| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༣. ཏཏིཡསངྒྷཱདིསེསསིཀྑཱཔདཾ
3. Tatiyasaṅghādisesasikkhāpadaṃ
༦༨༧. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན བྷདྡཱཡ ཀཱཔིལཱནིཡཱ ཨནྟེཝཱསིནཱི བྷིཀྑུནཱི བྷིཀྑུནཱིཧི སདྡྷིཾ བྷཎྜིཏྭཱ གཱམཀཾ 1 ཉཱཏིཀུལཾ ཨགམཱསི། བྷདྡཱ ཀཱཔིལཱནཱི ཏཾ བྷིཀྑུནིཾ ཨཔསྶནྟཱི བྷིཀྑུནིཡོ པུཙྪི – ‘‘ཀཧཾ ཨིཏྠནྣཱམཱ, ན དིསྶཏཱི’’ཏི! ‘‘བྷིཀྑུནཱིཧི སདྡྷིཾ, ཨཡྻེ, བྷཎྜིཏྭཱ ན དིསྶཏཱི’’ཏི། ‘‘ཨམྨཱ, ཨམུཀསྨིཾ གཱམཀེ ཨེཏིསྶཱ ཉཱཏིཀུལཾ། ཏཏྠ གནྟྭཱ ཝིཙིནཐཱ’’ཏི། བྷིཀྑུནིཡོ ཏཏྠ གནྟྭཱ ཏཾ བྷིཀྑུནིཾ པསྶིཏྭཱ ཨེཏདཝོཙུཾ – ‘‘ཀིསྶ ཏྭཾ, ཨཡྻེ , ཨེཀིཀཱ ཨཱགཏཱ, ཀཙྩིསི ཨཔྤདྷཾསིཏཱ’’ཏི? ‘‘ཨཔྤདྷཾསིཏཱམྷི, ཨཡྻེ’’ཏི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུནཱི ཨེཀཱ གཱམནྟརཾ གཙྪིསྶཏཱི’’ཏི…པེ॰… སཙྩཾ ཀིར, བྷིཀྑཝེ, བྷིཀྑུནཱི ཨེཀཱ གཱམནྟརཾ གཙྪཏཱིཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ , བྷིཀྑུནཱི ཨེཀཱ གཱམནྟརཾ གཙྪིསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
687. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhaddāya kāpilāniyā antevāsinī bhikkhunī bhikkhunīhi saddhiṃ bhaṇḍitvā gāmakaṃ 2 ñātikulaṃ agamāsi. Bhaddā kāpilānī taṃ bhikkhuniṃ apassantī bhikkhuniyo pucchi – ‘‘kahaṃ itthannāmā, na dissatī’’ti! ‘‘Bhikkhunīhi saddhiṃ, ayye, bhaṇḍitvā na dissatī’’ti. ‘‘Ammā, amukasmiṃ gāmake etissā ñātikulaṃ. Tattha gantvā vicinathā’’ti. Bhikkhuniyo tattha gantvā taṃ bhikkhuniṃ passitvā etadavocuṃ – ‘‘kissa tvaṃ, ayye , ekikā āgatā, kaccisi appadhaṃsitā’’ti? ‘‘Appadhaṃsitāmhi, ayye’’ti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī ekā gāmantaraṃ gacchissatī’’ti…pe… saccaṃ kira, bhikkhave, bhikkhunī ekā gāmantaraṃ gacchatīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave , bhikkhunī ekā gāmantaraṃ gacchissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘ཡཱ པན བྷིཀྑུནཱི ཨེཀཱ གཱམནྟརཾ གཙྪེཡྻ, ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེས’’ནྟི།
