| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
3. ததியஸங்கா⁴தி³ஸேஸஸிக்கா²பத³வண்ணனா
3. Tatiyasaṅghādisesasikkhāpadavaṇṇanā
692. ததியே பரிக்கே²பங் அதிக்காமெந்தியாதி கா³மந்தரஸ்ஸ பரிக்கே²பங் அதிக்காமெந்தியா. ‘‘கா³மந்தரங் க³ச்செ²ய்யா’’தி ஹி வுத்தங். விகாலகா³மப்பவேஸனஸிக்கா²பதே³ விய ‘‘அபரிக்கி²த்தஸ்ஸ உபசாரங் ஓக்கமந்தியா’’தி அவத்வா ‘‘அதிக்காமெந்தியா’’தி பாளியங் வுத்தத்தா கா³மங் பவிஸந்தியா க⁴ரூபசாரே டி²தஸ்ஸ து³தியலெட்³டு³பாதஸங்கா²தஸ்ஸ உபசாரஸ்ஸ அதிக்கமோ நாம பட²மலெட்³டு³பாதட்டா²னஸங்கா²தஸ்ஸ பரிக்கே²பாரஹட்டா²னஸ்ஸ அதிக்கமோ ஏவாதி ஆஹ ‘‘பரிக்கே²பாரஹட்டா²னங் ஏகேன பாதே³ன அதிக்கமதீ’’தி.
692. Tatiye parikkhepaṃ atikkāmentiyāti gāmantarassa parikkhepaṃ atikkāmentiyā. ‘‘Gāmantaraṃ gaccheyyā’’ti hi vuttaṃ. Vikālagāmappavesanasikkhāpade viya ‘‘aparikkhittassa upacāraṃ okkamantiyā’’ti avatvā ‘‘atikkāmentiyā’’ti pāḷiyaṃ vuttattā gāmaṃ pavisantiyā gharūpacāre ṭhitassa dutiyaleḍḍupātasaṅkhātassa upacārassa atikkamo nāma paṭhamaleḍḍupātaṭṭhānasaṅkhātassa parikkhepārahaṭṭhānassa atikkamo evāti āha ‘‘parikkhepārahaṭṭhānaṃ ekena pādena atikkamatī’’ti.
மஜ்ஜே²தி கா³மமஜ்ஜே². பச்சா²தி அபரகாலே. ‘‘சதுகா³மஸாதா⁴ரணத்தா’’தி இமினா விஹாரதோ சதூஸு கா³மேஸு யத்த² கத்த²சி பவிஸிதுங் வட்டதீதி எத்த² காரணமாஹ.
Majjheti gāmamajjhe. Pacchāti aparakāle. ‘‘Catugāmasādhāraṇattā’’ti iminā vihārato catūsu gāmesu yattha katthaci pavisituṃ vaṭṭatīti ettha kāraṇamāha.
பரதீரமேவ அக்கமந்தியாதி நதி³ங் அனோதரித்வா ஓரிமதீரதோ லங்கி⁴த்வா வா ஆகாஸாதி³னா வா பரதீரமேவ அதிக்காமெந்தியா. ஓரிமதீரமேவ ஆக³ச்ச²தி, ஆபத்தீதி பாரக³மனாய ஓதிண்ணத்தா வுத்தங்.
Paratīrameva akkamantiyāti nadiṃ anotaritvā orimatīrato laṅghitvā vā ākāsādinā vā paratīrameva atikkāmentiyā. Orimatīrameva āgacchati, āpattīti pāragamanāya otiṇṇattā vuttaṃ.
தாதி³ஸே அரஞ்ஞேதி இந்த³கீ²லதோ ப³ஹிபா⁴வலக்க²ணே அரஞ்ஞே. ‘‘தேனேவா’’திஆதி³னா த³ஸ்ஸனூபசாரே விரஹிதே ஸவனூபசாரஸ்ஸ விஜ்ஜமானத்தேபி ஆபத்தி ஹோதீதி த³ஸ்ஸேதி. அஞ்ஞங் மக்³க³ங் க³ண்ஹாதீதி மக்³க³மூள்ஹத்தா க³ண்ஹாதி, ந து³தியிகங் ஓஹியிதுங். தஸ்மா அனாபத்தி. அனந்தராயேன ஏகபா⁴வோ, அனாபதா³ய கா³மந்தரக³மனாதீ³ஸு ஏகந்தி த்³வே அங்கா³னி.
Tādise araññeti indakhīlato bahibhāvalakkhaṇe araññe. ‘‘Tenevā’’tiādinā dassanūpacāre virahite savanūpacārassa vijjamānattepi āpatti hotīti dasseti. Aññaṃ maggaṃ gaṇhātīti maggamūḷhattā gaṇhāti, na dutiyikaṃ ohiyituṃ. Tasmā anāpatti. Anantarāyena ekabhāvo, anāpadāya gāmantaragamanādīsu ekanti dve aṅgāni.
ததியஸங்கா⁴தி³ஸேஸஸிக்கா²பத³வண்ணனா நிட்டி²தா.
Tatiyasaṅghādisesasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 3. ததியஸங்கா⁴தி³ஸேஸஸிக்கா²பத³ங் • 3. Tatiyasaṅghādisesasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 3. ததியஸங்கா⁴தி³ஸேஸஸிக்கா²பத³வண்ணனா • 3. Tatiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. ததியஸங்கா⁴தி³ஸேஸஸிக்கா²பத³வண்ணனா • 3. Tatiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. ததியஸங்கா⁴தி³ஸேஸஸிக்கா²பத³வண்ணனா • 3. Tatiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. ததியஸங்கா⁴தி³ஸேஸஸிக்கா²பத³ங் • 3. Tatiyasaṅghādisesasikkhāpadaṃ
