| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༦. ཏཏིཡསདྡྷམྨསམྨོསསུཏྟཾ
6. Tatiyasaddhammasammosasuttaṃ
༡༥༦. 1 ‘‘པཉྩིམེ, བྷིཀྑཝེ, དྷམྨཱ སདྡྷམྨསྶ སམྨོསཱཡ ཨནྟརདྷཱནཱཡ སཾཝཏྟནྟི། ཀཏམེ པཉྩ? ཨིདྷ, བྷིཀྑཝེ, བྷིཀྑཱུ དུགྒཧིཏཾ སུཏྟནྟཾ པརིཡཱཔུཎནྟི དུནྣིཀྑིཏྟེཧི པདབྱཉྫནེཧི ། དུནྣིཀྑིཏྟསྶ, བྷིཀྑཝེ, པདབྱཉྫནསྶ ཨཏྠོཔི དུནྣཡོ ཧོཏི། ཨཡཾ, བྷིཀྑཝེ, པཋམོ དྷམྨོ སདྡྷམྨསྶ སམྨོསཱཡ ཨནྟརདྷཱནཱཡ སཾཝཏྟཏི།
156.2 ‘‘Pañcime, bhikkhave, dhammā saddhammassa sammosāya antaradhānāya saṃvattanti. Katame pañca? Idha, bhikkhave, bhikkhū duggahitaṃ suttantaṃ pariyāpuṇanti dunnikkhittehi padabyañjanehi . Dunnikkhittassa, bhikkhave, padabyañjanassa atthopi dunnayo hoti. Ayaṃ, bhikkhave, paṭhamo dhammo saddhammassa sammosāya antaradhānāya saṃvattati.
‘‘པུན ཙཔརཾ, བྷིཀྑཝེ, བྷིཀྑཱུ དུབྦཙཱ ཧོནྟི, དོཝཙསྶཀརཎེཧི དྷམྨེཧི སམནྣཱགཏཱ, ཨཀྑམཱ ཨཔྤདཀྑིཎགྒཱཧིནོ ཨནུསཱསནིཾ། ཨཡཾ, བྷིཀྑཝེ, དུཏིཡོ དྷམྨོ སདྡྷམྨསྶ སམྨོསཱཡ ཨནྟརདྷཱནཱཡ སཾཝཏྟཏི།
‘‘Puna caparaṃ, bhikkhave, bhikkhū dubbacā honti, dovacassakaraṇehi dhammehi samannāgatā, akkhamā appadakkhiṇaggāhino anusāsaniṃ. Ayaṃ, bhikkhave, dutiyo dhammo saddhammassa sammosāya antaradhānāya saṃvattati.
‘‘པུན ཙཔརཾ, བྷིཀྑཝེ, ཡེ ཏེ བྷིཀྑཱུ བཧུསྶུཏཱ ཨཱགཏཱགམཱ དྷམྨདྷརཱ ཝིནཡདྷརཱ མཱཏིཀཱདྷརཱ, ཏེ ན སཀྐཙྩཾ སུཏྟནྟཾ པརཾ ཝཱཙེནྟི; ཏེསཾ ཨཙྩཡེན ཚིནྣམཱུལཀོ སུཏྟནྟོ ཧོཏི ཨཔྤཊིསརཎོ། ཨཡཾ, བྷིཀྑཝེ, ཏཏིཡོ དྷམྨོ སདྡྷམྨསྶ སམྨོསཱཡ ཨནྟརདྷཱནཱཡ སཾཝཏྟཏི།
‘‘Puna caparaṃ, bhikkhave, ye te bhikkhū bahussutā āgatāgamā dhammadharā vinayadharā mātikādharā, te na sakkaccaṃ suttantaṃ paraṃ vācenti; tesaṃ accayena chinnamūlako suttanto hoti appaṭisaraṇo. Ayaṃ, bhikkhave, tatiyo dhammo saddhammassa sammosāya antaradhānāya saṃvattati.
