| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೯. ತತಿಯಸಞ್ಞಾವೇದಯಿತಕಥಾವಣ್ಣನಾ
9. Tatiyasaññāvedayitakathāvaṇṇanā
೭೩೨. ಇದಾನಿ ಯಸ್ಮಾ ‘‘ಅಸುಕೋ ಮರಣಧಮ್ಮೋ, ಅಸುಕೋ ನ ಮರಣಧಮ್ಮೋ’’ತಿ ಸತ್ತಾನಂ ಮರಣಧಮ್ಮತಾಯ ನಿಯಾಮೋ ನತ್ಥೀತಿ ಸಞ್ಞಾವೇದಯಿತನಿರೋಧಂ ಸಮಾಪನ್ನೋಪಿ ಕಾಲಂ ಕರೇಯ್ಯಾತಿ ಯೇಸಂ ಲದ್ಧಿ, ಸೇಯ್ಯಥಾಪಿ ರಾಜಗಿರಿಕಾನಂ; ತೇಸಂ ಸಮಾಪನ್ನಾಯಪಿ ಮರಣಧಮ್ಮತಾಯ ಮರಣಸಮಯಞ್ಚ ಅಮರಣಸಮಯಞ್ಚ ದಸ್ಸೇತುಂ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ಅಥ ನಂ ಯಸ್ಮಾ ಕಾಲಂ ಕರೋನ್ತಸ್ಸ ನಾಮ ಮರಣನ್ತಿಕೇಹಿ ಫಸ್ಸಾದೀಹಿ ಭವಿತಬ್ಬಂ, ತಸ್ಮಾ ತೇನಾಕಾರೇನ ಚೋದೇತುಂ ಅತ್ಥೀತಿಆದಿಮಾಹ।
732. Idāni yasmā ‘‘asuko maraṇadhammo, asuko na maraṇadhammo’’ti sattānaṃ maraṇadhammatāya niyāmo natthīti saññāvedayitanirodhaṃ samāpannopi kālaṃ kareyyāti yesaṃ laddhi, seyyathāpi rājagirikānaṃ; tesaṃ samāpannāyapi maraṇadhammatāya maraṇasamayañca amaraṇasamayañca dassetuṃ pucchā sakavādissa, paṭiññā itarassa. Atha naṃ yasmā kālaṃ karontassa nāma maraṇantikehi phassādīhi bhavitabbaṃ, tasmā tenākārena codetuṃ atthītiādimāha.
ಅಫಸ್ಸಕಸ್ಸ ಕಾಲಕಿರಿಯಾತಿಆದೀನಿ ಪುಟ್ಠೋ ಸೇಸಸತ್ತೇ ಸನ್ಧಾಯ ಪಟಿಕ್ಖಿಪತಿ ವಿಸಂ ಕಮೇಯ್ಯಾತಿಆದೀನಿ ಪುಟ್ಠೋ ಸಮಾಪತ್ತಿಆನುಭಾವಂ ಸನ್ಧಾಯ ಪಟಿಕ್ಖಿಪತಿ। ದುತಿಯವಾರೇ ಸರೀರಪಕತಿಂ ಸನ್ಧಾಯ ಪಟಿಜಾನಾತಿ। ಏವಂ ಸನ್ತೇ ಪನ ಸಮಾಪತ್ತಿಆನುಭಾವೋ ನಾಮ ನ ಹೋತಿ, ತೇನೇವ ನ ನಿರೋಧಸಮಾಪನ್ನೋತಿ ಅನುಯುಞ್ಜತಿ।
Aphassakassa kālakiriyātiādīni puṭṭho sesasatte sandhāya paṭikkhipati visaṃ kameyyātiādīni puṭṭho samāpattiānubhāvaṃ sandhāya paṭikkhipati. Dutiyavāre sarīrapakatiṃ sandhāya paṭijānāti. Evaṃ sante pana samāpattiānubhāvo nāma na hoti, teneva na nirodhasamāpannoti anuyuñjati.
೭೩೩-೭೩೪. ನ ಕಾಲಂ ಕರೇಯ್ಯಾತಿ ಪುಚ್ಛಾ ಪರವಾದಿಸ್ಸ। ಅತ್ಥಿ ಸೋ ನಿಯಾಮೋತಿ ಪರವಾದಿಸ್ಸ ಪಞ್ಹೇ ಪನ ಯಸ್ಮಾ ಏವರೂಪೋ ನಿಯಾಮೋ ನಾಮ ನತ್ಥಿ, ತಸ್ಮಾ ಪಟಿಕ್ಖಿಪತಿ। ಚಕ್ಖುವಿಞ್ಞಾಣಸಮಙ್ಗೀತಿಆದಿ ಸಕವಾದಿನಾ ‘‘ನಿಯಾಮೇ ಅಸನ್ತೇಪಿ ಮರಣಸಮಯೇನೇವ ಮರತಿ, ನಾಸಮಯೇನಾ’’ತಿ ದಸ್ಸೇತುಂ ವುತ್ತಂ। ತತ್ರಾಯಮಧಿಪ್ಪಾಯೋ – ಯದಿ ನಿಯಾಮಾಭಾವೇನ ಕಾಲಕಿರಿಯಾ ಭವೇಯ್ಯ, ಚಕ್ಖುವಿಞ್ಞಾಣಸಮಙ್ಗಿನೋಪಿ ಭವೇಯ್ಯ। ತತೋ ‘‘ಪಞ್ಚಹಿ ವಿಞ್ಞಾಣೇಹಿ ನ ಚವತಿ, ನ ಉಪಪಜ್ಜತೀ’’ತಿ ಸುತ್ತವಿರೋಧೋ ಸಿಯಾ। ಯಥಾ ಪನ ಚಕ್ಖುವಿಞ್ಞಾಣಸಮಙ್ಗಿಸ್ಸ ಕಾಲಕಿರಿಯಾ ನ ಹೋತಿ, ತಥಾ ನಿರೋಧಸಮಾಪನ್ನಸ್ಸಾಪೀತಿ।
733-734. Na kālaṃ kareyyāti pucchā paravādissa. Atthi so niyāmoti paravādissa pañhe pana yasmā evarūpo niyāmo nāma natthi, tasmā paṭikkhipati. Cakkhuviññāṇasamaṅgītiādi sakavādinā ‘‘niyāme asantepi maraṇasamayeneva marati, nāsamayenā’’ti dassetuṃ vuttaṃ. Tatrāyamadhippāyo – yadi niyāmābhāvena kālakiriyā bhaveyya, cakkhuviññāṇasamaṅginopi bhaveyya. Tato ‘‘pañcahi viññāṇehi na cavati, na upapajjatī’’ti suttavirodho siyā. Yathā pana cakkhuviññāṇasamaṅgissa kālakiriyā na hoti, tathā nirodhasamāpannassāpīti.
ತತಿಯಸಞ್ಞಾವೇದಯಿತಕಥಾವಣ್ಣನಾ।
Tatiyasaññāvedayitakathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೧೫೩) ೯. ತತಿಯಸಞ್ಞಾವೇದಯಿತಕಥಾ • (153) 9. Tatiyasaññāvedayitakathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೯. ತತಿಯಸಞ್ಞಾವೇದಯಿತಕಥಾವಣ್ಣನಾ • 9. Tatiyasaññāvedayitakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೯. ತತಿಯಸಞ್ಞಾವೇದಯಿತಕಥಾವಣ್ಣನಾ • 9. Tatiyasaññāvedayitakathāvaṇṇanā
