| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༣. ཏཏིཡཔཱརཱཛིཀཾ
3. Tatiyapārājikaṃ
༦༦༨. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཐུལླནནྡཱ བྷིཀྑུནཱི སམགྒེན སངྒྷེན ཨུཀྑིཏྟཾ ཨརིཊྛཾ བྷིཀྑུཾ གདྡྷབཱདྷིཔུབྦཾ ཨནུཝཏྟཏི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻཱ ཐུལླནནྡཱ བྷིཀྑུནཱི སམགྒེན སངྒྷེན ཨུཀྑིཏྟཾ ཨརིཊྛཾ བྷིཀྑུཾ གདྡྷབཱདྷིཔུབྦཾ ཨནུཝཏྟིསྶཏཱི’’ཏི…པེ॰… སཙྩཾ ཀིར, བྷིཀྑཝེ, ཐུལླནནྡཱ བྷིཀྑུནཱི སམགྒེན སངྒྷེན ཨུཀྑིཏྟཾ ཨརིཊྛཾ བྷིཀྑུཾ གདྡྷབཱདྷིཔུབྦཾ ཨནུཝཏྟཏཱིཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, ཐུལླནནྡཱ བྷིཀྑུནཱི སམགྒེན སངྒྷེན ཨུཀྑིཏྟཾ ཨརིཊྛཾ བྷིཀྑུཾ གདྡྷབཱདྷིཔུབྦཾ ཨནུཝཏྟིསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
668. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī samaggena saṅghena ukkhittaṃ ariṭṭhaṃ bhikkhuṃ gaddhabādhipubbaṃ anuvattati. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā bhikkhunī samaggena saṅghena ukkhittaṃ ariṭṭhaṃ bhikkhuṃ gaddhabādhipubbaṃ anuvattissatī’’ti…pe… saccaṃ kira, bhikkhave, thullanandā bhikkhunī samaggena saṅghena ukkhittaṃ ariṭṭhaṃ bhikkhuṃ gaddhabādhipubbaṃ anuvattatīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī samaggena saṅghena ukkhittaṃ ariṭṭhaṃ bhikkhuṃ gaddhabādhipubbaṃ anuvattissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༦༦༩. ‘‘ཡཱ པན བྷིཀྑུནཱི སམགྒེན སངྒྷེན ཨུཀྑིཏྟཾ བྷིཀྑུཾ དྷམྨེན ཝིནཡེན སཏྠུསཱསནེན ཨནཱདརཾ ཨཔྤཊིཀཱརཾ ཨཀཏསཧཱཡཾ ཏམནུཝཏྟེཡྻ, སཱ བྷིཀྑུནཱི བྷིཀྑུནཱིཧི ཨེཝམསྶ ཝཙནཱིཡཱ – ‘ཨེསོ ཁོ, ཨཡྻེ, བྷིཀྑུ སམགྒེན སངྒྷེན ཨུཀྑིཏྟོ དྷམྨེན ཝིནཡེན སཏྠུསཱསནེན ཨནཱདརོ ཨཔྤཊིཀཱརོ ཨཀཏསཧཱཡོ, མཱཡྻེ, ཨེཏཾ བྷིཀྑུཾ ཨནུཝཏྟཱི’ཏི། ཨེཝཉྩ སཱ བྷིཀྑུནཱི བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻ, སཱ བྷིཀྑུནཱི བྷིཀྑུནཱིཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ། ཡཱཝཏཏིཡཾ ཙེ སམནུབྷཱསིཡམཱནཱ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ། ནོ ཙེ པཊིནིསྶཛྫེཡྻ, ཨཡམྤི པཱརཱཛིཀཱ ཧོཏི ཨསཾཝཱསཱ ཨུཀྑིཏྟཱནུཝཏྟིཀཱ’’ཏི།
669.‘‘Yā pana bhikkhunī samaggena saṅghena ukkhittaṃ bhikkhuṃ dhammena vinayena satthusāsanena anādaraṃ appaṭikāraṃ akatasahāyaṃ tamanuvatteyya, sā bhikkhunī bhikkhunīhi evamassa vacanīyā – ‘eso kho, ayye, bhikkhu samaggena saṅghena ukkhitto dhammena vinayena satthusāsanena anādaro appaṭikāro akatasahāyo, māyye, etaṃ bhikkhuṃ anuvattī’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya. Yāvatatiyaṃ ce samanubhāsiyamānā taṃ paṭinissajjeyya, iccetaṃ kusalaṃ. No ce paṭinissajjeyya, ayampi pārājikā hoti asaṃvāsā ukkhittānuvattikā’’ti.
