| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
੯. ਤਤਿਯਸਞ੍ਞਾવੇਦਯਿਤਕਥਾવਣ੍ਣਨਾ
9. Tatiyasaññāvedayitakathāvaṇṇanā
੭੩੨. ਇਦਾਨਿ ਯਸ੍ਮਾ ‘‘ਅਸੁਕੋ ਮਰਣਧਮ੍ਮੋ, ਅਸੁਕੋ ਨ ਮਰਣਧਮ੍ਮੋ’’ਤਿ ਸਤ੍ਤਾਨਂ ਮਰਣਧਮ੍ਮਤਾਯ ਨਿਯਾਮੋ ਨਤ੍ਥੀਤਿ ਸਞ੍ਞਾવੇਦਯਿਤਨਿਰੋਧਂ ਸਮਾਪਨ੍ਨੋਪਿ ਕਾਲਂ ਕਰੇਯ੍ਯਾਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਰਾਜਗਿਰਿਕਾਨਂ; ਤੇਸਂ ਸਮਾਪਨ੍ਨਾਯਪਿ ਮਰਣਧਮ੍ਮਤਾਯ ਮਰਣਸਮਯਞ੍ਚ ਅਮਰਣਸਮਯਞ੍ਚ ਦਸ੍ਸੇਤੁਂ ਪੁਚ੍ਛਾ ਸਕવਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ। ਅਥ ਨਂ ਯਸ੍ਮਾ ਕਾਲਂ ਕਰੋਨ੍ਤਸ੍ਸ ਨਾਮ ਮਰਣਨ੍ਤਿਕੇਹਿ ਫਸ੍ਸਾਦੀਹਿ ਭવਿਤਬ੍ਬਂ, ਤਸ੍ਮਾ ਤੇਨਾਕਾਰੇਨ ਚੋਦੇਤੁਂ ਅਤ੍ਥੀਤਿਆਦਿਮਾਹ।
732. Idāni yasmā ‘‘asuko maraṇadhammo, asuko na maraṇadhammo’’ti sattānaṃ maraṇadhammatāya niyāmo natthīti saññāvedayitanirodhaṃ samāpannopi kālaṃ kareyyāti yesaṃ laddhi, seyyathāpi rājagirikānaṃ; tesaṃ samāpannāyapi maraṇadhammatāya maraṇasamayañca amaraṇasamayañca dassetuṃ pucchā sakavādissa, paṭiññā itarassa. Atha naṃ yasmā kālaṃ karontassa nāma maraṇantikehi phassādīhi bhavitabbaṃ, tasmā tenākārena codetuṃ atthītiādimāha.
ਅਫਸ੍ਸਕਸ੍ਸ ਕਾਲਕਿਰਿਯਾਤਿਆਦੀਨਿ ਪੁਟ੍ਠੋ ਸੇਸਸਤ੍ਤੇ ਸਨ੍ਧਾਯ ਪਟਿਕ੍ਖਿਪਤਿ વਿਸਂ ਕਮੇਯ੍ਯਾਤਿਆਦੀਨਿ ਪੁਟ੍ਠੋ ਸਮਾਪਤ੍ਤਿਆਨੁਭਾવਂ ਸਨ੍ਧਾਯ ਪਟਿਕ੍ਖਿਪਤਿ। ਦੁਤਿਯવਾਰੇ ਸਰੀਰਪਕਤਿਂ ਸਨ੍ਧਾਯ ਪਟਿਜਾਨਾਤਿ। ਏવਂ ਸਨ੍ਤੇ ਪਨ ਸਮਾਪਤ੍ਤਿਆਨੁਭਾવੋ ਨਾਮ ਨ ਹੋਤਿ, ਤੇਨੇવ ਨ ਨਿਰੋਧਸਮਾਪਨ੍ਨੋਤਿ ਅਨੁਯੁਞ੍ਜਤਿ।
Aphassakassa kālakiriyātiādīni puṭṭho sesasatte sandhāya paṭikkhipati visaṃ kameyyātiādīni puṭṭho samāpattiānubhāvaṃ sandhāya paṭikkhipati. Dutiyavāre sarīrapakatiṃ sandhāya paṭijānāti. Evaṃ sante pana samāpattiānubhāvo nāma na hoti, teneva na nirodhasamāpannoti anuyuñjati.
