| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༣. ཏཏིཡསུཏྟནྟནིདྡེསོ
3. Tatiyasuttantaniddeso
༡༩༤. སཱཝཏྠིནིདཱནཾ 1། ‘‘པཉྩིམཱནི, བྷིཀྑཝེ, ཨིནྡྲིཡཱནི། ཀཏམཱནི པཉྩ? སདྡྷིནྡྲིཡཾ, ཝཱིརིཡིནྡྲིཡཾ, སཏིནྡྲིཡཾ, སམཱདྷིནྡྲིཡཾ, པཉྙིནྡྲིཡཾ། ཀཏྠ ཙ, བྷིཀྑཝེ, སདྡྷིནྡྲིཡཾ དཊྛབྦཾ? ཙཏཱུསུ སོཏཱཔཏྟིཡངྒེསུ – ཨེཏྠ སདྡྷིནྡྲིཡཾ དཊྛབྦཾ། ཀཏྠ ཙ, བྷིཀྑཝེ, ཝཱིརིཡིནྡྲིཡཾ དཊྛབྦཾ? ཙཏཱུསུ སམྨཔྤདྷཱནེསུ – ཨེཏྠ ཝཱིརིཡིནྡྲིཡཾ དཊྛབྦཾ། ཀཏྠ ཙ , བྷིཀྑཝེ, སཏིནྡྲིཡཾ དཊྛབྦཾ? ཙཏཱུསུ སཏིཔཊྛཱནེསུ – ཨེཏྠ སཏིནྡྲིཡཾ དཊྛབྦཾ། ཀཏྠ ཙ, བྷིཀྑཝེ, སམཱདྷིནྡྲིཡཾ དཊྛབྦཾ? ཙཏཱུསུ ཛྷཱནེསུ – ཨེཏྠ སམཱདྷིནྡྲིཡཾ དཊྛབྦཾ། ཀཏྠ ཙ, བྷིཀྑཝེ, པཉྙིནྡྲིཡཾ དཊྛབྦཾ? ཙཏཱུསུ ཨརིཡསཙྩེསུ – ཨེཏྠ པཉྙིནྡྲིཡཾ དཊྛབྦཾ’’།
194. Sāvatthinidānaṃ 2. ‘‘Pañcimāni, bhikkhave, indriyāni. Katamāni pañca? Saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ. Kattha ca, bhikkhave, saddhindriyaṃ daṭṭhabbaṃ? Catūsu sotāpattiyaṅgesu – ettha saddhindriyaṃ daṭṭhabbaṃ. Kattha ca, bhikkhave, vīriyindriyaṃ daṭṭhabbaṃ? Catūsu sammappadhānesu – ettha vīriyindriyaṃ daṭṭhabbaṃ. Kattha ca , bhikkhave, satindriyaṃ daṭṭhabbaṃ? Catūsu satipaṭṭhānesu – ettha satindriyaṃ daṭṭhabbaṃ. Kattha ca, bhikkhave, samādhindriyaṃ daṭṭhabbaṃ? Catūsu jhānesu – ettha samādhindriyaṃ daṭṭhabbaṃ. Kattha ca, bhikkhave, paññindriyaṃ daṭṭhabbaṃ? Catūsu ariyasaccesu – ettha paññindriyaṃ daṭṭhabbaṃ’’.
ཙཏཱུསུ སོཏཱཔཏྟིཡངྒེསུ སདྡྷིནྡྲིཡསྶ ཝསེན ཀཏིཧཱཀཱརེཧི པཉྩིནྡྲིཡཱནི དཊྛབྦཱནི? ཙཏཱུསུ སམྨཔྤདྷཱནེསུ ཝཱིརིཡིནྡྲིཡསྶ ཝསེན ཀཏིཧཱཀཱརེཧི པཉྩིནྡྲིཡཱནི དཊྛབྦཱནི? ཙཏཱུསུ སཏིཔཊྛཱནེསུ སཏིནྡྲིཡསྶ ཝསེན ཀཏིཧཱཀཱརེཧི པཉྩིནྡྲིཡཱནི དཊྛབྦཱནི? ཙཏཱུསུ ཛྷཱནེསུ སམཱདྷིནྡྲིཡསྶ ཝསེན ཀཏིཧཱཀཱརེཧི པཉྩིནྡྲིཡཱནི དཊྛབྦཱནི? ཙཏཱུསུ ཨརིཡསཙྩེསུ པཉྙིནྡྲིཡསྶ ཝསེན ཀཏིཧཱཀཱརེཧི པཉྩིནྡྲིཡཱནི དཊྛབྦཱནི?
Catūsu sotāpattiyaṅgesu saddhindriyassa vasena katihākārehi pañcindriyāni daṭṭhabbāni? Catūsu sammappadhānesu vīriyindriyassa vasena katihākārehi pañcindriyāni daṭṭhabbāni? Catūsu satipaṭṭhānesu satindriyassa vasena katihākārehi pañcindriyāni daṭṭhabbāni? Catūsu jhānesu samādhindriyassa vasena katihākārehi pañcindriyāni daṭṭhabbāni? Catūsu ariyasaccesu paññindriyassa vasena katihākārehi pañcindriyāni daṭṭhabbāni?
ཙཏཱུསུ སོཏཱཔཏྟིཡངྒེསུ སདྡྷིནྡྲིཡསྶ ཝསེན ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི། ཙཏཱུསུ སམྨཔྤདྷཱནེསུ ཝཱིརིཡིནྡྲིཡསྶ ཝསེན ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི། ཙཏཱུསུ སཏིཔཊྛཱནེསུ སཏིནྡྲིཡསྶ ཝསེན ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི། ཙཏཱུསུ ཛྷཱནེསུ སམཱདྷིནྡྲིཡསྶ ཝསེན ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི། ཙཏཱུསུ ཨརིཡསཙྩེསུ པཉྙིནྡྲིཡསྶ ཝསེན ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི།
Catūsu sotāpattiyaṅgesu saddhindriyassa vasena vīsatiyā ākārehi pañcindriyāni daṭṭhabbāni. Catūsu sammappadhānesu vīriyindriyassa vasena vīsatiyā ākārehi pañcindriyāni daṭṭhabbāni. Catūsu satipaṭṭhānesu satindriyassa vasena vīsatiyā ākārehi pañcindriyāni daṭṭhabbāni. Catūsu jhānesu samādhindriyassa vasena vīsatiyā ākārehi pañcindriyāni daṭṭhabbāni. Catūsu ariyasaccesu paññindriyassa vasena vīsatiyā ākārehi pañcindriyāni daṭṭhabbāni.
