| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
3. ததியஸங்கா⁴தி³ஸேஸஸிக்கா²பத³ங்
3. Tatiyasaṅghādisesasikkhāpadaṃ
687. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ப⁴த்³தா³ய காபிலானியா அந்தேவாஸினீ பி⁴க்கு²னீ பி⁴க்கு²னீஹி ஸத்³தி⁴ங் ப⁴ண்டி³த்வா கா³மகங் 1 ஞாதிகுலங் அக³மாஸி. ப⁴த்³தா³ காபிலானீ தங் பி⁴க்கு²னிங் அபஸ்ஸந்தீ பி⁴க்கு²னியோ புச்சி² – ‘‘கஹங் இத்த²ன்னாமா, ந தி³ஸ்ஸதீ’’தி! ‘‘பி⁴க்கு²னீஹி ஸத்³தி⁴ங், அய்யே, ப⁴ண்டி³த்வா ந தி³ஸ்ஸதீ’’தி. ‘‘அம்மா, அமுகஸ்மிங் கா³மகே ஏதிஸ்ஸா ஞாதிகுலங். தத்த² க³ந்த்வா விசினதா²’’தி. பி⁴க்கு²னியோ தத்த² க³ந்த்வா தங் பி⁴க்கு²னிங் பஸ்ஸித்வா ஏதத³வோசுங் – ‘‘கிஸ்ஸ த்வங், அய்யே , ஏகிகா ஆக³தா, கச்சிஸி அப்பத⁴ங்ஸிதா’’தி? ‘‘அப்பத⁴ங்ஸிதாம்ஹி, அய்யே’’தி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னீ ஏகா கா³மந்தரங் க³ச்சி²ஸ்ஸதீ’’தி…பே॰… ஸச்சங் கிர, பி⁴க்க²வே, பி⁴க்கு²னீ ஏகா கா³மந்தரங் க³ச்ச²தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே , பி⁴க்கு²னீ ஏகா கா³மந்தரங் க³ச்சி²ஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
687. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhaddāya kāpilāniyā antevāsinī bhikkhunī bhikkhunīhi saddhiṃ bhaṇḍitvā gāmakaṃ 2 ñātikulaṃ agamāsi. Bhaddā kāpilānī taṃ bhikkhuniṃ apassantī bhikkhuniyo pucchi – ‘‘kahaṃ itthannāmā, na dissatī’’ti! ‘‘Bhikkhunīhi saddhiṃ, ayye, bhaṇḍitvā na dissatī’’ti. ‘‘Ammā, amukasmiṃ gāmake etissā ñātikulaṃ. Tattha gantvā vicinathā’’ti. Bhikkhuniyo tattha gantvā taṃ bhikkhuniṃ passitvā etadavocuṃ – ‘‘kissa tvaṃ, ayye , ekikā āgatā, kaccisi appadhaṃsitā’’ti? ‘‘Appadhaṃsitāmhi, ayye’’ti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī ekā gāmantaraṃ gacchissatī’’ti…pe… saccaṃ kira, bhikkhave, bhikkhunī ekā gāmantaraṃ gacchatīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave , bhikkhunī ekā gāmantaraṃ gacchissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘யா பன பி⁴க்கு²னீ ஏகா கா³மந்தரங் க³ச்செ²ய்ய, அயம்பி பி⁴க்கு²னீ பட²மாபத்திகங் த⁴ம்மங் ஆபன்னா நிஸ்ஸாரணீயங் ஸங்கா⁴தி³ஸேஸ’’ந்தி.
‘‘Yā pana bhikkhunī ekā gāmantaraṃ gaccheyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
ஏவஞ்சித³ங் ப⁴க³வதா பி⁴க்கு²னீனங் ஸிக்கா²பத³ங் பஞ்ஞத்தங் ஹோதி.
