| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
தத்ரித³ங் பகிண்ணகங்
Tatridaṃ pakiṇṇakaṃ
அட்ட²மஸிக்கா²பத³ங் பரேன அத்தனோ அத்தா²ய தி³ய்யமானஸ்ஸ வா பாரிவத்தகபா⁴வேன தி³ய்யமானஸ்ஸ வா பங்ஸுகூலஸ்ஸ வா ரூபியஸ்ஸ உக்³க³ண்ஹனஉக்³க³ண்ஹாபனஸாதி³யனானி படிக்கி²பதி.
Aṭṭhamasikkhāpadaṃ parena attano atthāya diyyamānassa vā pārivattakabhāvena diyyamānassa vā paṃsukūlassa vā rūpiyassa uggaṇhanauggaṇhāpanasādiyanāni paṭikkhipati.
நவமங் பரஸ்ஸ வா அத்தனோ வா ரூபியபரிவத்தனங் படிக்கி²பதி.
Navamaṃ parassa vā attano vā rūpiyaparivattanaṃ paṭikkhipati.
த³ஸமங் அரூபியபரிவத்தனங். ‘‘அரூபியே அரூபியஸஞ்ஞீ பஞ்சன்னங் ஸஹ அனாபத்தீ’’தி (பாரா॰ 591; வி॰ வி॰ டீ॰ 1.591; வஜிர॰ டீ॰ பாராஜிக 587) ச வசனங் இதரேஹி ஸஹ ஆபத்தீதி தீ³பேதி. அரூபியஞ்ச து³க்கடவத்து². தஸ்மா தஸ்ஸ பரிவத்தனே ஸதி நிஸ்ஸக்³கி³யந்தி ஏகந்தேன வுத்தங். பஞ்சன்னங் ஸஹ து³க்கடவத்தூ²னங் பரிவத்தனே அனாபத்திப்பஸங்க³தோ அனாபத்தி ஏவாதி போராணாதி சே? ந, கப்பியவத்தூ²னங்யேவ தத்த² ஆக³தத்தா. யதி³ கப்பியவத்து² நிஸ்ஸக்³கி³யங், பகே³வ து³க்கடவத்தூ²தி சே? ந, ஆபத்திக³ருகலஹுகபா⁴வேன வத்து²க³ருகலஹுகனியமாபா⁴வதோ.
Dasamaṃ arūpiyaparivattanaṃ. ‘‘Arūpiye arūpiyasaññī pañcannaṃ saha anāpattī’’ti (pārā. 591; vi. vi. ṭī. 1.591; vajira. ṭī. pārājika 587) ca vacanaṃ itarehi saha āpattīti dīpeti. Arūpiyañca dukkaṭavatthu. Tasmā tassa parivattane sati nissaggiyanti ekantena vuttaṃ. Pañcannaṃ saha dukkaṭavatthūnaṃ parivattane anāpattippasaṅgato anāpatti evāti porāṇāti ce? Na, kappiyavatthūnaṃyeva tattha āgatattā. Yadi kappiyavatthu nissaggiyaṃ, pageva dukkaṭavatthūti ce? Na, āpattigarukalahukabhāvena vatthugarukalahukaniyamābhāvato.
நிஸ்ஸக்³கி³யவத்து²தோ ஹி முத்தாமணிவேளுரியாதி³ மஹக்³க⁴ப்பஹோனகம்பி து³க்கடவத்தூ²தி கத்வா நிஸ்ஸக்³கி³யவத்து²தோ முத்தாதி³ லஹுகங் ஹோதி. லஹுகேபி வத்து²ஸ்மிங் யதே²வ து³க்கடவத்து²னோ படிக்³க³ஹணே து³க்கடங், ததே²வ தஸ்ஸ வா தேன வா சேதாபனேபி து³க்கடங் யுத்தந்தி (பாரா॰ அட்ட²॰ 2.589) அட்ட²கதா²சரியா.
