| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৯. ততিযসঞ্ঞাৰেদযিতকথাৰণ্ণনা
9. Tatiyasaññāvedayitakathāvaṇṇanā
৭৩২. ইদানি যস্মা ‘‘অসুকো মরণধম্মো, অসুকো ন মরণধম্মো’’তি সত্তানং মরণধম্মতায নিযামো নত্থীতি সঞ্ঞাৰেদযিতনিরোধং সমাপন্নোপি কালং করেয্যাতি যেসং লদ্ধি, সেয্যথাপি রাজগিরিকানং; তেসং সমাপন্নাযপি মরণধম্মতায মরণসমযঞ্চ অমরণসমযঞ্চ দস্সেতুং পুচ্ছা সকৰাদিস্স, পটিঞ্ঞা ইতরস্স। অথ নং যস্মা কালং করোন্তস্স নাম মরণন্তিকেহি ফস্সাদীহি ভৰিতব্বং, তস্মা তেনাকারেন চোদেতুং অত্থীতিআদিমাহ।
732. Idāni yasmā ‘‘asuko maraṇadhammo, asuko na maraṇadhammo’’ti sattānaṃ maraṇadhammatāya niyāmo natthīti saññāvedayitanirodhaṃ samāpannopi kālaṃ kareyyāti yesaṃ laddhi, seyyathāpi rājagirikānaṃ; tesaṃ samāpannāyapi maraṇadhammatāya maraṇasamayañca amaraṇasamayañca dassetuṃ pucchā sakavādissa, paṭiññā itarassa. Atha naṃ yasmā kālaṃ karontassa nāma maraṇantikehi phassādīhi bhavitabbaṃ, tasmā tenākārena codetuṃ atthītiādimāha.
অফস্সকস্স কালকিরিযাতিআদীনি পুট্ঠো সেসসত্তে সন্ধায পটিক্খিপতি ৰিসং কমেয্যাতিআদীনি পুট্ঠো সমাপত্তিআনুভাৰং সন্ধায পটিক্খিপতি। দুতিযৰারে সরীরপকতিং সন্ধায পটিজানাতি। এৰং সন্তে পন সমাপত্তিআনুভাৰো নাম ন হোতি, তেনেৰ ন নিরোধসমাপন্নোতি অনুযুঞ্জতি।
Aphassakassa kālakiriyātiādīni puṭṭho sesasatte sandhāya paṭikkhipati visaṃ kameyyātiādīni puṭṭho samāpattiānubhāvaṃ sandhāya paṭikkhipati. Dutiyavāre sarīrapakatiṃ sandhāya paṭijānāti. Evaṃ sante pana samāpattiānubhāvo nāma na hoti, teneva na nirodhasamāpannoti anuyuñjati.
৭৩৩-৭৩৪. ন কালং করেয্যাতি পুচ্ছা পরৰাদিস্স। অত্থি সো নিযামোতি পরৰাদিস্স পঞ্হে পন যস্মা এৰরূপো নিযামো নাম নত্থি, তস্মা পটিক্খিপতি। চক্খুৰিঞ্ঞাণসমঙ্গীতিআদি সকৰাদিনা ‘‘নিযামে অসন্তেপি মরণসমযেনেৰ মরতি, নাসমযেনা’’তি দস্সেতুং ৰুত্তং। তত্রাযমধিপ্পাযো – যদি নিযামাভাৰেন কালকিরিযা ভৰেয্য, চক্খুৰিঞ্ঞাণসমঙ্গিনোপি ভৰেয্য। ততো ‘‘পঞ্চহি ৰিঞ্ঞাণেহি ন চৰতি, ন উপপজ্জতী’’তি সুত্তৰিরোধো সিযা। যথা পন চক্খুৰিঞ্ঞাণসমঙ্গিস্স কালকিরিযা ন হোতি, তথা নিরোধসমাপন্নস্সাপীতি।
733-734. Na kālaṃ kareyyāti pucchā paravādissa. Atthi so niyāmoti paravādissa pañhe pana yasmā evarūpo niyāmo nāma natthi, tasmā paṭikkhipati. Cakkhuviññāṇasamaṅgītiādi sakavādinā ‘‘niyāme asantepi maraṇasamayeneva marati, nāsamayenā’’ti dassetuṃ vuttaṃ. Tatrāyamadhippāyo – yadi niyāmābhāvena kālakiriyā bhaveyya, cakkhuviññāṇasamaṅginopi bhaveyya. Tato ‘‘pañcahi viññāṇehi na cavati, na upapajjatī’’ti suttavirodho siyā. Yathā pana cakkhuviññāṇasamaṅgissa kālakiriyā na hoti, tathā nirodhasamāpannassāpīti.
ততিযসঞ্ঞাৰেদযিতকথাৰণ্ণনা।
Tatiyasaññāvedayitakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১৫৩) ৯. ততিযসঞ্ঞাৰেদযিতকথা • (153) 9. Tatiyasaññāvedayitakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৯. ততিযসঞ্ঞাৰেদযিতকথাৰণ্ণনা • 9. Tatiyasaññāvedayitakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৯. ততিযসঞ্ঞাৰেদযিতকথাৰণ্ণনা • 9. Tatiyasaññāvedayitakathāvaṇṇanā
