| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
3. ததியஸிக்கா²பத³ங்
3. Tatiyasikkhāpadaṃ
941. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ப³ஹுஸ்ஸுதா ஹோதி பா⁴ணிகா விஸாரதா³ பட்டா த⁴ம்மிங் கத²ங் காதுங். ப⁴த்³தா³பி காபிலானீ ப³ஹுஸ்ஸுதா ஹோதி பா⁴ணிகா விஸாரதா³ பட்டா த⁴ம்மிங் கத²ங் காதுங் உளாரஸம்பா⁴விதா. மனுஸ்ஸா – ‘‘அய்யா ப⁴த்³தா³ காபிலானீ ப³ஹுஸ்ஸுதா பா⁴ணிகா விஸாரதா³ பட்டா த⁴ம்மிங் கத²ங் காதுங் உளாரஸம்பா⁴விதா’’தி ப⁴த்³த³ங் காபிலானிங் பட²மங் பயிருபாஸித்வா, பச்சா² து²ல்லனந்த³ங் பி⁴க்கு²னிங் பயிருபாஸந்தி. து²ல்லனந்தா³ பி⁴க்கு²னீ இஸ்ஸாபகதா – ‘‘இமா கிர அப்பிச்சா² ஸந்துட்டா² பவிவித்தா அஸங்ஸட்டா² யா இமா ஸஞ்ஞத்திப³ஹுலா விஞ்ஞத்திப³ஹுலா விஹரந்தீ’’தி ப⁴த்³தா³ய காபிலானியா புரதோ சங்கமதிபி திட்ட²திபி நிஸீத³திபி ஸெய்யம்பி கப்பேதி உத்³தி³ஸதிபி உத்³தி³ஸாபேதிபி ஸஜ்ஜா²யம்பி கரோதி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ அய்யாய ப⁴த்³தா³ய காபிலானியா ஸஞ்சிச்ச அபா²ஸுங் கரிஸ்ஸதீ’’தி…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ ப⁴த்³தா³ய காபிலானியா ஸஞ்சிச்ச அபா²ஸுங் கரோதீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ப⁴த்³தா³ய காபிலானியா ஸஞ்சிச்ச அபா²ஸுங் கரிஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
941. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī bahussutā hoti bhāṇikā visāradā paṭṭā dhammiṃ kathaṃ kātuṃ. Bhaddāpi kāpilānī bahussutā hoti bhāṇikā visāradā paṭṭā dhammiṃ kathaṃ kātuṃ uḷārasambhāvitā. Manussā – ‘‘ayyā bhaddā kāpilānī bahussutā bhāṇikā visāradā paṭṭā dhammiṃ kathaṃ kātuṃ uḷārasambhāvitā’’ti bhaddaṃ kāpilāniṃ paṭhamaṃ payirupāsitvā, pacchā thullanandaṃ bhikkhuniṃ payirupāsanti. Thullanandā bhikkhunī issāpakatā – ‘‘imā kira appicchā santuṭṭhā pavivittā asaṃsaṭṭhā yā imā saññattibahulā viññattibahulā viharantī’’ti bhaddāya kāpilāniyā purato caṅkamatipi tiṭṭhatipi nisīdatipi seyyampi kappeti uddisatipi uddisāpetipi sajjhāyampi karoti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā ayyāya bhaddāya kāpilāniyā sañcicca aphāsuṃ karissatī’’ti…pe… saccaṃ kira, bhikkhave, thullanandā bhikkhunī bhaddāya kāpilāniyā sañcicca aphāsuṃ karotīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī bhaddāya kāpilāniyā sañcicca aphāsuṃ karissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
942. ‘‘யா பன பி⁴க்கு²னீ பி⁴க்கு²னியா ஸஞ்சிச்ச அபா²ஸுங் கரெய்ய, பாசித்திய’’ந்தி.
942.‘‘Yā pana bhikkhunī bhikkhuniyā sañcicca aphāsuṃ kareyya, pācittiya’’nti.
943. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
943.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
பி⁴க்கு²னியாதி அஞ்ஞாய பி⁴க்கு²னியா.
