| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā |
3. ததியபாராஜிகஸிக்கா²பத³வண்ணனா
3. Tatiyapārājikasikkhāpadavaṇṇanā
669. ததியே – த⁴ம்மேனாதி பூ⁴தேன வத்து²னா. வினயேனாதி சோதெ³த்வா ஸாரெத்வா. பத³பா⁴ஜனங் பனஸ்ஸ ‘‘யேன த⁴ம்மேன யேன வினயேன உக்கி²த்தோ ஸுஉக்கி²த்தோ ஹோதீ’’தி இமங்அதி⁴ப்பாயமத்தங் த³ஸ்ஸேதுங் வுத்தங். ஸத்து²ஸாஸனேனாதி ஞத்திஸம்பதா³ய சேவ அனுஸாவனஸம்பதா³ய ச. பத³பா⁴ஜனே பனஸ்ஸ ‘‘ஜினஸாஸனேன பு³த்³த⁴ஸாஸனேனா’’தி வேவசனமத்தமேவ வுத்தங். ஸங்க⁴ங் வா க³ணங் வாதிஆதீ³ஸு யேன ஸங்கே⁴ன கம்மங் கதங், தங் ஸங்க⁴ங் வா தத்த² ஸம்ப³ஹுலபுக்³க³லஸங்கா²தங் க³ணங் வா, ஏகபுக்³க³லங் வா தங் கம்மங் வா ந ஆதி³யதி, ந அனுவத்ததி, ந தத்த² ஆத³ரங் ஜனேதீதி அத்தோ². ஸமானஸங்வாஸகா பி⁴க்கூ² வுச்சந்தி ஸஹாயா, ஸோ தேஹி ஸத்³தி⁴ங் நத்தீ²தி எத்த² ‘‘ஏககம்மங் ஏகுத்³தே³ஸோ ஸமஸிக்க²தா’’தி அயங் தாவ ஸங்வாஸோ; ஸமானோ ஸங்வாஸோ ஏதேஸந்தி ஸமானஸங்வாஸகா.ஏவரூபா பி⁴க்கூ² பி⁴க்கு²ஸ்ஸ தஸ்மிங் ஸங்வாஸே ஸஹ அயனபா⁴வேன ஸஹாயாதி வுச்சந்தி. இதா³னி யேன ஸங்வாஸேன தே ஸமானஸங்வாஸகாதி வுத்தா, ஸோ ஸங்வாஸோ தஸ்ஸ உக்கி²த்தகஸ்ஸ தேஹி ஸத்³தி⁴ங் நத்தி². யேஹி ச ஸத்³தி⁴ங் தஸ்ஸ ஸோ ஸங்வாஸோ நத்தி², ந தேன தே பி⁴க்கூ² அத்தனோ ஸஹாயா கதா ஹொந்தி. தஸ்மா வுத்தங் ‘‘ஸமானஸங்வாஸகா பி⁴க்கூ² வுச்சந்தி ஸஹாயா, ஸோ தேஹி ஸத்³தி⁴ங் நத்தி², தேன வுச்சதி அகதஸஹாயோ’’தி. ஸேஸங் ஸங்க⁴பே⁴த³ஸிக்கா²பதா³தீ³ஸு வுத்தனயத்தா உத்தானத்த²மேவ.
669. Tatiye – dhammenāti bhūtena vatthunā. Vinayenāti codetvā sāretvā. Padabhājanaṃ panassa ‘‘yena dhammena yena vinayena ukkhitto suukkhitto hotī’’ti imaṃadhippāyamattaṃ dassetuṃ vuttaṃ. Satthusāsanenāti ñattisampadāya ceva anusāvanasampadāya ca. Padabhājane panassa ‘‘jinasāsanena buddhasāsanenā’’ti vevacanamattameva vuttaṃ. Saṅghaṃ vā gaṇaṃ vātiādīsu yena saṅghena kammaṃ kataṃ, taṃ saṅghaṃ vā tattha sambahulapuggalasaṅkhātaṃ gaṇaṃ vā, ekapuggalaṃ vā taṃ kammaṃ vā na ādiyati, na anuvattati, na tattha ādaraṃ janetīti attho. Samānasaṃvāsakā bhikkhū vuccanti sahāyā, so tehi saddhiṃ natthīti ettha ‘‘ekakammaṃ ekuddeso samasikkhatā’’ti ayaṃ tāva saṃvāso; samāno saṃvāso etesanti samānasaṃvāsakā.Evarūpā bhikkhū bhikkhussa tasmiṃ saṃvāse saha ayanabhāvena sahāyāti vuccanti. Idāni yena saṃvāsena te samānasaṃvāsakāti vuttā, so saṃvāso tassa ukkhittakassa tehi saddhiṃ natthi. Yehi ca saddhiṃ tassa so saṃvāso natthi, na tena te bhikkhū attano sahāyā katā honti. Tasmā vuttaṃ ‘‘samānasaṃvāsakā bhikkhū vuccanti sahāyā, so tehi saddhiṃ natthi, tena vuccati akatasahāyo’’ti. Sesaṃ saṅghabhedasikkhāpadādīsu vuttanayattā uttānatthameva.
ஸமனுபா⁴ஸனஸமுட்டா²னங் – காயவாசாசித்ததோ ஸமுட்டா²தி, அகிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், து³க்க²வேத³னந்தி.
Samanubhāsanasamuṭṭhānaṃ – kāyavācācittato samuṭṭhāti, akiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
ததியபாராஜிகங்.
Tatiyapārājikaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 3. ததியபாராஜிகங் • 3. Tatiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. ததியபாராஜிகஸிக்கா²பத³வண்ணனா • 3. Tatiyapārājikasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. வஜ்ஜபடிச்சா²தி³கஸிக்கா²பத³வண்ணனா • 2. Vajjapaṭicchādikasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. ததியபாராஜிகஸிக்கா²பத³ங் • 3. Tatiyapārājikasikkhāpadaṃ
