| Library / Tipiṭaka / তিপিটক • Tipiṭaka / মহাৰিভঙ্গ • Mahāvibhaṅga |
৩. ততিযপাটিদেসনীযসিক্খাপদং
3. Tatiyapāṭidesanīyasikkhāpadaṃ
৫৬২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন সাৰত্থিযং অঞ্ঞতরং কুলং উভতোপসন্নং হোতি। সদ্ধায ৰড্ঢতি, ভোগেন হাযতি, যং তস্মিং কুলে উপ্পজ্জতি পুরেভত্তং খাদনীযং ৰা ভোজনীযং ৰা তং সব্বং ভিক্খূনং ৰিস্সজ্জেত্ৰা অপ্পেকদা অনসিতা অচ্ছন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা ন মত্তং জানিত্ৰা পটিগ্গহেস্সন্তি! ইমে ইমেসং দত্ৰা অপ্পেকদা অনসিতা অচ্ছন্তী’’তি!! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, যং কুলং সদ্ধায ৰড্ঢতি, ভোগেন হাযতি এৰরূপস্স কুলস্স ঞত্তিদুতিযেন কম্মেন সেক্খসম্মুতিং দাতুং। এৰঞ্চ পন, ভিক্খৰে, দাতব্বা। ব্যত্তেন ভিক্খুনা পটিবলেন সঙ্ঘো ঞাপেতব্বো –
562. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sāvatthiyaṃ aññataraṃ kulaṃ ubhatopasannaṃ hoti. Saddhāya vaḍḍhati, bhogena hāyati, yaṃ tasmiṃ kule uppajjati purebhattaṃ khādanīyaṃ vā bhojanīyaṃ vā taṃ sabbaṃ bhikkhūnaṃ vissajjetvā appekadā anasitā acchanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā paṭiggahessanti! Ime imesaṃ datvā appekadā anasitā acchantī’’ti!! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, yaṃ kulaṃ saddhāya vaḍḍhati, bhogena hāyati evarūpassa kulassa ñattidutiyena kammena sekkhasammutiṃ dātuṃ. Evañca pana, bhikkhave, dātabbā. Byattena bhikkhunā paṭibalena saṅgho ñāpetabbo –
৫৬৩. ‘‘সুণাতু মে, ভন্তে, সঙ্ঘো। ইত্থন্নামং কুলং সদ্ধায ৰড্ঢতি, ভোগেন হাযতি। যদি সঙ্ঘস্স পত্তকল্লং, সঙ্ঘো ইত্থন্নামস্স কুলস্স সেক্খসম্মুতিং দদেয্য। এসা ঞত্তি।
563. ‘‘Suṇātu me, bhante, saṅgho. Itthannāmaṃ kulaṃ saddhāya vaḍḍhati, bhogena hāyati. Yadi saṅghassa pattakallaṃ, saṅgho itthannāmassa kulassa sekkhasammutiṃ dadeyya. Esā ñatti.
‘‘সুণাতু মে, ভন্তে, সঙ্ঘো। ইত্থন্নামং কুলং সদ্ধায ৰড্ঢতি, ভোগেন হাযতি। সঙ্ঘো ইত্থন্নামস্স কুলস্স সেক্খসম্মুতিং দেতি। যস্সাযস্মতো খমতি ইত্থন্নামস্স কুলস্স সেক্খসম্মুতিযা দানং, সো তুণ্হস্স; যস্স নক্খমতি, সো ভাসেয্য।
‘‘Suṇātu me, bhante, saṅgho. Itthannāmaṃ kulaṃ saddhāya vaḍḍhati, bhogena hāyati. Saṅgho itthannāmassa kulassa sekkhasammutiṃ deti. Yassāyasmato khamati itthannāmassa kulassa sekkhasammutiyā dānaṃ, so tuṇhassa; yassa nakkhamati, so bhāseyya.
