| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
৩. ততিযসিক্খাপদং
3. Tatiyasikkhāpadaṃ
৭৪৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনী অঞ্ঞতরায ভিক্খুনিযা সদ্ধিং চীৰরং পরিৰত্তেত্ৰা পরিভুঞ্জি। অথ খো সা ভিক্খুনী তং চীৰরং সঙ্ঘরিত্ৰা 1 নিক্খিপি। থুল্লনন্দা ভিক্খুনী তং ভিক্খুনিং এতদৰোচ – ‘‘যং তে, অয্যে, মযা সদ্ধিং চীৰরং পরিৰত্তিতং, কহং তং চীৰর’’ন্তি? অথ খো সা ভিক্খুনী তং চীৰরং নীহরিত্ৰা থুল্লনন্দায ভিক্খুনিযা দস্সেসি। থুল্লনন্দা ভিক্খুনী তং ভিক্খুনিং এতদৰোচ – ‘‘হন্দায্যে, তুয্হং চীৰরং, আহর মে’তং চীৰরং, যং তুয্হং তুয্হমেৰেতং, যং ময্হং ময্হমেৰেতং, আহর মে’তং, সকং পচ্চাহরা’’তি অচ্ছিন্দি। অথ খো সা ভিক্খুনী ভিক্খুনীনং এতমত্থং আরোচেসি। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা ভিক্খুনিযা সদ্ধিং চীৰরং পরিৰত্তেত্ৰা অচ্ছিন্দিস্সতী’’তি! অথ খো তা ভিক্খুনিযো ভিক্খূনং এতমত্থং আরোচেসুং। ভিক্খূ ভগৰতো এতমত্থং আরাচেসুং…পে॰… সচ্চং কির, ভিক্খৰে, থুল্লনন্দা ভিক্খুনী ভিক্খুনিযা সদ্ধিং চীৰরং পরিৰত্তেত্ৰা অচ্ছিন্দতীতি 2? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী ভিক্খুনিযা সদ্ধিং চীৰরং পরিৰত্তেত্ৰা অচ্ছিন্দিস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
743. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī aññatarāya bhikkhuniyā saddhiṃ cīvaraṃ parivattetvā paribhuñji. Atha kho sā bhikkhunī taṃ cīvaraṃ saṅgharitvā 3 nikkhipi. Thullanandā bhikkhunī taṃ bhikkhuniṃ etadavoca – ‘‘yaṃ te, ayye, mayā saddhiṃ cīvaraṃ parivattitaṃ, kahaṃ taṃ cīvara’’nti? Atha kho sā bhikkhunī taṃ cīvaraṃ nīharitvā thullanandāya bhikkhuniyā dassesi. Thullanandā bhikkhunī taṃ bhikkhuniṃ etadavoca – ‘‘handāyye, tuyhaṃ cīvaraṃ, āhara me’taṃ cīvaraṃ, yaṃ tuyhaṃ tuyhamevetaṃ, yaṃ mayhaṃ mayhamevetaṃ, āhara me’taṃ, sakaṃ paccāharā’’ti acchindi. Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā bhikkhuniyā saddhiṃ cīvaraṃ parivattetvā acchindissatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārācesuṃ…pe… saccaṃ kira, bhikkhave, thullanandā bhikkhunī bhikkhuniyā saddhiṃ cīvaraṃ parivattetvā acchindatīti 4? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī bhikkhuniyā saddhiṃ cīvaraṃ parivattetvā acchindissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
৭৪৪. ‘‘যা পন ভিক্খুনী ভিক্খুনিযা সদ্ধিং চীৰরং পরিৰত্তেত্ৰা সা পচ্ছা এৰং ৰদেয্য – ‘হন্দায্যে, তুয্হং চীৰরং আহর, মেতং চীৰরং, যং তুয্হং তুয্হমেৰেতং, যং ময্হং ময্হমেৰেতং, আহর মেতং, সকং পচ্চাহরা’তি অচ্ছিন্দেয্য ৰা অচ্ছিন্দাপেয্য ৰা, নিস্সগ্গিযং পাচিত্তিয’’ন্তি।
744.‘‘Yāpana bhikkhunī bhikkhuniyā saddhiṃ cīvaraṃ parivattetvā sā pacchā evaṃ vadeyya – ‘handāyye, tuyhaṃ cīvaraṃ āhara, metaṃ cīvaraṃ, yaṃ tuyhaṃ tuyhamevetaṃ, yaṃ mayhaṃ mayhamevetaṃ, āhara metaṃ, sakaṃ paccāharā’ti acchindeyya vā acchindāpeyya vā, nissaggiyaṃ pācittiya’’nti.
৭৪৫. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি।
745.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ভিক্খুনিযা সদ্ধিন্তি অঞ্ঞায ভিক্খুনিযা সদ্ধিং।
Bhikkhuniyā saddhinti aññāya bhikkhuniyā saddhiṃ.
চীৰরং নাম ছন্নং চীৰরানং অঞ্ঞতরং চীৰরং ৰিকপ্পনুপগং পচ্ছিমং।
Cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ.
পরিৰত্তেত্ৰাতি পরিত্তেন ৰা ৰিপুলং, ৰিপুলেন ৰা পরিত্তং।
Parivattetvāti parittena vā vipulaṃ, vipulena vā parittaṃ.