༦༧༠. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
670.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
སམགྒོ ནཱམ སངྒྷོ སམཱནསཾཝཱསཀོ སམཱནསཱིམཱཡཾ ཋིཏོ།
Samaggo nāma saṅgho samānasaṃvāsako samānasīmāyaṃ ṭhito.
ཨུཀྑིཏྟོ ནཱམ ཨཱཔཏྟིཡཱ ཨདསྶནེ ཝཱ ཨཔྤཊིཀམྨེ ཝཱ ཨཔྤཊིནིསྶགྒེ ཝཱ 1 ཨུཀྑིཏྟོ།
Ukkhitto nāma āpattiyā adassane vā appaṭikamme vā appaṭinissagge vā 2 ukkhitto.
དྷམྨེན ཝིནཡེནཱཏི ཡེན དྷམྨེན ཡེན ཝིནཡེན།
Dhammena vinayenāti yena dhammena yena vinayena.
སཏྠུསཱསནེནཱཏི ཛིནསཱསནེན བུདྡྷསཱསནེན།
Satthusāsanenāti jinasāsanena buddhasāsanena.
ཨནཱདརོ ནཱམ སངྒྷཾ ཝཱ གཎཾ ཝཱ པུགྒལཾ ཝཱ ཀམྨཾ ཝཱ ནཱདིཡཏི།
Anādaro nāma saṅghaṃ vā gaṇaṃ vā puggalaṃ vā kammaṃ vā nādiyati.
ཨཔྤཊིཀཱརོ ནཱམ ཨུཀྑིཏྟོ ཨནོསཱརིཏོ།
Appaṭikāro nāma ukkhitto anosārito.
ཨཀཏསཧཱཡོ ནཱམ སམཱནསཾཝཱསཀཱ བྷིཀྑཱུ ཝུཙྩནྟི སཧཱཡཱ། སོ ཏེཧི སདྡྷིཾ ནཏྠི, ཏེན ཝུཙྩཏི ཨཀཏསཧཱཡོཏི།
Akatasahāyo nāma samānasaṃvāsakā bhikkhū vuccanti sahāyā. So tehi saddhiṃ natthi, tena vuccati akatasahāyoti.
ཏམནུཝཏྟེཡྻཱཏི ཡཾདིཊྛིཀོ སོ ཧོཏི ཡཾཁནྟིཀོ ཡཾརུཙིཀོ, སཱཔི ཏཾདིཊྛིཀཱ ཧོཏི ཏཾཁནྟིཀཱ ཏཾརུཙིཀཱ།
Tamanuvatteyyāti yaṃdiṭṭhiko so hoti yaṃkhantiko yaṃruciko, sāpi taṃdiṭṭhikā hoti taṃkhantikā taṃrucikā.
སཱ བྷིཀྑུནཱིཏི ཡཱ སཱ ཨུཀྑིཏྟཱནུཝཏྟིཀཱ བྷིཀྑུནཱི།
Sā bhikkhunīti yā sā ukkhittānuvattikā bhikkhunī.
