| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༣. ཏཏིཡསིཀྑཱཔདཾ
3. Tatiyasikkhāpadaṃ
༨༩༢. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཨཉྙཏརིསྶཱ བྷིཀྑུནིཡཱ མཧགྒྷེ ཙཱིཝརདུསྶེ ཙཱིཝརཾ དུཀྐཊཾ ཧོཏི དུསྶིབྦིཏཾ། ཐུལླནནྡཱ བྷིཀྑུནཱི ཏཾ བྷིཀྑུནིཾ ཨེཏདཝོཙ – ‘‘སུནྡརཾ ཁོ ཨིདཾ ཏེ, ཨཡྻེ, ཙཱིཝརདུསྶཾ; ཙཱིཝརཉྩ ཁོ དུཀྐཊཾ དུསྶིབྦིཏ’’ནྟི། ‘‘ཝིསིབྦེམི, ཨཡྻེ, སིབྦིསྶསཱི’’ཏི? ‘‘ཨཱམཱཡྻེ, སིབྦིསྶཱམཱི’’ཏི། ཨཐ ཁོ སཱ བྷིཀྑུནཱི ཏཾ ཙཱིཝརཾ ཝིསིབྦེཏྭཱ ཐུལླནནྡཱཡ བྷིཀྑུནིཡཱ ཨདཱསི། ཐུལླནནྡཱ བྷིཀྑུནཱི – ‘‘སིབྦིསྶཱམི སིབྦིསྶཱམཱི’’ཏི ནེཝ སིབྦཏི ན སིབྦཱཔནཱཡ ཨུསྶུཀྐཾ ཀརོཏི། ཨཐ ཁོ སཱ བྷིཀྑུནཱི བྷིཀྑུནཱིནཾ ཨེཏམཏྠཾ ཨཱརོཙེསི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻཱ ཐུལླནནྡཱ བྷིཀྑུནིཡཱ ཙཱིཝརཾ ཝིསིབྦཱཔེཏྭཱ ནེཝ སིབྦིསྶཏི ན སིབྦཱཔནཱཡ ཨུསྶུཀྐཾ ཀརིསྶཏཱི’’ཏི…པེ॰… སཙྩཾ ཀིར, བྷིཀྑཝེ, ཐུལླནནྡཱ བྷིཀྑུནཱི བྷིཀྑུནིཡཱ ཙཱིཝརཾ ཝིསིབྦཱཔེཏྭཱ ནེཝ སིབྦཏི ན སིབྦཱཔནཱཡ ཨུསྶུཀྐཾ ཀརོཏཱིཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, ཐུལླནནྡཱ བྷིཀྑུནཱི བྷིཀྑུནིཡཱ ཙཱིཝརཾ ཝིསིབྦཱཔེཏྭཱ ནེཝ སིབྦིསྶཏི ན སིབྦཱཔནཱཡ ཨུསྶུཀྐཾ ཀརིསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
892. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarissā bhikkhuniyā mahagghe cīvaradusse cīvaraṃ dukkaṭaṃ hoti dussibbitaṃ. Thullanandā bhikkhunī taṃ bhikkhuniṃ etadavoca – ‘‘sundaraṃ kho idaṃ te, ayye, cīvaradussaṃ; cīvarañca kho dukkaṭaṃ dussibbita’’nti. ‘‘Visibbemi, ayye, sibbissasī’’ti? ‘‘Āmāyye, sibbissāmī’’ti. Atha kho sā bhikkhunī taṃ cīvaraṃ visibbetvā thullanandāya bhikkhuniyā adāsi. Thullanandā bhikkhunī – ‘‘sibbissāmi sibbissāmī’’ti neva sibbati na sibbāpanāya ussukkaṃ karoti. Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā bhikkhuniyā cīvaraṃ visibbāpetvā neva sibbissati na sibbāpanāya ussukkaṃ karissatī’’ti…pe… saccaṃ kira, bhikkhave, thullanandā bhikkhunī bhikkhuniyā cīvaraṃ visibbāpetvā neva sibbati na sibbāpanāya ussukkaṃ karotīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī bhikkhuniyā cīvaraṃ visibbāpetvā neva sibbissati na sibbāpanāya ussukkaṃ karissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༨༩༣. ‘‘ཡཱ པན བྷིཀྑུནཱི བྷིཀྑུནིཡཱ ཙཱིཝརཾ ཝིསིབྦེཏྭཱ ཝཱ ཝིསིབྦཱཔེཏྭཱ ཝཱ སཱ པཙྪཱ ཨནནྟརཱཡིཀིནཱི ནེཝ སིབྦེཡྻ ན སིབྦཱཔནཱཡ ཨུསྶུཀྐཾ ཀརེཡྻ, ཨཉྙཏྲ ཙཏཱུཧཔཉྩཱཧཱ, པཱཙིཏྟིཡ’’ནྟི།
893.‘‘Yā pana bhikkhunī bhikkhuniyā cīvaraṃ visibbetvā vā visibbāpetvā vā sā pacchā anantarāyikinī neva sibbeyya na sibbāpanāya ussukkaṃ kareyya, aññatra catūhapañcāhā, pācittiya’’nti.
