| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. ததியஸாரிபுத்தகொட்டி²கஸுத்தங்
5. Tatiyasāriputtakoṭṭhikasuttaṃ
414. ஏகங் ஸமயங் ஆயஸ்மா ச ஸாரிபுத்தோ, ஆயஸ்மா ச மஹாகொட்டி²கோ பா³ராணஸியங் விஹரந்தி இஸிபதனே மிக³தா³யே…பே॰… (ஸாயேவ புச்சா²) ‘‘கோ நு கோ², ஆவுஸோ, ஹேது கோ பச்சயோ, யேனேதங் அப்³யாகதங் ப⁴க³வதா’’தி? ‘‘ரூபே கோ², ஆவுஸோ, அவிக³தராக³ஸ்ஸ அவிக³தச்ச²ந்த³ஸ்ஸ அவிக³தபேமஸ்ஸ அவிக³தபிபாஸஸ்ஸ அவிக³தபரிளாஹஸ்ஸ அவிக³ததண்ஹஸ்ஸ ‘ஹோதி ததா²க³தோ பரங் மரணா’திபிஸ்ஸ ஹோதி…பே॰… ‘நேவ ஹோதி ந ந ஹோதி ததா²க³தோ பரங் மரணா’திபிஸ்ஸ ஹோதி. வேத³னாய…பே॰… ஸஞ்ஞாய…பே॰… ஸங்கா²ரேஸு…பே॰… விஞ்ஞாணே அவிக³தராக³ஸ்ஸ அவிக³தச்ச²ந்த³ஸ்ஸ அவிக³தபேமஸ்ஸ அவிக³தபிபாஸஸ்ஸ அவிக³தபரிளாஹஸ்ஸ அவிக³ததண்ஹஸ்ஸ ‘ஹோதி ததா²க³தோ பரங் மரணா’திபிஸ்ஸ ஹோதி…பே॰… ‘நேவ ஹோதி ந ந ஹோதி ததா²க³தோ பரங் மரணா’திபிஸ்ஸ ஹோதி. ரூபே ச கோ², ஆவுஸோ, விக³தராக³ஸ்ஸ…பே॰… வேத³னாய…பே॰… ஸஞ்ஞாய…பே॰… ஸங்கா²ரேஸு…பே॰… விஞ்ஞாணே விக³தராக³ஸ்ஸ விக³தச்ச²ந்த³ஸ்ஸ விக³தபேமஸ்ஸ விக³தபிபாஸஸ்ஸ விக³தபரிளாஹஸ்ஸ விக³ததண்ஹஸ்ஸ ‘ஹோதி ததா²க³தோ பரங் மரணா’திபிஸ்ஸ ந ஹோதி…பே॰… ‘நேவ ஹோதி ந ந ஹோதி ததா²க³தோ பரங் மரணா’திபிஸ்ஸ ந ஹோதி. அயங் கோ², ஆவுஸோ, ஹேது, அயங் பச்சயோ, யேனேதங் அப்³யாகதங் ப⁴க³வதா’’தி. பஞ்சமங்.
414. Ekaṃ samayaṃ āyasmā ca sāriputto, āyasmā ca mahākoṭṭhiko bārāṇasiyaṃ viharanti isipatane migadāye…pe… (sāyeva pucchā) ‘‘ko nu kho, āvuso, hetu ko paccayo, yenetaṃ abyākataṃ bhagavatā’’ti? ‘‘Rūpe kho, āvuso, avigatarāgassa avigatacchandassa avigatapemassa avigatapipāsassa avigatapariḷāhassa avigatataṇhassa ‘hoti tathāgato paraṃ maraṇā’tipissa hoti…pe… ‘neva hoti na na hoti tathāgato paraṃ maraṇā’tipissa hoti. Vedanāya…pe… saññāya…pe… saṅkhāresu…pe… viññāṇe avigatarāgassa avigatacchandassa avigatapemassa avigatapipāsassa avigatapariḷāhassa avigatataṇhassa ‘hoti tathāgato paraṃ maraṇā’tipissa hoti…pe… ‘neva hoti na na hoti tathāgato paraṃ maraṇā’tipissa hoti. Rūpe ca kho, āvuso, vigatarāgassa…pe… vedanāya…pe… saññāya…pe… saṅkhāresu…pe… viññāṇe vigatarāgassa vigatacchandassa vigatapemassa vigatapipāsassa vigatapariḷāhassa vigatataṇhassa ‘hoti tathāgato paraṃ maraṇā’tipissa na hoti…pe… ‘neva hoti na na hoti tathāgato paraṃ maraṇā’tipissa na hoti. Ayaṃ kho, āvuso, hetu, ayaṃ paccayo, yenetaṃ abyākataṃ bhagavatā’’ti. Pañcamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3-8. பட²மஸாரிபுத்தகொட்டி²கஸுத்தாதி³வண்ணனா • 3-8. Paṭhamasāriputtakoṭṭhikasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3-8. பட²மஸாரிபுத்தகொட்டி²கஸுத்தாதி³வண்ணனா • 3-8. Paṭhamasāriputtakoṭṭhikasuttādivaṇṇanā