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
688. தேன கோ² பன ஸமயேன த்³வே பி⁴க்கு²னியோ ஸாகேதா ஸாவத்தி²ங் அத்³தா⁴னமக்³க³ப்படிபன்னா ஹொந்தி. அந்தராமக்³கே³ நதீ³ தரிதப்³பா³ ஹோதி. அத² கோ² தா பி⁴க்கு²னியோ நாவிகே உபஸங்கமித்வா ஏதத³வோசுங் – ‘‘ஸாது⁴ நோ, ஆவுஸோ, தாரேதா²’’தி. ‘‘நாய்யே, ஸக்கா உபோ⁴ ஸகிங் தாரேது’’ந்தி. ஏகோ ஏகங் உத்தாரேஸி. உத்திண்ணோ உத்திண்ணங் தூ³ஸேஸி. அனுத்திண்ணோ அனுத்திண்ணங் தூ³ஸேஸி. தா பச்சா² ஸமாக³ந்த்வா புச்சி²ங்ஸு – ‘‘கச்சிஸி, அய்யே, அப்பத⁴ங்ஸிதா’’தி? ‘‘பத⁴ங்ஸிதாம்ஹி, அய்யே! த்வங் பன, அய்யே, அப்பத⁴ங்ஸிதா’’தி? ‘‘பத⁴ங்ஸிதாம்ஹி, அய்யே’’தி. அத² கோ² தா பி⁴க்கு²னியோ ஸாவத்தி²ங் க³ந்த்வா பி⁴க்கு²னீனங் ஏதமத்த²ங் ஆரோசேஸுங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னீ ஏகா நதீ³பாரங் க³ச்சி²ஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னங் ஏதமத்த²ங் ஆரோசேஸுங். பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ஸச்சங் கிர, பி⁴க்க²வே, பி⁴க்கு²னீ ஏகா நதீ³பாரங் க³ச்ச²தீ’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னீ ஏகா நதீ³பாரங் க³ச்சி²ஸ்ஸதி! நேதங் , பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
688. Tena kho pana samayena dve bhikkhuniyo sāketā sāvatthiṃ addhānamaggappaṭipannā honti. Antarāmagge nadī taritabbā hoti. Atha kho tā bhikkhuniyo nāvike upasaṅkamitvā etadavocuṃ – ‘‘sādhu no, āvuso, tārethā’’ti. ‘‘Nāyye, sakkā ubho sakiṃ tāretu’’nti. Eko ekaṃ uttāresi. Uttiṇṇo uttiṇṇaṃ dūsesi. Anuttiṇṇo anuttiṇṇaṃ dūsesi. Tā pacchā samāgantvā pucchiṃsu – ‘‘kaccisi, ayye, appadhaṃsitā’’ti? ‘‘Padhaṃsitāmhi, ayye! Tvaṃ pana, ayye, appadhaṃsitā’’ti? ‘‘Padhaṃsitāmhi, ayye’’ti. Atha kho tā bhikkhuniyo sāvatthiṃ gantvā bhikkhunīnaṃ etamatthaṃ ārocesuṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī ekā nadīpāraṃ gacchissatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ…pe… saccaṃ kira, bhikkhave, bhikkhunī ekā nadīpāraṃ gacchatī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī ekā nadīpāraṃ gacchissati! Netaṃ , bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘யா பன பி⁴க்கு²னீ ஏகா வா கா³மந்தரங் க³ச்செ²ய்ய, ஏகா வா நதீ³பாரங் க³ச்செ²ய்ய, அயம்பி பி⁴க்கு²னீ பட²மாபத்திகங் த⁴ம்மங் ஆபன்னா நிஸ்ஸாரணீயங் ஸங்கா⁴தி³ஸேஸ’’ந்தி.
‘‘Yā pana bhikkhunī ekā vā gāmantaraṃ gaccheyya, ekā vā nadīpāraṃ gaccheyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
ஏவஞ்சித³ங் ப⁴க³வதா பி⁴க்கு²னீனங் ஸிக்கா²பத³ங் பஞ்ஞத்தங் ஹோதி.
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
689. தேன கோ² பன ஸமயேன ஸம்ப³ஹுலா பி⁴க்கு²னியோ கோஸலேஸு ஜனபதே³ ஸாவத்தி²ங் க³ச்ச²ந்தா 3 ஸாயங் அஞ்ஞதரங் கா³மங் உபக³ச்சி²ங்ஸு. தத்த² அஞ்ஞதரா பி⁴க்கு²னீ அபி⁴ரூபா ஹோதி த³ஸ்ஸனீயா பாஸாதி³கா. அஞ்ஞதரோ புரிஸோ தஸ்ஸா பி⁴க்கு²னியா ஸஹ த³ஸ்ஸனேன படிப³த்³த⁴சித்தோ ஹோதி. அத² கோ² ஸோ புரிஸோ தாஸங் பி⁴க்கு²னீனங் ஸெய்யங் பஞ்ஞபெந்தோ தஸ்ஸா பி⁴க்கு²னியா ஸெய்யங் ஏகமந்தங் பஞ்ஞாபேஸி. அத² கோ² ஸா பி⁴க்கு²னீ ஸல்லக்கெ²த்வா – ‘‘பரியுட்டி²தோ அயங் புரிஸோ; ஸசே ரத்திங் ஆக³ச்சி²ஸ்ஸதி, விஸ்ஸரோ மே ப⁴விஸ்ஸதீ’’தி, பி⁴க்கு²னியோ அனாபுச்சா² அஞ்ஞதரங் குலங் க³ந்த்வா ஸெய்யங் கப்பேஸி. அத² கோ² ஸோ புரிஸோ ரத்திங் ஆக³ந்த்வா தங் பி⁴க்கு²னிங் க³வேஸந்தோ பி⁴க்கு²னியோ க⁴ட்டேஸி. பி⁴க்கு²னியோ தங் பி⁴க்கு²னிங் அபஸ்ஸந்தியோ ஏவமாஹங்ஸு – ‘‘நிஸ்ஸங்ஸயங் கோ² ஸா பி⁴க்கு²னீ புரிஸேன ஸத்³தி⁴ங் நிக்க²ந்தா’’தி.