༨༩༤. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
894.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
བྷིཀྑུནིཡཱཏི ཨཉྙཱཡ བྷིཀྑུནིཡཱ།
Bhikkhuniyāti aññāya bhikkhuniyā.
ཙཱིཝརཾ ནཱམ ཚནྣཾ ཙཱིཝརཱནཾ ཨཉྙཏརཾ ཙཱིཝརཾ།
Cīvaraṃ nāma channaṃ cīvarānaṃ aññataraṃ cīvaraṃ.
ཝིསིབྦེཏྭཱཏི སཡཾ ཝིསིབྦེཏྭཱ། ཝིསིབྦཱཔེཏྭཱཏི ཨཉྙཾ ཝིསིབྦཱཔེཏྭཱ།
Visibbetvāti sayaṃ visibbetvā. Visibbāpetvāti aññaṃ visibbāpetvā.
སཱ པཙྪཱ ཨནནྟརཱཡིཀིནཱིཏི ཨསཏི ཨནྟརཱཡེ།
Sā pacchā anantarāyikinīti asati antarāye.
ནེཝ སིབྦེཡྻཱཏི ན སཡཾ སིབྦེཡྻ། ན སིབྦཱཔནཱཡ ཨུསྶུཀྐཾ ཀརེཡྻཱཏི ན ཨཉྙཾ ཨཱཎཱཔེཡྻ།
Neva sibbeyyāti na sayaṃ sibbeyya. Na sibbāpanāya ussukkaṃ kareyyāti na aññaṃ āṇāpeyya.
ཨཉྙཏྲ ཙཏཱུཧཔཉྩཱཧཱཏི ཋཔེཏྭཱ ཙཏཱུཧཔཉྩཱཧཾ། ‘‘ནེཝ སིབྦིསྶཱམི ན སིབྦཱཔནཱཡ ཨུསྶུཀྐཾ ཀརིསྶཱམཱི’’ཏི དྷུརཾ ནིཀྑིཏྟམཏྟེ ཨཱཔཏྟི པཱཙིཏྟིཡསྶ།
Aññatracatūhapañcāhāti ṭhapetvā catūhapañcāhaṃ. ‘‘Neva sibbissāmi na sibbāpanāya ussukkaṃ karissāmī’’ti dhuraṃ nikkhittamatte āpatti pācittiyassa.
༨༩༥. ཨུཔསམྤནྣཱཡ ཨུཔསམྤནྣསཉྙཱ ཙཱིཝརཾ ཝིསིབྦེཏྭཱ ཝཱ ཝིསིབྦཱཔེཏྭཱ ཝཱ སཱ པཙྪཱ ཨནནྟརཱཡིཀིནཱི ནེཝ སིབྦཏི ན སིབྦཱཔནཱཡ ཨུསྶུཀྐཾ ཀརོཏི, ཨཉྙཏྲ ཙཏཱུཧཔཉྩཱཧཱ, ཨཱཔཏྟི པཱཙིཏྟིཡསྶ། ཨུཔསམྤནྣཱཡ ཝེམཏིཀཱ ཙཱིཝརཾ ཝིསིབྦེཏྭཱ ཝཱ ཝིསིབྦཱཔེཏྭཱ ཝཱ སཱ པཙྪཱ ཨནནྟརཱཡིཀིནཱི ནེཝ སིབྦཏི ན སིབྦཱཔནཱཡ ཨུསྶུཀྐཾ ཀརོཏི, ཨཉྙཏྲ ཙཏཱུཧཔཉྩཱཧཱ, ཨཱཔཏྟི པཱཙིཏྟིཡསྶ། ཨུཔསམྤནྣཱཡ ཨནུཔསམྤནྣསཉྙཱ ཙཱིཝརཾ ཝིསིབྦེཏྭཱ ཝཱ ཝིསིབྦཱཔེཏྭཱ ཝཱ སཱ པཙྪཱ ཨནནྟརཱཡིཀིནཱི ནེཝ སིབྦཏི ན སིབྦཱཔནཱཡ ཨུསྶུཀྐཾ ཀརོཏི, ཨཉྙཏྲ ཙཏཱུཧཔཉྩཱཧཱ, ཨཱཔཏྟི པཱཙིཏྟིཡསྶ།
895. Upasampannāya upasampannasaññā cīvaraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti pācittiyassa. Upasampannāya vematikā cīvaraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti pācittiyassa. Upasampannāya anupasampannasaññā cīvaraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti pācittiyassa.