ཀ. པབྷེདགཎནནིདྡེསོ
Ka. pabhedagaṇananiddeso
༡༩༥. ཙཏཱུསུ སོཏཱཔཏྟིཡངྒེསུ སདྡྷིནྡྲིཡསྶ ཝསེན ཀཏམེཧི ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི? སཔྤུརིསསཾསེཝེ སོཏཱཔཏྟིཡངྒེ ཨདྷིམོཀྑཱདྷིཔཏེཡྻཊྛེན སདྡྷིནྡྲིཡཾ དཊྛབྦཾ, སདྡྷིནྡྲིཡསྶ ཝསེན པགྒཧཊྛེན ཝཱིརིཡིནྡྲིཡཾ དཊྛབྦཾ, ཨུཔཊྛཱནཊྛེན སཏིནྡྲིཡཾ དཊྛབྦཾ, ཨཝིཀྑེཔཊྛེན སམཱདྷིནྡྲིཡཾ དཊྛབྦཾ , དསྶནཊྛེན པཉྙིནྡྲིཡཾ དཊྛབྦཾ; སདྡྷམྨསཝནེ སོཏཱཔཏྟིཡངྒེ… ཡོནིསོམནསིཀཱརེ སོཏཱཔཏྟིཡངྒེ… དྷམྨཱནུདྷམྨཔཊིཔཏྟིཡཱ སོཏཱཔཏྟིཡངྒེ ཨདྷིམོཀྑཱདྷིཔཏེཡྻཊྛེན སདྡྷིནྡྲིཡཾ དཊྛབྦཾ, སདྡྷིནྡྲིཡསྶ ཝསེན པགྒཧཊྛེན ཝཱིརིཡིནྡྲིཡཾ དཊྛབྦཾ, ཨུཔཊྛཱནཊྛེན སཏིནྡྲིཡཾ དཊྛབྦཾ, ཨཝིཀྑེཔཊྛེན སམཱདྷིནྡྲིཡཾ དཊྛབྦཾ, དསྶནཊྛེན པཉྙིནྡྲིཡཾ དཊྛབྦཾ། ཙཏཱུསུ སོཏཱཔཏྟིཡངྒེསུ སདྡྷིནྡྲིཡསྶ ཝསེན ཨིམེཧི ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི།
195. Catūsu sotāpattiyaṅgesu saddhindriyassa vasena katamehi vīsatiyā ākārehi pañcindriyāni daṭṭhabbāni? Sappurisasaṃseve sotāpattiyaṅge adhimokkhādhipateyyaṭṭhena saddhindriyaṃ daṭṭhabbaṃ, saddhindriyassa vasena paggahaṭṭhena vīriyindriyaṃ daṭṭhabbaṃ, upaṭṭhānaṭṭhena satindriyaṃ daṭṭhabbaṃ, avikkhepaṭṭhena samādhindriyaṃ daṭṭhabbaṃ , dassanaṭṭhena paññindriyaṃ daṭṭhabbaṃ; saddhammasavane sotāpattiyaṅge… yonisomanasikāre sotāpattiyaṅge… dhammānudhammapaṭipattiyā sotāpattiyaṅge adhimokkhādhipateyyaṭṭhena saddhindriyaṃ daṭṭhabbaṃ, saddhindriyassa vasena paggahaṭṭhena vīriyindriyaṃ daṭṭhabbaṃ, upaṭṭhānaṭṭhena satindriyaṃ daṭṭhabbaṃ, avikkhepaṭṭhena samādhindriyaṃ daṭṭhabbaṃ, dassanaṭṭhena paññindriyaṃ daṭṭhabbaṃ. Catūsu sotāpattiyaṅgesu saddhindriyassa vasena imehi vīsatiyā ākārehi pañcindriyāni daṭṭhabbāni.
ཙཏཱུསུ སམྨཔྤདྷཱནེསུ ཝཱིརིཡིནྡྲིཡསྶ ཝསེན ཀཏམེཧི ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི? ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ སམྨཔྤདྷཱནེ པགྒཧཱདྷིཔཏེཡྻཊྛེན ཝཱིརིཡིནྡྲིཡཾ དཊྛབྦཾ, ཝཱིརིཡིནྡྲིཡསྶ ཝསེན ཨུཔཊྛཱནཊྛེན སཏིནྡྲིཡཾ དཊྛབྦཾ, ཨཝིཀྑེཔཊྛེན སམཱདྷིནྡྲིཡཾ དཊྛབྦཾ, དསྶནཊྛེན པཉྙིནྡྲིཡཾ དཊྛབྦཾ, ཨདྷིམོཀྑཊྛེན སདྡྷིནྡྲིཡཾ དཊྛབྦཾ། ཨུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ སམྨཔྤདྷཱནེ…པེ॰… ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ སམྨཔྤདྷཱནེ…པེ॰… ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ སམྨཔྤདྷཱནེ པགྒཧཱདྷིཔཏེཡྻཊྛེན ཝཱིརིཡིནྡྲིཡཾ དཊྛབྦཾ, ཝཱིརིཡིནྡྲིཡསྶ ཝསེན ཨུཔཊྛཱནཊྛེན སཏིནྡྲིཡཾ དཊྛབྦཾ, ཨཝིཀྑེཔཊྛེན སམཱདྷིནྡྲིཡཾ དཊྛབྦཾ, དསྶནཊྛེན པཉྙིནྡྲིཡཾ དཊྛབྦཾ, ཨདྷིམོཀྑཊྛེན སདྡྷིནྡྲིཡཾ དཊྛབྦཾ། ཙཏཱུསུ སམྨཔྤདྷཱནེསུ ཝཱིརིཡིནྡྲིཡསྶ ཝསེན ཨིམེཧི ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི།
Catūsu sammappadhānesu vīriyindriyassa vasena katamehi vīsatiyā ākārehi pañcindriyāni daṭṭhabbāni? Anuppannānaṃ pāpakānaṃ akusalānaṃ dhammānaṃ anuppādāya sammappadhāne paggahādhipateyyaṭṭhena vīriyindriyaṃ daṭṭhabbaṃ, vīriyindriyassa vasena upaṭṭhānaṭṭhena satindriyaṃ daṭṭhabbaṃ, avikkhepaṭṭhena samādhindriyaṃ daṭṭhabbaṃ, dassanaṭṭhena paññindriyaṃ daṭṭhabbaṃ, adhimokkhaṭṭhena saddhindriyaṃ daṭṭhabbaṃ. Uppannānaṃ pāpakānaṃ akusalānaṃ dhammānaṃ pahānāya sammappadhāne…pe… anuppannānaṃ kusalānaṃ dhammānaṃ uppādāya sammappadhāne…pe… uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā sammappadhāne paggahādhipateyyaṭṭhena vīriyindriyaṃ daṭṭhabbaṃ, vīriyindriyassa vasena upaṭṭhānaṭṭhena satindriyaṃ daṭṭhabbaṃ, avikkhepaṭṭhena samādhindriyaṃ daṭṭhabbaṃ, dassanaṭṭhena paññindriyaṃ daṭṭhabbaṃ, adhimokkhaṭṭhena saddhindriyaṃ daṭṭhabbaṃ. Catūsu sammappadhānesu vīriyindriyassa vasena imehi vīsatiyā ākārehi pañcindriyāni daṭṭhabbāni.
