| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
3. තතියසික්‌ඛාපදං
3. Tatiyasikkhāpadaṃ
743. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ථුල්‌ලනන්‌දා භික්‌ඛුනී අඤ්‌ඤතරාය භික්‌ඛුනියා සද්‌ධිං චීවරං පරිවත්‌තෙත්‌වා පරිභුඤ්‌ජි. අථ ඛො සා භික්‌ඛුනී තං චීවරං සඞ්‌ඝරිත්‌වා 1 නික්‌ඛිපි. ථුල්‌ලනන්‌දා භික්‌ඛුනී තං භික්‌ඛුනිං එතදවොච – ‘‘යං තෙ, අය්‍යෙ, මයා සද්‌ධිං චීවරං පරිවත්‌තිතං, කහං තං චීවර’’න්‌ති? අථ ඛො සා භික්‌ඛුනී තං චීවරං නීහරිත්‌වා ථුල්‌ලනන්‌දාය භික්‌ඛුනියා දස්‌සෙසි. ථුල්‌ලනන්‌දා භික්‌ඛුනී තං භික්‌ඛුනිං එතදවොච – ‘‘හන්‌දාය්‍යෙ, තුය්‌හං චීවරං, ආහර මෙ’තං චීවරං, යං තුය්‌හං තුය්‌හමෙවෙතං, යං මය්‌හං මය්‌හමෙවෙතං, ආහර මෙ’තං, සකං පච්‌චාහරා’’ති අච්‌ඡින්‌දි. අථ ඛො සා භික්‌ඛුනී භික්‌ඛුනීනං එතමත්‌ථං ආරොචෙසි. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා භික්‌ඛුනියා සද්‌ධිං චීවරං පරිවත්‌තෙත්‌වා අච්‌ඡින්‌දිස්‌සතී’’ති! අථ ඛො තා භික්‌ඛුනියො භික්‌ඛූනං එතමත්‌ථං ආරොචෙසුං. භික්‌ඛූ භගවතො එතමත්‌ථං ආරාචෙසුං…පෙ.… සච්‌චං කිර, භික්‌ඛවෙ, ථුල්‌ලනන්‌දා භික්‌ඛුනී භික්‌ඛුනියා සද්‌ධිං චීවරං පරිවත්‌තෙත්‌වා අච්‌ඡින්‌දතීති 2? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ථුල්‌ලනන්‌දා භික්‌ඛුනී භික්‌ඛුනියා සද්‌ධිං චීවරං පරිවත්‌තෙත්‌වා අච්‌ඡින්‌දිස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
743. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī aññatarāya bhikkhuniyā saddhiṃ cīvaraṃ parivattetvā paribhuñji. Atha kho sā bhikkhunī taṃ cīvaraṃ saṅgharitvā 3 nikkhipi. Thullanandā bhikkhunī taṃ bhikkhuniṃ etadavoca – ‘‘yaṃ te, ayye, mayā saddhiṃ cīvaraṃ parivattitaṃ, kahaṃ taṃ cīvara’’nti? Atha kho sā bhikkhunī taṃ cīvaraṃ nīharitvā thullanandāya bhikkhuniyā dassesi. Thullanandā bhikkhunī taṃ bhikkhuniṃ etadavoca – ‘‘handāyye, tuyhaṃ cīvaraṃ, āhara me’taṃ cīvaraṃ, yaṃ tuyhaṃ tuyhamevetaṃ, yaṃ mayhaṃ mayhamevetaṃ, āhara me’taṃ, sakaṃ paccāharā’’ti acchindi. Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā bhikkhuniyā saddhiṃ cīvaraṃ parivattetvā acchindissatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārācesuṃ…pe… saccaṃ kira, bhikkhave, thullanandā bhikkhunī bhikkhuniyā saddhiṃ cīvaraṃ parivattetvā acchindatīti 4? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī bhikkhuniyā saddhiṃ cīvaraṃ parivattetvā acchindissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
744. ‘‘යා පන භික්‌ඛුනී භික්‌ඛුනියා සද්‌ධිං චීවරං පරිවත්‌තෙත්‌වා සා පච්‌ඡා එවං වදෙය්‍ය – ‘හන්‌දාය්‍යෙ, තුය්‌හං චීවරං ආහර, මෙතං චීවරං, යං තුය්‌හං තුය්‌හමෙවෙතං, යං මය්‌හං මය්‌හමෙවෙතං, ආහර මෙතං, සකං පච්‌චාහරා’ති අච්‌ඡින්‌දෙය්‍ය වා අච්‌ඡින්‌දාපෙය්‍ය වා, නිස්‌සග්‌ගියං පාචිත්‌තිය’’න්‌ති.