ཨཉྙཾ པརིཀྑཱརཾ ཝིསིབྦེཏྭཱ ཝཱ ཝིསིབྦཱཔེཏྭཱ ཝཱ སཱ པཙྪཱ ཨནནྟརཱཡིཀིནཱི ནེཝ སིབྦཏི ན སིབྦཱཔནཱཡ ཨུསྶུཀྐཾ ཀརོཏི, ཨཉྙཏྲ ཙཏཱུཧཔཉྩཱཧཱ, ཨཱཔཏྟི དུཀྐཊསྶ ། ཨནུཔསམྤནྣཱཡ ཙཱིཝརཾ ཝཱ ཨཉྙཾ ཝཱ པརིཀྑཱརཾ ཝིསིབྦེཏྭཱ ཝཱ ཝིསིབྦཱཔེཏྭཱ ཝཱ སཱ པཙྪཱ ཨནནྟརཱཡིཀིནཱི ནེཝ སིབྦཏི ན སིབྦཱཔནཱཡ ཨུསྶུཀྐཾ ཀརོཏི, ཨཉྙཏྲ ཙཏཱུཧཔཉྩཱཧཱ, ཨཱཔཏྟི དུཀྐཊསྶ། ཨནུཔསམྤནྣཱཡ ཨུཔསམྤནྣསཉྙཱ, ཨཱཔཏྟི དུཀྐཊསྶ། ཨནུཔསམྤནྣཱཡ ཝེམཏིཀཱ, ཨཱཔཏྟི དུཀྐཊསྶ། ཨནུཔསམྤནྣཱཡ ཨནུཔསམྤནྣསཉྙཱ, ཨཱཔཏྟི དུཀྐཊསྶ།
Aññaṃ parikkhāraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti dukkaṭassa . Anupasampannāya cīvaraṃ vā aññaṃ vā parikkhāraṃ visibbetvā vā visibbāpetvā vā sā pacchā anantarāyikinī neva sibbati na sibbāpanāya ussukkaṃ karoti, aññatra catūhapañcāhā, āpatti dukkaṭassa. Anupasampannāya upasampannasaññā, āpatti dukkaṭassa. Anupasampannāya vematikā, āpatti dukkaṭassa. Anupasampannāya anupasampannasaññā, āpatti dukkaṭassa.
༨༩༦. ཨནཱཔཏྟི སཏི ཨནྟརཱཡེ, པརིཡེསིཏྭཱ ན ལབྷཏི, ཀརོནྟཱི ཙཏཱུཧཔཉྩཱཧཾ ཨཏིཀྐཱམེཏི, གིལཱནཱཡ, ཨཱཔདཱསུ, ཨུམྨཏྟིཀཱཡ, ཨཱདིཀམྨིཀཱཡཱཏི།
896. Anāpatti sati antarāye, pariyesitvā na labhati, karontī catūhapañcāhaṃ atikkāmeti, gilānāya, āpadāsu, ummattikāya, ādikammikāyāti.
ཏཏིཡསིཀྑཱཔདཾ ནིཊྛིཏཾ།
Tatiyasikkhāpadaṃ niṭṭhitaṃ.
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༣. ཏཏིཡསིཀྑཱཔདཝཎྞནཱ • 3. Tatiyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༣. ནགྒཝགྒཝཎྞནཱ • 3. Naggavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༣. ཏཏིཡསིཀྑཱཔདཝཎྞནཱ • 3. Tatiyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམཱདིསིཀྑཱཔདཝཎྞནཱ • 1. Paṭhamādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༣. ཏཏིཡསིཀྑཱཔདཾ • 3. Tatiyasikkhāpadaṃ