‘‘দিন্না সঙ্ঘেন ইত্থন্নামস্স কুলস্স সেক্খসম্মুতি। খমতি সঙ্ঘস্স, তস্মা তুণ্হী, এৰমেতং ধারযামী’’তি।
‘‘Dinnā saṅghena itthannāmassa kulassa sekkhasammuti. Khamati saṅghassa, tasmā tuṇhī, evametaṃ dhārayāmī’’ti.
এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
Evañca pana, bhikkhave, imaṃ sikkhāpadaṃ uddiseyyātha –
‘‘যানি খো পন তানি সেক্খসম্মতানি কুলানি, যো পন ভিক্খু তথারূপেসু সেক্খসম্মতেসু কুলেসু খাদনীযং ৰা ভোজনীযং ৰা সহত্থা পটিগ্গহেত্ৰা খাদেয্য ৰা ভুঞ্জেয্য ৰা, পটিদেসেতব্বং তেন ভিক্খুনা – ‘গারয্হং, আৰুসো, ধম্মং আপজ্জিং অসপ্পাযং পাটিদেসনীযং তং পটিদেসেমী’’’তি।
‘‘Yāni kho pana tāni sekkhasammatāni kulāni, yo pana bhikkhu tathārūpesu sekkhasammatesu kulesu khādanīyaṃ vā bhojanīyaṃ vā sahatthā paṭiggahetvā khādeyya vā bhuñjeyya vā, paṭidesetabbaṃ tena bhikkhunā – ‘gārayhaṃ, āvuso, dhammaṃ āpajjiṃ asappāyaṃ pāṭidesanīyaṃ taṃ paṭidesemī’’’ti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
৫৬৪. তেন খো পন সমযেন সাৰত্থিযং উস্সৰো হোতি। মনুস্সা ভিক্খূ নিমন্তেত্ৰা ভোজেন্তি। তম্পি খো কুলং ভিক্খূ নিমন্তেসি। ভিক্খূ কুক্কুচ্চাযন্তা নাধিৰাসেন্তি – ‘‘পটিক্খিত্তং ভগৰতা সেক্খসম্মতেসু কুলেসু খাদনীযং ৰা ভোজনীযং ৰা সহত্থা পটিগ্গহেত্ৰা খাদিতুং ভুঞ্জিতু’’ন্তি। তে উজ্ঝাযন্তি খিয্যন্তি ৰিপাচেন্তি – ‘‘কিং নু খো নাম অম্হাকং জীৰিতেন যং অয্যা অম্হাকং ন পটিগ্গণ্হন্তী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, নিমন্তিতেন সেক্খসম্মতেসু কুলেসু খাদনীযং ৰা ভোজনীযং ৰা সহত্থা পটিগ্গহেত্ৰা খাদিতুং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
564. Tena kho pana samayena sāvatthiyaṃ ussavo hoti. Manussā bhikkhū nimantetvā bhojenti. Tampi kho kulaṃ bhikkhū nimantesi. Bhikkhū kukkuccāyantā nādhivāsenti – ‘‘paṭikkhittaṃ bhagavatā sekkhasammatesu kulesu khādanīyaṃ vā bhojanīyaṃ vā sahatthā paṭiggahetvā khādituṃ bhuñjitu’’nti. Te ujjhāyanti khiyyanti vipācenti – ‘‘kiṃ nu kho nāma amhākaṃ jīvitena yaṃ ayyā amhākaṃ na paṭiggaṇhantī’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, nimantitena sekkhasammatesu kulesu khādanīyaṃ vā bhojanīyaṃ vā sahatthā paṭiggahetvā khādituṃ bhuñjituṃ. Evañca pana, bhikkhave, imaṃ sikkhāpadaṃ uddiseyyātha –
‘‘যানি খো পন তানি সেক্খসম্মতানি কুলানি, যো পন ভিক্খু তথারূপেসু সেক্খসম্মতেসু কুলেসু পুব্বে অনিমন্তিতো খাদনীযং ৰা ভোজনীযং ৰা সহত্থা পটিগ্গহেত্ৰা খাদেয্য ৰা ভুঞ্জেয্য ৰা , পটিদেসেতব্বং তেন ভিক্খুনা – ‘গারয্হং, আৰুসো, ধম্মং আপজ্জিং অসপ্পাযং পাটিদেসনীযং, তং পটিদেসেমী’’’তি।
