| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
3. ததியஸங்கா⁴தி³ஸேஸஸிக்கா²பத³ங்
3. Tatiyasaṅghādisesasikkhāpadaṃ
692. ததியே து³தியேன பாதே³ன அதிக்கந்தமத்தேதி ஸம்ப³ந்தோ⁴. பரிக்கே²பாரஹட்டா²னங் நாம க⁴ரூபசாரதோ பட²மலெட்³டு³பாதோ. ஸங்கே²பதோ வுத்தமத்த²ங் வித்தா²ரதோ த³ஸ்ஸெந்தோ ஆஹ ‘‘அபி செத்தா²’’திஆதி³. எத்தா²தி இமஸ்மிங் ஸிக்கா²பதே³. உபசாரே வாதி அபரிக்கி²த்தஸ்ஸ கா³மஸ்ஸ பரிக்கே²பாரஹட்டா²னே வா. ததோதி கா³மந்தரதோ, க²ண்ட³பாகாரேன வா வதிசி²த்³தே³ன வா பவிஸிதுந்தி ஸம்ப³ந்தோ⁴.
692. Tatiye dutiyena pādena atikkantamatteti sambandho. Parikkhepārahaṭṭhānaṃ nāma gharūpacārato paṭhamaleḍḍupāto. Saṅkhepato vuttamatthaṃ vitthārato dassento āha ‘‘api cetthā’’tiādi. Etthāti imasmiṃ sikkhāpade. Upacāre vāti aparikkhittassa gāmassa parikkhepārahaṭṭhāne vā. Tatoti gāmantarato, khaṇḍapākārena vā vatichiddena vā pavisitunti sambandho.
ஸம்ப³த்³தா⁴ வதி ஏதேஸந்தி ஸம்ப³த்³த⁴வதிகா, த்³வே கா³மா. விஹாரந்தி பி⁴க்கு²னிவிஹாரங். ததோ பன கா³மதோதி ததோ இதரகா³மதோ பன, நிக்க²ந்தாய பி⁴க்கு²னியா டா²தப்³ப³ந்தி ஸம்ப³ந்தோ⁴. உஸ்ஸாரணா வாதி மனுஸ்ஸானங் உஸ்ஸாரணா வா.
Sambaddhā vati etesanti sambaddhavatikā, dve gāmā. Vihāranti bhikkhunivihāraṃ. Tato pana gāmatoti tato itaragāmato pana, nikkhantāya bhikkhuniyā ṭhātabbanti sambandho. Ussāraṇā vāti manussānaṃ ussāraṇā vā.
ஜனாதி கா³மபோ⁴ஜகா ஜனா. ஏகங் கா³மந்தி யங்கிஞ்சி இச்சி²தங் ஏகங் கா³மங். ததோதி கா³மதோ. ‘‘கஸ்மா’’தி இமாய புச்சா²ய ‘‘விஹரதோ ஏகங் கா³மங் க³ந்துங் வட்டதீ’’தி வசனஸ்ஸ காரணங் புச்ச²தி. ‘‘விஹாரஸ்ஸ சதுகா³மஸாதா⁴ரணத்தா’’திஇமினா விஸஜ்ஜனேன தங் புச்ச²ங் விஸஜ்ஜேதி.
Janāti gāmabhojakā janā. Ekaṃ gāmanti yaṃkiñci icchitaṃ ekaṃ gāmaṃ. Tatoti gāmato. ‘‘Kasmā’’ti imāya pucchāya ‘‘viharato ekaṃ gāmaṃ gantuṃ vaṭṭatī’’ti vacanassa kāraṇaṃ pucchati. ‘‘Vihārassa catugāmasādhāraṇattā’’tiiminā visajjanena taṃ pucchaṃ visajjeti.