Nissaggiyavatthuto hi muttāmaṇiveḷuriyādi mahagghappahonakampi dukkaṭavatthūti katvā nissaggiyavatthuto muttādi lahukaṃ hoti. Lahukepi vatthusmiṃ yatheva dukkaṭavatthuno paṭiggahaṇe dukkaṭaṃ, tatheva tassa vā tena vā cetāpanepi dukkaṭaṃ yuttanti (pārā. aṭṭha. 2.589) aṭṭhakathācariyā.
அத² வா யங் வுத்தங் ‘‘கப்பியவத்தூ²னங்யேவ தத்த² ஆக³தத்தா’’தி, தத்த² கிஞ்சாபி து³க்கடவத்தூ²னிபி அதி⁴ப்பேதானி, ந பன பாளியங் வுத்தானி அனாபத்திவாரப்பஸங்க³ப⁴யாதி வுத்தங் ஹோதி. முத்தாதீ³ஸுபி வுத்தேஸு அனாபத்தியங் கப்பியகாரகஸ்ஸ ஆசிக்க²தி, ‘‘இத³ங் முத்தாதி³ அம்ஹாகங் அத்தி², அம்ஹாகஞ்ச இமினா ச இமினா ச வேளுரியாதி³னா அத்தோ²’’தி ப⁴ணதி, த³ஸமேன ஆபஜ்ஜதீதி அதி⁴ப்பாயோ ஸியா. யஸ்மா ச இத³ங் கப்பியகாரகஸ்ஸ ஆசிக்க²னாதி³ஸங்வோஹாரோ ச, தஸ்மா தங் நவமேன வுத்தந்தி வேதி³தப்³ப³ங். கிஞ்சாபி கயவிக்கயேவ ஹோதி கப்பியவத்தூ²ஹி அனுஞ்ஞாதங், இமினாவ நயேன கிஞ்சாபி து³க்கடவத்து²பி த³ஸமே அதி⁴ப்பேதங் ஆபஜ்ஜதி, அட்ட²கதா²விரோத⁴தோ பன நாதி⁴ப்பேதமிச்சேவ க³ஹேதப்³போ³.
Atha vā yaṃ vuttaṃ ‘‘kappiyavatthūnaṃyeva tattha āgatattā’’ti, tattha kiñcāpi dukkaṭavatthūnipi adhippetāni, na pana pāḷiyaṃ vuttāni anāpattivārappasaṅgabhayāti vuttaṃ hoti. Muttādīsupi vuttesu anāpattiyaṃ kappiyakārakassa ācikkhati, ‘‘idaṃ muttādi amhākaṃ atthi, amhākañca iminā ca iminā ca veḷuriyādinā attho’’ti bhaṇati, dasamena āpajjatīti adhippāyo siyā. Yasmā ca idaṃ kappiyakārakassa ācikkhanādisaṃvohāro ca, tasmā taṃ navamena vuttanti veditabbaṃ. Kiñcāpi kayavikkayeva hoti kappiyavatthūhi anuññātaṃ, imināva nayena kiñcāpi dukkaṭavatthupi dasame adhippetaṃ āpajjati, aṭṭhakathāvirodhato pana nādhippetamicceva gahetabbo.
கா பனெத்த² காரணச்சா²யாதி, பஞ்சன்னங் ஸஹ தத்த² அனாபத்திப்பஸங்க³தோ அனாபத்தி ஏவாதி சே? ந, தத்த² அனாக³தத்தா. அனாக³தகாரணா வுத்தந்தி சே? ந, பஞ்சன்னங் ஸஹ ஆபத்திவத்து²கஸ்ஸ அனாபத்திவாரலாபே⁴ விஸேஸகாரணாபா⁴வா, அகப்பியத்தா பஞ்சன்னங் ஸஹாபி ஆபத்தியா ப⁴விதப்³ப³ந்தி ஸித்³தோ⁴ அட்ட²கதா²வாதோ³.
Kā panettha kāraṇacchāyāti, pañcannaṃ saha tattha anāpattippasaṅgato anāpatti evāti ce? Na, tattha anāgatattā. Anāgatakāraṇā vuttanti ce? Na, pañcannaṃ saha āpattivatthukassa anāpattivāralābhe visesakāraṇābhāvā, akappiyattā pañcannaṃ sahāpi āpattiyā bhavitabbanti siddho aṭṭhakathāvādo.