‘‘པུན ཙཔརཾ, བྷིཀྑཝེ, ཐེརཱ བྷིཀྑཱུ བཱཧུལིཀཱ ཧོནྟི སཱཐལིཀཱ ཨོཀྐམནེ པུབྦངྒམཱ པཝིཝེཀེ ནིཀྑིཏྟདྷུརཱ , ན ཝཱིརིཡཾ ཨཱརབྷནྟི ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ ཨསཙྪིཀཏསྶ སཙྪིཀིརིཡཱཡ། ཏེསཾ པཙྪིམཱ ཛནཏཱ དིཊྛཱནུགཏིཾ ཨཱཔཛྫཏི། སཱཔི ཧོཏི བཱཧུལིཀཱ སཱཐལིཀཱ ཨོཀྐམནེ པུབྦངྒམཱ པཝིཝེཀེ ནིཀྑིཏྟདྷུརཱ, ན ཝཱིརིཡཾ ཨཱརབྷཏི ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ ཨསཙྪིཀཏསྶ སཙྪིཀིརིཡཱཡ། ཨཡཾ, བྷིཀྑཝེ, ཙཏུཏྠོ དྷམྨོ སདྡྷམྨསྶ སམྨོསཱཡ ཨནྟརདྷཱནཱཡ སཾཝཏྟཏི།
‘‘Puna caparaṃ, bhikkhave, therā bhikkhū bāhulikā honti sāthalikā okkamane pubbaṅgamā paviveke nikkhittadhurā , na vīriyaṃ ārabhanti appattassa pattiyā anadhigatassa adhigamāya asacchikatassa sacchikiriyāya. Tesaṃ pacchimā janatā diṭṭhānugatiṃ āpajjati. Sāpi hoti bāhulikā sāthalikā okkamane pubbaṅgamā paviveke nikkhittadhurā, na vīriyaṃ ārabhati appattassa pattiyā anadhigatassa adhigamāya asacchikatassa sacchikiriyāya. Ayaṃ, bhikkhave, catuttho dhammo saddhammassa sammosāya antaradhānāya saṃvattati.
‘‘པུན ཙཔརཾ, བྷིཀྑཝེ, སངྒྷོ བྷིནྣོ ཧོཏི། སངྒྷེ ཁོ པན, བྷིཀྑཝེ, བྷིནྣེ ཨཉྙམཉྙཾ ཨཀྐོསཱ ཙ ཧོནྟི, ཨཉྙམཉྙཾ པརིབྷཱསཱ ཙ ཧོནྟི, ཨཉྙམཉྙཾ པརིཀྑེཔཱ ཙ ཧོནྟི, ཨཉྙམཉྙཾ པརིཙྩཛནཱ 3 ཙ ཧོནྟི། ཏཏྠ ཨཔྤསནྣཱ ཙེཝ ནཔྤསཱིདནྟི, པསནྣཱནཉྩ ཨེཀཙྩཱནཾ ཨཉྙཐཏྟཾ ཧོཏི། ཨཡཾ, བྷིཀྑཝེ, པཉྩམོ དྷམྨོ སདྡྷམྨསྶ སམྨོསཱཡ ཨནྟརདྷཱནཱཡ སཾཝཏྟཏི། ཨིམེ ཁོ, བྷིཀྑཝེ, པཉྩ དྷམྨཱ སདྡྷམྨསྶ སམྨོསཱཡ ཨནྟརདྷཱནཱཡ སཾཝཏྟནྟི།
‘‘Puna caparaṃ, bhikkhave, saṅgho bhinno hoti. Saṅghe kho pana, bhikkhave, bhinne aññamaññaṃ akkosā ca honti, aññamaññaṃ paribhāsā ca honti, aññamaññaṃ parikkhepā ca honti, aññamaññaṃ pariccajanā 4 ca honti. Tattha appasannā ceva nappasīdanti, pasannānañca ekaccānaṃ aññathattaṃ hoti. Ayaṃ, bhikkhave, pañcamo dhammo saddhammassa sammosāya antaradhānāya saṃvattati. Ime kho, bhikkhave, pañca dhammā saddhammassa sammosāya antaradhānāya saṃvattanti.