‘‘Yā pana bhikkhunī ekā gāmantaraṃ gaccheyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
ཨེཝཉྩིདཾ བྷགཝཏཱ བྷིཀྑུནཱིནཾ སིཀྑཱཔདཾ པཉྙཏྟཾ ཧོཏི།
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
༦༨༨. ཏེན ཁོ པན སམཡེན དྭེ བྷིཀྑུནིཡོ སཱཀེཏཱ སཱཝཏྠིཾ ཨདྡྷཱནམགྒཔྤཊིཔནྣཱ ཧོནྟི། ཨནྟརཱམགྒེ ནདཱི ཏརིཏབྦཱ ཧོཏི། ཨཐ ཁོ ཏཱ བྷིཀྑུནིཡོ ནཱཝིཀེ ཨུཔསངྐམིཏྭཱ ཨེཏདཝོཙུཾ – ‘‘སཱདྷུ ནོ, ཨཱཝུསོ, ཏཱརེཐཱ’’ཏི། ‘‘ནཱཡྻེ, སཀྐཱ ཨུབྷོ སཀིཾ ཏཱརེཏུ’’ནྟི། ཨེཀོ ཨེཀཾ ཨུཏྟཱརེསི། ཨུཏྟིཎྞོ ཨུཏྟིཎྞཾ དཱུསེསི། ཨནུཏྟིཎྞོ ཨནུཏྟིཎྞཾ དཱུསེསི། ཏཱ པཙྪཱ སམཱགནྟྭཱ པུཙྪིཾསུ – ‘‘ཀཙྩིསི, ཨཡྻེ, ཨཔྤདྷཾསིཏཱ’’ཏི? ‘‘པདྷཾསིཏཱམྷི, ཨཡྻེ! ཏྭཾ པན, ཨཡྻེ, ཨཔྤདྷཾསིཏཱ’’ཏི? ‘‘པདྷཾསིཏཱམྷི, ཨཡྻེ’’ཏི། ཨཐ ཁོ ཏཱ བྷིཀྑུནིཡོ སཱཝཏྠིཾ གནྟྭཱ བྷིཀྑུནཱིནཾ ཨེཏམཏྠཾ ཨཱརོཙེསུཾ། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུནཱི ཨེཀཱ ནདཱིཔཱརཾ གཙྪིསྶཏཱི’’ཏི! ཨཐ ཁོ ཏཱ བྷིཀྑུནིཡོ བྷིཀྑཱུནཾ ཨེཏམཏྠཾ ཨཱརོཙེསུཾ། བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ…པེ॰… སཙྩཾ ཀིར, བྷིཀྑཝེ, བྷིཀྑུནཱི ཨེཀཱ ནདཱིཔཱརཾ གཙྪཏཱི’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, བྷིཀྑུནཱི ཨེཀཱ ནདཱིཔཱརཾ གཙྪིསྶཏི! ནེཏཾ , བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
688. Tena kho pana samayena dve bhikkhuniyo sāketā sāvatthiṃ addhānamaggappaṭipannā honti. Antarāmagge nadī taritabbā hoti. Atha kho tā bhikkhuniyo nāvike upasaṅkamitvā etadavocuṃ – ‘‘sādhu no, āvuso, tārethā’’ti. ‘‘Nāyye, sakkā ubho sakiṃ tāretu’’nti. Eko ekaṃ uttāresi. Uttiṇṇo uttiṇṇaṃ dūsesi. Anuttiṇṇo anuttiṇṇaṃ dūsesi. Tā pacchā samāgantvā pucchiṃsu – ‘‘kaccisi, ayye, appadhaṃsitā’’ti? ‘‘Padhaṃsitāmhi, ayye! Tvaṃ pana, ayye, appadhaṃsitā’’ti? ‘‘Padhaṃsitāmhi, ayye’’ti. Atha kho tā bhikkhuniyo sāvatthiṃ gantvā bhikkhunīnaṃ etamatthaṃ ārocesuṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī ekā nadīpāraṃ gacchissatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ…pe… saccaṃ kira, bhikkhave, bhikkhunī ekā nadīpāraṃ gacchatī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī ekā nadīpāraṃ gacchissati! Netaṃ , bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘ཡཱ པན བྷིཀྑུནཱི ཨེཀཱ ཝཱ གཱམནྟརཾ གཙྪེཡྻ, ཨེཀཱ ཝཱ ནདཱིཔཱརཾ གཙྪེཡྻ, ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེས’’ནྟི།
