| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
9. ததியஸஞ்ஞாவேத³யிதகதா²வண்ணனா
9. Tatiyasaññāvedayitakathāvaṇṇanā
732. இதா³னி யஸ்மா ‘‘அஸுகோ மரணத⁴ம்மோ, அஸுகோ ந மரணத⁴ம்மோ’’தி ஸத்தானங் மரணத⁴ம்மதாய நியாமோ நத்தீ²தி ஸஞ்ஞாவேத³யிதனிரோத⁴ங் ஸமாபன்னோபி காலங் கரெய்யாதி யேஸங் லத்³தி⁴, ஸெய்யதா²பி ராஜகி³ரிகானங்; தேஸங் ஸமாபன்னாயபி மரணத⁴ம்மதாய மரணஸமயஞ்ச அமரணஸமயஞ்ச த³ஸ்ஸேதுங் புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் யஸ்மா காலங் கரொந்தஸ்ஸ நாம மரணந்திகேஹி ப²ஸ்ஸாதீ³ஹி ப⁴விதப்³ப³ங், தஸ்மா தேனாகாரேன சோதே³துங் அத்தீ²திஆதி³மாஹ.
732. Idāni yasmā ‘‘asuko maraṇadhammo, asuko na maraṇadhammo’’ti sattānaṃ maraṇadhammatāya niyāmo natthīti saññāvedayitanirodhaṃ samāpannopi kālaṃ kareyyāti yesaṃ laddhi, seyyathāpi rājagirikānaṃ; tesaṃ samāpannāyapi maraṇadhammatāya maraṇasamayañca amaraṇasamayañca dassetuṃ pucchā sakavādissa, paṭiññā itarassa. Atha naṃ yasmā kālaṃ karontassa nāma maraṇantikehi phassādīhi bhavitabbaṃ, tasmā tenākārena codetuṃ atthītiādimāha.
அப²ஸ்ஸகஸ்ஸ காலகிரியாதிஆதீ³னி புட்டோ² ஸேஸஸத்தே ஸந்தா⁴ய படிக்கி²பதி விஸங் கமெய்யாதிஆதீ³னி புட்டோ² ஸமாபத்திஆனுபா⁴வங் ஸந்தா⁴ய படிக்கி²பதி. து³தியவாரே ஸரீரபகதிங் ஸந்தா⁴ய படிஜானாதி. ஏவங் ஸந்தே பன ஸமாபத்திஆனுபா⁴வோ நாம ந ஹோதி, தேனேவ ந நிரோத⁴ஸமாபன்னோதி அனுயுஞ்ஜதி.
Aphassakassa kālakiriyātiādīni puṭṭho sesasatte sandhāya paṭikkhipati visaṃ kameyyātiādīni puṭṭho samāpattiānubhāvaṃ sandhāya paṭikkhipati. Dutiyavāre sarīrapakatiṃ sandhāya paṭijānāti. Evaṃ sante pana samāpattiānubhāvo nāma na hoti, teneva na nirodhasamāpannoti anuyuñjati.
733-734. ந காலங் கரெய்யாதி புச்சா² பரவாதி³ஸ்ஸ. அத்தி² ஸோ நியாமோதி பரவாதி³ஸ்ஸ பஞ்ஹே பன யஸ்மா ஏவரூபோ நியாமோ நாம நத்தி², தஸ்மா படிக்கி²பதி. சக்கு²விஞ்ஞாணஸமங்கீ³திஆதி³ ஸகவாதி³னா ‘‘நியாமே அஸந்தேபி மரணஸமயேனேவ மரதி, நாஸமயேனா’’தி த³ஸ்ஸேதுங் வுத்தங். தத்ராயமதி⁴ப்பாயோ – யதி³ நியாமாபா⁴வேன காலகிரியா ப⁴வெய்ய, சக்கு²விஞ்ஞாணஸமங்கி³னோபி ப⁴வெய்ய. ததோ ‘‘பஞ்சஹி விஞ்ஞாணேஹி ந சவதி, ந உபபஜ்ஜதீ’’தி ஸுத்தவிரோதோ⁴ ஸியா. யதா² பன சக்கு²விஞ்ஞாணஸமங்கி³ஸ்ஸ காலகிரியா ந ஹோதி, ததா² நிரோத⁴ஸமாபன்னஸ்ஸாபீதி.
733-734. Na kālaṃ kareyyāti pucchā paravādissa. Atthi so niyāmoti paravādissa pañhe pana yasmā evarūpo niyāmo nāma natthi, tasmā paṭikkhipati. Cakkhuviññāṇasamaṅgītiādi sakavādinā ‘‘niyāme asantepi maraṇasamayeneva marati, nāsamayenā’’ti dassetuṃ vuttaṃ. Tatrāyamadhippāyo – yadi niyāmābhāvena kālakiriyā bhaveyya, cakkhuviññāṇasamaṅginopi bhaveyya. Tato ‘‘pañcahi viññāṇehi na cavati, na upapajjatī’’ti suttavirodho siyā. Yathā pana cakkhuviññāṇasamaṅgissa kālakiriyā na hoti, tathā nirodhasamāpannassāpīti.
ததியஸஞ்ஞாவேத³யிதகதா²வண்ணனா.
Tatiyasaññāvedayitakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (153) 9. ததியஸஞ்ஞாவேத³யிதகதா² • (153) 9. Tatiyasaññāvedayitakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 9. ததியஸஞ்ஞாவேத³யிதகதா²வண்ணனா • 9. Tatiyasaññāvedayitakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 9. ததியஸஞ்ஞாவேத³யிதகதா²வண்ணனா • 9. Tatiyasaññāvedayitakathāvaṇṇanā
