| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೧೦. ತತಿಯಸಮಣಬ್ರಾಹ್ಮಣಸುತ್ತಂ
10. Tatiyasamaṇabrāhmaṇasuttaṃ
೧೨೩. ಸಾವತ್ಥಿಯಂ ವಿಹರತಿ…ಪೇ॰… ‘‘ಯೇ ಹಿ ಕೇಚಿ, ಭಿಕ್ಖವೇ, ಸಮಣಾ ವಾ ಬ್ರಾಹ್ಮಣಾ ವಾ ಪಥವೀಧಾತುಂ ನಪ್ಪಜಾನನ್ತಿ, ಪಥವೀಧಾತುಸಮುದಯಂ ನಪ್ಪಜಾನನ್ತಿ, ಪಥವೀಧಾತುನಿರೋಧಂ ನಪ್ಪಜಾನನ್ತಿ, ಪಥವೀಧಾತುನಿರೋಧಗಾಮಿನಿಂ ಪಟಿಪದಂ ನಪ್ಪಜಾನನ್ತಿ…ಪೇ॰… ಆಪೋಧಾತುಂ ನಪ್ಪಜಾನನ್ತಿ… ತೇಜೋಧಾತುಂ ನಪ್ಪಜಾನನ್ತಿ… ವಾಯೋಧಾತುಂ ನಪ್ಪಜಾನನ್ತಿ, ವಾಯೋಧಾತುಸಮುದಯಂ ನಪ್ಪಜಾನನ್ತಿ, ವಾಯೋಧಾತುನಿರೋಧಂ ನಪ್ಪಜಾನನ್ತಿ, ವಾಯೋಧಾತುನಿರೋಧಗಾಮಿನಿಂ ಪಟಿಪದಂ ನಪ್ಪಜಾನನ್ತಿ, ನ ಮೇ ತೇ, ಭಿಕ್ಖವೇ, ಸಮಣಾ ವಾ ಬ್ರಾಹ್ಮಣಾ ವಾ ಸಮಣೇಸು ವಾ ಸಮಣಸಮ್ಮತಾ ಬ್ರಾಹ್ಮಣೇಸು ವಾ ಬ್ರಾಹ್ಮಣಸಮ್ಮತಾ; ನ ಚ ಪನ ತೇ ಆಯಸ್ಮನ್ತೋ ಸಾಮಞ್ಞತ್ಥಂ ವಾ ಬ್ರಹ್ಮಞ್ಞತ್ಥಂ ವಾ ದಿಟ್ಠೇವ ಧಮ್ಮೇ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಉಪಸಮ್ಪಜ್ಜ ವಿಹರನ್ತಿ’’।
123. Sāvatthiyaṃ viharati…pe… ‘‘ye hi keci, bhikkhave, samaṇā vā brāhmaṇā vā pathavīdhātuṃ nappajānanti, pathavīdhātusamudayaṃ nappajānanti, pathavīdhātunirodhaṃ nappajānanti, pathavīdhātunirodhagāminiṃ paṭipadaṃ nappajānanti…pe… āpodhātuṃ nappajānanti… tejodhātuṃ nappajānanti… vāyodhātuṃ nappajānanti, vāyodhātusamudayaṃ nappajānanti, vāyodhātunirodhaṃ nappajānanti, vāyodhātunirodhagāminiṃ paṭipadaṃ nappajānanti, na me te, bhikkhave, samaṇā vā brāhmaṇā vā samaṇesu vā samaṇasammatā brāhmaṇesu vā brāhmaṇasammatā; na ca pana te āyasmanto sāmaññatthaṃ vā brahmaññatthaṃ vā diṭṭheva dhamme sayaṃ abhiññā sacchikatvā upasampajja viharanti’’.