யத்தா²தி யஸ்ஸங் நதி³யங். உத்தரந்தியா ஏகத்³வங்கு³லமத்தம்பி அந்தரவாஸகோ தேமியதி, ஸா நதீ³ நாமாதி யோஜனா. யதா² நிவஸியமானாய திமண்ட³லபடிச்சா²த³னங் ஹோதி, ஏவங் நிவத்தா²யாதி யோஜனா . பி⁴க்கு²னியா உத்தரந்தியா அந்தரவாஸகோதி ஸம்ப³ந்தோ⁴. யத்த² கத்த²சீதி யஸ்மிங் கிஸ்மிங்சி டா²னே. ‘‘ஸேதுனா க³ச்ச²தி, அனாபத்தீ’’திஇமினா பத³ஸா உத்தரந்தியா ஏவ ஆபத்தீதி த³ஸ்ஸேதி. உத்தரணகாலேதி நதி³தோ உத்தரணகாலே. ஆகாஸக³மனந்தி இத்³தி⁴யா க³மனங். ஆதி³ஸத்³தே³ன ஹத்தி²பிட்டி²ஆத³யோ ஸங்க³ண்ஹாதி. அக்கமந்தியாதி அதிக்கமந்தியா. எத்தா²தி த்³வீஸு தீஸு பி⁴க்கு²னீஸு. ஓரிமதீரமேவாதி அபாரதீரமேவ. தமேவ தீரந்தி ஓரிமதீரமேவ. பச்சுத்தரதீதி படினிவத்தித்வா உத்தரதி.
Yatthāti yassaṃ nadiyaṃ. Uttarantiyā ekadvaṅgulamattampi antaravāsako temiyati, sā nadī nāmāti yojanā. Yathā nivasiyamānāya timaṇḍalapaṭicchādanaṃ hoti, evaṃ nivatthāyāti yojanā . Bhikkhuniyā uttarantiyā antaravāsakoti sambandho. Yattha katthacīti yasmiṃ kismiṃci ṭhāne. ‘‘Setunā gacchati, anāpattī’’tiiminā padasā uttarantiyā eva āpattīti dasseti. Uttaraṇakāleti nadito uttaraṇakāle. Ākāsagamananti iddhiyā gamanaṃ. Ādisaddena hatthipiṭṭhiādayo saṅgaṇhāti. Akkamantiyāti atikkamantiyā. Etthāti dvīsu tīsu bhikkhunīsu. Orimatīramevāti apāratīrameva. Tameva tīranti orimatīrameva. Paccuttaratīti paṭinivattitvā uttarati.
குருமானா பி⁴க்கு²னீ கரோதீதி யோஜனா. அஸ்ஸாதி பி⁴க்கு²னியா அஜானந்தியா ஏவ சாதி ஸம்ப³ந்தோ⁴, அனாத³ரே சேதங் ஸாமிவசனங். அத² பனாதி அத²ஸத்³தோ³ யதி³பரியாயோ, கிரியாபதே³ன யோஜேதப்³போ³. அத² அச்ச²தி, அத² ந ஓதரதீதி அத்தோ². அச்ச²தீதி வஸதி. ஹீதி ஸச்சங். இதா⁴தி ‘‘ஏகா வா ரத்திங் விப்பவஸெய்யா’’திபதே³.
Kurumānā bhikkhunī karotīti yojanā. Assāti bhikkhuniyā ajānantiyā eva cāti sambandho, anādare cetaṃ sāmivacanaṃ. Atha panāti athasaddo yadipariyāyo, kiriyāpadena yojetabbo. Atha acchati, atha na otaratīti attho. Acchatīti vasati. Hīti saccaṃ. Idhāti ‘‘ekā vā rattiṃ vippavaseyyā’’tipade.
ஏவங் வுத்தலக்க²ணமேவாதி ஏவங் அபி⁴த⁴ம்மபரியாயேன வுத்தலக்க²ணமேவ. தங் பனேதந்தி தங் பன அரஞ்ஞங். தேனேவாதி ஆபன்னஹேதுனா ஏவ. அட்ட²கதா²யந்தி மஹாஅட்ட²கதா²யங். பி⁴க்கு²னீஸு பவிஸந்தீஸூதி ஸம்ப³ந்தோ⁴, நித்³தா⁴ரணத்தே² சேதங் பு⁴ம்மவசனங். எத்தா²தி த³ஸ்ஸனூபசாரஸவனூபசாரேஸு. யத்த² ஓகாஸே டி²தங் து³தியிகா பஸ்ஸதி, ஸோ ஓகாஸோ த³ஸ்ஸனூபசாரோ நாமாதி யோஜனா. ஸாணிபாகாரந்தரிகாபீதி ஸாணிபாகாரேன ப்³யவஹிகாபி. யத்த² ஓகாஸே டி²தா…பே॰… ஸத்³த³ங் ஸுணாதி, ஸோ ஓகாஸோ ஸவனூபசாரோ நாமாதி யோஜனா. மக்³க³மூள்ஹஸத்³தே³னாதி மக்³கே³ மூள்ஹானங் ஸத்³தே³ன. த⁴ம்மஸ்ஸவனாரோசனஸத்³தே³னாதி த⁴ம்மஸ்ஸவனத்தா²ய ஆரோசனானங் ஸத்³தே³ன. மக்³க³மூள்ஹஸத்³தே³ன ஸத்³தா³யந்தியா ஸத்³த³ங் ஸுணாதி விய ச த⁴ம்மஸ்ஸவனாரோசனஸத்³தே³ன ஸத்³தா³யந்தியா ஸத்³த³ங் ஸுணாதி விய ச ‘‘அய்யே’’தி ஸத்³தா³யந்தியா ஸத்³த³ங் ஸுணாதீதி யோஜனா. ஸத்³தா³யந்தியாதி ஸத்³த³ங் கரொந்தியா. நாமதா⁴து ஹேஸா. ஏவரூபேதி ‘‘மக்³க³மூள்ஹஸத்³தே³ன வியா’’திஆதி³னா வுத்தே ஏவரூபே.