அபரோ நயோ – யதி³ து³க்கடவத்து²னா கயவிக்கயே நிஸ்ஸக்³கி³யங், கப்பியவத்து²ம்ஹி வுத்தபரியாயோ தத்த² லப்³பெ⁴ய்ய, ந பன லப்³ப⁴தீதி நவமே ஏவ தானி வத்தப்³பா³னி. தஸ்மா ஸங்வோஹாரோ நாம கயவிக்கயோபி அஞ்ஞதா² பரிவத்தனங் பரியாதி³யித்வா பவத்தோ, கயவிக்கயஞ்ச மோசெத்வா ‘‘இமினா இமங் தே³ஹீ’தி சேதாபேதி, வட்டதீ’’தி அவத்வா த³ஸமஸ்ஸ அனாபத்திவாரே வுத்தனயேனேவ தேஸங் பரிவத்தனே நிஸ்ஸக்³கி³யானுமதிவிரோத⁴தோ அட்ட²கதா²யங் வுத்தனயேனேவ து³க்கடவத்து²னா சேதாபனே து³க்கடமேவ. நேஸங் கயவிக்கயேன நிஸ்ஸக்³கி³யந்தி சே? ந, ஸப்³ப³ஸ்ஸபி கயவிக்கயத்தா. தேனேவ வுத்தங் ‘‘அந்த⁴கட்ட²கதா²யங் பன ‘ஸசே கயவிக்கயங் ஸமாபஜ்ஜெய்ய, நிஸ்ஸக்³கி³யங் பாசித்திய’ந்தி பா⁴ஸிதங், தங் து³ப்³பா⁴ஸிதங். கஸ்மா? ந ஹி தா³னக்³க³ஹணதோ அஞ்ஞோ கயவிக்கயோ நாம அத்தீ²’’தி (பாரா॰ அட்ட²॰ 2.589), அத்தனோ மதியா கயவிக்கயலக்க²ணஸம்மதே த³ஸமஸ்ஸ அனாபத்திவாரே வுத்தனயேனேவ தேஸங் பரிவத்தனே நிஸ்ஸக்³கி³யானுமதிவிரோத⁴தோ ச. ப⁴வது வா அத்தனோ படிஸித்³த⁴மித³ங் காரணங், த³ஸமே அவஸ்ஸமேவ ஜானிதப்³பா³னீதி தானி கயவிக்கயானேவாதி தேஸங் நிஸ்ஸக்³கி³யபா⁴வஞ்ச க³தானீதி ஏவம்பி ஸித்³தோ⁴ அட்ட²கதா²வாதோ³.
Aparo nayo – yadi dukkaṭavatthunā kayavikkaye nissaggiyaṃ, kappiyavatthumhi vuttapariyāyo tattha labbheyya, na pana labbhatīti navame eva tāni vattabbāni. Tasmā saṃvohāro nāma kayavikkayopi aññathā parivattanaṃ pariyādiyitvā pavatto, kayavikkayañca mocetvā ‘‘iminā imaṃ dehī’ti cetāpeti, vaṭṭatī’’ti avatvā dasamassa anāpattivāre vuttanayeneva tesaṃ parivattane nissaggiyānumativirodhato aṭṭhakathāyaṃ vuttanayeneva dukkaṭavatthunā cetāpane dukkaṭameva. Nesaṃ kayavikkayena nissaggiyanti ce? Na, sabbassapi kayavikkayattā. Teneva vuttaṃ ‘‘andhakaṭṭhakathāyaṃ pana ‘sace kayavikkayaṃ samāpajjeyya, nissaggiyaṃ pācittiya’nti bhāsitaṃ, taṃ dubbhāsitaṃ. Kasmā? Na hi dānaggahaṇato añño kayavikkayo nāma atthī’’ti (pārā. aṭṭha. 2.589), attano matiyā kayavikkayalakkhaṇasammate dasamassa anāpattivāre vuttanayeneva tesaṃ parivattane nissaggiyānumativirodhato ca. Bhavatu vā attano paṭisiddhamidaṃ kāraṇaṃ, dasame avassameva jānitabbānīti tāni kayavikkayānevāti tesaṃ nissaggiyabhāvañca gatānīti evampi siddho aṭṭhakathāvādo.
