Sā taṃ vatthuṃ na paṭinissajjati. Saṅgho itthannāmaṃ bhikkhuniṃ samanubhāsati tassa vatthussa paṭinissaggāya. Yassā ayyāya khamati itthannāmāya bhikkhuniyā samanubhāsanā tassa vatthussa paṭinissaggāya, sā tuṇhassa; yassā nakkhamati, sā bhāseyya.
‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি…পে॰…।
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘সমনুভট্ঠা সঙ্ঘেন ইত্থন্নামা ভিক্খুনী তস্স ৰত্থুস্স পটিনিস্সগ্গায। খমতি সঙ্ঘস্স, তস্মা তুণ্হী, এৰমেতং ধারযামী’’তি।
‘‘Samanubhaṭṭhā saṅghena itthannāmā bhikkhunī tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
ঞত্তিযা দুক্কটং, দ্ৰীহি কম্মৰাচাহি থুল্লচ্চযা, কম্মৰাচা পরিযোসানে আপত্তি পারাজিকস্স।
Ñattiyā dukkaṭaṃ, dvīhi kammavācāhi thullaccayā, kammavācā pariyosāne āpatti pārājikassa.
অযম্পীতি পুরিমাযো উপাদায ৰুচ্চতি।
Ayampīti purimāyo upādāya vuccati.
পারাজিকা হোতীতি সেয্যথাপি নাম পুথুসিলা দ্ৰেধা ভিন্না অপ্পটিসন্ধিকা হোতি, এৰমেৰ ভিক্খুনী যাৰততিযং সমনুভাসনায ন পটিনিস্সজ্জন্তী অস্সমণী হোতি অসক্যধীতা। তেন ৰুচ্চতি পারাজিকা হোতীতি।
Pārājikā hotīti seyyathāpi nāma puthusilā dvedhā bhinnā appaṭisandhikā hoti, evameva bhikkhunī yāvatatiyaṃ samanubhāsanāya na paṭinissajjantī assamaṇī hoti asakyadhītā. Tena vuccati pārājikā hotīti.
অসংৰাসাতি সংৰাসো নাম এককম্মং একুদ্দেসো সমসিক্খতা। এসো সংৰাসো নাম। সো তায সদ্ধিং নত্থি। তেন ৰুচ্চতি অসংৰাসাতি।
Asaṃvāsāti saṃvāso nāma ekakammaṃ ekuddeso samasikkhatā. Eso saṃvāso nāma. So tāya saddhiṃ natthi. Tena vuccati asaṃvāsāti.
৬৭২. ধম্মকম্মে ধম্মকম্মসঞ্ঞা ন পটিনিস্সজ্জতি, আপত্তি পারাজিকস্স। ধম্মকম্মে ৰেমতিকা ন পটিনিস্সজ্জতি, আপত্তি পারাজিকস্স। ধম্মকম্মে অধম্মকম্মসঞ্ঞা ন পটিনিস্সজ্জতি, আপত্তি পারাজিকস্স।
672. Dhammakamme dhammakammasaññā na paṭinissajjati, āpatti pārājikassa. Dhammakamme vematikā na paṭinissajjati, āpatti pārājikassa. Dhammakamme adhammakammasaññā na paṭinissajjati, āpatti pārājikassa.
অধম্মকম্মে ধম্মকম্মসঞ্ঞা, আপত্তি দুক্কটস্স। অধম্মকম্মে ৰেমতিকা, আপত্তি দুক্কটস্স। অধম্মকম্মে অধম্মকম্মসঞ্ঞা, আপত্তি দুক্কটস্স।
Adhammakamme dhammakammasaññā, āpatti dukkaṭassa. Adhammakamme vematikā, āpatti dukkaṭassa. Adhammakamme adhammakammasaññā, āpatti dukkaṭassa.
৬৭৩. অনাপত্তি অসমনুভাসন্তিযা, পটিনিস্সজ্জন্তিযা, উম্মত্তিকায…পে॰… আদিকম্মিকাযাতি।
673. Anāpatti asamanubhāsantiyā, paṭinissajjantiyā, ummattikāya…pe… ādikammikāyāti.
ততিযপারাজিকং সমত্তং।
Tatiyapārājikaṃ samattaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / ৩. ততিযপারাজিকসিক্খাপদৰণ্ণনা • 3. Tatiyapārājikasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ২. দুতিযপারাজিকসিক্খাপদৰণ্ণনা • 2. Dutiyapārājikasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৩. ততিযপারাজিকসিক্খাপদৰণ্ণনা • 3. Tatiyapārājikasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. ৰজ্জপটিচ্ছাদিকসিক্খাপদৰণ্ণনা • 2. Vajjapaṭicchādikasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৩. ততিযপারাজিকসিক্খাপদং • 3. Tatiyapārājikasikkhāpadaṃ