689. Tena kho pana samayena sambahulā bhikkhuniyo kosalesu janapade sāvatthiṃ gacchantā 4 sāyaṃ aññataraṃ gāmaṃ upagacchiṃsu. Tattha aññatarā bhikkhunī abhirūpā hoti dassanīyā pāsādikā. Aññataro puriso tassā bhikkhuniyā saha dassanena paṭibaddhacitto hoti. Atha kho so puriso tāsaṃ bhikkhunīnaṃ seyyaṃ paññapento tassā bhikkhuniyā seyyaṃ ekamantaṃ paññāpesi. Atha kho sā bhikkhunī sallakkhetvā – ‘‘pariyuṭṭhito ayaṃ puriso; sace rattiṃ āgacchissati, vissaro me bhavissatī’’ti, bhikkhuniyo anāpucchā aññataraṃ kulaṃ gantvā seyyaṃ kappesi. Atha kho so puriso rattiṃ āgantvā taṃ bhikkhuniṃ gavesanto bhikkhuniyo ghaṭṭesi. Bhikkhuniyo taṃ bhikkhuniṃ apassantiyo evamāhaṃsu – ‘‘nissaṃsayaṃ kho sā bhikkhunī purisena saddhiṃ nikkhantā’’ti.
அத² கோ² ஸா பி⁴க்கு²னீ தஸ்ஸா ரத்தியா அச்சயேன யேன தா பி⁴க்கு²னியோ தேனுபஸங்கமி. பி⁴க்கு²னியோ தங் பி⁴க்கு²னிங் ஏதத³வோசுங் – ‘‘கிஸ்ஸ த்வங், அய்யே, புரிஸேன ஸத்³தி⁴ங் நிக்க²ந்தா’’தி? ‘‘நாஹங், அய்யே, புரிஸேன ஸத்³தி⁴ங் நிக்க²ந்தா’’தி. பி⁴க்கு²னீனங் ஏதமத்த²ங் ஆரோசேஸி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னீ ஏகா ரத்திங் விப்பவஸிஸ்ஸதீ’’தி…பே॰… ஸச்சங் கிர, பி⁴க்க²வே, பி⁴க்கு²னீ ஏகா ரத்திங் விப்பவஸீதி 5? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னீ ஏகா ரத்திங் விப்பவஸிஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
Atha kho sā bhikkhunī tassā rattiyā accayena yena tā bhikkhuniyo tenupasaṅkami. Bhikkhuniyo taṃ bhikkhuniṃ etadavocuṃ – ‘‘kissa tvaṃ, ayye, purisena saddhiṃ nikkhantā’’ti? ‘‘Nāhaṃ, ayye, purisena saddhiṃ nikkhantā’’ti. Bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī ekā rattiṃ vippavasissatī’’ti…pe… saccaṃ kira, bhikkhave, bhikkhunī ekā rattiṃ vippavasīti 6? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī ekā rattiṃ vippavasissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘யா பன பி⁴க்கு²னீ ஏகா வா கா³மந்தரங் க³ச்செ²ய்ய, ஏகா வா நதீ³பாரங் க³ச்செ²ய்ய, ஏகா வா ரத்திங் விப்பவஸெய்ய, அயம்பி பி⁴க்கு²னீ பட²மாபத்திகங் த⁴ம்மங் ஆபன்னா நிஸ்ஸாரணீயங் ஸங்கா⁴தி³ஸேஸ’’ந்தி.
‘‘Yā pana bhikkhunī ekā vā gāmantaraṃ gaccheyya, ekā vā nadīpāraṃ gaccheyya, ekā vā rattiṃ vippavaseyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
ஏவஞ்சித³ங் ப⁴க³வதா பி⁴க்கு²னீனங் ஸிக்கா²பத³ங் பஞ்ஞத்தங் ஹோதி.