‘‘ಯೇ ಚ ಖೋ ಕೇಚಿ, ಭಿಕ್ಖವೇ, ಸಮಣಾ ವಾ ಬ್ರಾಹ್ಮಣಾ ವಾ ಪಥವೀಧಾತುಂ ಪಜಾನನ್ತಿ, ಪಥವೀಧಾತುಸಮುದಯಂ ಪಜಾನನ್ತಿ, ಪಥವೀಧಾತುನಿರೋಧಂ ಪಜಾನನ್ತಿ, ಪಥವೀಧಾತುನಿರೋಧಗಾಮಿನಿಂ ಪಟಿಪದಂ ಪಜಾನನ್ತಿ… ಯೇ ಚ ಖೋ ಕೇಚಿ, ಭಿಕ್ಖವೇ, ಸಮಣಾ ವಾ ಬ್ರಾಹ್ಮಣಾ ವಾ…ಪೇ॰… ಆಪೋಧಾತುಂ ಪಜಾನನ್ತಿ… ತೇಜೋಧಾತುಂ ಪಜಾನನ್ತಿ… ವಾಯೋಧಾತುಂ ಪಜಾನನ್ತಿ, ವಾಯೋಧಾತುಸಮುದಯಂ ಪಜಾನನ್ತಿ, ವಾಯೋಧಾತುನಿರೋಧಂ ಪಜಾನನ್ತಿ, ವಾಯೋಧಾತುನಿರೋಧಗಾಮಿನಿಂ ಪಟಿಪದಂ ಪಜಾನನ್ತಿ, ತೇ ಚ ಖೋ ಮೇ, ಭಿಕ್ಖವೇ, ಸಮಣಾ ವಾ ಬ್ರಾಹ್ಮಣಾ ವಾ ಸಮಣೇಸು ಚೇವ ಸಮಣಸಮ್ಮತಾ ಬ್ರಾಹ್ಮಣೇಸು ಚ ಬ್ರಾಹ್ಮಣಸಮ್ಮತಾ; ತೇ ಚ ಪನಾಯಸ್ಮನ್ತೋ ಸಾಮಞ್ಞತ್ಥಞ್ಚ ಬ್ರಹ್ಮಞ್ಞತ್ಥಞ್ಚ ದಿಟ್ಠೇವ ಧಮ್ಮೇ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಉಪಸಮ್ಪಜ್ಜ ವಿಹರನ್ತೀ’’ತಿ। ದಸಮಂ।
‘‘Ye ca kho keci, bhikkhave, samaṇā vā brāhmaṇā vā pathavīdhātuṃ pajānanti, pathavīdhātusamudayaṃ pajānanti, pathavīdhātunirodhaṃ pajānanti, pathavīdhātunirodhagāminiṃ paṭipadaṃ pajānanti… ye ca kho keci, bhikkhave, samaṇā vā brāhmaṇā vā…pe… āpodhātuṃ pajānanti… tejodhātuṃ pajānanti… vāyodhātuṃ pajānanti, vāyodhātusamudayaṃ pajānanti, vāyodhātunirodhaṃ pajānanti, vāyodhātunirodhagāminiṃ paṭipadaṃ pajānanti, te ca kho me, bhikkhave, samaṇā vā brāhmaṇā vā samaṇesu ceva samaṇasammatā brāhmaṇesu ca brāhmaṇasammatā; te ca panāyasmanto sāmaññatthañca brahmaññatthañca diṭṭheva dhamme sayaṃ abhiññā sacchikatvā upasampajja viharantī’’ti. Dasamaṃ.
ಚತುತ್ಥೋ ವಗ್ಗೋ।
Catuttho vaggo.
ತಸ್ಸುದ್ದಾನಂ –
Tassuddānaṃ –
ಚತಸ್ಸೋ ಪುಬ್ಬೇ ಅಚರಿಂ, ನೋಚೇದಞ್ಚ ದುಕ್ಖೇನ ಚ।
Catasso pubbe acariṃ, nocedañca dukkhena ca;
ಅಭಿನನ್ದಞ್ಚ ಉಪ್ಪಾದೋ, ತಯೋ ಸಮಣಬ್ರಾಹ್ಮಣಾತಿ॥
Abhinandañca uppādo, tayo samaṇabrāhmaṇāti.
ಧಾತುಸಂಯುತ್ತಂ ಸಮತ್ತಂ।
Dhātusaṃyuttaṃ samattaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೬-೧೦. ಅಭಿನನ್ದಸುತ್ತಾದಿವಣ್ಣನಾ • 6-10. Abhinandasuttādivaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೬-೧೦. ಅಭಿನನ್ದಸುತ್ತಾದಿವಣ್ಣನಾ • 6-10. Abhinandasuttādivaṇṇanā