‘‘པཉྩིམེ, བྷིཀྑཝེ, དྷམྨཱ སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟནྟི། ཀཏམེ པཉྩ? ཨིདྷ, བྷིཀྑཝེ, བྷིཀྑཱུ སུགྒཧིཏཾ སུཏྟནྟཾ པརིཡཱཔུཎནྟི སུནིཀྑིཏྟེཧི པདབྱཉྫནེཧི། སུནིཀྑིཏྟསྶ, བྷིཀྑཝེ, པདབྱཉྫནསྶ ཨཏྠོཔི སུནཡོ ཧོཏི། ཨཡཾ, བྷིཀྑཝེ, པཋམོ དྷམྨོ སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟཏི།
‘‘Pañcime, bhikkhave, dhammā saddhammassa ṭhitiyā asammosāya anantaradhānāya saṃvattanti. Katame pañca? Idha, bhikkhave, bhikkhū suggahitaṃ suttantaṃ pariyāpuṇanti sunikkhittehi padabyañjanehi. Sunikkhittassa, bhikkhave, padabyañjanassa atthopi sunayo hoti. Ayaṃ, bhikkhave, paṭhamo dhammo saddhammassa ṭhitiyā asammosāya anantaradhānāya saṃvattati.
‘‘པུན ཙཔརཾ, བྷིཀྑཝེ, བྷིཀྑཱུ སུཝཙཱ ཧོནྟི སོཝཙསྶཀརཎེཧི དྷམྨེཧི སམནྣཱགཏཱ, ཁམཱ པདཀྑིཎགྒཱཧིནོ ཨནུསཱསནིཾ། ཨཡཾ, བྷིཀྑཝེ, དུཏིཡོ དྷམྨོ སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟཏི།
‘‘Puna caparaṃ, bhikkhave, bhikkhū suvacā honti sovacassakaraṇehi dhammehi samannāgatā, khamā padakkhiṇaggāhino anusāsaniṃ. Ayaṃ, bhikkhave, dutiyo dhammo saddhammassa ṭhitiyā asammosāya anantaradhānāya saṃvattati.
‘‘པུན ཙཔརཾ, བྷིཀྑཝེ, ཡེ ཏེ བྷིཀྑཱུ བཧུསྶུཏཱ ཨཱགཏཱགམཱ དྷམྨདྷརཱ ཝིནཡདྷརཱ མཱཏིཀཱདྷརཱ, ཏེ སཀྐཙྩཾ སུཏྟནྟཾ པརཾ ཝཱཙེནྟི; ཏེསཾ ཨཙྩཡེན ན ཚིནྣམཱུལཀོ 5 སུཏྟནྟོ ཧོཏི སཔྤཊིསརཎོ། ཨཡཾ, བྷིཀྑཝེ, ཏཏིཡོ དྷམྨོ སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟཏི།
‘‘Puna caparaṃ, bhikkhave, ye te bhikkhū bahussutā āgatāgamā dhammadharā vinayadharā mātikādharā, te sakkaccaṃ suttantaṃ paraṃ vācenti; tesaṃ accayena na chinnamūlako 6 suttanto hoti sappaṭisaraṇo. Ayaṃ, bhikkhave, tatiyo dhammo saddhammassa ṭhitiyā asammosāya anantaradhānāya saṃvattati.