བྷིཀྑུནཱིཧཱིཏི ཨཉྙཱཧི བྷིཀྑུནཱིཧི། ཡཱ པསྶནྟི ཡཱ སུཎནྟི ཏཱཧི ཝཏྟབྦཱ – ‘‘ཨེསོ ཁོ, ཨཡྻེ, བྷིཀྑུ སམགྒེན སངྒྷེན ཨུཀྑིཏྟོ དྷམྨེན ཝིནཡེན སཏྠུསཱསནེན ཨནཱདརོ ཨཔྤཊིཀཱརོ ཨཀཏསཧཱཡོ། མཱཡྻེ, ཨེཏཾ བྷིཀྑུཾ ཨནུཝཏྟཱི’’ཏི། དུཏིཡམྤི ཝཏྟབྦཱ། ཏཏིཡམྤི ཝཏྟབྦཱ། སཙེ པཊིནིསྶཛྫཏི, ཨིཙྩེཏཾ ཀུསལཾ; ནོ ཙེ པཊིནིསྶཛྫཏི, ཨཱཔཏྟི དུཀྐཊསྶ། སུཏྭཱ ན ཝདནྟི, ཨཱཔཏྟི དུཀྐཊསྶ། སཱ བྷིཀྑུནཱི སངྒྷམཛ྄ཛྷམྤི ཨཱཀཌྜྷིཏྭཱ ཝཏྟབྦཱ – ‘‘ཨེསོ ཁོ, ཨཡྻེ, བྷིཀྑུ སམགྒེན སངྒྷེན ཨུཀྑིཏྟོ དྷམྨེན ཝིནཡེན སཏྠུསཱསནེན ཨནཱདརོ ཨཔྤཊིཀཱརོ ཨཀཏསཧཱཡོ། མཱཡྻེ, ཨེཏཾ བྷིཀྑུཾ ཨནུཝཏྟཱི’’ཏི། དུཏིཡམྤི ཝཏྟབྦཱ། ཏཏིཡམྤི ཝཏྟབྦཱ། སཙེ པཊིནིསྶཛྫཏི, ཨིཙྩེཏཾ ཀུསལཾ། ནོ ཙེ པཊིནིསྶཛྫཏི, ཨཱཔཏྟི དུཀྐཊསྶ། སཱ བྷིཀྑུནཱི སམནུབྷཱསིཏབྦཱ། ཨེཝཉྩ པན, བྷིཀྑཝེ, སམནུབྷཱསིཏབྦཱ། བྱཏྟཱཡ བྷིཀྑུནིཡཱ པཊིབལཱཡ སངྒྷོ ཉཱཔེཏབྦོ –
Bhikkhunīhīti aññāhi bhikkhunīhi. Yā passanti yā suṇanti tāhi vattabbā – ‘‘eso kho, ayye, bhikkhu samaggena saṅghena ukkhitto dhammena vinayena satthusāsanena anādaro appaṭikāro akatasahāyo. Māyye, etaṃ bhikkhuṃ anuvattī’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sutvā na vadanti, āpatti dukkaṭassa. Sā bhikkhunī saṅghamajjhampi ākaḍḍhitvā vattabbā – ‘‘eso kho, ayye, bhikkhu samaggena saṅghena ukkhitto dhammena vinayena satthusāsanena anādaro appaṭikāro akatasahāyo. Māyye, etaṃ bhikkhuṃ anuvattī’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ. No ce paṭinissajjati, āpatti dukkaṭassa. Sā bhikkhunī samanubhāsitabbā. Evañca pana, bhikkhave, samanubhāsitabbā. Byattāya bhikkhuniyā paṭibalāya saṅgho ñāpetabbo –
༦༧༡. ‘‘སུཎཱཏུ མེ, ཨཡྻེ, སངྒྷོ། ཨཡཾ ཨིཏྠནྣཱམཱ བྷིཀྑུནཱི སམགྒེན སངྒྷེན ཨུཀྑིཏྟཾ བྷིཀྑུཾ དྷམྨེན ཝིནཡེན སཏྠུསཱསནེན ཨནཱདརཾ ཨཔྤཊིཀཱརཾ ཨཀཏསཧཱཡཾ ཏམནུཝཏྟཏི, སཱ ཏཾ ཝཏྠུཾ ན པཊིནིསྶཛྫཏི། ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཾ བྷིཀྑུནིཾ སམནུབྷཱསེཡྻ ཏསྶ ཝཏྠུསྶ པཊིནིསྶགྒཱཡ། ཨེསཱ ཉཏྟི།
671. ‘‘Suṇātu me, ayye, saṅgho. Ayaṃ itthannāmā bhikkhunī samaggena saṅghena ukkhittaṃ bhikkhuṃ dhammena vinayena satthusāsanena anādaraṃ appaṭikāraṃ akatasahāyaṃ tamanuvattati, sā taṃ vatthuṃ na paṭinissajjati. Yadi saṅghassa pattakallaṃ, saṅgho itthannāmaṃ bhikkhuniṃ samanubhāseyya tassa vatthussa paṭinissaggāya. Esā ñatti.