‘‘Yā pana bhikkhunī ekā vā gāmantaraṃ gaccheyya, ekā vā nadīpāraṃ gaccheyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
ཨེཝཉྩིདཾ བྷགཝཏཱ བྷིཀྑུནཱིནཾ སིཀྑཱཔདཾ པཉྙཏྟཾ ཧོཏི།
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
༦༨༩. ཏེན ཁོ པན སམཡེན སམྦཧུལཱ བྷིཀྑུནིཡོ ཀོསལེསུ ཛནཔདེ སཱཝཏྠིཾ གཙྪནྟཱ 3 སཱཡཾ ཨཉྙཏརཾ གཱམཾ ཨུཔགཙྪིཾསུ། ཏཏྠ ཨཉྙཏརཱ བྷིཀྑུནཱི ཨབྷིརཱུཔཱ ཧོཏི དསྶནཱིཡཱ པཱསཱདིཀཱ། ཨཉྙཏརོ པུརིསོ ཏསྶཱ བྷིཀྑུནིཡཱ སཧ དསྶནེན པཊིབདྡྷཙིཏྟོ ཧོཏི། ཨཐ ཁོ སོ པུརིསོ ཏཱསཾ བྷིཀྑུནཱིནཾ སེཡྻཾ པཉྙཔེནྟོ ཏསྶཱ བྷིཀྑུནིཡཱ སེཡྻཾ ཨེཀམནྟཾ པཉྙཱཔེསི། ཨཐ ཁོ སཱ བྷིཀྑུནཱི སལླཀྑེཏྭཱ – ‘‘པརིཡུཊྛིཏོ ཨཡཾ པུརིསོ; སཙེ རཏྟིཾ ཨཱགཙྪིསྶཏི, ཝིསྶརོ མེ བྷཝིསྶཏཱི’’ཏི, བྷིཀྑུནིཡོ ཨནཱཔུཙྪཱ ཨཉྙཏརཾ ཀུལཾ གནྟྭཱ སེཡྻཾ ཀཔྤེསི། ཨཐ ཁོ སོ པུརིསོ རཏྟིཾ ཨཱགནྟྭཱ ཏཾ བྷིཀྑུནིཾ གཝེསནྟོ བྷིཀྑུནིཡོ གྷཊྚེསི། བྷིཀྑུནིཡོ ཏཾ བྷིཀྑུནིཾ ཨཔསྶནྟིཡོ ཨེཝམཱཧཾསུ – ‘‘ནིསྶཾསཡཾ ཁོ སཱ བྷིཀྑུནཱི པུརིསེན སདྡྷིཾ ནིཀྑནྟཱ’’ཏི།
689. Tena kho pana samayena sambahulā bhikkhuniyo kosalesu janapade sāvatthiṃ gacchantā 4 sāyaṃ aññataraṃ gāmaṃ upagacchiṃsu. Tattha aññatarā bhikkhunī abhirūpā hoti dassanīyā pāsādikā. Aññataro puriso tassā bhikkhuniyā saha dassanena paṭibaddhacitto hoti. Atha kho so puriso tāsaṃ bhikkhunīnaṃ seyyaṃ paññapento tassā bhikkhuniyā seyyaṃ ekamantaṃ paññāpesi. Atha kho sā bhikkhunī sallakkhetvā – ‘‘pariyuṭṭhito ayaṃ puriso; sace rattiṃ āgacchissati, vissaro me bhavissatī’’ti, bhikkhuniyo anāpucchā aññataraṃ kulaṃ gantvā seyyaṃ kappesi. Atha kho so puriso rattiṃ āgantvā taṃ bhikkhuniṃ gavesanto bhikkhuniyo ghaṭṭesi. Bhikkhuniyo taṃ bhikkhuniṃ apassantiyo evamāhaṃsu – ‘‘nissaṃsayaṃ kho sā bhikkhunī purisena saddhiṃ nikkhantā’’ti.
