| Library / Tipiṭaka / д̇ибидага • Tipiṭaka / бхигкунийвибхан̇г̇а-адтагат̇аа • Bhikkhunīvibhaṅga-aṭṭhakathā |
3. д̇ад̇ияабаарааж̇игасигкаабад̣̇аван̣н̣анаа
3. Tatiyapārājikasikkhāpadavaṇṇanā
669. д̇ад̇ияз – д̇хаммзнаад̇и бхууд̇зна вад̇т̇унаа. винаязнаад̇и жод̣̇зд̇ваа саарзд̇ваа. бад̣̇абхааж̇анам̣ банасса ‘‘язна д̇хаммзна язна винаязна угкид̇д̇о суугкид̇д̇о ход̇ий’’д̇и имам̣ад̇хиббааяамад̇д̇ам̣ д̣̇ассзд̇ум̣ вуд̇д̇ам̣. сад̇т̇усаасанзнаад̇и н̃ад̇д̇исамбад̣̇ааяа жзва анусааванасамбад̣̇ааяа жа. бад̣̇абхааж̇анз банасса ‘‘ж̇инасаасанзна б̣уд̣̇д̇хасаасанзнаа’’д̇и взважанамад̇д̇амзва вуд̇д̇ам̣. сан̇гхам̣ ваа г̇ан̣ам̣ ваад̇иаад̣̇ийсу язна сан̇гхзна гаммам̣ гад̇ам̣, д̇ам̣ сан̇гхам̣ ваа д̇ад̇т̇а самб̣ахулабуг̇г̇аласан̇каад̇ам̣ г̇ан̣ам̣ ваа, згабуг̇г̇алам̣ ваа д̇ам̣ гаммам̣ ваа на аад̣̇ияад̇и, на анувад̇д̇ад̇и, на д̇ад̇т̇а аад̣̇арам̣ ж̇анзд̇ийд̇и ад̇т̇о. самаанасам̣ваасагаа бхигкуу вужжанд̇и сахааяаа, со д̇зхи сад̣̇д̇хим̣ над̇т̇ийд̇и зд̇т̇а ‘‘згагаммам̣ згуд̣̇д̣̇зсо самасигкад̇аа’’д̇и аяам̣ д̇аава сам̣ваасо; самаано сам̣ваасо зд̇зсанд̇и самаанасам̣ваасагаа.зваруубаа бхигкуу бхигкусса д̇асмим̣ сам̣ваасз саха аяанабхаавзна сахааяаад̇и вужжанд̇и. ид̣̇аани язна сам̣ваасзна д̇з самаанасам̣ваасагаад̇и вуд̇д̇аа, со сам̣ваасо д̇асса угкид̇д̇агасса д̇зхи сад̣̇д̇хим̣ над̇т̇и. язхи жа сад̣̇д̇хим̣ д̇асса со сам̣ваасо над̇т̇и, на д̇зна д̇з бхигкуу ад̇д̇ано сахааяаа гад̇аа хонд̇и. д̇асмаа вуд̇д̇ам̣ ‘‘самаанасам̣ваасагаа бхигкуу вужжанд̇и сахааяаа, со д̇зхи сад̣̇д̇хим̣ над̇т̇и, д̇зна вужжад̇и агад̇асахааяо’’д̇и. сзсам̣ сан̇гхабхзд̣̇асигкаабад̣̇аад̣̇ийсу вуд̇д̇анаяад̇д̇аа уд̇д̇аанад̇т̇амзва.
669. Tatiye – dhammenāti bhūtena vatthunā. Vinayenāti codetvā sāretvā. Padabhājanaṃ panassa ‘‘yena dhammena yena vinayena ukkhitto suukkhitto hotī’’ti imaṃadhippāyamattaṃ dassetuṃ vuttaṃ. Satthusāsanenāti ñattisampadāya ceva anusāvanasampadāya ca. Padabhājane panassa ‘‘jinasāsanena buddhasāsanenā’’ti vevacanamattameva vuttaṃ. Saṅghaṃ vā gaṇaṃ vātiādīsu yena saṅghena kammaṃ kataṃ, taṃ saṅghaṃ vā tattha sambahulapuggalasaṅkhātaṃ gaṇaṃ vā, ekapuggalaṃ vā taṃ kammaṃ vā na ādiyati, na anuvattati, na tattha ādaraṃ janetīti attho. Samānasaṃvāsakā bhikkhū vuccanti sahāyā, so tehi saddhiṃ natthīti ettha ‘‘ekakammaṃ ekuddeso samasikkhatā’’ti ayaṃ tāva saṃvāso; samāno saṃvāso etesanti samānasaṃvāsakā.Evarūpā bhikkhū bhikkhussa tasmiṃ saṃvāse saha ayanabhāvena sahāyāti vuccanti. Idāni yena saṃvāsena te samānasaṃvāsakāti vuttā, so saṃvāso tassa ukkhittakassa tehi saddhiṃ natthi. Yehi ca saddhiṃ tassa so saṃvāso natthi, na tena te bhikkhū attano sahāyā katā honti. Tasmā vuttaṃ ‘‘samānasaṃvāsakā bhikkhū vuccanti sahāyā, so tehi saddhiṃ natthi, tena vuccati akatasahāyo’’ti. Sesaṃ saṅghabhedasikkhāpadādīsu vuttanayattā uttānatthameva.
саманубхаасанасамудтаанам̣ – гааяаваажаажид̇д̇ад̇о самудтаад̇и, агирияам̣, сан̃н̃аавимогкам̣, сажид̇д̇агам̣, логаваж̇ж̇ам̣, гааяагаммам̣, важийгаммам̣, агусалажид̇д̇ам̣, д̣̇угкавзд̣̇ананд̇и.
Samanubhāsanasamuṭṭhānaṃ – kāyavācācittato samuṭṭhāti, akiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
д̇ад̇ияабаарааж̇игам̣.
Tatiyapārājikaṃ.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / бхигкунийвибхан̇г̇а • Bhikkhunīvibhaṅga / 3. д̇ад̇ияабаарааж̇игам̣ • 3. Tatiyapārājikaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 3. д̇ад̇ияабаарааж̇игасигкаабад̣̇аван̣н̣анаа • 3. Tatiyapārājikasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 2. важ̇ж̇абадижчаад̣̇игасигкаабад̣̇аван̣н̣анаа • 2. Vajjapaṭicchādikasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 3. д̇ад̇ияабаарааж̇игасигкаабад̣̇ам̣ • 3. Tatiyapārājikasikkhāpadaṃ