ཙཏཱུསུ སཏིཔཊྛཱནེསུ སཏིནྡྲིཡསྶ ཝསེན ཀཏམེཧི ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི? ཀཱཡེ ཀཱཡཱནུཔསྶནཱསཏིཔཊྛཱནེ ཨུཔཊྛཱནཱདྷིཔཏེཡྻཊྛེན སཏིནྡྲིཡཾ དཊྛབྦཾ, སཏིནྡྲིཡསྶ ཝསེན ཨཝིཀྑེཔཊྛེན སམཱདྷིནྡྲིཡཾ དཊྛབྦཾ, དསྶནཊྛེན པཉྙིནྡྲིཡཾ དཊྛབྦཾ, ཨདྷིམོཀྑཊྛེན སདྡྷིནྡྲིཡཾ དཊྛབྦཾ, པགྒཧཊྛེན ཝཱིརིཡིནྡྲིཡཾ དཊྛབྦཾ། ཝེདནཱསུ ཝེདནཱནུཔསྶནཱསཏིཔཊྛཱནེ…པེ॰… ཙིཏྟེ ཙིཏྟཱནུཔསྶནཱསཏིཔཊྛཱནེ… དྷམྨེསུ དྷམྨཱནུཔསྶནཱསཏིཔཊྛཱནེ ཨུཔཊྛཱནཱདྷིཔཏེཡྻཊྛེན སཏིནྡྲིཡཾ དཊྛབྦཾ, སཏིནྡྲིཡསྶ ཝསེན ཨཝིཀྑེཔཊྛེན སམཱདྷིནྡྲིཡཾ དཊྛབྦཾ, དསྶནཊྛེན པཉྙིནྡྲིཡཾ དཊྛབྦཾ, ཨདྷིམོཀྑཊྛེན སདྡྷིནྡྲིཡཾ དཊྛབྦཾ, པགྒཧཊྛེན ཝཱིརིཡིནྡྲིཡཾ དཊྛབྦཾ། ཙཏཱུསུ སཏིཔཊྛཱནེསུ སཏིནྡྲིཡསྶ ཝསེན ཨིམེཧི ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི།
Catūsu satipaṭṭhānesu satindriyassa vasena katamehi vīsatiyā ākārehi pañcindriyāni daṭṭhabbāni? Kāye kāyānupassanāsatipaṭṭhāne upaṭṭhānādhipateyyaṭṭhena satindriyaṃ daṭṭhabbaṃ, satindriyassa vasena avikkhepaṭṭhena samādhindriyaṃ daṭṭhabbaṃ, dassanaṭṭhena paññindriyaṃ daṭṭhabbaṃ, adhimokkhaṭṭhena saddhindriyaṃ daṭṭhabbaṃ, paggahaṭṭhena vīriyindriyaṃ daṭṭhabbaṃ. Vedanāsu vedanānupassanāsatipaṭṭhāne…pe… citte cittānupassanāsatipaṭṭhāne… dhammesu dhammānupassanāsatipaṭṭhāne upaṭṭhānādhipateyyaṭṭhena satindriyaṃ daṭṭhabbaṃ, satindriyassa vasena avikkhepaṭṭhena samādhindriyaṃ daṭṭhabbaṃ, dassanaṭṭhena paññindriyaṃ daṭṭhabbaṃ, adhimokkhaṭṭhena saddhindriyaṃ daṭṭhabbaṃ, paggahaṭṭhena vīriyindriyaṃ daṭṭhabbaṃ. Catūsu satipaṭṭhānesu satindriyassa vasena imehi vīsatiyā ākārehi pañcindriyāni daṭṭhabbāni.
ཙཏཱུསུ ཛྷཱནེསུ སམཱདྷིནྡྲིཡསྶ ཝསེན ཀཏམེཧི ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི? པཋམེ ཛྷཱནེ ཨཝིཀྑེཔཱདྷིཔཏེཡྻཊྛེན སམཱདྷིནྡྲིཡཾ དཊྛབྦཾ, སམཱདྷིནྡྲིཡསྶ ཝསེན དསྶནཊྛེན པཉྙིནྡྲིཡཾ དཊྛབྦཾ, ཨདྷིམོཀྑཊྛེན སདྡྷིནྡྲིཡཾ དཊྛབྦཾ, པགྒཧཊྛེན ཝཱིརིཡིནྡྲིཡཾ དཊྛབྦཾ, ཨུཔཊྛཱནཊྛེན སཏིནྡྲིཡཾ དཊྛབྦཾ། དུཏིཡེ ཛྷཱནེ…པེ॰… ཏཏིཡེ ཛྷཱནེ… ཙཏུཏྠེ ཛྷཱནེ ཨཝིཀྑེཔཱདྷིཔཏེཡྻཊྛེན སམཱདྷིནྡྲིཡཾ དཊྛབྦཾ, སམཱདྷིནྡྲིཡསྶ ཝསེན དསྶནཊྛེན པཉྙིནྡྲིཡཾ དཊྛབྦཾ, ཨདྷིམོཀྑཊྛེན སདྡྷིནྡྲིཡཾ དཊྛབྦཾ, པགྒཧཊྛེན ཝཱིརིཡིནྡྲིཡཾ དཊྛབྦཾ, ཨུཔཊྛཱནཊྛེན སཏིནྡྲིཡཾ དཊྛབྦཾ། ཙཏཱུསུ ཛྷཱནེསུ སམཱདྷིནྡྲིཡསྶ ཝསེན ཨིམེཧི ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི།
Catūsu jhānesu samādhindriyassa vasena katamehi vīsatiyā ākārehi pañcindriyāni daṭṭhabbāni? Paṭhame jhāne avikkhepādhipateyyaṭṭhena samādhindriyaṃ daṭṭhabbaṃ, samādhindriyassa vasena dassanaṭṭhena paññindriyaṃ daṭṭhabbaṃ, adhimokkhaṭṭhena saddhindriyaṃ daṭṭhabbaṃ, paggahaṭṭhena vīriyindriyaṃ daṭṭhabbaṃ, upaṭṭhānaṭṭhena satindriyaṃ daṭṭhabbaṃ. Dutiye jhāne…pe… tatiye jhāne… catutthe jhāne avikkhepādhipateyyaṭṭhena samādhindriyaṃ daṭṭhabbaṃ, samādhindriyassa vasena dassanaṭṭhena paññindriyaṃ daṭṭhabbaṃ, adhimokkhaṭṭhena saddhindriyaṃ daṭṭhabbaṃ, paggahaṭṭhena vīriyindriyaṃ daṭṭhabbaṃ, upaṭṭhānaṭṭhena satindriyaṃ daṭṭhabbaṃ. Catūsu jhānesu samādhindriyassa vasena imehi vīsatiyā ākārehi pañcindriyāni daṭṭhabbāni.