ཨཐ ཁོ སཱ བྷིཀྑུནཱི ཏསྶཱ རཏྟིཡཱ ཨཙྩཡེན ཡེན ཏཱ བྷིཀྑུནིཡོ ཏེནུཔསངྐམི། བྷིཀྑུནིཡོ ཏཾ བྷིཀྑུནིཾ ཨེཏདཝོཙུཾ – ‘‘ཀིསྶ ཏྭཾ, ཨཡྻེ, པུརིསེན སདྡྷིཾ ནིཀྑནྟཱ’’ཏི? ‘‘ནཱཧཾ, ཨཡྻེ, པུརིསེན སདྡྷིཾ ནིཀྑནྟཱ’’ཏི། བྷིཀྑུནཱིནཾ ཨེཏམཏྠཾ ཨཱརོཙེསི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུནཱི ཨེཀཱ རཏྟིཾ ཝིཔྤཝསིསྶཏཱི’’ཏི…པེ॰… སཙྩཾ ཀིར, བྷིཀྑཝེ, བྷིཀྑུནཱི ཨེཀཱ རཏྟིཾ ཝིཔྤཝསཱིཏི 5? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, བྷིཀྑུནཱི ཨེཀཱ རཏྟིཾ ཝིཔྤཝསིསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
Atha kho sā bhikkhunī tassā rattiyā accayena yena tā bhikkhuniyo tenupasaṅkami. Bhikkhuniyo taṃ bhikkhuniṃ etadavocuṃ – ‘‘kissa tvaṃ, ayye, purisena saddhiṃ nikkhantā’’ti? ‘‘Nāhaṃ, ayye, purisena saddhiṃ nikkhantā’’ti. Bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī ekā rattiṃ vippavasissatī’’ti…pe… saccaṃ kira, bhikkhave, bhikkhunī ekā rattiṃ vippavasīti 6? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī ekā rattiṃ vippavasissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘ཡཱ པན བྷིཀྑུནཱི ཨེཀཱ ཝཱ གཱམནྟརཾ གཙྪེཡྻ, ཨེཀཱ ཝཱ ནདཱིཔཱརཾ གཙྪེཡྻ, ཨེཀཱ ཝཱ རཏྟིཾ ཝིཔྤཝསེཡྻ, ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེས’’ནྟི།
‘‘Yā pana bhikkhunī ekā vā gāmantaraṃ gaccheyya, ekā vā nadīpāraṃ gaccheyya, ekā vā rattiṃ vippavaseyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
ཨེཝཉྩིདཾ བྷགཝཏཱ བྷིཀྑུནཱིནཾ སིཀྑཱཔདཾ པཉྙཏྟཾ ཧོཏི།
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
༦༩༠. ཏེན ཁོ པན སམཡེན སམྦཧུལཱ བྷིཀྑུནིཡོ ཀོསལེསུ ཛནཔདེ སཱཝཏྠིཾ ཨདྡྷཱནམགྒཔྤཊིཔནྣཱ ཧོནྟི། ཏཏྠ ཨཉྙཏརཱ བྷིཀྑུནཱི ཝཙྩེན པཱིལི༹ཏཱ ཨེཀིཀཱ ཨོཧཱིཡིཏྭཱ 7 པཙྪཱ ཨགམཱསི། མནུསྶཱ ཏཾ བྷིཀྑུནིཾ པསྶིཏྭཱ དཱུསེསུཾ། ཨཐ ཁོ སཱ བྷིཀྑུནཱི ཡེན ཏཱ བྷིཀྑུནིཡོ ཏེནུཔསངྐམི། བྷིཀྑུནིཡོ ཏཾ བྷིཀྑུནིཾ ཨེཏདཝོཙུཾ – ‘‘ཀིསྶ ཏྭཾ, ཨཡྻེ, ཨེཀིཀཱ ཨོཧཱིནཱ, ཀཙྩིསི ཨཔྤདྷཾསིཏཱ’’ཏི? ‘‘པདྷཾསིཏཱམྷི, ཨཡྻེ’’ཏི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ཀཐཉྷི ནཱམ བྷིཀྑུནཱི ཨེཀཱ གཎམྷཱ ཨོཧཱིཡིསྶཏཱིཏི…པེ॰… སཙྩཾ ཀིར, བྷིཀྑཝེ, བྷིཀྑུནཱི ཨེཀཱ གཎམྷཱ ཨོཧཱིཡཏཱིཏི? ‘‘སཙྩཾ, བྷགཝཱ’’ཏི ། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, བྷིཀྑུནཱི ཨེཀཱ གཎམྷཱ ཨོཧཱིཡིསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