எத்தா²ஹு போராணா – ‘‘அத்தனோ ஸந்தகங் ரூபியங் பரஹத்த²க³தங் கரோதி அஜ்ஜா²சரதி, து³க்கடங். பரஸ்ஸ ரூபியங் அத்தனோ ஹத்த²க³தங் கரோதி, அட்ட²மேன நிஸ்ஸக்³கி³யங். உக்³க³ஹிதவத்து²பரிவத்தனே கத²ங் ஜாதங்? அப்³போ³ஹாரிகங் ஜாதங். அத² பரஸ்ஸ ரூபியங் அத்தனோ ஹத்த²க³தங் பட²மங் கரோதி, ரூபியப்படிக்³க³ஹணஸ்ஸ கதத்தா அட்ட²மேன நிஸ்ஸக்³கி³யங். அத்தனோ ஸந்தகங் ரூபியங் பரஸ்ஸ ஹத்த²க³தங் பச்சா² கரோதி, ஸங்வோஹாரேன நிஸ்ஸக்³கி³ய’’ந்தி. ‘‘ரூபியஸ்ஸ க³ஹணமத்தேன அட்ட²மேன ஆபத்தி, பச்சா² பரிவத்தனே நவமேனா’’தி ஹி தத்த² வுத்தங், தங் பன யுத்தங். ‘‘அஜ்ஜா²சரதி, து³க்கட’’ந்தி து³வுத்தங். து³க்கடஸ்ஸ அனியமப்பஸங்க³தோ நிஸ்ஸஜ்ஜனவிதா⁴னேஸு த³ஸ்ஸிதோவ. கிங் வுத்தங் ஹோதி – யதி³ த்³வீஹி நிஸ்ஸக்³கி³யேஹி ப⁴விதப்³ப³ங், நிஸ்ஸஜ்ஜனவிதா⁴னே ‘‘அஹங், ப⁴ந்தே, ரூபியங் படிக்³க³ஹேஸிங், நானாப்பகாரகஞ்ச ரூபியஸங்வோஹாரங் ஸமாபஜ்ஜி’’ந்தி வத்தப்³ப³ங் ப⁴வெய்ய ‘‘ரூபியங் சேதாபேதீ’’தி ஸப்³ப³த்த² பாளியங் ரூபியப்படிக்³க³ஹணஸ்ஸ வுத்தத்தா.
Etthāhu porāṇā – ‘‘attano santakaṃ rūpiyaṃ parahatthagataṃ karoti ajjhācarati, dukkaṭaṃ. Parassa rūpiyaṃ attano hatthagataṃ karoti, aṭṭhamena nissaggiyaṃ. Uggahitavatthuparivattane kathaṃ jātaṃ? Abbohārikaṃ jātaṃ. Atha parassa rūpiyaṃ attano hatthagataṃ paṭhamaṃ karoti, rūpiyappaṭiggahaṇassa katattā aṭṭhamena nissaggiyaṃ. Attano santakaṃ rūpiyaṃ parassa hatthagataṃ pacchā karoti, saṃvohārena nissaggiya’’nti. ‘‘Rūpiyassa gahaṇamattena aṭṭhamena āpatti, pacchā parivattane navamenā’’ti hi tattha vuttaṃ, taṃ pana yuttaṃ. ‘‘Ajjhācarati, dukkaṭa’’nti duvuttaṃ. Dukkaṭassa aniyamappasaṅgato nissajjanavidhānesu dassitova. Kiṃ vuttaṃ hoti – yadi dvīhi nissaggiyehi bhavitabbaṃ, nissajjanavidhāne ‘‘ahaṃ, bhante, rūpiyaṃ paṭiggahesiṃ, nānāppakārakañca rūpiyasaṃvohāraṃ samāpajji’’nti vattabbaṃ bhaveyya ‘‘rūpiyaṃ cetāpetī’’ti sabbattha pāḷiyaṃ rūpiyappaṭiggahaṇassa vuttattā.