‘‘པུན ཙཔརཾ, བྷིཀྑཝེ, ཐེརཱ བྷིཀྑཱུ ན བཱཧུལིཀཱ ཧོནྟི ན སཱཐལིཀཱ, ཨོཀྐམནེ ནིཀྑིཏྟདྷུརཱ པཝིཝེཀེ པུབྦངྒམཱ; ཝཱིརིཡཾ ཨཱརབྷནྟི ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ ཨསཙྪིཀཏསྶ སཙྪིཀིརིཡཱཡ། ཏེསཾ པཙྪིམཱ ཛནཏཱ དིཊྛཱནུགཏིཾ ཨཱཔཛྫཏི། སཱཔི ཧོཏི ན བཱཧུལིཀཱ ན སཱཐལིཀཱ, ཨོཀྐམནེ ནིཀྑིཏྟདྷུརཱ པཝིཝེཀེ པུབྦངྒམཱ, ཝཱིརིཡཾ ཨཱརབྷཏི ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ ཨསཙྪིཀཏསྶ སཙྪིཀིརིཡཱཡ། ཨཡཾ, བྷིཀྑཝེ, ཙཏུཏྠོ དྷམྨོ སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟཏི།
‘‘Puna caparaṃ, bhikkhave, therā bhikkhū na bāhulikā honti na sāthalikā, okkamane nikkhittadhurā paviveke pubbaṅgamā; vīriyaṃ ārabhanti appattassa pattiyā anadhigatassa adhigamāya asacchikatassa sacchikiriyāya. Tesaṃ pacchimā janatā diṭṭhānugatiṃ āpajjati. Sāpi hoti na bāhulikā na sāthalikā, okkamane nikkhittadhurā paviveke pubbaṅgamā, vīriyaṃ ārabhati appattassa pattiyā anadhigatassa adhigamāya asacchikatassa sacchikiriyāya. Ayaṃ, bhikkhave, catuttho dhammo saddhammassa ṭhitiyā asammosāya anantaradhānāya saṃvattati.
‘‘པུན ཙཔརཾ, བྷིཀྑཝེ, སངྒྷོ སམགྒོ སམྨོདམཱནོ ཨཝིཝདམཱནོ ཨེཀུདྡེསོ ཕཱསུཾ ཝིཧརཏི། སངྒྷེ ཁོ པན, བྷིཀྑཝེ, སམགྒེ ན ཙེཝ ཨཉྙམཉྙཾ ཨཀྐོསཱ ཧོནྟི, ན ཙ ཨཉྙམཉྙཾ པརིབྷཱསཱ ཧོནྟི, ན ཙ ཨཉྙམཉྙཾ པརིཀྑེཔཱ ཧོནྟི, ན ཙ ཨཉྙམཉྙཾ པརིཙྩཛནཱ ཧོནྟི། ཏཏྠ ཨཔྤསནྣཱ ཙེཝ པསཱིདནྟི, པསནྣཱནཉྩ བྷིཡྻོབྷཱཝོ ཧོཏི། ཨཡཾ, བྷིཀྑཝེ, པཉྩམོ དྷམྨོ སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟཏི། ཨིམེ ཁོ, བྷིཀྑཝེ, པཉྩ དྷམྨཱ སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟནྟཱི’’ཏི། ཚཊྛཾ།
‘‘Puna caparaṃ, bhikkhave, saṅgho samaggo sammodamāno avivadamāno ekuddeso phāsuṃ viharati. Saṅghe kho pana, bhikkhave, samagge na ceva aññamaññaṃ akkosā honti, na ca aññamaññaṃ paribhāsā honti, na ca aññamaññaṃ parikkhepā honti, na ca aññamaññaṃ pariccajanā honti. Tattha appasannā ceva pasīdanti, pasannānañca bhiyyobhāvo hoti. Ayaṃ, bhikkhave, pañcamo dhammo saddhammassa ṭhitiyā asammosāya anantaradhānāya saṃvattati. Ime kho, bhikkhave, pañca dhammā saddhammassa ṭhitiyā asammosāya anantaradhānāya saṃvattantī’’ti. Chaṭṭhaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. ཏཏིཡསདྡྷམྨསམྨོསསུཏྟཝཎྞནཱ • 6. Tatiyasaddhammasammosasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / (༡༦) ༡. སདྡྷམྨཝགྒོ • (16) 1. Saddhammavaggo