‘‘Yāni kho pana tāni sekkhasammatāni kulāni, yo pana bhikkhu tathārūpesu sekkhasammatesu kulesu pubbe animantitokhādanīyaṃ vā bhojanīyaṃ vā sahatthā paṭiggahetvā khādeyyavā bhuñjeyya vā, paṭidesetabbaṃ tena bhikkhunā – ‘gārayhaṃ, āvuso, dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’’ti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
৫৬৫. তেন খো পন সমযেন অঞ্ঞতরো ভিক্খু তস্স কুলস্স কুলূপকো হোতি। অথ খো সো ভিক্খু পুব্বণ্হসমযং নিৰাসেত্ৰা পত্তচীৰরমাদায যেন তং কুলং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি। তেন খো পন সমযেন সো ভিক্খু গিলানো হোতি। অথ খো তে মনুস্সা তং ভিক্খুং এতদৰোচুং – ‘‘ভুঞ্জথ, ভন্তে’’তি। অথ খো সো ভিক্খু – ‘‘ভগৰতা পটিক্খিত্তং অনিমন্তিতেন সেক্খসম্মতেসু কুলেসু খাদনীযং ৰা ভোজনীযং ৰা সহত্থা পটিগ্গহেত্ৰা খাদিতুং ভুঞ্জিতু’’ন্তি কুক্কুচ্চাযন্তো ন পটিগ্গহেসি; নাসক্খি পিণ্ডায চরিতুং; ছিন্নভত্তো অহোসি। অথ খো সো ভিক্খু আরামং গন্ত্ৰা ভিক্খূনং এতমত্থং আরোচেসি। ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, গিলানেন ভিক্খুনা সেক্খসম্মতেসু কুলেসু খাদনীযং ৰা ভোজনীযং ৰা সহত্থা পটিগ্গহেত্ৰা খাদিতুং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
565. Tena kho pana samayena aññataro bhikkhu tassa kulassa kulūpako hoti. Atha kho so bhikkhu pubbaṇhasamayaṃ nivāsetvā pattacīvaramādāya yena taṃ kulaṃ tenupasaṅkami; upasaṅkamitvā paññatte āsane nisīdi. Tena kho pana samayena so bhikkhu gilāno hoti. Atha kho te manussā taṃ bhikkhuṃ etadavocuṃ – ‘‘bhuñjatha, bhante’’ti. Atha kho so bhikkhu – ‘‘bhagavatā paṭikkhittaṃ animantitena sekkhasammatesu kulesu khādanīyaṃ vā bhojanīyaṃ vā sahatthā paṭiggahetvā khādituṃ bhuñjitu’’nti kukkuccāyanto na paṭiggahesi; nāsakkhi piṇḍāya carituṃ; chinnabhatto ahosi. Atha kho so bhikkhu ārāmaṃ gantvā bhikkhūnaṃ etamatthaṃ ārocesi. Bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, gilānena bhikkhunā sekkhasammatesu kulesu khādanīyaṃ vā bhojanīyaṃ vā sahatthā paṭiggahetvā khādituṃ bhuñjituṃ. Evañca pana, bhikkhave, imaṃ sikkhāpadaṃ uddiseyyātha –
৫৬৬. ‘‘যানি খো পন তানি সেক্খসম্মতানি কুলানি, যো পন ভিক্খু তথারূপেসু সেক্খসম্মতেসু কুলেসু পুব্বে অনিমন্তিতো অগিলানো খাদনীযং ৰা ভোজনীযং ৰা সহত্থা পটিগ্গহেত্ৰা খাদেয্য ৰা ভুঞ্জেয্য ৰা, পটিদেসেতব্বং তেন ভিক্খুনা – ‘গারয্হং, আৰুসো, ধম্মং আপজ্জিং অসপ্পাযং পাটিদেসনীযং, তং পটিদেসেমী’’তি।
566.‘‘Yāni kho pana tāni sekkhasammatāni kulāni, yo pana bhikkhu tathārūpesu sekkhasammatesu kulesu pubbe animantito agilāno khādanīyaṃ vā bhojanīyaṃ vā sahatthā paṭiggahetvā khādeyya vā bhuñjeyya vā, paṭidesetabbaṃ tena bhikkhunā – ‘gārayhaṃ, āvuso, dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’ti.