ཙཏཱུསུ ཨརིཡསཙྩེསུ པཉྙིནྡྲིཡསྶ ཝསེན ཀཏམེཧི ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི? དུཀྑེ ཨརིཡསཙྩེ དསྶནཱདྷིཔཏེཡྻཊྛེན པཉྙིནྡྲིཡཾ དཊྛབྦཾ, པཉྙིནྡྲིཡསྶ ཝསེན ཨདྷིམོཀྑཊྛེན སདྡྷིནྡྲིཡཾ དཊྛབྦཾ, པགྒཧཊྛེན ཝཱིརིཡིནྡྲིཡཾ དཊྛབྦཾ, ཨུཔཊྛཱནཊྛེན སཏིནྡྲིཡཾ དཊྛབྦཾ, ཨཝིཀྑེཔཊྛེན སམཱདྷིནྡྲིཡཾ དཊྛབྦཾ། དུཀྑསམུདཡེ ཨརིཡསཙྩེ…པེ॰… དུཀྑནིརོདྷེ ཨརིཡསཙྩེ… དུཀྑནིརོདྷགཱམིནིཡཱ པཊིཔདཱཡ ཨརིཡསཙྩེ དསྶནཱདྷིཔཏེཡྻཊྛེན པཉྙིནྡྲིཡཾ དཊྛབྦཾ, པཉྙིནྡྲིཡསྶ ཝསེན ཨདྷིམོཀྑཊྛེན སདྡྷིནྡྲིཡཾ དཊྛབྦཾ, པགྒཧཊྛེན ཝཱིརིཡིནྡྲིཡཾ དཊྛབྦཾ, ཨུཔཊྛཱནཊྛེན སཏིནྡྲིཡཾ དཊྛབྦཾ, ཨཝིཀྑེཔཊྛེན སམཱདྷིནྡྲིཡཾ དཊྛབྦཾ། ཙཏཱུསུ ཨརིཡསཙྩེསུ པཉྙིནྡྲིཡསྶ ཝསེན ཨིམེཧི ཝཱིསཏིཡཱ ཨཱཀཱརེཧི པཉྩིནྡྲིཡཱནི དཊྛབྦཱནི།
Catūsu ariyasaccesu paññindriyassa vasena katamehi vīsatiyā ākārehi pañcindriyāni daṭṭhabbāni? Dukkhe ariyasacce dassanādhipateyyaṭṭhena paññindriyaṃ daṭṭhabbaṃ, paññindriyassa vasena adhimokkhaṭṭhena saddhindriyaṃ daṭṭhabbaṃ, paggahaṭṭhena vīriyindriyaṃ daṭṭhabbaṃ, upaṭṭhānaṭṭhena satindriyaṃ daṭṭhabbaṃ, avikkhepaṭṭhena samādhindriyaṃ daṭṭhabbaṃ. Dukkhasamudaye ariyasacce…pe… dukkhanirodhe ariyasacce… dukkhanirodhagāminiyā paṭipadāya ariyasacce dassanādhipateyyaṭṭhena paññindriyaṃ daṭṭhabbaṃ, paññindriyassa vasena adhimokkhaṭṭhena saddhindriyaṃ daṭṭhabbaṃ, paggahaṭṭhena vīriyindriyaṃ daṭṭhabbaṃ, upaṭṭhānaṭṭhena satindriyaṃ daṭṭhabbaṃ, avikkhepaṭṭhena samādhindriyaṃ daṭṭhabbaṃ. Catūsu ariyasaccesu paññindriyassa vasena imehi vīsatiyā ākārehi pañcindriyāni daṭṭhabbāni.
ཁ. ཙརིཡཝཱརོ
Kha. cariyavāro
༡༩༦. ཙཏཱུསུ སོཏཱཔཏྟིཡངྒེསུ སདྡྷིནྡྲིཡསྶ ཝསེན ཀཏིཧཱཀཱརེཧི པཉྩནྣཾ ཨིནྡྲིཡཱནཾ ཙརིཡཱ དཊྛབྦཱ?
196. Catūsu sotāpattiyaṅgesu saddhindriyassa vasena katihākārehi pañcannaṃ indriyānaṃ cariyā daṭṭhabbā?
ཙཏཱུསུ སམྨཔྤདྷཱནེསུ…པེ॰… ཙཏཱུསུ སཏིཔཊྛཱནེསུ… ཙཏཱུསུ ཛྷཱནེསུ… ཙཏཱུསུ ཨརིཡསཙྩེསུ པཉྙིནྡྲིཡསྶ ཝསེན ཀཏིཧཱཀཱརེཧི པཉྩནྣཾ ཨིནྡྲིཡཱནཾ ཙརིཡཱ དཊྛབྦཱ? ཙཏཱུསུ སོཏཱཔཏྟིཡངྒེསུ སདྡྷིནྡྲིཡསྶ ཝསེན ཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཙརིཡཱ དཊྛབྦཱ། ཙཏཱུསུ སམྨཔྤདྷཱནེསུ…པེ॰… ཙཏཱུསུ སཏིཔཊྛཱནེསུ… ཙཏཱུསུ ཛྷཱནེསུ… ཙཏཱུསུ ཨརིཡསཙྩེསུ པཉྙིནྡྲིཡསྶ ཝསེན ཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཙརིཡཱ དཊྛབྦཱ།
Catūsu sammappadhānesu…pe… catūsu satipaṭṭhānesu… catūsu jhānesu… catūsu ariyasaccesu paññindriyassa vasena katihākārehi pañcannaṃ indriyānaṃ cariyā daṭṭhabbā? Catūsu sotāpattiyaṅgesu saddhindriyassa vasena vīsatiyā ākārehi pañcannaṃ indriyānaṃ cariyā daṭṭhabbā. Catūsu sammappadhānesu…pe… catūsu satipaṭṭhānesu… catūsu jhānesu… catūsu ariyasaccesu paññindriyassa vasena vīsatiyā ākārehi pañcannaṃ indriyānaṃ cariyā daṭṭhabbā.
ཙཏཱུསུ སོཏཱཔཏྟིཡངྒེསུ སདྡྷིནྡྲིཡསྶ ཝསེན ཀཏམེཧི ཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཙརིཡཱ དཊྛབྦཱ? སཔྤུརིསསཾསེཝེ སོཏཱཔཏྟིཡངྒེ ཨདྷིམོཀྑཱདྷིཔཏེཡྻཊྛེན སདྡྷིནྡྲིཡསྶ ཙརིཡཱ དཊྛབྦཱ, སདྡྷིནྡྲིཡསྶ ཝསེན པགྒཧཊྛེན ཝཱིརིཡིནྡྲིཡསྶ ཙརིཡཱ དཊྛབྦཱ, ཨུཔཊྛཱནཊྛེན སཏིནྡྲིཡསྶ ཙརིཡཱ དཊྛབྦཱ, ཨཝིཀྑེཔཊྛེན སམཱདྷིནྡྲིཡསྶ ཙརིཡཱ དཊྛབྦཱ, དསྶནཊྛེན པཉྙིནྡྲིཡསྶ ཙརིཡཱ དཊྛབྦཱ། སདྡྷམྨསཝནེ སོཏཱཔཏྟིཡངྒེ…པེ॰… ཡོནིསོ མནསིཀཱརེ སོཏཱཔཏྟིཡངྒེ… དྷམྨཱནུདྷམྨཔཊིཔཏྟིཡཱ སོཏཱཔཏྟིཡངྒེ ཨདྷིམོཀྑཱདྷིཔཏེཡྻཊྛེན སདྡྷིནྡྲིཡསྶ ཙརིཡཱ དཊྛབྦཱ, སདྡྷིནྡྲིཡསྶ ཝསེན པགྒཧཊྛེན ཝཱིརིཡིནྡྲིཡསྶ ཙརིཡཱ དཊྛབྦཱ, ཨུཔཊྛཱནཊྛེན སཏིནྡྲིཡསྶ ཙརིཡཱ དཊྛབྦཱ, ཨཝིཀྑེཔཊྛེན སམཱདྷིནྡྲིཡསྶ ཙརིཡཱ དཊྛབྦཱ, དསྶནཊྛེན པཉྙིནྡྲིཡསྶ ཙརིཡཱ དཊྛབྦཱ། ཙཏཱུསུ སོཏཱཔཏྟིཡངྒེསུ སདྡྷིནྡྲིཡསྶ ཝསེན ཨིམེཧི ཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཙརིཡཱ དཊྛབྦཱ།
Catūsu sotāpattiyaṅgesu saddhindriyassa vasena katamehi vīsatiyā ākārehi pañcannaṃ indriyānaṃ cariyā daṭṭhabbā? Sappurisasaṃseve sotāpattiyaṅge adhimokkhādhipateyyaṭṭhena saddhindriyassa cariyā daṭṭhabbā, saddhindriyassa vasena paggahaṭṭhena vīriyindriyassa cariyā daṭṭhabbā, upaṭṭhānaṭṭhena satindriyassa cariyā daṭṭhabbā, avikkhepaṭṭhena samādhindriyassa cariyā daṭṭhabbā, dassanaṭṭhena paññindriyassa cariyā daṭṭhabbā. Saddhammasavane sotāpattiyaṅge…pe… yoniso manasikāre sotāpattiyaṅge… dhammānudhammapaṭipattiyā sotāpattiyaṅge adhimokkhādhipateyyaṭṭhena saddhindriyassa cariyā daṭṭhabbā, saddhindriyassa vasena paggahaṭṭhena vīriyindriyassa cariyā daṭṭhabbā, upaṭṭhānaṭṭhena satindriyassa cariyā daṭṭhabbā, avikkhepaṭṭhena samādhindriyassa cariyā daṭṭhabbā, dassanaṭṭhena paññindriyassa cariyā daṭṭhabbā. Catūsu sotāpattiyaṅgesu saddhindriyassa vasena imehi vīsatiyā ākārehi pañcannaṃ indriyānaṃ cariyā daṭṭhabbā.