744.‘‘Yāpana bhikkhunī bhikkhuniyā saddhiṃ cīvaraṃ parivattetvā sā pacchā evaṃ vadeyya – ‘handāyye, tuyhaṃ cīvaraṃ āhara, metaṃ cīvaraṃ, yaṃ tuyhaṃ tuyhamevetaṃ, yaṃ mayhaṃ mayhamevetaṃ, āhara metaṃ, sakaṃ paccāharā’ti acchindeyya vā acchindāpeyya vā, nissaggiyaṃ pācittiya’’nti.
745. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
745.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
භික්‌ඛුනියා සද්‌ධින්‌ති අඤ්‌ඤාය භික්‌ඛුනියා සද්‌ධිං.
Bhikkhuniyā saddhinti aññāya bhikkhuniyā saddhiṃ.
චීවරං නාම ඡන්‌නං චීවරානං අඤ්‌ඤතරං චීවරං විකප්‌පනුපගං පච්‌ඡිමං.
Cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ.
පරිවත්‌තෙත්‌වාති පරිත්‌තෙන වා විපුලං, විපුලෙන වා පරිත්‌තං.
Parivattetvāti parittena vā vipulaṃ, vipulena vā parittaṃ.
අච්‌ඡින්‌දෙය්‍යාති සයං අච්‌ඡින්‌දති නිස්‌සග්‌ගියං පාචිත්‌තියං.
Acchindeyyāti sayaṃ acchindati nissaggiyaṃ pācittiyaṃ.
අච්‌ඡින්‌දාපෙය්‍යාති අඤ්‌ඤං ආණාපෙති, ආපත්‌ති දුක්‌කටස්‌ස. සකිං ආණත්‌තා බහුකම්‌පි අච්‌ඡින්‌දති, නිස්‌සග්‌ගියං හොති. නිස්‌සජ්‌ජිතබ්‌බං සඞ්‌ඝස්‌ස වා ගණස්‌ස වා එකභික්‌ඛුනියා වා. එවඤ්‌ච පන, භික්‌ඛවෙ, නිස්‌සජ්‌ජිතබ්‌බං…පෙ.… ‘‘ඉදං මෙ අය්‍යෙ චීවරං භික්‌ඛුනියා සද්‌ධිං පරිවත්‌තෙත්‌වා අච්‌ඡින්‌නං නිස්‌සග්‌ගියං, ඉමාහං සඞ්‌ඝස්‌ස නිස්‌සජ්‌ජාමී’’ති…පෙ.… දදෙය්‍යාති…පෙ.… දදෙය්‍යුන්‌ති…පෙ.… අය්‍යාය දම්‌මීති.
Acchindāpeyyāti aññaṃ āṇāpeti, āpatti dukkaṭassa. Sakiṃ āṇattā bahukampi acchindati, nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbaṃ…pe… ‘‘idaṃ me ayye cīvaraṃ bhikkhuniyā saddhiṃ parivattetvā acchinnaṃ nissaggiyaṃ, imāhaṃ saṅghassa nissajjāmī’’ti…pe… dadeyyāti…pe… dadeyyunti…pe… ayyāya dammīti.
