| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৩. ততিযসঙ্ঘাদিসেসসিক্খাপদং
3. Tatiyasaṅghādisesasikkhāpadaṃ
৬৯২. ততিযে দুতিযেন পাদেন অতিক্কন্তমত্তেতি সম্বন্ধো। পরিক্খেপারহট্ঠানং নাম ঘরূপচারতো পঠমলেড্ডুপাতো। সঙ্খেপতো ৰুত্তমত্থং ৰিত্থারতো দস্সেন্তো আহ ‘‘অপি চেত্থা’’তিআদি। এত্থাতি ইমস্মিং সিক্খাপদে। উপচারে ৰাতি অপরিক্খিত্তস্স গামস্স পরিক্খেপারহট্ঠানে ৰা। ততোতি গামন্তরতো, খণ্ডপাকারেন ৰা ৰতিছিদ্দেন ৰা পৰিসিতুন্তি সম্বন্ধো।
692. Tatiye dutiyena pādena atikkantamatteti sambandho. Parikkhepārahaṭṭhānaṃ nāma gharūpacārato paṭhamaleḍḍupāto. Saṅkhepato vuttamatthaṃ vitthārato dassento āha ‘‘api cetthā’’tiādi. Etthāti imasmiṃ sikkhāpade. Upacāre vāti aparikkhittassa gāmassa parikkhepārahaṭṭhāne vā. Tatoti gāmantarato, khaṇḍapākārena vā vatichiddena vā pavisitunti sambandho.
সম্বদ্ধা ৰতি এতেসন্তি সম্বদ্ধৰতিকা, দ্ৰে গামা। ৰিহারন্তি ভিক্খুনিৰিহারং। ততো পন গামতোতি ততো ইতরগামতো পন, নিক্খন্তায ভিক্খুনিযা ঠাতব্বন্তি সম্বন্ধো। উস্সারণা ৰাতি মনুস্সানং উস্সারণা ৰা।
Sambaddhā vati etesanti sambaddhavatikā, dve gāmā. Vihāranti bhikkhunivihāraṃ. Tato pana gāmatoti tato itaragāmato pana, nikkhantāya bhikkhuniyā ṭhātabbanti sambandho. Ussāraṇā vāti manussānaṃ ussāraṇā vā.
জনাতি গামভোজকা জনা। একং গামন্তি যংকিঞ্চি ইচ্ছিতং একং গামং। ততোতি গামতো। ‘‘কস্মা’’তি ইমায পুচ্ছায ‘‘ৰিহরতো একং গামং গন্তুং ৰট্টতী’’তি ৰচনস্স কারণং পুচ্ছতি। ‘‘ৰিহারস্স চতুগামসাধারণত্তা’’তিইমিনা ৰিসজ্জনেন তং পুচ্ছং ৰিসজ্জেতি।
Janāti gāmabhojakā janā. Ekaṃ gāmanti yaṃkiñci icchitaṃ ekaṃ gāmaṃ. Tatoti gāmato. ‘‘Kasmā’’ti imāya pucchāya ‘‘viharato ekaṃ gāmaṃ gantuṃ vaṭṭatī’’ti vacanassa kāraṇaṃ pucchati. ‘‘Vihārassa catugāmasādhāraṇattā’’tiiminā visajjanena taṃ pucchaṃ visajjeti.
