| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༣. ཏཏིཡསིཀྑཱཔདཾ
3. Tatiyasikkhāpadaṃ
༡༡༩༠. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཨཉྙཏརཱ བྷིཀྑུནཱི ཨཉྙཏརིསྶཱ ཨིཏྠིཡཱ ཀུལཱུཔིཀཱ ཧོཏི། ཨཐ ཁོ སཱ ཨིཏྠཱི ཏཾ བྷིཀྑུནིཾ ཨེཏདཝོཙ – ‘‘ཧནྡཱཡྻེ, ཨིམཾ སངྒྷཱཎིཾ ཨམུཀཱཡ ནཱམ ཨིཏྠིཡཱ དེཧཱི’’ཏི། ཨཐ ཁོ སཱ བྷིཀྑུནཱི – ‘‘སཙཱཧཾ པཏྟེན ཨཱདཱཡ གཙྪཱམི ཝིསྶརོ མེ བྷཝིསྶཏཱི’’ཏི པཊིམུཉྩིཏྭཱ ཨགམཱསི། ཏསྶཱ རཐིཀཱཡ སུཏྟཀེ ཚིནྣེ ཝིཔྤཀིརིཡིཾསུ། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུནིཡོ སངྒྷཱཎིཾ དྷཱརེསྶནྟི, སེཡྻཐཱཔི གིཧིནིཡོ ཀཱམབྷོགིནིཡོ’’ཏི! ཨསྶོསུཾ ཁོ བྷིཀྑུནིཡོ ཏེསཾ མནུསྶཱནཾ ཨུཛ྄ཛྷཱཡནྟཱནཾ ཁིཡྻནྟཱནཾ ཝིཔཱཙེནྟཱནཾ། ཡཱ ཏཱ བྷིཀྑུནིཡོ ཨཔྤིཙྪཱ…པེ॰ … ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུནཱི སངྒྷཱཎིཾ དྷཱརེསྶཏཱི’’ཏི…པེ॰… སཙྩཾ ཀིར, བྷིཀྑཝེ, བྷིཀྑུནཱི སངྒྷཱཎིཾ དྷཱརེཏཱི’’ཏི 1? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, བྷིཀྑུནཱི སངྒྷཱཎིཾ དྷཱརེསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
1190. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarā bhikkhunī aññatarissā itthiyā kulūpikā hoti. Atha kho sā itthī taṃ bhikkhuniṃ etadavoca – ‘‘handāyye, imaṃ saṅghāṇiṃ amukāya nāma itthiyā dehī’’ti. Atha kho sā bhikkhunī – ‘‘sacāhaṃ pattena ādāya gacchāmi vissaro me bhavissatī’’ti paṭimuñcitvā agamāsi. Tassā rathikāya suttake chinne vippakiriyiṃsu. Manussā ujjhāyanti khiyyanti vipācenti – ‘‘kathañhi nāma bhikkhuniyo saṅghāṇiṃ dhāressanti, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe. … tā ujjhāyanti khiyyanti vipācenti – ‘‘kathañhi nāma bhikkhunī saṅghāṇiṃ dhāressatī’’ti…pe… saccaṃ kira, bhikkhave, bhikkhunī saṅghāṇiṃ dhāretī’’ti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī saṅghāṇiṃ dhāressati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༡༡༩༡. ‘‘ཡཱ པན བྷིཀྑུནཱི སངྒྷཱཎིཾ དྷཱརེཡྻ, པཱཙིཏྟིཡ’’ནྟི།
1191.‘‘Yā pana bhikkhunī saṅghāṇiṃ dhāreyya, pācittiya’’nti.
༡༡༩༢. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
1192.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
སངྒྷཱཎི ནཱམ ཡཱ ཀཱཙི ཀཊཱུཔགཱ།
Saṅghāṇi nāma yā kāci kaṭūpagā.
དྷཱརེཡྻཱཏི སཀིམྤི དྷཱརེཏི, ཨཱཔཏྟི པཱཙིཏྟིཡསྶ།
Dhāreyyāti sakimpi dhāreti, āpatti pācittiyassa.
༡༡༩༣. ཨནཱཔཏྟི ཨཱབཱདྷཔྤཙྩཡཱ, ཀཊིསུཏྟཀཾ དྷཱརེཏི, ཨུམྨཏྟིཀཱཡ, ཨཱདིཀམྨིཀཱཡཱཏི།
1193. Anāpatti ābādhappaccayā, kaṭisuttakaṃ dhāreti, ummattikāya, ādikammikāyāti.
ཏཏིཡསིཀྑཱཔདཾ ནིཊྛིཏཾ།
Tatiyasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༣. ཏཏིཡསིཀྑཱཔདཝཎྞནཱ • 3. Tatiyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༣. ཏཏིཡསིཀྑཱཔདཾ • 3. Tatiyasikkhāpadaṃ