690. Tena kho pana samayena sambahulā bhikkhuniyo kosalesu janapade sāvatthiṃ addhānamaggappaṭipannā honti. Tattha aññatarā bhikkhunī vaccena pīḷitā ekikā ohīyitvā 8 pacchā agamāsi. Manussā taṃ bhikkhuniṃ passitvā dūsesuṃ. Atha kho sā bhikkhunī yena tā bhikkhuniyo tenupasaṅkami. Bhikkhuniyo taṃ bhikkhuniṃ etadavocuṃ – ‘‘kissa tvaṃ, ayye, ekikā ohīnā, kaccisi appadhaṃsitā’’ti? ‘‘Padhaṃsitāmhi, ayye’’ti. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma bhikkhunī ekā gaṇamhā ohīyissatīti…pe… saccaṃ kira, bhikkhave, bhikkhunī ekā gaṇamhā ohīyatīti? ‘‘Saccaṃ, bhagavā’’ti . Vigarahi buddho bhagavā…pe… kathañhi nāma, bhikkhave, bhikkhunī ekā gaṇamhā ohīyissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༦༩༡. ‘‘ཡཱ པན བྷིཀྑུནཱི ཨེཀཱ ཝཱ གཱམནྟརཾ གཙྪེཡྻ, ཨེཀཱ ཝཱ ནདཱིཔཱརཾ གཙྪེཡྻ, ཨེཀཱ ཝཱ རཏྟིཾ ཝིཔྤཝསེཡྻ, ཨེཀཱ ཝཱ གཎམྷཱ ཨོཧཱིཡེཡྻ, ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེས’’ནྟི།
691.‘‘Yāpana bhikkhunī ekā vā gāmantaraṃ gaccheyya, ekā vā nadīpāraṃ gaccheyya, ekā vā rattiṃ vippavaseyya, ekā vā gaṇamhā ohīyeyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
༦༩༢. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
692.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ཨེཀཱ ཝཱ གཱམནྟརཾ གཙྪེཡྻཱཏི པརིཀྑིཏྟསྶ གཱམསྶ པརིཀྑེཔཾ པཋམཾ པཱདཾ ཨཏིཀྐཱམེནྟིཡཱ ཨཱཔཏྟི ཐུལླཙྩཡསྶ, དུཏིཡཾ པཱདཾ ཨཏིཀྐཱམེནྟིཡཱ ཨཱཔཏྟི སངྒྷཱདིསེསསྶ།
Ekā vā gāmantaraṃ gaccheyyāti parikkhittassa gāmassa parikkhepaṃ paṭhamaṃ pādaṃ atikkāmentiyā āpatti thullaccayassa, dutiyaṃ pādaṃ atikkāmentiyā āpatti saṅghādisesassa.
ཨཔརིཀྑིཏྟསྶ གཱམསྶ ཨུཔཙཱརཾ པཋམཾ པཱདཾ ཨཏིཀྐཱམེནྟིཡཱ ཨཱཔཏྟི ཐུལླཙྩཡསྶ། དུཏིཡཾ པཱདཾ ཨཏིཀྐཱམེནྟིཡཱ ཨཱཔཏྟི སངྒྷཱདིསེསསྶ།
Aparikkhittassa gāmassa upacāraṃ paṭhamaṃ pādaṃ atikkāmentiyā āpatti thullaccayassa. Dutiyaṃ pādaṃ atikkāmentiyā āpatti saṅghādisesassa.
ཨེཀཱ ཝཱ ནདཱིཔཱརཾ གཙྪེཡྻཱཏི ནདཱི ནཱམ ཏིམཎྜལཾ པཊིཙྪཱདེཏྭཱ ཡཏྠ ཀཏྠཙི ཨུཏྟརནྟིཡཱ བྷིཀྑུནིཡཱ ཨནྟརཝཱསཀོ ཏེམིཡཏི། པཋམཾ པཱདཾ ཨུཏྟརནྟིཡཱ ཨཱཔཏྟི ཐུལླཙྩཡསྶ། དུཏིཡཾ པཱདཾ ཨུཏྟརནྟིཡཱ ཨཱཔཏྟི སངྒྷཱདིསེསསྶ།
Ekā vā nadīpāraṃ gaccheyyāti nadī nāma timaṇḍalaṃ paṭicchādetvā yattha katthaci uttarantiyā bhikkhuniyā antaravāsako temiyati. Paṭhamaṃ pādaṃ uttarantiyā āpatti thullaccayassa. Dutiyaṃ pādaṃ uttarantiyā āpatti saṅghādisesassa.