৫৬৭. যানি খো পন তানি সেক্খসম্মতানি কুলানীতি সেক্খসম্মতং নাম কুলং যং কুলং সদ্ধায ৰড্ঢতি, ভোগেন হাযতি। এৰরূপস্স কুলস্স ঞত্তিদুতিযেন কম্মেন সেক্খসম্মুতি দিন্না হোতি।
567.Yāni kho pana tāni sekkhasammatāni kulānīti sekkhasammataṃ nāma kulaṃ yaṃ kulaṃ saddhāya vaḍḍhati, bhogena hāyati. Evarūpassa kulassa ñattidutiyena kammena sekkhasammuti dinnā hoti.
যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
তথারূপেসু সেক্খসম্মতেসু কুলেসূতি এৰরূপেসু সেক্খসম্মতেসু কুলেসু।
Tathārūpesu sekkhasammatesu kulesūti evarūpesu sekkhasammatesu kulesu.
অনিমন্তিতো নাম অজ্জতনায ৰা স্ৰাতনায ৰা অনিমন্তিতো, ঘরূপচারং ওক্কমন্তে নিমন্তেতি, এসো অনিমন্তিতো নাম।
Animantito nāma ajjatanāya vā svātanāya vā animantito, gharūpacāraṃ okkamante nimanteti, eso animantito nāma.
নিমন্তিতো নাম অজ্জতনায ৰা স্ৰাতনায ৰা নিমন্তিতো, ঘরূপচারং অনোক্কমন্তে নিমন্তেতি, এসো নিমন্তিতো নাম।
Nimantito nāma ajjatanāya vā svātanāya vā nimantito, gharūpacāraṃ anokkamante nimanteti, eso nimantito nāma.
অগিলানো নাম সক্কোতি পিণ্ডায চরিতুং।
Agilāno nāma sakkoti piṇḍāya carituṃ.
গিলানো নাম ন সক্কোতি পিণ্ডায চরিতুং।
Gilāno nāma na sakkoti piṇḍāya carituṃ.
খাদনীযং নাম পঞ্চ ভোজনানি – যামকালিকং সত্তাহকালিকং যাৰজীৰিকং ঠপেত্ৰা অৰসেসং খাদনীযং নাম।
Khādanīyaṃ nāma pañca bhojanāni – yāmakālikaṃ sattāhakālikaṃ yāvajīvikaṃ ṭhapetvā avasesaṃ khādanīyaṃ nāma.
ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং।
Bhojanīyaṃ nāma pañca bhojanāni – odano, kummāso, sattu, maccho, maṃsaṃ.
অনিমন্তিতো অগিলানো ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স । অজ্ঝোহারে অজ্ঝোহারে আপত্তি পাটিদেসনীযস্স।
Animantito agilāno ‘‘khādissāmi bhuñjissāmī’’ti paṭiggaṇhāti, āpatti dukkaṭassa . Ajjhohāre ajjhohāre āpatti pāṭidesanīyassa.
