| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၄. တတိယသမာဓိသုတ္တံ
4. Tatiyasamādhisuttaṃ
၉၄. ‘‘စတ္တာရောမေ, ဘိက္ခဝေ, ပုဂ္ဂလာ သန္တော သံဝိဇ္ဇမာနာ လောကသ္မိံ။ ကတမေ စတ္တာရော? ဣဓ, ဘိက္ခဝေ, ဧကစ္စော ပုဂ္ဂလော လာဘီ ဟောတိ အဇ္ဈတ္တံ စေတောသမထသ္သ, န လာဘီ အဓိပညာဓမ္မဝိပသ္သနာယ။ ဣဓ ပန, ဘိက္ခဝေ, ဧကစ္စော ပုဂ္ဂလော လာဘီ ဟောတိ အဓိပညာဓမ္မဝိပသ္သနာယ, န လာဘီ အဇ္ဈတ္တံ စေတောသမထသ္သ။ ဣဓ ပန, ဘိက္ခဝေ, ဧကစ္စော ပုဂ္ဂလော န စေဝ လာဘီ ဟောတိ အဇ္ဈတ္တံ စေတောသမထသ္သ န စ လာဘီ အဓိပညာဓမ္မဝိပသ္သနာယ။ ဣဓ ပန, ဘိက္ခဝေ, ဧကစ္စော ပုဂ္ဂလော လာဘီ စေဝ ဟောတိ အဇ္ဈတ္တံ စေတောသမထသ္သ လာဘီ စ အဓိပညာဓမ္မဝိပသ္သနာယ။
94. ‘‘Cattārome, bhikkhave, puggalā santo saṃvijjamānā lokasmiṃ. Katame cattāro? Idha, bhikkhave, ekacco puggalo lābhī hoti ajjhattaṃ cetosamathassa, na lābhī adhipaññādhammavipassanāya. Idha pana, bhikkhave, ekacco puggalo lābhī hoti adhipaññādhammavipassanāya, na lābhī ajjhattaṃ cetosamathassa. Idha pana, bhikkhave, ekacco puggalo na ceva lābhī hoti ajjhattaṃ cetosamathassa na ca lābhī adhipaññādhammavipassanāya. Idha pana, bhikkhave, ekacco puggalo lābhī ceva hoti ajjhattaṃ cetosamathassa lābhī ca adhipaññādhammavipassanāya.
‘‘တတ္ရ , ဘိက္ခဝေ, ယ္ဝာယံ ပုဂ္ဂလော လာဘီ အဇ္ဈတ္တံ စေတောသမထသ္သ န လာဘီ အဓိပညာဓမ္မဝိပသ္သနာယ, တေန, ဘိက္ခဝေ, ပုဂ္ဂလေန ယ္ဝာယံ ပုဂ္ဂလော လာဘီ အဓိပညာဓမ္မဝိပသ္သနာယ သော ဥပသင္ကမိတ္ဝာ ဧဝမသ္သ ဝစနီယော – ‘ကထံ နု ခော, အာဝုသော, သင္ခာရာ ဒဋ္ဌဗ္ဗာ? ကထံ သင္ခာရာ သမ္မသိတဗ္ဗာ? ကထံ သင္ခာရာ ဝိပသ္သိတဗ္ဗာ’ 1 တိ? တသ္သ သော ယထာဒိဋ္ဌံ ယထာဝိဒိတံ ဗ္ယာကရောတိ – ‘ဧဝံ ခော, အာဝုသော, သင္ခာရာ ဒဋ္ဌဗ္ဗာ, ဧဝံ သင္ခာရာ သမ္မသိတဗ္ဗာ, ဧဝံ သင္ခာရာ ဝိပသ္သိတဗ္ဗာ’တိ။ သော အပရေန သမယေန လာဘီ စေဝ ဟောတိ အဇ္ဈတ္တံ စေတောသမထသ္သ လာဘီ စ အဓိပညာဓမ္မဝိပသ္သနာယ။
‘‘Tatra , bhikkhave, yvāyaṃ puggalo lābhī ajjhattaṃ cetosamathassa na lābhī adhipaññādhammavipassanāya, tena, bhikkhave, puggalena yvāyaṃ puggalo lābhī adhipaññādhammavipassanāya so upasaṅkamitvā evamassa vacanīyo – ‘kathaṃ nu kho, āvuso, saṅkhārā daṭṭhabbā? Kathaṃ saṅkhārā sammasitabbā? Kathaṃ saṅkhārā vipassitabbā’ 2 ti? Tassa so yathādiṭṭhaṃ yathāviditaṃ byākaroti – ‘evaṃ kho, āvuso, saṅkhārā daṭṭhabbā, evaṃ saṅkhārā sammasitabbā, evaṃ saṅkhārā vipassitabbā’ti. So aparena samayena lābhī ceva hoti ajjhattaṃ cetosamathassa lābhī ca adhipaññādhammavipassanāya.