ཙཏཱུསུ སམྨཔྤདྷཱནེསུ ཝཱིརིཡིནྡྲིཡསྶ ཝསེན ཀཏམེཧི ཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཙརིཡཱ དཊྛབྦཱ? ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ སམྨཔྤདྷཱནེ པགྒཧཱདྷིཔཏེཡྻཊྛེན ཝཱིརིཡིནྡྲིཡསྶ ཙརིཡཱ དཊྛབྦཱ, ཝཱིརིཡིནྡྲིཡསྶ ཝསེན ཨུཔཊྛཱནཊྛེན སཏིནྡྲིཡསྶ ཙརིཡཱ དཊྛབྦཱ, ཨཝིཀྑེཔཊྛེན སམཱདྷིནྡྲིཡསྶ ཙརིཡཱ དཊྛབྦཱ, དསྶནཊྛེན པཉྙིནྡྲིཡསྶ ཙརིཡཱ དཊྛབྦཱ, ཨདྷིམོཀྑཊྛེན སདྡྷིནྡྲིཡསྶ ཙརིཡཱ དཊྛབྦཱ། ཨུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ སམྨཔྤདྷཱནེ…པེ॰… ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ སམྨཔྤདྷཱནེ…པེ॰… ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ སམྨཔྤདྷཱནེ པགྒཧཱདྷིཔཏེཡྻཊྛེན ཝཱིརིཡིནྡྲིཡསྶ ཙརིཡཱ དཊྛབྦཱ…པེ॰… ཙཏཱུསུ སམྨཔྤདྷཱནེསུ ཝཱིརིཡིནྡྲིཡསྶ ཝསེན ཨིམེཧི ཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཙརིཡཱ དཊྛབྦཱ།
Catūsu sammappadhānesu vīriyindriyassa vasena katamehi vīsatiyā ākārehi pañcannaṃ indriyānaṃ cariyā daṭṭhabbā? Anuppannānaṃ pāpakānaṃ akusalānaṃ dhammānaṃ anuppādāya sammappadhāne paggahādhipateyyaṭṭhena vīriyindriyassa cariyā daṭṭhabbā, vīriyindriyassa vasena upaṭṭhānaṭṭhena satindriyassa cariyā daṭṭhabbā, avikkhepaṭṭhena samādhindriyassa cariyā daṭṭhabbā, dassanaṭṭhena paññindriyassa cariyā daṭṭhabbā, adhimokkhaṭṭhena saddhindriyassa cariyā daṭṭhabbā. Uppannānaṃ pāpakānaṃ akusalānaṃ dhammānaṃ pahānāya sammappadhāne…pe… anuppannānaṃ kusalānaṃ dhammānaṃ uppādāya sammappadhāne…pe… uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā sammappadhāne paggahādhipateyyaṭṭhena vīriyindriyassa cariyā daṭṭhabbā…pe… catūsu sammappadhānesu vīriyindriyassa vasena imehi vīsatiyā ākārehi pañcannaṃ indriyānaṃ cariyā daṭṭhabbā.
ཙཏཱུསུ སཏིཔཊྛཱནེསུ སཏིནྡྲིཡསྶ ཝསེན ཀཏམེཧི ཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཙརིཡཱ དཊྛབྦཱ? ཀཱཡེ ཀཱཡཱནུཔསྶནཱསཏིཔཊྛཱནེ ཨུཔཊྛཱནཱདྷིཔཏེཡྻཊྛེན སཏིནྡྲིཡསྶ ཙརིཡཱ དཊྛབྦཱ, སཏིནྡྲིཡསྶ ཝསེན ཨཝིཀྑེཔཊྛེན སམཱདྷིནྡྲིཡསྶ ཙརིཡཱ དཊྛབྦཱ, དསྶནཊྛེན པཉྙིནྡྲིཡསྶ ཙརིཡཱ དཊྛབྦཱ, ཨདྷིམོཀྑཊྛེན སདྡྷིནྡྲིཡསྶ ཙརིཡཱ དཊྛབྦཱ, པགྒཧཊྛེན ཝཱིརིཡིནྡྲིཡསྶ ཙརིཡཱ དཊྛབྦཱ། ཝེདནཱསུ ཝེདནཱནུཔསྶནཱསཏིཔཊྛཱནེ…པེ॰… ཙིཏྟེ ཙིཏྟཱནུཔསྶནཱསཏིཔཊྛཱནེ…པེ॰… དྷམྨེསུ དྷམྨཱནུཔསྶནཱསཏིཔཊྛཱནེ ཨུཔཊྛཱནཱདྷིཔཏེཡྻཊྛེན སཏིནྡྲིཡསྶ ཙརིཡཱ དཊྛབྦཱ…པེ॰… ཙཏཱུསུ སཏིཔཊྛཱནེསུ སཏིནྡྲིཡསྶ ཝསེན ཨིམེཧི ཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཙརིཡཱ དཊྛབྦཱ།
Catūsu satipaṭṭhānesu satindriyassa vasena katamehi vīsatiyā ākārehi pañcannaṃ indriyānaṃ cariyā daṭṭhabbā? Kāye kāyānupassanāsatipaṭṭhāne upaṭṭhānādhipateyyaṭṭhena satindriyassa cariyā daṭṭhabbā, satindriyassa vasena avikkhepaṭṭhena samādhindriyassa cariyā daṭṭhabbā, dassanaṭṭhena paññindriyassa cariyā daṭṭhabbā, adhimokkhaṭṭhena saddhindriyassa cariyā daṭṭhabbā, paggahaṭṭhena vīriyindriyassa cariyā daṭṭhabbā. Vedanāsu vedanānupassanāsatipaṭṭhāne…pe… citte cittānupassanāsatipaṭṭhāne…pe… dhammesu dhammānupassanāsatipaṭṭhāne upaṭṭhānādhipateyyaṭṭhena satindriyassa cariyā daṭṭhabbā…pe… catūsu satipaṭṭhānesu satindriyassa vasena imehi vīsatiyā ākārehi pañcannaṃ indriyānaṃ cariyā daṭṭhabbā.