‘‘སུཎཱཏུ མེ, ཨཡྻེ, སངྒྷོ། ཨཡཾ ཨིཏྠནྣཱམཱ བྷིཀྑུནཱི སམགྒེན སངྒྷེན ཨུཀྑིཏྟཾ བྷིཀྑུཾ དྷམྨེན ཝིནཡེན སཏྠུསཱསནེན ཨནཱདརཾ ཨཔྤཊིཀཱརཾ ཨཀཏསཧཱཡཾ ཏམནུཝཏྟཏི། སཱ ཏཾ ཝཏྠུཾ ན པཊིནིསྶཛྫཏི། སངྒྷོ ཨིཏྠནྣཱམཾ བྷིཀྑུནིཾ སམནུབྷཱསཏི ཏསྶ ཝཏྠུསྶ པཊིནིསྶགྒཱཡ། ཡསྶཱ ཨཡྻཱཡ ཁམཏི ཨིཏྠནྣཱམཱཡ བྷིཀྑུནིཡཱ སམནུབྷཱསནཱ ཏསྶ ཝཏྠུསྶ པཊིནིསྶགྒཱཡ, སཱ ཏུཎྷསྶ; ཡསྶཱ ནཀྑམཏི, སཱ བྷཱསེཡྻ།
‘‘Suṇātu me, ayye, saṅgho. Ayaṃ itthannāmā bhikkhunī samaggena saṅghena ukkhittaṃ bhikkhuṃ dhammena vinayena satthusāsanena anādaraṃ appaṭikāraṃ akatasahāyaṃ tamanuvattati. Sā taṃ vatthuṃ na paṭinissajjati. Saṅgho itthannāmaṃ bhikkhuniṃ samanubhāsati tassa vatthussa paṭinissaggāya. Yassā ayyāya khamati itthannāmāya bhikkhuniyā samanubhāsanā tassa vatthussa paṭinissaggāya, sā tuṇhassa; yassā nakkhamati, sā bhāseyya.
‘‘དུཏིཡམྤི ཨེཏམཏྠཾ ཝདཱམི…པེ॰… ཏཏིཡམྤི ཨེཏམཏྠཾ ཝདཱམི…པེ॰…།
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘སམནུབྷཊྛཱ སངྒྷེན ཨིཏྠནྣཱམཱ བྷིཀྑུནཱི ཏསྶ ཝཏྠུསྶ པཊིནིསྶགྒཱཡ། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Samanubhaṭṭhā saṅghena itthannāmā bhikkhunī tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
ཉཏྟིཡཱ དུཀྐཊཾ, དྭཱིཧི ཀམྨཝཱཙཱཧི ཐུལླཙྩཡཱ, ཀམྨཝཱཙཱ པརིཡོསཱནེ ཨཱཔཏྟི པཱརཱཛིཀསྶ།
Ñattiyā dukkaṭaṃ, dvīhi kammavācāhi thullaccayā, kammavācā pariyosāne āpatti pārājikassa.
ཨཡམྤཱིཏི པུརིམཱཡོ ཨུཔཱདཱཡ ཝུཙྩཏི།
Ayampīti purimāyo upādāya vuccati.
