| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
3. ததியஸிக்கா²பத³ங்
3. Tatiyasikkhāpadaṃ
892. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரிஸ்ஸா பி⁴க்கு²னியா மஹக்³கே⁴ சீவரது³ஸ்ஸே சீவரங் து³க்கடங் ஹோதி து³ஸ்ஸிப்³பி³தங். து²ல்லனந்தா³ பி⁴க்கு²னீ தங் பி⁴க்கு²னிங் ஏதத³வோச – ‘‘ஸுந்த³ரங் கோ² இத³ங் தே, அய்யே, சீவரது³ஸ்ஸங்; சீவரஞ்ச கோ² து³க்கடங் து³ஸ்ஸிப்³பி³த’’ந்தி. ‘‘விஸிப்³பே³மி, அய்யே, ஸிப்³பி³ஸ்ஸஸீ’’தி? ‘‘ஆமாய்யே, ஸிப்³பி³ஸ்ஸாமீ’’தி. அத² கோ² ஸா பி⁴க்கு²னீ தங் சீவரங் விஸிப்³பெ³த்வா து²ல்லனந்தா³ய பி⁴க்கு²னியா அதா³ஸி. து²ல்லனந்தா³ பி⁴க்கு²னீ – ‘‘ஸிப்³பி³ஸ்ஸாமி ஸிப்³பி³ஸ்ஸாமீ’’தி நேவ ஸிப்³ப³தி ந ஸிப்³பா³பனாய உஸ்ஸுக்கங் கரோதி. அத² கோ² ஸா பி⁴க்கு²னீ பி⁴க்கு²னீனங் ஏதமத்த²ங் ஆரோசேஸி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ பி⁴க்கு²னியா சீவரங் விஸிப்³பா³பெத்வா நேவ ஸிப்³பி³ஸ்ஸதி ந ஸிப்³பா³பனாய உஸ்ஸுக்கங் கரிஸ்ஸதீ’’தி…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ பி⁴க்கு²னியா சீவரங் விஸிப்³பா³பெத்வா நேவ ஸிப்³ப³தி ந ஸிப்³பா³பனாய உஸ்ஸுக்கங் கரோதீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ பி⁴க்கு²னியா சீவரங் விஸிப்³பா³பெத்வா நேவ ஸிப்³பி³ஸ்ஸதி ந ஸிப்³பா³பனாய உஸ்ஸுக்கங் கரிஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
892. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarissā bhikkhuniyā mahagghe cīvaradusse cīvaraṃ dukkaṭaṃ hoti dussibbitaṃ. Thullanandā bhikkhunī taṃ bhikkhuniṃ etadavoca – ‘‘sundaraṃ kho idaṃ te, ayye, cīvaradussaṃ; cīvarañca kho dukkaṭaṃ dussibbita’’nti. ‘‘Visibbemi, ayye, sibbissasī’’ti? ‘‘Āmāyye, sibbissāmī’’ti. Atha kho sā bhikkhunī taṃ cīvaraṃ visibbetvā thullanandāya bhikkhuniyā adāsi. Thullanandā bhikkhunī – ‘‘sibbissāmi sibbissāmī’’ti neva sibbati na sibbāpanāya ussukkaṃ karoti. Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā bhikkhuniyā cīvaraṃ visibbāpetvā neva sibbissati na sibbāpanāya ussukkaṃ karissatī’’ti…pe… saccaṃ kira, bhikkhave, thullanandā bhikkhunī bhikkhuniyā cīvaraṃ visibbāpetvā neva sibbati na sibbāpanāya ussukkaṃ karotīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī bhikkhuniyā cīvaraṃ visibbāpetvā neva sibbissati na sibbāpanāya ussukkaṃ karissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
893. ‘‘யா பன பி⁴க்கு²னீ பி⁴க்கு²னியா சீவரங் விஸிப்³பெ³த்வா வா விஸிப்³பா³பெத்வா வா ஸா பச்சா² அனந்தராயிகினீ நேவ ஸிப்³பெ³ய்ய ந ஸிப்³பா³பனாய உஸ்ஸுக்கங் கரெய்ய, அஞ்ஞத்ர சதூஹபஞ்சாஹா, பாசித்திய’’ந்தி.
893.‘‘Yā pana bhikkhunī bhikkhuniyā cīvaraṃ visibbetvā vā visibbāpetvā vā sā pacchā anantarāyikinī neva sibbeyya na sibbāpanāya ussukkaṃ kareyya, aññatra catūhapañcāhā, pācittiya’’nti.
894. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
894.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
பி⁴க்கு²னியாதி அஞ்ஞாய பி⁴க்கு²னியா.
Bhikkhuniyāti aññāya bhikkhuniyā.
சீவரங் நாம ச²ன்னங் சீவரானங் அஞ்ஞதரங் சீவரங்.
Cīvaraṃ nāma channaṃ cīvarānaṃ aññataraṃ cīvaraṃ.
விஸிப்³பெ³த்வாதி ஸயங் விஸிப்³பெ³த்வா. விஸிப்³பா³பெத்வாதி அஞ்ஞங் விஸிப்³பா³பெத்வா.
Visibbetvāti sayaṃ visibbetvā. Visibbāpetvāti aññaṃ visibbāpetvā.
ஸா பச்சா² அனந்தராயிகினீதி அஸதி அந்தராயே.
Sā pacchā anantarāyikinīti asati antarāye.
