| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
១០. តតិយសមណព្រាហ្មណសុត្តំ
10. Tatiyasamaṇabrāhmaṇasuttaṃ
១២៣. សាវត្ថិយំ វិហរតិ…បេ.… ‘‘យេ ហិ កេចិ, ភិក្ខវេ, សមណា វា ព្រាហ្មណា វា បថវីធាតុំ នប្បជានន្តិ, បថវីធាតុសមុទយំ នប្បជានន្តិ, បថវីធាតុនិរោធំ នប្បជានន្តិ, បថវីធាតុនិរោធគាមិនិំ បដិបទំ នប្បជានន្តិ…បេ.… អាបោធាតុំ នប្បជានន្តិ… តេជោធាតុំ នប្បជានន្តិ… វាយោធាតុំ នប្បជានន្តិ, វាយោធាតុសមុទយំ នប្បជានន្តិ, វាយោធាតុនិរោធំ នប្បជានន្តិ, វាយោធាតុនិរោធគាមិនិំ បដិបទំ នប្បជានន្តិ, ន មេ តេ, ភិក្ខវេ, សមណា វា ព្រាហ្មណា វា សមណេសុ វា សមណសម្មតា ព្រាហ្មណេសុ វា ព្រាហ្មណសម្មតា; ន ច បន តេ អាយស្មន្តោ សាមញ្ញត្ថំ វា ព្រហ្មញ្ញត្ថំ វា ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរន្តិ’’។
123. Sāvatthiyaṃ viharati…pe… ‘‘ye hi keci, bhikkhave, samaṇā vā brāhmaṇā vā pathavīdhātuṃ nappajānanti, pathavīdhātusamudayaṃ nappajānanti, pathavīdhātunirodhaṃ nappajānanti, pathavīdhātunirodhagāminiṃ paṭipadaṃ nappajānanti…pe… āpodhātuṃ nappajānanti… tejodhātuṃ nappajānanti… vāyodhātuṃ nappajānanti, vāyodhātusamudayaṃ nappajānanti, vāyodhātunirodhaṃ nappajānanti, vāyodhātunirodhagāminiṃ paṭipadaṃ nappajānanti, na me te, bhikkhave, samaṇā vā brāhmaṇā vā samaṇesu vā samaṇasammatā brāhmaṇesu vā brāhmaṇasammatā; na ca pana te āyasmanto sāmaññatthaṃ vā brahmaññatthaṃ vā diṭṭheva dhamme sayaṃ abhiññā sacchikatvā upasampajja viharanti’’.
‘‘យេ ច ខោ កេចិ, ភិក្ខវេ, សមណា វា ព្រាហ្មណា វា បថវីធាតុំ បជានន្តិ, បថវីធាតុសមុទយំ បជានន្តិ, បថវីធាតុនិរោធំ បជានន្តិ, បថវីធាតុនិរោធគាមិនិំ បដិបទំ បជានន្តិ… យេ ច ខោ កេចិ, ភិក្ខវេ, សមណា វា ព្រាហ្មណា វា…បេ.… អាបោធាតុំ បជានន្តិ… តេជោធាតុំ បជានន្តិ… វាយោធាតុំ បជានន្តិ, វាយោធាតុសមុទយំ បជានន្តិ, វាយោធាតុនិរោធំ បជានន្តិ, វាយោធាតុនិរោធគាមិនិំ បដិបទំ បជានន្តិ, តេ ច ខោ មេ, ភិក្ខវេ, សមណា វា ព្រាហ្មណា វា សមណេសុ ចេវ សមណសម្មតា ព្រាហ្មណេសុ ច ព្រាហ្មណសម្មតា; តេ ច បនាយស្មន្តោ សាមញ្ញត្ថញ្ច ព្រហ្មញ្ញត្ថញ្ច ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរន្តី’’តិ។ ទសមំ។
‘‘Ye ca kho keci, bhikkhave, samaṇā vā brāhmaṇā vā pathavīdhātuṃ pajānanti, pathavīdhātusamudayaṃ pajānanti, pathavīdhātunirodhaṃ pajānanti, pathavīdhātunirodhagāminiṃ paṭipadaṃ pajānanti… ye ca kho keci, bhikkhave, samaṇā vā brāhmaṇā vā…pe… āpodhātuṃ pajānanti… tejodhātuṃ pajānanti… vāyodhātuṃ pajānanti, vāyodhātusamudayaṃ pajānanti, vāyodhātunirodhaṃ pajānanti, vāyodhātunirodhagāminiṃ paṭipadaṃ pajānanti, te ca kho me, bhikkhave, samaṇā vā brāhmaṇā vā samaṇesu ceva samaṇasammatā brāhmaṇesu ca brāhmaṇasammatā; te ca panāyasmanto sāmaññatthañca brahmaññatthañca diṭṭheva dhamme sayaṃ abhiññā sacchikatvā upasampajja viharantī’’ti. Dasamaṃ.
ចតុត្ថោ វគ្គោ។
Catuttho vaggo.
តស្សុទ្ទានំ –
Tassuddānaṃ –
ចតស្សោ បុព្ពេ អចរិំ, នោចេទញ្ច ទុក្ខេន ច;
Catasso pubbe acariṃ, nocedañca dukkhena ca;
អភិនន្ទញ្ច ឧប្បាទោ, តយោ សមណព្រាហ្មណាតិ។
Abhinandañca uppādo, tayo samaṇabrāhmaṇāti.
ធាតុសំយុត្តំ សមត្តំ។
Dhātusaṃyuttaṃ samattaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៦-១០. អភិនន្ទសុត្តាទិវណ្ណនា • 6-10. Abhinandasuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៦-១០. អភិនន្ទសុត្តាទិវណ្ណនា • 6-10. Abhinandasuttādivaṇṇanā
