| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
3. ததியபாடிதே³ஸனீயஸிக்கா²பத³வண்ணனா
3. Tatiyapāṭidesanīyasikkhāpadavaṇṇanā
லத்³த⁴ஸெக்க²ஸம்முதிகானீதி ஞத்திது³தியேன கம்மேன லத்³த⁴ஸெக்க²ஸம்முதிகானி. யஞ்ஹி குலங் ஸத்³தா⁴ய வட்³ட⁴தி, போ⁴கே³ன ஹாயதி, ஏவரூபஸ்ஸ குலஸ்ஸ ஞத்திது³தியேன கம்மேன ஸெக்க²ஸம்முதிங் தெ³ந்தி, தங் ஸந்தா⁴யேதங் வுத்தங்.
Laddhasekkhasammutikānīti ñattidutiyena kammena laddhasekkhasammutikāni. Yañhi kulaṃ saddhāya vaḍḍhati, bhogena hāyati, evarūpassa kulassa ñattidutiyena kammena sekkhasammutiṃ denti, taṃ sandhāyetaṃ vuttaṃ.
க⁴ரதோ நீஹரித்வாதி க⁴ரதோ ஆஸனஸாலங் வா விஹாரங் வா ஆனெத்வா. தேனாஹ ‘‘ஆஸனஸாலாதீ³ஸு வா’’தி. இமஸ்ஸ ‘‘தெ³ந்தீ’’தி இமினா ஸம்ப³ந்தோ⁴. த்³வாரமூலே வா ட²பிதங் தெ³ந்தீதி த்³வாரமூலே ட²பிதங் பச்சா² ஸம்பத்தஸ்ஸ தெ³ந்தி. பி⁴க்கு²ங் பன தி³ஸ்வா அந்தோகே³ஹதோ நீஹரித்வா தி³ய்யமானங் ந வட்டதி. நிச்சப⁴த்தகேதி நிச்சங் தா³தப்³ப³ப⁴த்தகே. ஸலாகப⁴த்தேதி ருக்க²ஸாரமயாய ஸலாகாய வா வேளுவிலீவதாலபண்ணாதி³மயாய பட்டிகாய வா ‘‘அஸுகஸ்ஸ நாம ஸலாகப⁴த்த’’ந்தி ஏவங் அக்க²ரானி உபனிப³ந்தி⁴த்வா கா³ஹாபெத்வா தா³தப்³ப³ப⁴த்தே. பக்கி²கேதி ஏகஸ்மிங் பக்கே² ஏகதி³வஸே தா³தப்³ப³ப⁴த்தே. உபோஸதி²கேதி உபோஸதே² தா³தப்³ப³ப⁴த்தே. பாடிபதி³கேதி பாடிபத³தி³வஸே தா³தப்³ப³ப⁴த்தே.
Gharato nīharitvāti gharato āsanasālaṃ vā vihāraṃ vā ānetvā. Tenāha ‘‘āsanasālādīsu vā’’ti. Imassa ‘‘dentī’’ti iminā sambandho. Dvāramūle vā ṭhapitaṃ dentīti dvāramūle ṭhapitaṃ pacchā sampattassa denti. Bhikkhuṃ pana disvā antogehato nīharitvā diyyamānaṃ na vaṭṭati. Niccabhattaketi niccaṃ dātabbabhattake. Salākabhatteti rukkhasāramayāya salākāya vā veḷuvilīvatālapaṇṇādimayāya paṭṭikāya vā ‘‘asukassa nāma salākabhatta’’nti evaṃ akkharāni upanibandhitvā gāhāpetvā dātabbabhatte. Pakkhiketi ekasmiṃ pakkhe ekadivase dātabbabhatte. Uposathiketi uposathe dātabbabhatte. Pāṭipadiketi pāṭipadadivase dātabbabhatte.
ததியபாடிதே³ஸனீயஸிக்கா²பத³வண்ணனா நிட்டி²தா.
Tatiyapāṭidesanīyasikkhāpadavaṇṇanā niṭṭhitā.
