| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
3. තතියසික්‌ඛාපදං
3. Tatiyasikkhāpadaṃ
892. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන අඤ්‌ඤතරිස්‌සා භික්‌ඛුනියා මහග්‌ඝෙ චීවරදුස්‌සෙ චීවරං දුක්‌කටං හොති දුස්‌සිබ්‌බිතං. ථුල්‌ලනන්‌දා භික්‌ඛුනී තං භික්‌ඛුනිං එතදවොච – ‘‘සුන්‌දරං ඛො ඉදං තෙ, අය්‍යෙ, චීවරදුස්‌සං; චීවරඤ්‌ච ඛො දුක්‌කටං දුස්‌සිබ්‌බිත’’න්‌ති. ‘‘විසිබ්‌බෙමි, අය්‍යෙ, සිබ්‌බිස්‌සසී’’ති? ‘‘ආමාය්‍යෙ, සිබ්‌බිස්‌සාමී’’ති. අථ ඛො සා භික්‌ඛුනී තං චීවරං විසිබ්‌බෙත්‌වා ථුල්‌ලනන්‌දාය භික්‌ඛුනියා අදාසි. ථුල්‌ලනන්‌දා භික්‌ඛුනී – ‘‘සිබ්‌බිස්‌සාමි සිබ්‌බිස්‌සාමී’’ති නෙව සිබ්‌බති න සිබ්‌බාපනාය උස්‌සුක්‌කං කරොති. අථ ඛො සා භික්‌ඛුනී භික්‌ඛුනීනං එතමත්‌ථං ආරොචෙසි. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා භික්‌ඛුනියා චීවරං විසිබ්‌බාපෙත්‌වා නෙව සිබ්‌බිස්‌සති න සිබ්‌බාපනාය උස්‌සුක්‌කං කරිස්‌සතී’’ති…පෙ.… සච්‌චං කිර, භික්‌ඛවෙ, ථුල්‌ලනන්‌දා භික්‌ඛුනී භික්‌ඛුනියා චීවරං විසිබ්‌බාපෙත්‌වා නෙව සිබ්‌බති න සිබ්‌බාපනාය උස්‌සුක්‌කං කරොතීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ථුල්‌ලනන්‌දා භික්‌ඛුනී භික්‌ඛුනියා චීවරං විසිබ්‌බාපෙත්‌වා නෙව සිබ්‌බිස්‌සති න සිබ්‌බාපනාය උස්‌සුක්‌කං කරිස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
892. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarissā bhikkhuniyā mahagghe cīvaradusse cīvaraṃ dukkaṭaṃ hoti dussibbitaṃ. Thullanandā bhikkhunī taṃ bhikkhuniṃ etadavoca – ‘‘sundaraṃ kho idaṃ te, ayye, cīvaradussaṃ; cīvarañca kho dukkaṭaṃ dussibbita’’nti. ‘‘Visibbemi, ayye, sibbissasī’’ti? ‘‘Āmāyye, sibbissāmī’’ti. Atha kho sā bhikkhunī taṃ cīvaraṃ visibbetvā thullanandāya bhikkhuniyā adāsi. Thullanandā bhikkhunī – ‘‘sibbissāmi sibbissāmī’’ti neva sibbati na sibbāpanāya ussukkaṃ karoti. Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā bhikkhuniyā cīvaraṃ visibbāpetvā neva sibbissati na sibbāpanāya ussukkaṃ karissatī’’ti…pe… saccaṃ kira, bhikkhave, thullanandā bhikkhunī bhikkhuniyā cīvaraṃ visibbāpetvā neva sibbati na sibbāpanāya ussukkaṃ karotīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī bhikkhuniyā cīvaraṃ visibbāpetvā neva sibbissati na sibbāpanāya ussukkaṃ karissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
893. ‘‘යා පන භික්‌ඛුනී භික්‌ඛුනියා චීවරං විසිබ්‌බෙත්‌වා වා විසිබ්‌බාපෙත්‌වා වා සා පච්‌ඡා අනන්‌තරායිකිනී නෙව සිබ්‌බෙය්‍ය න සිබ්‌බාපනාය උස්‌සුක්‌කං කරෙය්‍ය, අඤ්‌ඤත්‍ර චතූහපඤ්‌චාහා, පාචිත්‌තිය’’න්‌ති.
893.‘‘Yā pana bhikkhunī bhikkhuniyā cīvaraṃ visibbetvā vā visibbāpetvā vā sā pacchā anantarāyikinī neva sibbeyya na sibbāpanāya ussukkaṃ kareyya, aññatra catūhapañcāhā, pācittiya’’nti.
894. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
894.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
භික්‌ඛුනියාති අඤ්‌ඤාය භික්‌ඛුනියා.
Bhikkhuniyāti aññāya bhikkhuniyā.
චීවරං නාම ඡන්‌නං චීවරානං අඤ්‌ඤතරං චීවරං.
Cīvaraṃ nāma channaṃ cīvarānaṃ aññataraṃ cīvaraṃ.
විසිබ්‌බෙත්‌වාති සයං විසිබ්‌බෙත්‌වා. විසිබ්‌බාපෙත්‌වාති අඤ්‌ඤං විසිබ්‌බාපෙත්‌වා.
Visibbetvāti sayaṃ visibbetvā. Visibbāpetvāti aññaṃ visibbāpetvā.
සා පච්‌ඡා අනන්‌තරායිකිනීති අසති අන්‌තරායෙ.
Sā pacchā anantarāyikinīti asati antarāye.
නෙව සිබ්‌බෙය්‍යාති න සයං සිබ්‌බෙය්‍ය. න සිබ්‌බාපනාය උස්‌සුක්‌කං කරෙය්‍යාති න අඤ්‌ඤං ආණාපෙය්‍ය.