অচ্ছিন্দেয্যাতি সযং অচ্ছিন্দতি নিস্সগ্গিযং পাচিত্তিযং।
Acchindeyyāti sayaṃ acchindati nissaggiyaṃ pācittiyaṃ.
অচ্ছিন্দাপেয্যাতি অঞ্ঞং আণাপেতি, আপত্তি দুক্কটস্স। সকিং আণত্তা বহুকম্পি অচ্ছিন্দতি, নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ‘‘ইদং মে অয্যে চীৰরং ভিক্খুনিযা সদ্ধিং পরিৰত্তেত্ৰা অচ্ছিন্নং নিস্সগ্গিযং, ইমাহং সঙ্ঘস্স নিস্সজ্জামী’’তি…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি।
Acchindāpeyyāti aññaṃ āṇāpeti, āpatti dukkaṭassa. Sakiṃ āṇattā bahukampi acchindati, nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbaṃ…pe… ‘‘idaṃ me ayye cīvaraṃ bhikkhuniyā saddhiṃ parivattetvā acchinnaṃ nissaggiyaṃ, imāhaṃ saṅghassa nissajjāmī’’ti…pe… dadeyyāti…pe… dadeyyunti…pe… ayyāya dammīti.
৭৪৬. উপসম্পন্নায উপসম্পন্নসঞ্ঞা চীৰরং পরিৰত্তেত্ৰা অচ্ছিন্দতি ৰা অচ্ছিন্দাপেতি ৰা, নিস্সগ্গিযং পাচিত্তিযং। উপসম্পন্নায ৰেমতিকা চীৰরং পরিৰত্তেত্ৰা অচ্ছিন্দতি ৰা অচ্ছিন্দাপেতি ৰা, নিস্সগ্গিযং পাচিত্তিযং। উপসম্পন্নায অনুপসম্পন্নসঞ্ঞা চীৰরং পরিৰত্তেত্ৰা অচ্ছিন্দতি ৰা অচ্ছিন্দাপেতি ৰা, নিস্সগ্গিযং পাচিত্তিযং।
746. Upasampannāya upasampannasaññā cīvaraṃ parivattetvā acchindati vā acchindāpeti vā, nissaggiyaṃ pācittiyaṃ. Upasampannāya vematikā cīvaraṃ parivattetvā acchindati vā acchindāpeti vā, nissaggiyaṃ pācittiyaṃ. Upasampannāya anupasampannasaññā cīvaraṃ parivattetvā acchindati vā acchindāpeti vā, nissaggiyaṃ pācittiyaṃ.
অঞ্ঞং পরিক্খারং পরিৰত্তেত্ৰা অচ্ছিন্দতি ৰা অচ্ছিন্দাপেতি ৰা, আপত্তি দুক্কটস্স। অনুপসম্পন্নায সদ্ধিং চীৰরং ৰা অঞ্ঞং ৰা পরিক্খারং পরিৰত্তেত্ৰা অচ্ছিন্দতি ৰা অচ্ছিন্দাপেতি ৰা, আপত্তি দুক্কটস্স। অনুপসম্পন্নায উপসম্পন্নসঞ্ঞা, আপত্তি দুক্কটস্স। অনুপসম্পন্নায ৰেমতিকা, আপত্তি দুক্কটস্স। অনুপসম্পন্নায অনুপসম্পন্নসঞ্ঞা, আপত্তি দুক্কটস্স।
Aññaṃ parikkhāraṃ parivattetvā acchindati vā acchindāpeti vā, āpatti dukkaṭassa. Anupasampannāya saddhiṃ cīvaraṃ vā aññaṃ vā parikkhāraṃ parivattetvā acchindati vā acchindāpeti vā, āpatti dukkaṭassa. Anupasampannāya upasampannasaññā, āpatti dukkaṭassa. Anupasampannāya vematikā, āpatti dukkaṭassa. Anupasampannāya anupasampannasaññā, āpatti dukkaṭassa.
৭৪৭. অনাপত্তি সা ৰা দেতি, তস্সা ৰা ৰিস্সসন্তী গণ্হাতি, উম্মত্তিকায, আদিকম্মিকাযাতি।
747. Anāpatti sā vā deti, tassā vā vissasantī gaṇhāti, ummattikāya, ādikammikāyāti.
ততিযসিক্খাপদং নিট্ঠিতং।
Tatiyasikkhāpadaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / ততিযনিস্সগ্গিযপাচিত্তিযসিক্খাপদৰণ্ণনা • Tatiyanissaggiyapācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৩. নিস্সগ্গিযকণ্ডং (ভিক্খুনীৰিভঙ্গৰণ্ণনা) • 3. Nissaggiyakaṇḍaṃ (bhikkhunīvibhaṅgavaṇṇanā)
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৩. ততিযনিস্সগ্গিযপাচিত্তিযসিক্খাপদৰণ্ণনা • 3. Tatiyanissaggiyapācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. দুতিযনিস্সগ্গিযাদিপাচিত্তিযসিক্খাপদৰণ্ণনা • 2. Dutiyanissaggiyādipācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৩. ততিযনিস্সগ্গিযপাচিত্তিযসিক্খাপদং • 3. Tatiyanissaggiyapācittiyasikkhāpadaṃ