যত্থাতি যস্সং নদিযং। উত্তরন্তিযা একদ্ৰঙ্গুলমত্তম্পি অন্তরৰাসকো তেমিযতি, সা নদী নামাতি যোজনা। যথা নিৰসিযমানায তিমণ্ডলপটিচ্ছাদনং হোতি, এৰং নিৰত্থাযাতি যোজনা । ভিক্খুনিযা উত্তরন্তিযা অন্তরৰাসকোতি সম্বন্ধো। যত্থ কত্থচীতি যস্মিং কিস্মিংচি ঠানে। ‘‘সেতুনা গচ্ছতি, অনাপত্তী’’তিইমিনা পদসা উত্তরন্তিযা এৰ আপত্তীতি দস্সেতি। উত্তরণকালেতি নদিতো উত্তরণকালে। আকাসগমনন্তি ইদ্ধিযা গমনং। আদিসদ্দেন হত্থিপিট্ঠিআদযো সঙ্গণ্হাতি। অক্কমন্তিযাতি অতিক্কমন্তিযা। এত্থাতি দ্ৰীসু তীসু ভিক্খুনীসু। ওরিমতীরমেৰাতি অপারতীরমেৰ। তমেৰ তীরন্তি ওরিমতীরমেৰ। পচ্চুত্তরতীতি পটিনিৰত্তিত্ৰা উত্তরতি।
Yatthāti yassaṃ nadiyaṃ. Uttarantiyā ekadvaṅgulamattampi antaravāsako temiyati, sā nadī nāmāti yojanā. Yathā nivasiyamānāya timaṇḍalapaṭicchādanaṃ hoti, evaṃ nivatthāyāti yojanā . Bhikkhuniyā uttarantiyā antaravāsakoti sambandho. Yattha katthacīti yasmiṃ kismiṃci ṭhāne. ‘‘Setunā gacchati, anāpattī’’tiiminā padasā uttarantiyā eva āpattīti dasseti. Uttaraṇakāleti nadito uttaraṇakāle. Ākāsagamananti iddhiyā gamanaṃ. Ādisaddena hatthipiṭṭhiādayo saṅgaṇhāti. Akkamantiyāti atikkamantiyā. Etthāti dvīsu tīsu bhikkhunīsu. Orimatīramevāti apāratīrameva. Tameva tīranti orimatīrameva. Paccuttaratīti paṭinivattitvā uttarati.
কুরুমানা ভিক্খুনী করোতীতি যোজনা। অস্সাতি ভিক্খুনিযা অজানন্তিযা এৰ চাতি সম্বন্ধো, অনাদরে চেতং সামিৰচনং। অথ পনাতি অথসদ্দো যদিপরিযাযো, কিরিযাপদেন যোজেতব্বো। অথ অচ্ছতি, অথ ন ওতরতীতি অত্থো। অচ্ছতীতি ৰসতি। হীতি সচ্চং। ইধাতি ‘‘একা ৰা রত্তিং ৰিপ্পৰসেয্যা’’তিপদে।
Kurumānā bhikkhunī karotīti yojanā. Assāti bhikkhuniyā ajānantiyā eva cāti sambandho, anādare cetaṃ sāmivacanaṃ. Atha panāti athasaddo yadipariyāyo, kiriyāpadena yojetabbo. Atha acchati, atha na otaratīti attho. Acchatīti vasati. Hīti saccaṃ. Idhāti ‘‘ekā vā rattiṃ vippavaseyyā’’tipade.