எத்தாவதா யங் போராணக³ண்டி²பதே³ வுத்தங் ‘‘து³க்கடவத்து²னா கயவிக்கயங் பரிஹரந்தேன சதூஸு நிஸ்ஸக்³கி³யவத்தூ²ஸு ஏகேகஸ்மிங் க³ஹிதே அட்ட²மேன நிஸ்ஸக்³கி³யங் ஹோதி. து³க்கடவத்து²னா து³க்கடவத்து²ந்தி ‘‘இமினா இத³ங் தே³ஹீ’’தி க³ஹிதே தேனேவ நிஸ்ஸக்³கி³யங் ஹோதி. ‘‘கயவிக்கயம்பி நீஹரித்வா க³ஹிதே து³க்கடங், சேதாபிதரூபியக்³க³ஹணே அட்ட²மேன, பரிவத்தனே நவமேனாதிஆதி³னா அத்தனா அனுக்³க³ஹெத்வா கப்பியவஸேன நீஹரித்வா பஞ்சஹி ஸஹத⁴ம்மிகேஹி ஸத்³தி⁴ங் பரிவத்தேதுங் வட்டதீ’’தி, தங் விஸோதி⁴தங் ஹோதி. அபரம்பி தத்த² வுத்தங் ‘‘நிஸ்ஸஜ்ஜிதப்³பே³ அஸதி கத²ங் பாசித்தியங், து³ன்னிஸ்ஸட்ட²ரூபியம்பி ‘ந ச²ட்³டே³தீ’தி வத³ந்தஸ்ஸ விஸ்ஸட்டோ² உபாஸகோ தங் க³ஹெத்வா அஞ்ஞங் சே பி⁴க்கு²னோ தே³தி, கப்பதீ’’தி, தஞ்ச து³வுத்தங். ந ஹி க³ஹிதத்தா ததோ அஞ்ஞங் வத்து² ஹோதி. புன அபரஞ்ச தத்த² வுத்தங் ‘‘இமங் ‘க³ண்ஹாஹீ’தி வத³ந்தஸ்ஸ ஸத்³தா⁴தெ³ய்யவினிபாதது³க்கடங், ‘ஏதங் தே³ஹீ’தி வத³ந்தஸ்ஸ விஞ்ஞத்திது³க்கட’’ந்தி, தஞ்ச து³வுத்தங். தத்த² ஹி பயோக³து³க்கடங் யுத்தங் விய பஞ்ஞாயதி.
Ettāvatā yaṃ porāṇagaṇṭhipade vuttaṃ ‘‘dukkaṭavatthunā kayavikkayaṃ pariharantena catūsu nissaggiyavatthūsu ekekasmiṃ gahite aṭṭhamena nissaggiyaṃ hoti. Dukkaṭavatthunā dukkaṭavatthunti ‘‘iminā idaṃ dehī’’ti gahite teneva nissaggiyaṃ hoti. ‘‘Kayavikkayampi nīharitvā gahite dukkaṭaṃ, cetāpitarūpiyaggahaṇe aṭṭhamena, parivattane navamenātiādinā attanā anuggahetvā kappiyavasena nīharitvā pañcahi sahadhammikehi saddhiṃ parivattetuṃ vaṭṭatī’’ti, taṃ visodhitaṃ hoti. Aparampi tattha vuttaṃ ‘‘nissajjitabbe asati kathaṃ pācittiyaṃ, dunnissaṭṭharūpiyampi ‘na chaḍḍetī’ti vadantassa vissaṭṭho upāsako taṃ gahetvā aññaṃ ce bhikkhuno deti, kappatī’’ti, tañca duvuttaṃ. Na hi gahitattā tato aññaṃ vatthu hoti. Puna aparañca tattha vuttaṃ ‘‘imaṃ ‘gaṇhāhī’ti vadantassa saddhādeyyavinipātadukkaṭaṃ, ‘etaṃ dehī’ti vadantassa viññattidukkaṭa’’nti, tañca duvuttaṃ. Tattha hi payogadukkaṭaṃ yuttaṃ viya paññāyati.
பகிண்ணகங் நிட்டி²தங்.
Pakiṇṇakaṃ niṭṭhitaṃ.
ஏளகலோமவக்³கோ³ து³தியோ.
Eḷakalomavaggo dutiyo.