པཱརཱཛིཀཱ ཧོཏཱིཏི སེཡྻཐཱཔི ནཱམ པུཐུསིལཱ དྭེདྷཱ བྷིནྣཱ ཨཔྤཊིསནྡྷིཀཱ ཧོཏི, ཨེཝམེཝ བྷིཀྑུནཱི ཡཱཝཏཏིཡཾ སམནུབྷཱསནཱཡ ན པཊིནིསྶཛྫནྟཱི ཨསྶམཎཱི ཧོཏི ཨསཀྱདྷཱིཏཱ། ཏེན ཝུཙྩཏི པཱརཱཛིཀཱ ཧོཏཱིཏི།
Pārājikā hotīti seyyathāpi nāma puthusilā dvedhā bhinnā appaṭisandhikā hoti, evameva bhikkhunī yāvatatiyaṃ samanubhāsanāya na paṭinissajjantī assamaṇī hoti asakyadhītā. Tena vuccati pārājikā hotīti.
ཨསཾཝཱསཱཏི སཾཝཱསོ ནཱམ ཨེཀཀམྨཾ ཨེཀུདྡེསོ སམསིཀྑཏཱ། ཨེསོ སཾཝཱསོ ནཱམ། སོ ཏཱཡ སདྡྷིཾ ནཏྠི། ཏེན ཝུཙྩཏི ཨསཾཝཱསཱཏི།
Asaṃvāsāti saṃvāso nāma ekakammaṃ ekuddeso samasikkhatā. Eso saṃvāso nāma. So tāya saddhiṃ natthi. Tena vuccati asaṃvāsāti.
༦༧༢. དྷམྨཀམྨེ དྷམྨཀམྨསཉྙཱ ན པཊིནིསྶཛྫཏི, ཨཱཔཏྟི པཱརཱཛིཀསྶ། དྷམྨཀམྨེ ཝེམཏིཀཱ ན པཊིནིསྶཛྫཏི, ཨཱཔཏྟི པཱརཱཛིཀསྶ། དྷམྨཀམྨེ ཨདྷམྨཀམྨསཉྙཱ ན པཊིནིསྶཛྫཏི, ཨཱཔཏྟི པཱརཱཛིཀསྶ།
672. Dhammakamme dhammakammasaññā na paṭinissajjati, āpatti pārājikassa. Dhammakamme vematikā na paṭinissajjati, āpatti pārājikassa. Dhammakamme adhammakammasaññā na paṭinissajjati, āpatti pārājikassa.
ཨདྷམྨཀམྨེ དྷམྨཀམྨསཉྙཱ, ཨཱཔཏྟི དུཀྐཊསྶ། ཨདྷམྨཀམྨེ ཝེམཏིཀཱ, ཨཱཔཏྟི དུཀྐཊསྶ། ཨདྷམྨཀམྨེ ཨདྷམྨཀམྨསཉྙཱ, ཨཱཔཏྟི དུཀྐཊསྶ།
Adhammakamme dhammakammasaññā, āpatti dukkaṭassa. Adhammakamme vematikā, āpatti dukkaṭassa. Adhammakamme adhammakammasaññā, āpatti dukkaṭassa.
༦༧༣. ཨནཱཔཏྟི ཨསམནུབྷཱསནྟིཡཱ, པཊིནིསྶཛྫནྟིཡཱ, ཨུམྨཏྟིཀཱཡ…པེ॰… ཨཱདིཀམྨིཀཱཡཱཏི།
673. Anāpatti asamanubhāsantiyā, paṭinissajjantiyā, ummattikāya…pe… ādikammikāyāti.
ཏཏིཡཔཱརཱཛིཀཾ སམཏྟཾ།
Tatiyapārājikaṃ samattaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༣. ཏཏིཡཔཱརཱཛིཀསིཀྑཱཔདཝཎྞནཱ • 3. Tatiyapārājikasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༢. དུཏིཡཔཱརཱཛིཀསིཀྑཱཔདཝཎྞནཱ • 2. Dutiyapārājikasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༣. ཏཏིཡཔཱརཱཛིཀསིཀྑཱཔདཝཎྞནཱ • 3. Tatiyapārājikasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༢. ཝཛྫཔཊིཙྪཱདིཀསིཀྑཱཔདཝཎྞནཱ • 2. Vajjapaṭicchādikasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༣. ཏཏིཡཔཱརཱཛིཀསིཀྑཱཔདཾ • 3. Tatiyapārājikasikkhāpadaṃ