Bhikkhuniyāti aññāya bhikkhuniyā.
ஸஞ்சிச்சாதி ஜானந்தீ ஸஞ்ஜானந்தீ சேச்ச அபி⁴விதரித்வா வீதிக்கமோ.
Sañciccāti jānantī sañjānantī cecca abhivitaritvā vītikkamo.
அபா²ஸுங் கரெய்யாதி – ‘‘இமினா இமிஸ்ஸா அபா²ஸு ப⁴விஸ்ஸதீ’’தி அனாபுச்சா² புரதோ சங்கமதி வா திட்ட²தி வா நிஸீத³தி வா ஸெய்யங் வா கப்பேதி உத்³தி³ஸதி வா உத்³தி³ஸாபேதி வா ஸஜ்ஜா²யங் வா கரோதி, ஆபத்தி பாசித்தியஸ்ஸ.
Aphāsuṃ kareyyāti – ‘‘iminā imissā aphāsu bhavissatī’’ti anāpucchā purato caṅkamati vā tiṭṭhati vā nisīdati vā seyyaṃ vā kappeti uddisati vā uddisāpeti vā sajjhāyaṃ vā karoti, āpatti pācittiyassa.
944. உபஸம்பன்னாய உபஸம்பன்னஸஞ்ஞா ஸஞ்சிச்ச அபா²ஸுங் கரோதி, ஆபத்தி பாசித்தியஸ்ஸ. உபஸம்பன்னாய வேமதிகா ஸஞ்சிச்ச அபா²ஸுங் கரோதி, ஆபத்தி பாசித்தியஸ்ஸ. உபஸம்பன்னாய அனுபஸம்பன்னஸஞ்ஞா ஸஞ்சிச்ச அபா²ஸுங் கரோதி, ஆபத்தி பாசித்தியஸ்ஸ.
944. Upasampannāya upasampannasaññā sañcicca aphāsuṃ karoti, āpatti pācittiyassa. Upasampannāya vematikā sañcicca aphāsuṃ karoti, āpatti pācittiyassa. Upasampannāya anupasampannasaññā sañcicca aphāsuṃ karoti, āpatti pācittiyassa.
அனுபஸம்பன்னாய ஸஞ்சிச்ச அபா²ஸுங் கரோதி, ஆபத்தி து³க்கடஸ்ஸ. அனுபஸம்பன்னாய உபஸம்பன்னஸஞ்ஞா, ஆபத்தி து³க்கடஸ்ஸ. அனுபஸம்பன்னாய வேமதிகா, ஆபத்தி து³க்கடஸ்ஸ. அனுபஸம்பன்னாய அனுபஸம்பன்னஸஞ்ஞா, ஆபத்தி து³க்கடஸ்ஸ.
Anupasampannāya sañcicca aphāsuṃ karoti, āpatti dukkaṭassa. Anupasampannāya upasampannasaññā, āpatti dukkaṭassa. Anupasampannāya vematikā, āpatti dukkaṭassa. Anupasampannāya anupasampannasaññā, āpatti dukkaṭassa.
945. அனாபத்தி ந அபா²ஸுங் கத்துகாமா ஆபுச்சா² புரதோ சங்கமதி வா திட்ட²தி வா நிஸீத³தி வா ஸெய்யங் வா கப்பேதி உத்³தி³ஸதி வா உத்³தி³ஸாபேதி வா ஸஜ்ஜா²யங் வா கரோதி, உம்மத்திகாய, ஆதி³கம்மிகாயாதி.
945. Anāpatti na aphāsuṃ kattukāmā āpucchā purato caṅkamati vā tiṭṭhati vā nisīdati vā seyyaṃ vā kappeti uddisati vā uddisāpeti vā sajjhāyaṃ vā karoti, ummattikāya, ādikammikāyāti.
ததியஸிக்கா²பத³ங் நிட்டி²தங்.
Tatiyasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 3. ததியஸிக்கா²பத³வண்ணனா • 3. Tatiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. ததியஸிக்கா²பத³வண்ணனா • 3. Tatiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. ததியஸிக்கா²பத³ங் • 3. Tatiyasikkhāpadaṃ