‘‘တတ္ရ, ဘိက္ခဝေ, ယ္ဝာယံ ပုဂ္ဂလော လာဘီ အဓိပညာဓမ္မဝိပသ္သနာယ န လာဘီ အဇ္ဈတ္တံ စေတောသမထသ္သ, တေန, ဘိက္ခဝေ, ပုဂ္ဂလေန ယ္ဝာယံ ပုဂ္ဂလော လာဘီ အဇ္ဈတ္တံ စေတောသမထသ္သ သော ဥပသင္ကမိတ္ဝာ ဧဝမသ္သ ဝစနီယော – ‘ကထံ နု ခော, အာဝုသော, စိတ္တံ သဏ္ဌပေတဗ္ဗံ? ကထံ စိတ္တံ သန္နိသာဒေတဗ္ဗံ ? ကထံ စိတ္တံ ဧကောဒိ ကာတဗ္ဗံ? ကထံ စိတ္တံ သမာဒဟာတဗ္ဗ’န္တိ? တသ္သ သော ယထာဒိဋ္ဌံ ယထာဝိဒိတံ ဗ္ယာကရောတိ – ‘ဧဝံ ခော, အာဝုသော, စိတ္တံ သဏ္ဌပေတဗ္ဗံ, ဧဝံ စိတ္တံ သန္နိသာဒေတဗ္ဗံ, ဧဝံ စိတ္တံ ဧကောဒိ ကာတဗ္ဗံ 3, ဧဝံ စိတ္တံ သမာဒဟာတဗ္ဗ’န္တိ။ သော အပရေန သမယေ လာဘီ စေဝ ဟောတိ အဓိပညာဓမ္မဝိပသ္သနာယ လာဘီ စ အဇ္ဈတ္တံ စေတောသမထသ္သ။
‘‘Tatra, bhikkhave, yvāyaṃ puggalo lābhī adhipaññādhammavipassanāya na lābhī ajjhattaṃ cetosamathassa, tena, bhikkhave, puggalena yvāyaṃ puggalo lābhī ajjhattaṃ cetosamathassa so upasaṅkamitvā evamassa vacanīyo – ‘kathaṃ nu kho, āvuso, cittaṃ saṇṭhapetabbaṃ? Kathaṃ cittaṃ sannisādetabbaṃ ? Kathaṃ cittaṃ ekodi kātabbaṃ? Kathaṃ cittaṃ samādahātabba’nti? Tassa so yathādiṭṭhaṃ yathāviditaṃ byākaroti – ‘evaṃ kho, āvuso, cittaṃ saṇṭhapetabbaṃ, evaṃ cittaṃ sannisādetabbaṃ, evaṃ cittaṃ ekodi kātabbaṃ 4, evaṃ cittaṃ samādahātabba’nti. So aparena samaye lābhī ceva hoti adhipaññādhammavipassanāya lābhī ca ajjhattaṃ cetosamathassa.
