| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
३. ततियपाटिदेसनीयसिक्खापदवण्णना
3. Tatiyapāṭidesanīyasikkhāpadavaṇṇanā
लद्धसेक्खसम्मुतिकानीति ञत्तिदुतियेन कम्मेन लद्धसेक्खसम्मुतिकानि। यञ्हि कुलं सद्धाय वड्ढति, भोगेन हायति, एवरूपस्स कुलस्स ञत्तिदुतियेन कम्मेन सेक्खसम्मुतिं देन्ति, तं सन्धायेतं वुत्तं।
Laddhasekkhasammutikānīti ñattidutiyena kammena laddhasekkhasammutikāni. Yañhi kulaṃ saddhāya vaḍḍhati, bhogena hāyati, evarūpassa kulassa ñattidutiyena kammena sekkhasammutiṃ denti, taṃ sandhāyetaṃ vuttaṃ.
घरतो नीहरित्वाति घरतो आसनसालं वा विहारं वा आनेत्वा। तेनाह ‘‘आसनसालादीसु वा’’ति। इमस्स ‘‘देन्ती’’ति इमिना सम्बन्धो। द्वारमूले वा ठपितं देन्तीति द्वारमूले ठपितं पच्छा सम्पत्तस्स देन्ति। भिक्खुं पन दिस्वा अन्तोगेहतो नीहरित्वा दिय्यमानं न वट्टति। निच्चभत्तकेति निच्चं दातब्बभत्तके। सलाकभत्तेति रुक्खसारमयाय सलाकाय वा वेळुविलीवतालपण्णादिमयाय पट्टिकाय वा ‘‘असुकस्स नाम सलाकभत्त’’न्ति एवं अक्खरानि उपनिबन्धित्वा गाहापेत्वा दातब्बभत्ते। पक्खिकेति एकस्मिं पक्खे एकदिवसे दातब्बभत्ते। उपोसथिकेति उपोसथे दातब्बभत्ते। पाटिपदिकेति पाटिपददिवसे दातब्बभत्ते।
Gharato nīharitvāti gharato āsanasālaṃ vā vihāraṃ vā ānetvā. Tenāha ‘‘āsanasālādīsu vā’’ti. Imassa ‘‘dentī’’ti iminā sambandho. Dvāramūle vā ṭhapitaṃ dentīti dvāramūle ṭhapitaṃ pacchā sampattassa denti. Bhikkhuṃ pana disvā antogehato nīharitvā diyyamānaṃ na vaṭṭati. Niccabhattaketi niccaṃ dātabbabhattake. Salākabhatteti rukkhasāramayāya salākāya vā veḷuvilīvatālapaṇṇādimayāya paṭṭikāya vā ‘‘asukassa nāma salākabhatta’’nti evaṃ akkharāni upanibandhitvā gāhāpetvā dātabbabhatte. Pakkhiketi ekasmiṃ pakkhe ekadivase dātabbabhatte. Uposathiketi uposathe dātabbabhatte. Pāṭipadiketi pāṭipadadivase dātabbabhatte.
ततियपाटिदेसनीयसिक्खापदवण्णना निट्ठिता।
Tatiyapāṭidesanīyasikkhāpadavaṇṇanā niṭṭhitā.