৫৬৮. সেক্খসম্মতে সেক্খসম্মতসঞ্ঞী অনিমন্তিতো অগিলানো খাদনীযং ৰা ভোজনীযংৰ সহত্থা পটিগ্গহেত্ৰা খাদতি ৰা ভুঞ্জতি ৰা, আপত্তি পাটিদেসনীযস্স। সেক্খসম্মতে ৰেমতিকো…পে॰… সেক্খসম্মতে অসেক্খসম্মতসঞ্ঞী অনিমন্তিতো অগিলানো খাদনীযং ৰা ভোজনীযং ৰা সহত্থা পটিগ্গহেত্ৰা খাদতি ৰা ভুঞ্জতি ৰা, আপত্তি পাটিদেসনীযস্স।
568. Sekkhasammate sekkhasammatasaññī animantito agilāno khādanīyaṃ vā bhojanīyaṃva sahatthā paṭiggahetvā khādati vā bhuñjati vā, āpatti pāṭidesanīyassa. Sekkhasammate vematiko…pe… sekkhasammate asekkhasammatasaññī animantito agilāno khādanīyaṃ vā bhojanīyaṃ vā sahatthā paṭiggahetvā khādati vā bhuñjati vā, āpatti pāṭidesanīyassa.
যামকালিকং সত্তাহকালিকং যাৰজীৰিকং আহারত্থায পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি দুক্কটস্স। অসেক্খসম্মতে সেক্খসম্মতসঞ্ঞী, আপত্তি দুক্কটস্স। অসেক্খসম্মতে ৰেমতিকো, আপত্তি দুক্কটস্স। অসেক্খসম্মতে অসেক্খসম্মতসঞ্ঞী, অনাপত্তি।
Yāmakālikaṃ sattāhakālikaṃ yāvajīvikaṃ āhāratthāya paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassa. Asekkhasammate sekkhasammatasaññī, āpatti dukkaṭassa. Asekkhasammate vematiko, āpatti dukkaṭassa. Asekkhasammate asekkhasammatasaññī, anāpatti.
৫৬৯. অনাপত্তি নিমন্তিতস্স, গিলানস্স, নিমন্তিতস্স ৰা গিলানস্স ৰা সেসকং ভুঞ্জতি , অঞ্ঞেসং ভিক্খা তত্থ পঞ্ঞত্তা হোতি, ঘরতো নীহরিত্ৰা দেন্তি, নিচ্চভত্তে, সলাকভত্তে, পক্খিকে, উপোসথিকে, পাটিপদিকে, যামকালিকং সত্তাহকালিকং যাৰজীৰিকং – ‘‘সতি পচ্চযে পরিভুঞ্জা’’তি দেতি, উম্মত্তকস্স, আদিকম্মিকস্সাতি।
569. Anāpatti nimantitassa, gilānassa, nimantitassa vā gilānassa vā sesakaṃ bhuñjati , aññesaṃ bhikkhā tattha paññattā hoti, gharato nīharitvā denti, niccabhatte, salākabhatte, pakkhike, uposathike, pāṭipadike, yāmakālikaṃ sattāhakālikaṃ yāvajīvikaṃ – ‘‘sati paccaye paribhuñjā’’ti deti, ummattakassa, ādikammikassāti.
ততিযপাটিদেসনীযসিক্খাপদং নিট্ঠিতং।
Tatiyapāṭidesanīyasikkhāpadaṃ niṭṭhitaṃ.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৩. ততিযপাটিদেসনীযসিক্খাপদৰণ্ণনা • 3. Tatiyapāṭidesanīyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পাটিদেসনীযসিক্খাপদৰণ্ণনা • Pāṭidesanīyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ২. দুতিযপাটিদেসনীযসিক্খাপদৰণ্ণনা • 2. Dutiyapāṭidesanīyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমপাটিদেসনীযসিক্খাপদৰণ্ণনা • 1. Paṭhamapāṭidesanīyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৩. ততিযপাটিদেসনীযসিক্খাপদং • 3. Tatiyapāṭidesanīyasikkhāpadaṃ