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
690. தேன கோ² பன ஸமயேன ஸம்ப³ஹுலா பி⁴க்கு²னியோ கோஸலேஸு ஜனபதே³ ஸாவத்தி²ங் அத்³தா⁴னமக்³க³ப்படிபன்னா ஹொந்தி. தத்த² அஞ்ஞதரா பி⁴க்கு²னீ வச்சேன பீளிதா ஏகிகா ஓஹீயித்வா 7 பச்சா² அக³மாஸி. மனுஸ்ஸா தங் பி⁴க்கு²னிங் பஸ்ஸித்வா தூ³ஸேஸுங். அத² கோ² ஸா பி⁴க்கு²னீ யேன தா பி⁴க்கு²னியோ தேனுபஸங்கமி. பி⁴க்கு²னியோ தங் பி⁴க்கு²னிங் ஏதத³வோசுங் – ‘‘கிஸ்ஸ த்வங், அய்யே, ஏகிகா ஓஹீனா, கச்சிஸி அப்பத⁴ங்ஸிதா’’தி? ‘‘பத⁴ங்ஸிதாம்ஹி, அய்யே’’தி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – கத²ஞ்ஹி நாம பி⁴க்கு²னீ ஏகா க³ணம்ஹா ஓஹீயிஸ்ஸதீதி…பே॰… ஸச்சங் கிர, பி⁴க்க²வே, பி⁴க்கு²னீ ஏகா க³ணம்ஹா ஓஹீயதீதி? ‘‘ஸச்சங், ப⁴க³வா’’தி . விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னீ ஏகா க³ணம்ஹா ஓஹீயிஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
690. Tena kho pana samayena sambahulā bhikkhuniyo kosalesu janapade sāvatthiṃ addhānamaggappaṭipannā honti. Tattha aññatarā bhikkhunī vaccena pīḷitā ekikā ohīyitvā 8 pacchā agamāsi. Manussā taṃ bhikkhuniṃ passitvā dūsesuṃ. Atha kho sā bhikkhunī yena tā bhikkhuniyo tenupasaṅkami. Bhikkhuniyo taṃ bhikkhuniṃ etadavocuṃ – ‘‘kissa tvaṃ, ayye, ekikā ohīnā, kaccisi appadhaṃsitā’’ti? ‘‘Padhaṃsitāmhi, ayye’’ti. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma bhikkhunī ekā gaṇamhā ohīyissatīti…pe… saccaṃ kira, bhikkhave, bhikkhunī ekā gaṇamhā ohīyatīti? ‘‘Saccaṃ, bhagavā’’ti . Vigarahi buddho bhagavā…pe… kathañhi nāma, bhikkhave, bhikkhunī ekā gaṇamhā ohīyissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
691. ‘‘யா பன பி⁴க்கு²னீ ஏகா வா கா³மந்தரங் க³ச்செ²ய்ய, ஏகா வா நதீ³பாரங் க³ச்செ²ய்ய, ஏகா வா ரத்திங் விப்பவஸெய்ய, ஏகா வா க³ணம்ஹா ஓஹீயெய்ய, அயம்பி பி⁴க்கு²னீ பட²மாபத்திகங் த⁴ம்மங் ஆபன்னா நிஸ்ஸாரணீயங் ஸங்கா⁴தி³ஸேஸ’’ந்தி.
691.‘‘Yāpana bhikkhunī ekā vā gāmantaraṃ gaccheyya, ekā vā nadīpāraṃ gaccheyya, ekā vā rattiṃ vippavaseyya, ekā vā gaṇamhā ohīyeyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
692. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
692.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ஏகா வா கா³மந்தரங் க³ச்செ²ய்யாதி பரிக்கி²த்தஸ்ஸ கா³மஸ்ஸ பரிக்கே²பங் பட²மங் பாத³ங் அதிக்காமெந்தியா ஆபத்தி து²ல்லச்சயஸ்ஸ, து³தியங் பாத³ங் அதிக்காமெந்தியா ஆபத்தி ஸங்கா⁴தி³ஸேஸஸ்ஸ.
Ekā vā gāmantaraṃ gaccheyyāti parikkhittassa gāmassa parikkhepaṃ paṭhamaṃ pādaṃ atikkāmentiyā āpatti thullaccayassa, dutiyaṃ pādaṃ atikkāmentiyā āpatti saṅghādisesassa.
அபரிக்கி²த்தஸ்ஸ கா³மஸ்ஸ உபசாரங் பட²மங் பாத³ங் அதிக்காமெந்தியா ஆபத்தி து²ல்லச்சயஸ்ஸ. து³தியங் பாத³ங் அதிக்காமெந்தியா ஆபத்தி ஸங்கா⁴தி³ஸேஸஸ்ஸ.