நேவ ஸிப்³பெ³ய்யாதி ந ஸயங் ஸிப்³பெ³ய்ய. ந ஸிப்³பா³பனாய உஸ்ஸுக்கங் கரெய்யாதி ந அஞ்ஞங் ஆணாபெய்ய.
Neva sibbeyyāti na sayaṃ sibbeyya. Na sibbāpanāya ussukkaṃ kareyyāti na aññaṃ āṇāpeyya.
அஞ்ஞத்ர சதூஹபஞ்சாஹாதி ட²பெத்வா சதூஹபஞ்சாஹங். ‘‘நேவ ஸிப்³பி³ஸ்ஸாமி ந ஸிப்³பா³பனாய உஸ்ஸுக்கங் கரிஸ்ஸாமீ’’தி து⁴ரங் நிக்கி²த்தமத்தே ஆபத்தி பாசித்தியஸ்ஸ.
Aññatracatūhapañcāhāti ṭhapetvā catūhapañcāhaṃ. ‘‘Neva sibbissāmi na sibbāpanāya ussukkaṃ karissāmī’’ti dhuraṃ nikkhittamatte āpatti pācittiyassa.
895. உபஸம்பன்னாய உபஸம்பன்னஸஞ்ஞா சீவரங் விஸிப்³பெ³த்வா வா விஸிப்³பா³பெத்வா வா ஸா பச்சா² அனந்தராயிகினீ நேவ ஸிப்³ப³தி ந ஸிப்³பா³பனாய உஸ்ஸுக்கங் கரோதி, அஞ்ஞத்ர சதூஹபஞ்சாஹா, ஆபத்தி பாசித்தியஸ்ஸ. உபஸம்பன்னாய வேமதிகா சீவரங் விஸிப்³பெ³த்வா வா விஸிப்³பா³பெத்வா வா ஸா பச்சா² அனந்தராயிகினீ நேவ ஸிப்³ப³தி ந ஸிப்³பா³பனாய உஸ்ஸுக்கங் கரோதி, அஞ்ஞத்ர சதூஹபஞ்சாஹா, ஆபத்தி பாசித்தியஸ்ஸ. உபஸம்பன்னாய அனுபஸம்பன்னஸஞ்ஞா சீவரங் விஸிப்³பெ³த்வா வா விஸிப்³பா³பெத்வா வா ஸா பச்சா² அனந்தராயிகினீ நேவ ஸிப்³ப³தி ந ஸிப்³பா³பனாய உஸ்ஸுக்கங் கரோதி, அஞ்ஞத்ர சதூஹபஞ்சாஹா, ஆபத்தி பாசித்தியஸ்ஸ.
895. Upasampannāya upasampannasaññā cīvaraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti pācittiyassa. Upasampannāya vematikā cīvaraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti pācittiyassa. Upasampannāya anupasampannasaññā cīvaraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti pācittiyassa.
அஞ்ஞங் பரிக்கா²ரங் விஸிப்³பெ³த்வா வா விஸிப்³பா³பெத்வா வா ஸா பச்சா² அனந்தராயிகினீ நேவ ஸிப்³ப³தி ந ஸிப்³பா³பனாய உஸ்ஸுக்கங் கரோதி, அஞ்ஞத்ர சதூஹபஞ்சாஹா, ஆபத்தி து³க்கடஸ்ஸ . அனுபஸம்பன்னாய சீவரங் வா அஞ்ஞங் வா பரிக்கா²ரங் விஸிப்³பெ³த்வா வா விஸிப்³பா³பெத்வா வா ஸா பச்சா² அனந்தராயிகினீ நேவ ஸிப்³ப³தி ந ஸிப்³பா³பனாய உஸ்ஸுக்கங் கரோதி, அஞ்ஞத்ர சதூஹபஞ்சாஹா, ஆபத்தி து³க்கடஸ்ஸ. அனுபஸம்பன்னாய உபஸம்பன்னஸஞ்ஞா, ஆபத்தி து³க்கடஸ்ஸ. அனுபஸம்பன்னாய வேமதிகா, ஆபத்தி து³க்கடஸ்ஸ. அனுபஸம்பன்னாய அனுபஸம்பன்னஸஞ்ஞா, ஆபத்தி து³க்கடஸ்ஸ.
Aññaṃ parikkhāraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti dukkaṭassa . Anupasampannāya cīvaraṃ vā aññaṃ vā parikkhāraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti dukkaṭassa. Anupasampannāya upasampannasaññā, āpatti dukkaṭassa. Anupasampannāya vematikā, āpatti dukkaṭassa. Anupasampannāya anupasampannasaññā, āpatti dukkaṭassa.
896. அனாபத்தி ஸதி அந்தராயே, பரியேஸித்வா ந லப⁴தி, கரொந்தீ சதூஹபஞ்சாஹங் அதிக்காமேதி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.
896. Anāpatti sati antarāye, pariyesitvā na labhati, karontī catūhapañcāhaṃ atikkāmeti, gilānāya, āpadāsu, ummattikāya, ādikammikāyāti.
ததியஸிக்கா²பத³ங் நிட்டி²தங்.
Tatiyasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 3. ததியஸிக்கா²பத³வண்ணனா • 3. Tatiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. நக்³க³வக்³க³வண்ணனா • 3. Naggavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. ததியஸிக்கா²பத³வண்ணனா • 3. Tatiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மாதி³ஸிக்கா²பத³வண்ணனா • 1. Paṭhamādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. ததியஸிக்கா²பத³ங் • 3. Tatiyasikkhāpadaṃ