ཨེཀཱ ཝཱ རཏྟིཾ ཝིཔྤཝསེཡྻཱཏི སཧ ཨརུཎུགྒམནཱ དུཏིཡིཀཱཡ བྷིཀྑུནིཡཱ ཧཏྠཔཱསཾ ཝིཛཧནྟིཡཱ ཨཱཔཏྟི ཐུལླཙྩཡསྶ། ཝིཛཧིཏེ ཨཱཔཏྟི སངྒྷཱདིསེསསྶ།
Ekā vā rattiṃ vippavaseyyāti saha aruṇuggamanā dutiyikāya bhikkhuniyā hatthapāsaṃ vijahantiyā āpatti thullaccayassa. Vijahite āpatti saṅghādisesassa.
ཨེཀཱ ཝཱ གཎམྷཱ ཨོཧཱིཡེཡྻཱཏི ཨགཱམཀེ ཨརཉྙེ དུཏིཡིཀཱཡ བྷིཀྑུནིཡཱ དསྶནཱུཔཙཱརཾ ཝཱ སཝནཱུཔཙཱརཾ ཝཱ ཝིཛཧནྟིཡཱ ཨཱཔཏྟི ཐུལླཙྩཡསྶ། ཝིཛཧིཏེ ཨཱཔཏྟི སངྒྷཱདིསེསསྶ།
Ekā vā gaṇamhā ohīyeyyāti agāmake araññe dutiyikāya bhikkhuniyā dassanūpacāraṃ vā savanūpacāraṃ vā vijahantiyā āpatti thullaccayassa. Vijahite āpatti saṅghādisesassa.
ཨཡམྤཱིཏི པུརིམཱཡོ ཨུཔཱདཱཡ ཝུཙྩཏི།
Ayampīti purimāyo upādāya vuccati.
པཋམཱཔཏྟིཀནྟི སཧ ཝཏྠུཛ྄ཛྷཱཙཱརཱ ཨཱཔཛྫཏི ཨསམནུབྷཱསནཱཡ།
Paṭhamāpattikanti saha vatthujjhācārā āpajjati asamanubhāsanāya.
ནིསྶཱརཎཱིཡནྟི སངྒྷམྷཱ ནིསྶཱརཱིཡཏི།
Nissāraṇīyanti saṅghamhā nissārīyati.
སངྒྷཱདིསེསོཏི…པེ॰… ཏེནཔི ཝུཙྩཏི སངྒྷཱདིསེསོཏི།
Saṅghādisesoti…pe… tenapi vuccati saṅghādisesoti.
༦༩༣. ཨནཱཔཏྟི དུཏིཡིཀཱ བྷིཀྑུནཱི པཀྐནྟཱ ཝཱ ཧོཏི ཝིབྦྷནྟཱ ཝཱ ཀཱལངྐཏཱ ཝཱ པཀྑསངྐནྟཱ ཝཱ, ཨཱཔདཱསུ, ཨུམྨཏྟིཀཱཡ, ཨཱདིཀམྨིཀཱཡཱཏི།
693. Anāpatti dutiyikā bhikkhunī pakkantā vā hoti vibbhantā vā kālaṅkatā vā pakkhasaṅkantā vā, āpadāsu, ummattikāya, ādikammikāyāti.
ཏཏིཡསངྒྷཱདིསེསསིཀྑཱཔདཾ ནིཊྛིཏཾ།
Tatiyasaṅghādisesasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༣. ཏཏིཡསངྒྷཱདིསེསསིཀྑཱཔདཝཎྞནཱ • 3. Tatiyasaṅghādisesasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༣. ཏཏིཡསངྒྷཱདིསེསསིཀྑཱཔདཝཎྞནཱ • 3. Tatiyasaṅghādisesasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༣. ཏཏིཡསངྒྷཱདིསེསསིཀྑཱཔདཝཎྞནཱ • 3. Tatiyasaṅghādisesasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༣. ཏཏིཡསངྒྷཱདིསེསསིཀྑཱཔདཝཎྞནཱ • 3. Tatiyasaṅghādisesasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༣. ཏཏིཡསངྒྷཱདིསེསསིཀྑཱཔདཾ • 3. Tatiyasaṅghādisesasikkhāpadaṃ
