| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༣. ཏཏིཡསིཀྑཱཔདཾ
3. Tatiyasikkhāpadaṃ
༡༠༣༣. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཙཎྜཀཱལཱི༹ བྷིཀྑུནཱི བྷཎྜནཀཱརིཀཱ ཧོཏི ཀལཧཀཱརིཀཱ ཝིཝཱདཀཱརིཀཱ བྷསྶཀཱརིཀཱ སངྒྷེ ཨདྷིཀརཎཀཱརིཀཱ། ཐུལླནནྡཱ བྷིཀྑུནཱི ཏསྶཱ ཀམྨེ ཀརཱིཡམཱནེ པཊིཀྐོསཏི། ཏེན ཁོ པན སམཡེན ཐུལླནནྡཱ བྷིཀྑུནཱི གཱམཀཾ ཨགམཱསི ཀེནཙིདེཝ ཀརཎཱིཡེན། ཨཐ ཁོ བྷིཀྑུནིསངྒྷོ – ‘‘ཐུལླནནྡཱ བྷིཀྑུནཱི པཀྐནྟཱ’’ཏི ཙཎྜཀཱལི༹ཾ བྷིཀྑུནིཾ ཨཱཔཏྟིཡཱ ཨདསྶནེ ཨུཀྑིཔི། ཐུལླནནྡཱ བྷིཀྑུནཱི གཱམཀེ ཏཾ ཀརཎཱིཡཾ ཏཱིརེཏྭཱ པུནདེཝ སཱཝཏྠིཾ པཙྩཱགཙྪི། ཙཎྜཀཱལཱི༹ བྷིཀྑུནཱི ཐུལླནནྡཱཡ བྷིཀྑུནིཡཱ ཨཱགཙྪནྟིཡཱ ནེཝ ཨཱསནཾ པཉྙཔེསི ན པཱདོདཀཾ པཱདཔཱིཋཾ པཱདཀཋལིཀཾ ཨུཔནིཀྑིཔི; ན པཙྩུགྒནྟྭཱ པཏྟཙཱིཝརཾ པཊིགྒཧེསི ན པཱནཱིཡེན ཨཱཔུཙྪི། ཐུལླནནྡཱ བྷིཀྑུནཱི ཙཎྜཀཱལི༹ཾ བྷིཀྑུནིཾ ཨེཏདཝོཙ – ‘‘ཀིསྶ ཏྭཾ, ཨཡྻེ, མཡི ཨཱགཙྪནྟིཡཱ ནེཝ ཨཱསནཾ པཉྙཔེསི ན པཱདོདཀཾ པཱདཔཱིཋཾ པཱདཀཋལིཀཾ ཨུཔནིཀྑིཔི; ན པཙྩུགྒནྟྭཱ པཏྟཙཱིཝརཾ པཊིགྒཧེསི ན པཱནཱིཡེན ཨཱཔུཙྪཱི’’ཏི? ‘‘ཨེཝཉྷེཏཾ, ཨཡྻེ, ཧོཏི ཡཐཱ ཏཾ ཨནཱཐཱཡཱ’’ཏི། ‘‘ཀིསྶ པན ཏྭཾ, ཨཡྻེ, ཨནཱཐཱ’’ཏི? ‘‘ཨིམཱ མཾ, ཨཡྻེ, བྷིཀྑུནིཡོ – ‘‘ཨཡཾ ཨནཱཐཱ ཨཔྤཉྙཱཏཱ, ནཏྠི ཨིམིསྶཱ ཀཱཙི པཏིཝཏྟཱ’’ཏི, ཨཱཔཏྟིཡཱ ཨདསྶནེ ཨུཀྑིཔིཾསཱུ’’ཏི། ཐུལླནནྡཱ བྷིཀྑུནཱི – ‘‘བཱལཱ ཨེཏཱ ཨབྱཏྟཱ ཨེཏཱ ནེཏཱ ཛཱནནྟི ཀམྨཾ ཝཱ ཀམྨདོསཾ ཝཱ ཀམྨཝིཔཏྟིཾ ཝཱ ཀམྨསམྤཏྟིཾ ཝཱ’’ཏི, ཙཎྜཱིཀཏཱ གཎཾ པརིབྷཱསི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻཱ ཐུལླནནྡཱ ཙཎྜཱིཀཏཱ གཎཾ པརིབྷཱསིསྶཏཱི’’ཏི…པེ॰… སཙྩཾ ཀིར, བྷིཀྑཝེ, ཐུལླནནྡཱ བྷིཀྑུནཱི ཙཎྜཱིཀཏཱ གཎཾ པརིབྷཱསཏཱིཏི 1? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ …པེ॰…ཀཐཉྷི ནཱམ, བྷིཀྑཝེ, ཐུལླནནྡཱ བྷིཀྑུནཱི ཙཎྜཱིཀཏཱ གཎཾ པརིབྷཱསིསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
1033. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena caṇḍakāḷī bhikkhunī bhaṇḍanakārikā hoti kalahakārikā vivādakārikā bhassakārikā saṅghe adhikaraṇakārikā. Thullanandā bhikkhunī tassā kamme karīyamāne paṭikkosati. Tena kho pana samayena thullanandā bhikkhunī gāmakaṃ agamāsi kenacideva karaṇīyena. Atha kho bhikkhunisaṅgho – ‘‘thullanandā bhikkhunī pakkantā’’ti caṇḍakāḷiṃ bhikkhuniṃ āpattiyā adassane ukkhipi. Thullanandā bhikkhunī gāmake taṃ karaṇīyaṃ tīretvā punadeva sāvatthiṃ paccāgacchi. Caṇḍakāḷī bhikkhunī thullanandāya bhikkhuniyā āgacchantiyā neva āsanaṃ paññapesi na pādodakaṃ pādapīṭhaṃ pādakaṭhalikaṃ upanikkhipi; na paccuggantvā pattacīvaraṃ paṭiggahesi na pānīyena āpucchi. Thullanandā bhikkhunī caṇḍakāḷiṃ bhikkhuniṃ etadavoca – ‘‘kissa tvaṃ, ayye, mayi āgacchantiyā neva āsanaṃ paññapesi na pādodakaṃ pādapīṭhaṃ pādakaṭhalikaṃ upanikkhipi; na paccuggantvā pattacīvaraṃ paṭiggahesi na pānīyena āpucchī’’ti? ‘‘Evañhetaṃ, ayye, hoti yathā taṃ anāthāyā’’ti. ‘‘Kissa pana tvaṃ, ayye, anāthā’’ti? ‘‘Imā maṃ, ayye, bhikkhuniyo – ‘‘ayaṃ anāthā appaññātā, natthi imissā kāci pativattā’’ti, āpattiyā adassane ukkhipiṃsū’’ti. Thullanandā bhikkhunī – ‘‘bālā etā abyattā etā netā jānanti kammaṃ vā kammadosaṃ vā kammavipattiṃ vā kammasampattiṃ vā’’ti, caṇḍīkatā gaṇaṃ paribhāsi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā caṇḍīkatā gaṇaṃ paribhāsissatī’’ti…pe… saccaṃ kira, bhikkhave, thullanandā bhikkhunī caṇḍīkatā gaṇaṃ paribhāsatīti 2? ‘‘Saccaṃ, bhagavā’’ti. Vigarahi buddho bhagavā …pe…kathañhi nāma, bhikkhave, thullanandā bhikkhunī caṇḍīkatā gaṇaṃ paribhāsissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༡༠༣༤. ‘‘ཡཱ པན བྷིཀྑུནཱི ཙཎྜཱིཀཏཱ གཎཾ པརིབྷཱསེཡྻ, པཱཙིཏྟིཡ’’ནྟི།
1034.‘‘Yā pana bhikkhunī caṇḍīkatā gaṇaṃ paribhāseyya, pācittiya’’nti.
༡༠༣༥. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
1035.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ཙཎྜཱིཀཏཱ ནཱམ ཀོདྷནཱ ཝུཙྩཏི།
Caṇḍīkatā nāma kodhanā vuccati.
གཎོ ནཱམ བྷིཀྑུནིསངྒྷོ ཝུཙྩཏི།
Gaṇo nāma bhikkhunisaṅgho vuccati.
པརིབྷཱསེཡྻཱཏི ‘‘བཱལཱ ཨེཏཱ ཨབྱཏྟཱ ཨེཏཱ ནེཏཱ ཛཱནནྟི ཀམྨཾ ཝཱ ཀམྨདོསཾ ཝཱ ཀམྨཝིཔཏྟིཾ ཝཱ ཀམྨསམྤཏྟིཾ ཝཱ’’ཏི པརིབྷཱསཏི, ཨཱཔཏྟི པཱཙིཏྟིཡསྶ། སམྦཧུལཱ བྷིཀྑུནིཡོ ཝཱ ཨེཀཾ བྷིཀྑུནིཾ ཝཱ ཨནུཔསམྤནྣཾ ཝཱ པརིབྷཱསཏི, ཨཱཔཏྟི དུཀྐཊསྶ།
Paribhāseyyāti ‘‘bālā etā abyattā etā netā jānanti kammaṃ vā kammadosaṃ vā kammavipattiṃ vā kammasampattiṃ vā’’ti paribhāsati, āpatti pācittiyassa. Sambahulā bhikkhuniyo vā ekaṃ bhikkhuniṃ vā anupasampannaṃ vā paribhāsati, āpatti dukkaṭassa.
༡༠༣༦. ཨནཱཔཏྟི ཨཏྠཔུརེཀྑཱརཱཡ, དྷམྨཔུརེཀྑཱརཱཡ, ཨནུསཱསནིཔུརེཀྑཱརཱཡ, ཨུམྨཏྟིཀཱཡ, ཨཱདིཀམྨིཀཱཡཱཏི།
1036. Anāpatti atthapurekkhārāya, dhammapurekkhārāya, anusāsanipurekkhārāya, ummattikāya, ādikammikāyāti.
ཏཏིཡསིཀྑཱཔདཾ ནིཊྛིཏཾ།
Tatiyasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༣. ཏཏིཡསིཀྑཱཔདཝཎྞནཱ • 3. Tatiyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༢. དུཏིཡསིཀྑཱཔདཝཎྞནཱ • 2. Dutiyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམཱདིསིཀྑཱཔདཝཎྞནཱ • 1. Paṭhamādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༣-༤. ཏཏིཡ-ཙཏུཏྠསིཀྑཱཔདཾ • 3-4. Tatiya-catutthasikkhāpadaṃ