Aparikkhittassa gāmassa upacāraṃ paṭhamaṃ pādaṃ atikkāmentiyā āpatti thullaccayassa. Dutiyaṃ pādaṃ atikkāmentiyā āpatti saṅghādisesassa.
ஏகா வா நதீ³பாரங் க³ச்செ²ய்யாதி நதீ³ நாம திமண்ட³லங் படிச்சா²தெ³த்வா யத்த² கத்த²சி உத்தரந்தியா பி⁴க்கு²னியா அந்தரவாஸகோ தேமியதி. பட²மங் பாத³ங் உத்தரந்தியா ஆபத்தி து²ல்லச்சயஸ்ஸ. து³தியங் பாத³ங் உத்தரந்தியா ஆபத்தி ஸங்கா⁴தி³ஸேஸஸ்ஸ.
Ekā vā nadīpāraṃ gaccheyyāti nadī nāma timaṇḍalaṃ paṭicchādetvā yattha katthaci uttarantiyā bhikkhuniyā antaravāsako temiyati. Paṭhamaṃ pādaṃ uttarantiyā āpatti thullaccayassa. Dutiyaṃ pādaṃ uttarantiyā āpatti saṅghādisesassa.
ஏகா வா ரத்திங் விப்பவஸெய்யாதி ஸஹ அருணுக்³க³மனா து³தியிகாய பி⁴க்கு²னியா ஹத்த²பாஸங் விஜஹந்தியா ஆபத்தி து²ல்லச்சயஸ்ஸ. விஜஹிதே ஆபத்தி ஸங்கா⁴தி³ஸேஸஸ்ஸ.
Ekā vā rattiṃ vippavaseyyāti saha aruṇuggamanā dutiyikāya bhikkhuniyā hatthapāsaṃ vijahantiyā āpatti thullaccayassa. Vijahite āpatti saṅghādisesassa.
ஏகா வா க³ணம்ஹா ஓஹீயெய்யாதி அகா³மகே அரஞ்ஞே து³தியிகாய பி⁴க்கு²னியா த³ஸ்ஸனூபசாரங் வா ஸவனூபசாரங் வா விஜஹந்தியா ஆபத்தி து²ல்லச்சயஸ்ஸ. விஜஹிதே ஆபத்தி ஸங்கா⁴தி³ஸேஸஸ்ஸ.
Ekā vā gaṇamhā ohīyeyyāti agāmake araññe dutiyikāya bhikkhuniyā dassanūpacāraṃ vā savanūpacāraṃ vā vijahantiyā āpatti thullaccayassa. Vijahite āpatti saṅghādisesassa.
அயம்பீதி புரிமாயோ உபாதா³ய வுச்சதி.
Ayampīti purimāyo upādāya vuccati.
பட²மாபத்திகந்தி ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாய.
Paṭhamāpattikanti saha vatthujjhācārā āpajjati asamanubhāsanāya.
நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.
Nissāraṇīyanti saṅghamhā nissārīyati.
ஸங்கா⁴தி³ஸேஸோதி…பே॰… தேனபி வுச்சதி ஸங்கா⁴தி³ஸேஸோதி.
Saṅghādisesoti…pe… tenapi vuccati saṅghādisesoti.
693. அனாபத்தி து³தியிகா பி⁴க்கு²னீ பக்கந்தா வா ஹோதி விப்³ப⁴ந்தா வா காலங்கதா வா பக்க²ஸங்கந்தா வா, ஆபதா³ஸு, உம்மத்திகாய, ஆதி³கம்மிகாயாதி.
693. Anāpatti dutiyikā bhikkhunī pakkantā vā hoti vibbhantā vā kālaṅkatā vā pakkhasaṅkantā vā, āpadāsu, ummattikāya, ādikammikāyāti.
ததியஸங்கா⁴தி³ஸேஸஸிக்கா²பத³ங் நிட்டி²தங்.
Tatiyasaṅghādisesasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 3. ததியஸங்கா⁴தி³ஸேஸஸிக்கா²பத³வண்ணனா • 3. Tatiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. ததியஸங்கா⁴தி³ஸேஸஸிக்கா²பத³வண்ணனா • 3. Tatiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. ததியஸங்கா⁴தி³ஸேஸஸிக்கா²பத³வண்ணனா • 3. Tatiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. ததியஸங்கா⁴தி³ஸேஸஸிக்கா²பத³வண்ணனா • 3. Tatiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. ததியஸங்கா⁴தி³ஸேஸஸிக்கா²பத³ங் • 3. Tatiyasaṅghādisesasikkhāpadaṃ
