| Library / Tipiṭaka / തിപിടക • Tipiṭaka / കങ്ഖാവിതരണീ-അഭിനവ-ടീകാ • Kaṅkhāvitaraṇī-abhinava-ṭīkā |
൩. തതിയപാടിദേസനീയസിക്ഖാപദവണ്ണനാ
3. Tatiyapāṭidesanīyasikkhāpadavaṇṇanā
ലദ്ധസേക്ഖസമ്മുതികാനീതി ഞത്തിദുതിയേന കമ്മേന ലദ്ധസേക്ഖസമ്മുതികാനി. യഞ്ഹി കുലം സദ്ധായ വഡ്ഢതി, ഭോഗേന ഹായതി, ഏവരൂപസ്സ കുലസ്സ ഞത്തിദുതിയേന കമ്മേന സേക്ഖസമ്മുതിം ദേന്തി, തം സന്ധായേതം വുത്തം.
Laddhasekkhasammutikānīti ñattidutiyena kammena laddhasekkhasammutikāni. Yañhi kulaṃ saddhāya vaḍḍhati, bhogena hāyati, evarūpassa kulassa ñattidutiyena kammena sekkhasammutiṃ denti, taṃ sandhāyetaṃ vuttaṃ.
ഘരതോ നീഹരിത്വാതി ഘരതോ ആസനസാലം വാ വിഹാരം വാ ആനേത്വാ. തേനാഹ ‘‘ആസനസാലാദീസു വാ’’തി. ഇമസ്സ ‘‘ദേന്തീ’’തി ഇമിനാ സമ്ബന്ധോ. ദ്വാരമൂലേ വാ ഠപിതം ദേന്തീതി ദ്വാരമൂലേ ഠപിതം പച്ഛാ സമ്പത്തസ്സ ദേന്തി. ഭിക്ഖും പന ദിസ്വാ അന്തോഗേഹതോ നീഹരിത്വാ ദിയ്യമാനം ന വട്ടതി. നിച്ചഭത്തകേതി നിച്ചം ദാതബ്ബഭത്തകേ. സലാകഭത്തേതി രുക്ഖസാരമയായ സലാകായ വാ വേളുവിലീവതാലപണ്ണാദിമയായ പട്ടികായ വാ ‘‘അസുകസ്സ നാമ സലാകഭത്ത’’ന്തി ഏവം അക്ഖരാനി ഉപനിബന്ധിത്വാ ഗാഹാപേത്വാ ദാതബ്ബഭത്തേ. പക്ഖികേതി ഏകസ്മിം പക്ഖേ ഏകദിവസേ ദാതബ്ബഭത്തേ. ഉപോസഥികേതി ഉപോസഥേ ദാതബ്ബഭത്തേ. പാടിപദികേതി പാടിപദദിവസേ ദാതബ്ബഭത്തേ.
Gharato nīharitvāti gharato āsanasālaṃ vā vihāraṃ vā ānetvā. Tenāha ‘‘āsanasālādīsu vā’’ti. Imassa ‘‘dentī’’ti iminā sambandho. Dvāramūle vā ṭhapitaṃ dentīti dvāramūle ṭhapitaṃ pacchā sampattassa denti. Bhikkhuṃ pana disvā antogehato nīharitvā diyyamānaṃ na vaṭṭati. Niccabhattaketi niccaṃ dātabbabhattake. Salākabhatteti rukkhasāramayāya salākāya vā veḷuvilīvatālapaṇṇādimayāya paṭṭikāya vā ‘‘asukassa nāma salākabhatta’’nti evaṃ akkharāni upanibandhitvā gāhāpetvā dātabbabhatte. Pakkhiketi ekasmiṃ pakkhe ekadivase dātabbabhatte. Uposathiketi uposathe dātabbabhatte. Pāṭipadiketi pāṭipadadivase dātabbabhatte.
തതിയപാടിദേസനീയസിക്ഖാപദവണ്ണനാ നിട്ഠിതാ.
Tatiyapāṭidesanīyasikkhāpadavaṇṇanā niṭṭhitā.
