| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. තතියසමණබ්‍රාහ්‌මණසුත්‌තං
10. Tatiyasamaṇabrāhmaṇasuttaṃ
123. සාවත්‌ථියං විහරති…පෙ.… ‘‘යෙ හි කෙචි, භික්‌ඛවෙ, සමණා වා බ්‍රාහ්‌මණා වා පථවීධාතුං නප්‌පජානන්‌ති, පථවීධාතුසමුදයං නප්‌පජානන්‌ති, පථවීධාතුනිරොධං නප්‌පජානන්‌ති, පථවීධාතුනිරොධගාමිනිං පටිපදං නප්‌පජානන්‌ති…පෙ.… ආපොධාතුං නප්‌පජානන්‌ති… තෙජොධාතුං නප්‌පජානන්‌ති… වායොධාතුං නප්‌පජානන්‌ති, වායොධාතුසමුදයං නප්‌පජානන්‌ති, වායොධාතුනිරොධං නප්‌පජානන්‌ති, වායොධාතුනිරොධගාමිනිං පටිපදං නප්‌පජානන්‌ති, න මෙ තෙ, භික්‌ඛවෙ, සමණා වා බ්‍රාහ්‌මණා වා සමණෙසු වා සමණසම්‌මතා බ්‍රාහ්‌මණෙසු වා බ්‍රාහ්‌මණසම්‌මතා; න ච පන තෙ ආයස්‌මන්‌තො සාමඤ්‌ඤත්‌ථං වා බ්‍රහ්‌මඤ්‌ඤත්‌ථං වා දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරන්‌ති’’.
123. Sāvatthiyaṃ viharati…pe… ‘‘ye hi keci, bhikkhave, samaṇā vā brāhmaṇā vā pathavīdhātuṃ nappajānanti, pathavīdhātusamudayaṃ nappajānanti, pathavīdhātunirodhaṃ nappajānanti, pathavīdhātunirodhagāminiṃ paṭipadaṃ nappajānanti…pe… āpodhātuṃ nappajānanti… tejodhātuṃ nappajānanti… vāyodhātuṃ nappajānanti, vāyodhātusamudayaṃ nappajānanti, vāyodhātunirodhaṃ nappajānanti, vāyodhātunirodhagāminiṃ paṭipadaṃ nappajānanti, na me te, bhikkhave, samaṇā vā brāhmaṇā vā samaṇesu vā samaṇasammatā brāhmaṇesu vā brāhmaṇasammatā; na ca pana te āyasmanto sāmaññatthaṃ vā brahmaññatthaṃ vā diṭṭheva dhamme sayaṃ abhiññā sacchikatvā upasampajja viharanti’’.
‘‘යෙ ච ඛො කෙචි, භික්‌ඛවෙ, සමණා වා බ්‍රාහ්‌මණා වා පථවීධාතුං පජානන්‌ති, පථවීධාතුසමුදයං පජානන්‌ති, පථවීධාතුනිරොධං පජානන්‌ති, පථවීධාතුනිරොධගාමිනිං පටිපදං පජානන්‌ති… යෙ ච ඛො කෙචි, භික්‌ඛවෙ, සමණා වා බ්‍රාහ්‌මණා වා…පෙ.… ආපොධාතුං පජානන්‌ති… තෙජොධාතුං පජානන්‌ති… වායොධාතුං පජානන්‌ති, වායොධාතුසමුදයං පජානන්‌ති, වායොධාතුනිරොධං පජානන්‌ති, වායොධාතුනිරොධගාමිනිං පටිපදං පජානන්‌ති, තෙ ච ඛො මෙ, භික්‌ඛවෙ, සමණා වා බ්‍රාහ්‌මණා වා සමණෙසු චෙව සමණසම්‌මතා බ්‍රාහ්‌මණෙසු ච බ්‍රාහ්‌මණසම්‌මතා; තෙ ච පනායස්‌මන්‌තො සාමඤ්‌ඤත්‌ථඤ්‌ච බ්‍රහ්‌මඤ්‌ඤත්‌ථඤ්‌ච දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරන්‌තී’’ති. දසමං.
‘‘Ye ca kho keci, bhikkhave, samaṇā vā brāhmaṇā vā pathavīdhātuṃ pajānanti, pathavīdhātusamudayaṃ pajānanti, pathavīdhātunirodhaṃ pajānanti, pathavīdhātunirodhagāminiṃ paṭipadaṃ pajānanti… ye ca kho keci, bhikkhave, samaṇā vā brāhmaṇā vā…pe… āpodhātuṃ pajānanti… tejodhātuṃ pajānanti… vāyodhātuṃ pajānanti, vāyodhātusamudayaṃ pajānanti, vāyodhātunirodhaṃ pajānanti, vāyodhātunirodhagāminiṃ paṭipadaṃ pajānanti, te ca kho me, bhikkhave, samaṇā vā brāhmaṇā vā samaṇesu ceva samaṇasammatā brāhmaṇesu ca brāhmaṇasammatā; te ca panāyasmanto sāmaññatthañca brahmaññatthañca diṭṭheva dhamme sayaṃ abhiññā sacchikatvā upasampajja viharantī’’ti. Dasamaṃ.
චතුත්‌ථො වග්‌ගො.
Catuttho vaggo.
තස්‌සුද්‌දානං –
Tassuddānaṃ –
චතස්‌සො පුබ්‌බෙ අචරිං, නොචෙදඤ්‌ච දුක්‌ඛෙන ච;
Catasso pubbe acariṃ, nocedañca dukkhena ca;
අභිනන්‌දඤ්‌ච උප්‌පාදො, තයො සමණබ්‍රාහ්‌මණාති.
Abhinandañca uppādo, tayo samaṇabrāhmaṇāti.
ධාතුසංයුත්‌තං සමත්‌තං.
Dhātusaṃyuttaṃ samattaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6-10. අභිනන්‌දසුත්‌තාදිවණ්‌ණනා • 6-10. Abhinandasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 6-10. අභිනන්‌දසුත්‌තාදිවණ්‌ණනා • 6-10. Abhinandasuttādivaṇṇanā