੭੩੩-੭੩੪. ਨ ਕਾਲਂ ਕਰੇਯ੍ਯਾਤਿ ਪੁਚ੍ਛਾ ਪਰવਾਦਿਸ੍ਸ। ਅਤ੍ਥਿ ਸੋ ਨਿਯਾਮੋਤਿ ਪਰવਾਦਿਸ੍ਸ ਪਞ੍ਹੇ ਪਨ ਯਸ੍ਮਾ ਏવਰੂਪੋ ਨਿਯਾਮੋ ਨਾਮ ਨਤ੍ਥਿ, ਤਸ੍ਮਾ ਪਟਿਕ੍ਖਿਪਤਿ। ਚਕ੍ਖੁવਿਞ੍ਞਾਣਸਮਙ੍ਗੀਤਿਆਦਿ ਸਕવਾਦਿਨਾ ‘‘ਨਿਯਾਮੇ ਅਸਨ੍ਤੇਪਿ ਮਰਣਸਮਯੇਨੇવ ਮਰਤਿ, ਨਾਸਮਯੇਨਾ’’ਤਿ ਦਸ੍ਸੇਤੁਂ વੁਤ੍ਤਂ। ਤਤ੍ਰਾਯਮਧਿਪ੍ਪਾਯੋ – ਯਦਿ ਨਿਯਾਮਾਭਾવੇਨ ਕਾਲਕਿਰਿਯਾ ਭવੇਯ੍ਯ, ਚਕ੍ਖੁવਿਞ੍ਞਾਣਸਮਙ੍ਗਿਨੋਪਿ ਭવੇਯ੍ਯ। ਤਤੋ ‘‘ਪਞ੍ਚਹਿ વਿਞ੍ਞਾਣੇਹਿ ਨ ਚવਤਿ, ਨ ਉਪਪਜ੍ਜਤੀ’’ਤਿ ਸੁਤ੍ਤવਿਰੋਧੋ ਸਿਯਾ। ਯਥਾ ਪਨ ਚਕ੍ਖੁવਿਞ੍ਞਾਣਸਮਙ੍ਗਿਸ੍ਸ ਕਾਲਕਿਰਿਯਾ ਨ ਹੋਤਿ, ਤਥਾ ਨਿਰੋਧਸਮਾਪਨ੍ਨਸ੍ਸਾਪੀਤਿ।
733-734. Na kālaṃ kareyyāti pucchā paravādissa. Atthi so niyāmoti paravādissa pañhe pana yasmā evarūpo niyāmo nāma natthi, tasmā paṭikkhipati. Cakkhuviññāṇasamaṅgītiādi sakavādinā ‘‘niyāme asantepi maraṇasamayeneva marati, nāsamayenā’’ti dassetuṃ vuttaṃ. Tatrāyamadhippāyo – yadi niyāmābhāvena kālakiriyā bhaveyya, cakkhuviññāṇasamaṅginopi bhaveyya. Tato ‘‘pañcahi viññāṇehi na cavati, na upapajjatī’’ti suttavirodho siyā. Yathā pana cakkhuviññāṇasamaṅgissa kālakiriyā na hoti, tathā nirodhasamāpannassāpīti.
ਤਤਿਯਸਞ੍ਞਾવੇਦਯਿਤਕਥਾવਣ੍ਣਨਾ।
Tatiyasaññāvedayitakathāvaṇṇanā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਕਥਾવਤ੍ਥੁਪਾਲ਼ਿ • Kathāvatthupāḷi / (੧੫੩) ੯. ਤਤਿਯਸਞ੍ਞਾવੇਦਯਿਤਕਥਾ • (153) 9. Tatiyasaññāvedayitakathā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਮੂਲਟੀਕਾ • Pañcapakaraṇa-mūlaṭīkā / ੯. ਤਤਿਯਸਞ੍ਞਾવੇਦਯਿਤਕਥਾવਣ੍ਣਨਾ • 9. Tatiyasaññāvedayitakathāvaṇṇanā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਅਨੁਟੀਕਾ • Pañcapakaraṇa-anuṭīkā / ੯. ਤਤਿਯਸਞ੍ਞਾવੇਦਯਿਤਕਥਾવਣ੍ਣਨਾ • 9. Tatiyasaññāvedayitakathāvaṇṇanā