Evaṃ vuttalakkhaṇamevāti evaṃ abhidhammapariyāyena vuttalakkhaṇameva. Taṃ panetanti taṃ pana araññaṃ. Tenevāti āpannahetunā eva. Aṭṭhakathāyanti mahāaṭṭhakathāyaṃ. Bhikkhunīsu pavisantīsūti sambandho, niddhāraṇatthe cetaṃ bhummavacanaṃ. Etthāti dassanūpacārasavanūpacāresu. Yattha okāse ṭhitaṃ dutiyikā passati, so okāso dassanūpacāro nāmāti yojanā. Sāṇipākārantarikāpīti sāṇipākārena byavahikāpi. Yattha okāse ṭhitā…pe… saddaṃ suṇāti, so okāso savanūpacāro nāmāti yojanā. Maggamūḷhasaddenāti magge mūḷhānaṃ saddena. Dhammassavanārocanasaddenāti dhammassavanatthāya ārocanānaṃ saddena. Maggamūḷhasaddena saddāyantiyā saddaṃ suṇāti viya ca dhammassavanārocanasaddena saddāyantiyā saddaṃ suṇāti viya ca ‘‘ayye’’ti saddāyantiyā saddaṃ suṇātīti yojanā. Saddāyantiyāti saddaṃ karontiyā. Nāmadhātu hesā. Evarūpeti ‘‘maggamūḷhasaddena viyā’’tiādinā vutte evarūpe.
தித்தா²யதனங் ஸங்கந்தா வாதி தித்தீ²னங் வாஸட்டா²னங் ஸங்கந்தா வா. இமினா ‘‘பக்க²ஸங்கந்தா’’தி எத்த² பக்க²ஸத்³த³ஸ்ஸ படிபக்க²வாசகத்தா தேன ஸாஸனபடிபக்கா² தித்தி²யா ஏவ க³ஹேதப்³பா³தி த³ஸ்ஸேதி. தித்தி²யா ஹி ஸாஸனஸ்ஸ படிபக்கா² ஹொந்தீதி. ததியங்.
Titthāyatanaṃ saṅkantā vāti titthīnaṃ vāsaṭṭhānaṃ saṅkantā vā. Iminā ‘‘pakkhasaṅkantā’’ti ettha pakkhasaddassa paṭipakkhavācakattā tena sāsanapaṭipakkhā titthiyā eva gahetabbāti dasseti. Titthiyā hi sāsanassa paṭipakkhā hontīti. Tatiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 3. ததியஸங்கா⁴தி³ஸேஸஸிக்கா²பத³ங் • 3. Tatiyasaṅghādisesasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 3. ததியஸங்கா⁴தி³ஸேஸஸிக்கா²பத³வண்ணனா • 3. Tatiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. ததியஸங்கா⁴தி³ஸேஸஸிக்கா²பத³வண்ணனா • 3. Tatiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. ததியஸங்கா⁴தி³ஸேஸஸிக்கா²பத³வண்ணனா • 3. Tatiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. ததியஸங்கா⁴தி³ஸேஸஸிக்கா²பத³வண்ணனா • 3. Tatiyasaṅghādisesasikkhāpadavaṇṇanā