Neva sibbeyyāti na sayaṃ sibbeyya. Na sibbāpanāya ussukkaṃ kareyyāti na aññaṃ āṇāpeyya.
අඤ්‌ඤත්‍ර චතූහපඤ්‌චාහාති ඨපෙත්‌වා චතූහපඤ්‌චාහං. ‘‘නෙව සිබ්‌බිස්‌සාමි න සිබ්‌බාපනාය උස්‌සුක්‌කං කරිස්‌සාමී’’ති ධුරං නික්‌ඛිත්‌තමත්‌තෙ ආපත්‌ති පාචිත්‌තියස්‌ස.
Aññatracatūhapañcāhāti ṭhapetvā catūhapañcāhaṃ. ‘‘Neva sibbissāmi na sibbāpanāya ussukkaṃ karissāmī’’ti dhuraṃ nikkhittamatte āpatti pācittiyassa.
895. උපසම්‌පන්‌නාය උපසම්‌පන්‌නසඤ්‌ඤා චීවරං විසිබ්‌බෙත්‌වා වා විසිබ්‌බාපෙත්‌වා වා සා පච්‌ඡා අනන්‌තරායිකිනී නෙව සිබ්‌බති න සිබ්‌බාපනාය උස්‌සුක්‌කං කරොති, අඤ්‌ඤත්‍ර චතූහපඤ්‌චාහා, ආපත්‌ති පාචිත්‌තියස්‌ස. උපසම්‌පන්‌නාය වෙමතිකා චීවරං විසිබ්‌බෙත්‌වා වා විසිබ්‌බාපෙත්‌වා වා සා පච්‌ඡා අනන්‌තරායිකිනී නෙව සිබ්‌බති න සිබ්‌බාපනාය උස්‌සුක්‌කං කරොති, අඤ්‌ඤත්‍ර චතූහපඤ්‌චාහා, ආපත්‌ති පාචිත්‌තියස්‌ස. උපසම්‌පන්‌නාය අනුපසම්‌පන්‌නසඤ්‌ඤා චීවරං විසිබ්‌බෙත්‌වා වා විසිබ්‌බාපෙත්‌වා වා සා පච්‌ඡා අනන්‌තරායිකිනී නෙව සිබ්‌බති න සිබ්‌බාපනාය උස්‌සුක්‌කං කරොති, අඤ්‌ඤත්‍ර චතූහපඤ්‌චාහා, ආපත්‌ති පාචිත්‌තියස්‌ස.
895. Upasampannāya upasampannasaññā cīvaraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti pācittiyassa. Upasampannāya vematikā cīvaraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti pācittiyassa. Upasampannāya anupasampannasaññā cīvaraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti pācittiyassa.
අඤ්‌ඤං පරික්‌ඛාරං විසිබ්‌බෙත්‌වා වා විසිබ්‌බාපෙත්‌වා වා සා පච්‌ඡා අනන්‌තරායිකිනී නෙව සිබ්‌බති න සිබ්‌බාපනාය උස්‌සුක්‌කං කරොති, අඤ්‌ඤත්‍ර චතූහපඤ්‌චාහා, ආපත්‌ති දුක්‌කටස්‌ස . අනුපසම්‌පන්‌නාය චීවරං වා අඤ්‌ඤං වා පරික්‌ඛාරං විසිබ්‌බෙත්‌වා වා විසිබ්‌බාපෙත්‌වා වා සා පච්‌ඡා අනන්‌තරායිකිනී නෙව සිබ්‌බති න සිබ්‌බාපනාය උස්‌සුක්‌කං කරොති, අඤ්‌ඤත්‍ර චතූහපඤ්‌චාහා, ආපත්‌ති දුක්‌කටස්‌ස. අනුපසම්‌පන්‌නාය උපසම්‌පන්‌නසඤ්‌ඤා, ආපත්‌ති දුක්‌කටස්‌ස. අනුපසම්‌පන්‌නාය වෙමතිකා, ආපත්‌ති දුක්‌කටස්‌ස. අනුපසම්‌පන්‌නාය අනුපසම්‌පන්‌නසඤ්‌ඤා, ආපත්‌ති දුක්‌කටස්‌ස.
Aññaṃ parikkhāraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti dukkaṭassa . Anupasampannāya cīvaraṃ vā aññaṃ vā parikkhāraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti dukkaṭassa. Anupasampannāya upasampannasaññā, āpatti dukkaṭassa. Anupasampannāya vematikā, āpatti dukkaṭassa. Anupasampannāya anupasampannasaññā, āpatti dukkaṭassa.
896. අනාපත්‌ති සති අන්‌තරායෙ, පරියෙසිත්‌වා න ලභති, කරොන්‌තී චතූහපඤ්‌චාහං අතික්‌කාමෙති, ගිලානාය, ආපදාසු, උම්‌මත්‌තිකාය, ආදිකම්‌මිකායාති.
896. Anāpatti sati antarāye, pariyesitvā na labhati, karontī catūhapañcāhaṃ atikkāmeti, gilānāya, āpadāsu, ummattikāya, ādikammikāyāti.
තතියසික්‌ඛාපදං නිට්‌ඨිතං.
Tatiyasikkhāpadaṃ niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 3. තතියසික්‌ඛාපදවණ්‌ණනා • 3. Tatiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 3. නග්‌ගවග්‌ගවණ්‌ණනා • 3. Naggavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 3. තතියසික්‌ඛාපදවණ්‌ණනා • 3. Tatiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමාදිසික්‌ඛාපදවණ්‌ණනා • 1. Paṭhamādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 3. තතියසික්‌ඛාපදං • 3. Tatiyasikkhāpadaṃ