‘‘တတ္ရ, ဘိက္ခဝေ, ယ္ဝာယံ ပုဂ္ဂလော န စေဝ လာဘီ အဇ္ဈတ္တံ စေတောသမထသ္သ န စ လာဘီ အဓိပညာဓမ္မဝိပသ္သနာယ, တေန, ဘိက္ခဝေ, ပုဂ္ဂလေန ယ္ဝာယံ ပုဂ္ဂလော လာဘီ စေဝ အဇ္ဈတ္တံ စေတောသမထသ္သ လာဘီ စ အဓိပညာဓမ္မဝိပသ္သနာယ သော ဥပသင္ကမိတ္ဝာ ဧဝမသ္သ ဝစနီယော – ‘ကထံ နု ခော, အာဝုသော, စိတ္တံ သဏ္ဌပေတဗ္ဗံ? ကထံ စိတ္တံ သန္နိသာဒေတဗ္ဗံ? ကထံ စိတ္တံ ဧကောဒိ ကာတဗ္ဗံ? ကထံ စိတ္တံ သမာဒဟာတဗ္ဗံ? ကထံ သင္ခာရာ ဒဋ္ဌဗ္ဗာ? ကထံ သင္ခာရာ သမ္မသိတဗ္ဗာ? ကထံ သင္ခာရာ ဝိပသ္သိတဗ္ဗာ’တိ? တသ္သ သော ယထာဒိဋ္ဌံ ယထာဝိဒိတံ ဗ္ယာကရောတိ – ‘ဧဝံ ခော, အာဝုသော, စိတ္တံ သဏ္ဌပေတဗ္ဗံ, ဧဝံ စိတ္တံ သန္နိသာဒေတဗ္ဗံ, ဧဝံ စိတ္တံ ဧကောဒိ ကာတဗ္ဗံ, ဧဝံ စိတ္တံ သမာဒဟာတဗ္ဗံ, ဧဝံ သင္ခာရာ ဒဋ္ဌဗ္ဗာ, ဧဝံ သင္ခာရာ သမ္မသိတဗ္ဗာ, ဧဝံ သင္ခာရာ ဝိပသ္သိတဗ္ဗာ’တိ။ သော အပရေန သမယေန လာဘီ စေဝ ဟောတိ အဇ္ဈတ္တံ စေတောသမထသ္သ လာဘီ စ အဓိပညာဓမ္မဝိပသ္သနာယ။
‘‘Tatra, bhikkhave, yvāyaṃ puggalo na ceva lābhī ajjhattaṃ cetosamathassa na ca lābhī adhipaññādhammavipassanāya, tena, bhikkhave, puggalena yvāyaṃ puggalo lābhī ceva ajjhattaṃ cetosamathassa lābhī ca adhipaññādhammavipassanāya so upasaṅkamitvā evamassa vacanīyo – ‘kathaṃ nu kho, āvuso, cittaṃ saṇṭhapetabbaṃ? Kathaṃ cittaṃ sannisādetabbaṃ? Kathaṃ cittaṃ ekodi kātabbaṃ? Kathaṃ cittaṃ samādahātabbaṃ? Kathaṃ saṅkhārā daṭṭhabbā? Kathaṃ saṅkhārā sammasitabbā? Kathaṃ saṅkhārā vipassitabbā’ti? Tassa so yathādiṭṭhaṃ yathāviditaṃ byākaroti – ‘evaṃ kho, āvuso, cittaṃ saṇṭhapetabbaṃ, evaṃ cittaṃ sannisādetabbaṃ, evaṃ cittaṃ ekodi kātabbaṃ, evaṃ cittaṃ samādahātabbaṃ, evaṃ saṅkhārā daṭṭhabbā, evaṃ saṅkhārā sammasitabbā, evaṃ saṅkhārā vipassitabbā’ti. So aparena samayena lābhī ceva hoti ajjhattaṃ cetosamathassa lābhī ca adhipaññādhammavipassanāya.
‘‘တတ္ရ, ဘိက္ခဝေ, ယ္ဝာယံ ပုဂ္ဂလော လာဘီ စေဝ ဟောတိ အဇ္ဈတ္တံ စေတောသမထသ္သ လာဘီ အဓိပညာဓမ္မဝိပသ္သနာယ , တေန, ဘိက္ခဝေ, ပုဂ္ဂလေန တေသု စေဝ ကုသလေသု ဓမ္မေသု ပတိဋ္ဌာယ ဥတ္တရိ အာသဝာနံ ခယာယ ယောဂော ကရဏီယော။ ဣမေ ခော, ဘိက္ခဝေ, စတ္တာရော ပုဂ္ဂလာ သန္တော သံဝိဇ္ဇမာနာ လောကသ္မိ’’န္တိ။ စတုတ္ထံ။
‘‘Tatra, bhikkhave, yvāyaṃ puggalo lābhī ceva hoti ajjhattaṃ cetosamathassa lābhī adhipaññādhammavipassanāya , tena, bhikkhave, puggalena tesu ceva kusalesu dhammesu patiṭṭhāya uttari āsavānaṃ khayāya yogo karaṇīyo. Ime kho, bhikkhave, cattāro puggalā santo saṃvijjamānā lokasmi’’nti. Catutthaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၄. တတိယသမာဓိသုတ္တဝဏ္ဏနာ • 4. Tatiyasamādhisuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၄. တတိယသမာဓိသုတ္တဝဏ္ဏနာ • 4. Tatiyasamādhisuttavaṇṇanā