ཙཏཱུསུ ཛྷཱནེསུ སམཱདྷིནྡྲིཡསྶ ཝསེན ཀཏམེཧི ཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཙརིཡཱ དཊྛབྦཱ? པཋམེ ཛྷཱནེ ཨཝིཀྑེཔཱདྷིཔཏེཡྻཊྛེན སམཱདྷིནྡྲིཡསྶ ཙརིཡཱ དཊྛབྦཱ, སམཱདྷིནྡྲིཡསྶ ཝསེན དསྶནཊྛེན པཉྙིནྡྲིཡསྶ ཙརིཡཱ དཊྛབྦཱ, ཨདྷིམོཀྑཊྛེན སདྡྷིནྡྲིཡསྶ ཙརིཡཱ དཊྛབྦཱ, པགྒཧཊྛེན ཝཱིརིཡིནྡྲིཡསྶ ཙརིཡཱ དཊྛབྦཱ, ཨུཔཊྛཱནཊྛེན སཏིནྡྲིཡསྶ ཙརིཡཱ དཊྛབྦཱ། དུཏིཡེ ཛྷཱནེ…པེ॰… ཏཏིཡེ ཛྷཱནེ…པེ॰… ཙཏུཏྠེ ཛྷཱནེ ཨཝིཀྑེཔཱདྷིཔཏེཡྻཊྛེན སམཱདྷིནྡྲིཡསྶ ཙརིཡཱ དཊྛབྦཱ…པེ॰… ཙཏཱུསུ ཛྷཱནེསུ སམཱདྷིནྡྲིཡསྶ ཝསེན ཨིམེཧི ཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཙརིཡཱ དཊྛབྦཱ།
Catūsu jhānesu samādhindriyassa vasena katamehi vīsatiyā ākārehi pañcannaṃ indriyānaṃ cariyā daṭṭhabbā? Paṭhame jhāne avikkhepādhipateyyaṭṭhena samādhindriyassa cariyā daṭṭhabbā, samādhindriyassa vasena dassanaṭṭhena paññindriyassa cariyā daṭṭhabbā, adhimokkhaṭṭhena saddhindriyassa cariyā daṭṭhabbā, paggahaṭṭhena vīriyindriyassa cariyā daṭṭhabbā, upaṭṭhānaṭṭhena satindriyassa cariyā daṭṭhabbā. Dutiye jhāne…pe… tatiye jhāne…pe… catutthe jhāne avikkhepādhipateyyaṭṭhena samādhindriyassa cariyā daṭṭhabbā…pe… catūsu jhānesu samādhindriyassa vasena imehi vīsatiyā ākārehi pañcannaṃ indriyānaṃ cariyā daṭṭhabbā.
ཙཏཱུསུ ཨརིཡསཙྩེསུ པཉྙིནྡྲིཡསྶ ཝསེན ཀཏམེཧི ཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཙརིཡཱ དཊྛབྦཱ? དུཀྑེ ཨརིཡསཙྩེ དསྶནཱདྷིཔཏེཡྻཊྛེན པཉྙིནྡྲིཡསྶ ཙརིཡཱ དཊྛབྦཱ, པཉྙིནྡྲིཡསྶ ཝསེན ཨདྷིམོཀྑཊྛེན སདྡྷིནྡྲིཡསྶ ཙརིཡཱ དཊྛབྦཱ, པགྒཧཊྛེན ཝཱིརིཡིནྡྲིཡསྶ ཙརིཡཱ དཊྛབྦཱ, ཨུཔཊྛཱནཊྛེན སཏིནྡྲིཡསྶ ཙརིཡཱ དཊྛབྦཱ, ཨཝིཀྑེཔཊྛེན སམཱདྷིནྡྲིཡསྶ ཙརིཡཱ དཊྛབྦཱ། དུཀྑསམུདཡེ ཨརིཡསཙྩེ…པེ॰… དུཀྑནིརོདྷེ ཨརིཡསཙྩེ… དུཀྑནིརོདྷགཱམིནིཡཱ པཊིཔདཱཡ ཨརིཡསཙྩེ དསྶནཱདྷིཔཏེཡྻཊྛེན པཉྙིནྡྲིཡསྶ ཙརིཡཱ དཊྛབྦཱ, པཉྙིནྡྲིཡསྶ ཝསེན ཨདྷིམོཀྑཊྛེན སདྡྷིནྡྲིཡསྶ ཙརིཡཱ དཊྛབྦཱ, པགྒཧཊྛེན ཝཱིརིཡིནྡྲིཡསྶ ཙརིཡཱ དཊྛབྦཱ, ཨུཔཊྛཱནཊྛེན སཏིནྡྲིཡསྶ ཙརིཡཱ དཊྛབྦཱ, ཨཝིཀྑེཔཊྛེན སམཱདྷིནྡྲིཡསྶ ཙརིཡཱ དཊྛབྦཱ། ཙཏཱུསུ ཨརིཡསཙྩེསུ པཉྙིནྡྲིཡསྶ ཝསེན ཨིམེཧི ཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཙརིཡཱ དཊྛབྦཱ།
Catūsu ariyasaccesu paññindriyassa vasena katamehi vīsatiyā ākārehi pañcannaṃ indriyānaṃ cariyā daṭṭhabbā? Dukkhe ariyasacce dassanādhipateyyaṭṭhena paññindriyassa cariyā daṭṭhabbā, paññindriyassa vasena adhimokkhaṭṭhena saddhindriyassa cariyā daṭṭhabbā, paggahaṭṭhena vīriyindriyassa cariyā daṭṭhabbā, upaṭṭhānaṭṭhena satindriyassa cariyā daṭṭhabbā, avikkhepaṭṭhena samādhindriyassa cariyā daṭṭhabbā. Dukkhasamudaye ariyasacce…pe… dukkhanirodhe ariyasacce… dukkhanirodhagāminiyā paṭipadāya ariyasacce dassanādhipateyyaṭṭhena paññindriyassa cariyā daṭṭhabbā, paññindriyassa vasena adhimokkhaṭṭhena saddhindriyassa cariyā daṭṭhabbā, paggahaṭṭhena vīriyindriyassa cariyā daṭṭhabbā, upaṭṭhānaṭṭhena satindriyassa cariyā daṭṭhabbā, avikkhepaṭṭhena samādhindriyassa cariyā daṭṭhabbā. Catūsu ariyasaccesu paññindriyassa vasena imehi vīsatiyā ākārehi pañcannaṃ indriyānaṃ cariyā daṭṭhabbā.
ག. ཙཱརཝིཧཱརནིདྡེསོ
Ga. cāravihāraniddeso
༡༩༧. ཙཱརོ ཙ ཝིཧཱརོ ཙ ཨནུབུདྡྷོ ཧོཏི པཊིཝིདྡྷོ, ཡཐཱཙརནྟཾ ཡཐཱཝིཧརནྟཾ ཝིཉྙཱུ སབྲཧྨཙཱརཱི གམྦྷཱིརེསུ ཋཱནེསུ ཨོཀཔྤེཡྻུཾ – ‘‘ཨདྡྷཱ, ཨཡམཱཡསྨཱ པཏྟོ ཝཱ པཱཔུཎིསྶཏི ཝཱ’’།
197. Cāro ca vihāro ca anubuddho hoti paṭividdho, yathācarantaṃ yathāviharantaṃ viññū sabrahmacārī gambhīresu ṭhānesu okappeyyuṃ – ‘‘addhā, ayamāyasmā patto vā pāpuṇissati vā’’.