এৰং ৰুত্তলক্খণমেৰাতি এৰং অভিধম্মপরিযাযেন ৰুত্তলক্খণমেৰ। তং পনেতন্তি তং পন অরঞ্ঞং। তেনেৰাতি আপন্নহেতুনা এৰ। অট্ঠকথাযন্তি মহাঅট্ঠকথাযং। ভিক্খুনীসু পৰিসন্তীসূতি সম্বন্ধো, নিদ্ধারণত্থে চেতং ভুম্মৰচনং। এত্থাতি দস্সনূপচারসৰনূপচারেসু। যত্থ ওকাসে ঠিতং দুতিযিকা পস্সতি, সো ওকাসো দস্সনূপচারো নামাতি যোজনা। সাণিপাকারন্তরিকাপীতি সাণিপাকারেন ব্যৰহিকাপি। যত্থ ওকাসে ঠিতা…পে॰… সদ্দং সুণাতি, সো ওকাসো সৰনূপচারো নামাতি যোজনা। মগ্গমূল়্হসদ্দেনাতি মগ্গে মূল়্হানং সদ্দেন। ধম্মস্সৰনারোচনসদ্দেনাতি ধম্মস্সৰনত্থায আরোচনানং সদ্দেন। মগ্গমূল়্হসদ্দেন সদ্দাযন্তিযা সদ্দং সুণাতি ৰিয চ ধম্মস্সৰনারোচনসদ্দেন সদ্দাযন্তিযা সদ্দং সুণাতি ৰিয চ ‘‘অয্যে’’তি সদ্দাযন্তিযা সদ্দং সুণাতীতি যোজনা। সদ্দাযন্তিযাতি সদ্দং করোন্তিযা। নামধাতু হেসা। এৰরূপেতি ‘‘মগ্গমূল়্হসদ্দেন ৰিযা’’তিআদিনা ৰুত্তে এৰরূপে।
Evaṃ vuttalakkhaṇamevāti evaṃ abhidhammapariyāyena vuttalakkhaṇameva. Taṃ panetanti taṃ pana araññaṃ. Tenevāti āpannahetunā eva. Aṭṭhakathāyanti mahāaṭṭhakathāyaṃ. Bhikkhunīsu pavisantīsūti sambandho, niddhāraṇatthe cetaṃ bhummavacanaṃ. Etthāti dassanūpacārasavanūpacāresu. Yattha okāse ṭhitaṃ dutiyikā passati, so okāso dassanūpacāro nāmāti yojanā. Sāṇipākārantarikāpīti sāṇipākārena byavahikāpi. Yattha okāse ṭhitā…pe… saddaṃ suṇāti, so okāso savanūpacāro nāmāti yojanā. Maggamūḷhasaddenāti magge mūḷhānaṃ saddena. Dhammassavanārocanasaddenāti dhammassavanatthāya ārocanānaṃ saddena. Maggamūḷhasaddena saddāyantiyā saddaṃ suṇāti viya ca dhammassavanārocanasaddena saddāyantiyā saddaṃ suṇāti viya ca ‘‘ayye’’ti saddāyantiyā saddaṃ suṇātīti yojanā. Saddāyantiyāti saddaṃ karontiyā. Nāmadhātu hesā. Evarūpeti ‘‘maggamūḷhasaddena viyā’’tiādinā vutte evarūpe.
তিত্থাযতনং সঙ্কন্তা ৰাতি তিত্থীনং ৰাসট্ঠানং সঙ্কন্তা ৰা। ইমিনা ‘‘পক্খসঙ্কন্তা’’তি এত্থ পক্খসদ্দস্স পটিপক্খৰাচকত্তা তেন সাসনপটিপক্খা তিত্থিযা এৰ গহেতব্বাতি দস্সেতি। তিত্থিযা হি সাসনস্স পটিপক্খা হোন্তীতি। ততিযং।
Titthāyatanaṃ saṅkantā vāti titthīnaṃ vāsaṭṭhānaṃ saṅkantā vā. Iminā ‘‘pakkhasaṅkantā’’ti ettha pakkhasaddassa paṭipakkhavācakattā tena sāsanapaṭipakkhā titthiyā eva gahetabbāti dasseti. Titthiyā hi sāsanassa paṭipakkhā hontīti. Tatiyaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / ভিক্খুনীৰিভঙ্গ • Bhikkhunīvibhaṅga / ৩. ততিযসঙ্ঘাদিসেসসিক্খাপদং • 3. Tatiyasaṅghādisesasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / ৩. ততিযসঙ্ঘাদিসেসসিক্খাপদৰণ্ণনা • 3. Tatiyasaṅghādisesasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৩. ততিযসঙ্ঘাদিসেসসিক্খাপদৰণ্ণনা • 3. Tatiyasaṅghādisesasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৩. ততিযসঙ্ঘাদিসেসসিক্খাপদৰণ্ণনা • 3. Tatiyasaṅghādisesasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৩. ততিযসঙ্ঘাদিসেসসিক্খাপদৰণ্ণনা • 3. Tatiyasaṅghādisesasikkhāpadavaṇṇanā