746. උපසම්‌පන්‌නාය උපසම්‌පන්‌නසඤ්‌ඤා චීවරං පරිවත්‌තෙත්‌වා අච්‌ඡින්‌දති වා අච්‌ඡින්‌දාපෙති වා, නිස්‌සග්‌ගියං පාචිත්‌තියං. උපසම්‌පන්‌නාය වෙමතිකා චීවරං පරිවත්‌තෙත්‌වා අච්‌ඡින්‌දති වා අච්‌ඡින්‌දාපෙති වා, නිස්‌සග්‌ගියං පාචිත්‌තියං. උපසම්‌පන්‌නාය අනුපසම්‌පන්‌නසඤ්‌ඤා චීවරං පරිවත්‌තෙත්‌වා අච්‌ඡින්‌දති වා අච්‌ඡින්‌දාපෙති වා, නිස්‌සග්‌ගියං පාචිත්‌තියං.
746. Upasampannāya upasampannasaññā cīvaraṃ parivattetvā acchindati vā acchindāpeti vā, nissaggiyaṃ pācittiyaṃ. Upasampannāya vematikā cīvaraṃ parivattetvā acchindati vā acchindāpeti vā, nissaggiyaṃ pācittiyaṃ. Upasampannāya anupasampannasaññā cīvaraṃ parivattetvā acchindati vā acchindāpeti vā, nissaggiyaṃ pācittiyaṃ.
අඤ්‌ඤං පරික්‌ඛාරං පරිවත්‌තෙත්‌වා අච්‌ඡින්‌දති වා අච්‌ඡින්‌දාපෙති වා, ආපත්‌ති දුක්‌කටස්‌ස. අනුපසම්‌පන්‌නාය සද්‌ධිං චීවරං වා අඤ්‌ඤං වා පරික්‌ඛාරං පරිවත්‌තෙත්‌වා අච්‌ඡින්‌දති වා අච්‌ඡින්‌දාපෙති වා, ආපත්‌ති දුක්‌කටස්‌ස. අනුපසම්‌පන්‌නාය උපසම්‌පන්‌නසඤ්‌ඤා, ආපත්‌ති දුක්‌කටස්‌ස. අනුපසම්‌පන්‌නාය වෙමතිකා, ආපත්‌ති දුක්‌කටස්‌ස. අනුපසම්‌පන්‌නාය අනුපසම්‌පන්‌නසඤ්‌ඤා, ආපත්‌ති දුක්‌කටස්‌ස.
Aññaṃ parikkhāraṃ parivattetvā acchindati vā acchindāpeti vā, āpatti dukkaṭassa. Anupasampannāya saddhiṃ cīvaraṃ vā aññaṃ vā parikkhāraṃ parivattetvā acchindati vā acchindāpeti vā, āpatti dukkaṭassa. Anupasampannāya upasampannasaññā, āpatti dukkaṭassa. Anupasampannāya vematikā, āpatti dukkaṭassa. Anupasampannāya anupasampannasaññā, āpatti dukkaṭassa.
747. අනාපත්‌ති සා වා දෙති, තස්‌සා වා විස්‌සසන්‌තී ගණ්‌හාති, උම්‌මත්‌තිකාය, ආදිකම්‌මිකායාති.
747. Anāpatti sā vā deti, tassā vā vissasantī gaṇhāti, ummattikāya, ādikammikāyāti.
තතියසික්‌ඛාපදං නිට්‌ඨිතං.
Tatiyasikkhāpadaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / තතියනිස්‌සග්‌ගියපාචිත්‌තියසික්‌ඛාපදවණ්‌ණනා • Tatiyanissaggiyapācittiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 3. නිස්‌සග්‌ගියකණ්‌ඩං (භික්‌ඛුනීවිභඞ්‌ගවණ්‌ණනා) • 3. Nissaggiyakaṇḍaṃ (bhikkhunīvibhaṅgavaṇṇanā)
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 3. තතියනිස්‌සග්‌ගියපාචිත්‌තියසික්‌ඛාපදවණ්‌ණනා • 3. Tatiyanissaggiyapācittiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 2. දුතියනිස්‌සග්‌ගියාදිපාචිත්‌තියසික්‌ඛාපදවණ්‌ණනා • 2. Dutiyanissaggiyādipācittiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 3. තතියනිස්‌සග්‌ගියපාචිත්‌තියසික්‌ඛාපදං • 3. Tatiyanissaggiyapācittiyasikkhāpadaṃ