ཙརིཡཱཏི ཨཊྛ ཙརིཡཱཡོ – ཨིརིཡཱཔཐཙརིཡཱ, ཨཱཡཏནཙརིཡཱ, སཏིཙརིཡཱ, སམཱདྷིཙརིཡཱ, ཉཱཎཙརིཡཱ, མགྒཙརིཡཱ, པཏྟིཙརིཡཱ, ལོཀཏྠཙརིཡཱཏི། ཨིརིཡཱཔཐཙརིཡཱཏི ཙཏཱུསུ ཨིརིཡཱཔཐེསུ། ཨཱཡཏནཙརིཡཱཏི ཚསུ ཨཛ྄ཛྷཏྟིཀབཱཧིརེསུ ཨཱཡཏནེསུ། སཏིཙརིཡཱཏི ཙཏཱུསུ སཏིཔཊྛཱནེསུ། སམཱདྷིཙརིཡཱཏི ཙཏཱུསུ ཛྷཱནེསུ། ཉཱཎཙརིཡཱཏི ཙཏཱུསུ ཨརིཡསཙྩེསུ། མགྒཙརིཡཱཏི ཙཏཱུསུ ཨརིཡམགྒེསུ། པཏྟིཙརིཡཱཏི ཙཏཱུསུ སཱམཉྙཕལེསུ། ལོཀཏྠཙརིཡཱཏི ཏཐཱགཏེསུ ཨརཧནྟེསུ སམྨཱསམྦུདྡྷེསུ, པདེསེ པཙྩེཀབུདྡྷེསུ, པདེསེ སཱཝཀེསུ། ཨིརིཡཱཔཐཙརིཡཱ ཙ པཎིདྷིསམྤནྣཱནཾ, ཨཱཡཏནཙརིཡཱ ཙ ཨིནྡྲིཡེསུ གུཏྟདྭཱརཱནཾ, སཏིཙརིཡཱ ཙ ཨཔྤམཱདཝིཧཱརཱིནཾ, སམཱདྷིཙརིཡཱ ཙ ཨདྷིཙིཏྟམནུཡུཏྟཱནཾ, ཉཱཎཙརིཡཱ ཙ བུདྡྷིསམྤནྣཱནཾ, མགྒཙརིཡཱ ཙ སམྨཱཔཊིཔནྣཱནཾ, པཏྟིཙརིཡཱ ཙ ཨདྷིགཏཕལཱནཾ, ལོཀཏྠཙརིཡཱ ཙ ཏཐཱགཏཱནཾ ཨརཧནྟཱནཾ སམྨཱསམྦུདྡྷཱནཾ, པདེསེ པཙྩེཀབུདྡྷཱནཾ, པདེསེ སཱཝཀཱནཾ། ཨིམཱ ཨཊྛ ཙརིཡཱཡོ།
Cariyāti aṭṭha cariyāyo – iriyāpathacariyā, āyatanacariyā, saticariyā, samādhicariyā, ñāṇacariyā, maggacariyā, patticariyā, lokatthacariyāti. Iriyāpathacariyāti catūsu iriyāpathesu. Āyatanacariyāti chasu ajjhattikabāhiresu āyatanesu. Saticariyāti catūsu satipaṭṭhānesu. Samādhicariyāti catūsu jhānesu. Ñāṇacariyāti catūsu ariyasaccesu. Maggacariyāti catūsu ariyamaggesu. Patticariyāti catūsu sāmaññaphalesu. Lokatthacariyāti tathāgatesu arahantesu sammāsambuddhesu, padese paccekabuddhesu, padese sāvakesu. Iriyāpathacariyā ca paṇidhisampannānaṃ, āyatanacariyā ca indriyesu guttadvārānaṃ, saticariyā ca appamādavihārīnaṃ, samādhicariyā ca adhicittamanuyuttānaṃ, ñāṇacariyā ca buddhisampannānaṃ, maggacariyā ca sammāpaṭipannānaṃ, patticariyā ca adhigataphalānaṃ, lokatthacariyā ca tathāgatānaṃ arahantānaṃ sammāsambuddhānaṃ, padese paccekabuddhānaṃ, padese sāvakānaṃ. Imā aṭṭha cariyāyo.
ཨཔརཱཔི ཨཊྛ ཙརིཡཱཡོ། ཨདྷིམུཙྩནྟོ སདྡྷཱཡ ཙརཏི, པགྒཎྷནྟོ ཝཱིརིཡེན ཙརཏི, ཨུཔཊྛཱཔེནྟོ སཏིཡཱ ཙརཏི, ཨཝིཀྑེཔཾ ཀརོནྟོ སམཱདྷིནཱ ཙརཏི, པཛཱནནྟོ པཉྙཱཡ ཙརཏི, ཝིཛཱནནྟོ ཝིཉྙཱཎཙརིཡཱཡ ཙརཏི, ཨེཝཾ པཊིཔནྣསྶ ཀུསལཱ དྷམྨཱ ཨཱཡཱཔེནྟཱིཏི ཨཱཡཏནཙརིཡཱཡ ཙརཏི, ཨེཝཾ པཊིཔནྣོ ཝིསེསམདྷིགཙྪཏཱིཏི ཝིསེསཙརིཡཱཡ ཙརཏི – ཨིམཱ ཨཊྛ ཙརིཡཱཡོ།
Aparāpi aṭṭha cariyāyo. Adhimuccanto saddhāya carati, paggaṇhanto vīriyena carati, upaṭṭhāpento satiyā carati, avikkhepaṃ karonto samādhinā carati, pajānanto paññāya carati, vijānanto viññāṇacariyāya carati, evaṃ paṭipannassa kusalā dhammā āyāpentīti āyatanacariyāya carati, evaṃ paṭipanno visesamadhigacchatīti visesacariyāya carati – imā aṭṭha cariyāyo.
ཨཔརཱཔི ཨཊྛ ཙརིཡཱཡོ། དསྶནཙརིཡཱ ཙ སམྨཱདིཊྛིཡཱ, ཨབྷིནིརོཔནཙརིཡཱ ཙ སམྨཱསངྐཔྤསྶ, པརིགྒཧཙརིཡཱ ཙ སམྨཱཝཱཙཱཡ, སམུཊྛཱནཙརིཡཱ ཙ སམྨཱཀམྨནྟསྶ, ཝོདཱནཙརིཡཱ ཙ སམྨཱཨཱཛཱིཝསྶ, པགྒཧཙརིཡཱ ཙ སམྨཱཝཱཡཱམསྶ, ཨུཔཊྛཱནཙརིཡཱ ཙ སམྨཱསཏིཡཱ, ཨཝིཀྑེཔཙརིཡཱ ཙ སམྨཱསམཱདྷིསྶ – ཨིམཱ ཨཊྛ ཙརིཡཱཡོ།
Aparāpi aṭṭha cariyāyo. Dassanacariyā ca sammādiṭṭhiyā, abhiniropanacariyā ca sammāsaṅkappassa, pariggahacariyā ca sammāvācāya, samuṭṭhānacariyā ca sammākammantassa, vodānacariyā ca sammāājīvassa, paggahacariyā ca sammāvāyāmassa, upaṭṭhānacariyā ca sammāsatiyā, avikkhepacariyā ca sammāsamādhissa – imā aṭṭha cariyāyo.
ཝིཧཱརོཏི ཨདྷིམུཙྩནྟོ སདྡྷཱཡ ཝིཧརཏི, པགྒཎྷནྟོ ཝཱིརིཡེན ཝིཧརཏི, ཨུཔཊྛཱཔེནྟོ སཏིཡཱ ཝིཧརཏི, ཨཝིཀྑེཔཾ ཀརོནྟོ སམཱདྷིནཱ ཝིཧརཏི, པཛཱནནྟོ པཉྙཱཡ ཝིཧརཏི།
Vihāroti adhimuccanto saddhāya viharati, paggaṇhanto vīriyena viharati, upaṭṭhāpento satiyā viharati, avikkhepaṃ karonto samādhinā viharati, pajānanto paññāya viharati.
ཨནུབུདྡྷོཏི སདྡྷིནྡྲིཡསྶ ཨདྷིམོཀྑཊྛོ ཨནུབུདྡྷོ ཧོཏི, ཝཱིརིཡིནྡྲིཡསྶ པགྒཧཊྛོ ཨནུབུདྡྷོ ཧོཏི, སཏིནྡྲིཡསྶ ཨུཔཊྛཱནཊྛོ ཨནུབུདྡྷོ ཧོཏི, སམཱདྷིནྡྲིཡསྶ ཨཝིཀྑེཔཊྛོ ཨནུབུདྡྷོ ཧོཏི, པཉྙིནྡྲིཡསྶ དསྶནཊྛོ ཨནུབུདྡྷོ ཧོཏི།
Anubuddhoti saddhindriyassa adhimokkhaṭṭho anubuddho hoti, vīriyindriyassa paggahaṭṭho anubuddho hoti, satindriyassa upaṭṭhānaṭṭho anubuddho hoti, samādhindriyassa avikkhepaṭṭho anubuddho hoti, paññindriyassa dassanaṭṭho anubuddho hoti.
པཊིཝིདྡྷོཏི སདྡྷིནྡྲིཡསྶ ཨདྷིམོཀྑཊྛོ པཊིཝིདྡྷོ ཧོཏི, ཝཱིརིཡིནྡྲིཡསྶ པགྒཧཊྛོ པཊིཝིདྡྷོ ཧོཏི, སཏིནྡྲིཡསྶ ཨུཔཊྛཱནཊྛོ པཊིཝིདྡྷོ ཧོཏི, སམཱདྷིནྡྲིཡསྶ ཨཝིཀྑེཔཊྛོ པཊིཝིདྡྷོ ཧོཏི, པཉྙིནྡྲིཡསྶ དསྶནཊྛོ པཊིཝིདྡྷོ ཧོཏི། ཡཐཱཙརནྟནྟི ཨེཝཾ སདྡྷཱཡ ཙརནྟཾ, ཨེཝཾ ཝཱིརིཡེན ཙརནྟཾ, ཨེཝཾ སཏིཡཱ ཙརནྟཾ, ཨེཝཾ སམཱདྷིནཱ ཙརནྟཾ, ཨེཝཾ པཉྙཱཡ ཙརནྟཾ། ཡཐཱཝིཧརནྟནྟི ཨེཝཾ སདྡྷཱཡ ཝིཧརནྟཾ, ཨེཝཾ ཝཱིརིཡེན ཝིཧརནྟཾ, ཨེཝཾ སཏིཡཱ ཝིཧརནྟཾ, ཨེཝཾ སམཱདྷིནཱ ཝིཧརནྟཾ, ཨེཝཾ པཉྙཱཡ ཝིཧརནྟཾ། ཝིཉྙཱུཏི ཝིཉྙཱུ ཝིབྷཱཝཱི མེདྷཱཝཱི པཎྜིཏཱ བུདྡྷིསམྤནྣཱ། སབྲཧྨཙཱརཱིཏི ཨེཀཀམྨཾ ཨེཀུདྡེསོ སམསིཀྑཏཱ། གམྦྷཱིརེསུ ཋཱནེསཱུཏི གམྦྷཱིརཱནི ཋཱནཱནི ཝུཙྩནྟི ཛྷཱནཱ ཙ ཝིམོཀྑཱ ཙ སམཱདྷཱི ཙ སམཱཔཏྟིཡོ ཙ མགྒཱ ཙ ཕལཱནི ཙ ཨབྷིཉྙཱཡོ ཙ པཊིསམྦྷིདཱ ཙ། ཨོཀཔྤེཡྻུནྟི སདྡཧེཡྻུཾ ཨདྷིམུཙྩེཡྻུཾ། ཨདྡྷཱཏི ཨེཀཾསཝཙནམེཏཾ ནིསྶཾསཡཝཙནམེཏཾ ནིཀྐངྑཝཙནམེཏཾ ཨདྭེཛ྄ཛྷཝཙནམེཏཾ ཨདྭེལ༹ྷཀཝཙནམེཏཾ ནིཡོགཝཙནམེཏཾ ཨཔཎྞཀཝཙནམེཏཾ ཨཝཏྠཱཔནཝཙནམེཏཾ – ཨདྡྷཱཏི། ཨཱཡསྨཱཏི པིཡཝཙནམེཏཾ གརུཝཙནམེཏཾ སགཱརཝསཔྤཏིསྶཱདྷིཝཙནམེཏཾ – ཨཱཡསྨཱཏི། པཏྟོ ཝཱཏི ཨདྷིགཏོ ཝཱ། པཱཔུཎིསྶཏི ཝཱཏི ཨདྷིགམིསྶཏི ཝཱ།
Paṭividdhoti saddhindriyassa adhimokkhaṭṭho paṭividdho hoti, vīriyindriyassa paggahaṭṭho paṭividdho hoti, satindriyassa upaṭṭhānaṭṭho paṭividdho hoti, samādhindriyassa avikkhepaṭṭho paṭividdho hoti, paññindriyassa dassanaṭṭho paṭividdho hoti. Yathācarantanti evaṃ saddhāya carantaṃ, evaṃ vīriyena carantaṃ, evaṃ satiyā carantaṃ, evaṃ samādhinā carantaṃ, evaṃ paññāya carantaṃ. Yathāviharantanti evaṃ saddhāya viharantaṃ, evaṃ vīriyena viharantaṃ, evaṃ satiyā viharantaṃ, evaṃ samādhinā viharantaṃ, evaṃ paññāya viharantaṃ. Viññūti viññū vibhāvī medhāvī paṇḍitā buddhisampannā. Sabrahmacārīti ekakammaṃ ekuddeso samasikkhatā. Gambhīresu ṭhānesūti gambhīrāni ṭhānāni vuccanti jhānā ca vimokkhā ca samādhī ca samāpattiyo ca maggā ca phalāni ca abhiññāyo ca paṭisambhidā ca. Okappeyyunti saddaheyyuṃ adhimucceyyuṃ. Addhāti ekaṃsavacanametaṃ nissaṃsayavacanametaṃ nikkaṅkhavacanametaṃ advejjhavacanametaṃ adveḷhakavacanametaṃ niyogavacanametaṃ apaṇṇakavacanametaṃ avatthāpanavacanametaṃ – addhāti. Āyasmāti piyavacanametaṃ garuvacanametaṃ sagāravasappatissādhivacanametaṃ – āyasmāti. Pattovāti adhigato vā. Pāpuṇissati vāti adhigamissati vā.
སུཏྟནྟནིདྡེསོ ཏཏིཡོ།
Suttantaniddeso tatiyo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༣. ཏཏིཡསུཏྟནྟནིདྡེསཝཎྞནཱ • 3. Tatiyasuttantaniddesavaṇṇanā
