| Library / Tipiṭaka / তিপিটক • Tipiṭaka / কঙ্খাৰিতরণী-পুরাণ-টীকা • Kaṅkhāvitaraṇī-purāṇa-ṭīkā |
তত্রিদং পকিণ্ণকং
Tatridaṃ pakiṇṇakaṃ
অট্ঠমসিক্খাপদং পরেন অত্তনো অত্থায দিয্যমানস্স ৰা পারিৰত্তকভাৰেন দিয্যমানস্স ৰা পংসুকূলস্স ৰা রূপিযস্স উগ্গণ্হনউগ্গণ্হাপনসাদিযনানি পটিক্খিপতি।
Aṭṭhamasikkhāpadaṃ parena attano atthāya diyyamānassa vā pārivattakabhāvena diyyamānassa vā paṃsukūlassa vā rūpiyassa uggaṇhanauggaṇhāpanasādiyanāni paṭikkhipati.
নৰমং পরস্স ৰা অত্তনো ৰা রূপিযপরিৰত্তনং পটিক্খিপতি।
Navamaṃ parassa vā attano vā rūpiyaparivattanaṃ paṭikkhipati.
দসমং অরূপিযপরিৰত্তনং। ‘‘অরূপিযে অরূপিযসঞ্ঞী পঞ্চন্নং সহ অনাপত্তী’’তি (পারা॰ ৫৯১; ৰি॰ ৰি॰ টী॰ ১.৫৯১; ৰজির॰ টী॰ পারাজিক ৫৮৭) চ ৰচনং ইতরেহি সহ আপত্তীতি দীপেতি। অরূপিযঞ্চ দুক্কটৰত্থু। তস্মা তস্স পরিৰত্তনে সতি নিস্সগ্গিযন্তি একন্তেন ৰুত্তং। পঞ্চন্নং সহ দুক্কটৰত্থূনং পরিৰত্তনে অনাপত্তিপ্পসঙ্গতো অনাপত্তি এৰাতি পোরাণাতি চে? ন, কপ্পিযৰত্থূনংযেৰ তত্থ আগতত্তা। যদি কপ্পিযৰত্থু নিস্সগ্গিযং, পগেৰ দুক্কটৰত্থূতি চে? ন, আপত্তিগরুকলহুকভাৰেন ৰত্থুগরুকলহুকনিযমাভাৰতো।
Dasamaṃ arūpiyaparivattanaṃ. ‘‘Arūpiye arūpiyasaññī pañcannaṃ saha anāpattī’’ti (pārā. 591; vi. vi. ṭī. 1.591; vajira. ṭī. pārājika 587) ca vacanaṃ itarehi saha āpattīti dīpeti. Arūpiyañca dukkaṭavatthu. Tasmā tassa parivattane sati nissaggiyanti ekantena vuttaṃ. Pañcannaṃ saha dukkaṭavatthūnaṃ parivattane anāpattippasaṅgato anāpatti evāti porāṇāti ce? Na, kappiyavatthūnaṃyeva tattha āgatattā. Yadi kappiyavatthu nissaggiyaṃ, pageva dukkaṭavatthūti ce? Na, āpattigarukalahukabhāvena vatthugarukalahukaniyamābhāvato.
নিস্সগ্গিযৰত্থুতো হি মুত্তামণিৰেল়ুরিযাদি মহগ্ঘপ্পহোনকম্পি দুক্কটৰত্থূতি কত্ৰা নিস্সগ্গিযৰত্থুতো মুত্তাদি লহুকং হোতি। লহুকেপি ৰত্থুস্মিং যথেৰ দুক্কটৰত্থুনো পটিগ্গহণে দুক্কটং, তথেৰ তস্স ৰা তেন ৰা চেতাপনেপি দুক্কটং যুত্তন্তি (পারা॰ অট্ঠ॰ ২.৫৮৯) অট্ঠকথাচরিযা।
Nissaggiyavatthuto hi muttāmaṇiveḷuriyādi mahagghappahonakampi dukkaṭavatthūti katvā nissaggiyavatthuto muttādi lahukaṃ hoti. Lahukepi vatthusmiṃ yatheva dukkaṭavatthuno paṭiggahaṇe dukkaṭaṃ, tatheva tassa vā tena vā cetāpanepi dukkaṭaṃ yuttanti (pārā. aṭṭha. 2.589) aṭṭhakathācariyā.
অথ ৰা যং ৰুত্তং ‘‘কপ্পিযৰত্থূনংযেৰ তত্থ আগতত্তা’’তি, তত্থ কিঞ্চাপি দুক্কটৰত্থূনিপি অধিপ্পেতানি, ন পন পাল়িযং ৰুত্তানি অনাপত্তিৰারপ্পসঙ্গভযাতি ৰুত্তং হোতি। মুত্তাদীসুপি ৰুত্তেসু অনাপত্তিযং কপ্পিযকারকস্স আচিক্খতি, ‘‘ইদং মুত্তাদি অম্হাকং অত্থি, অম্হাকঞ্চ ইমিনা চ ইমিনা চ ৰেল়ুরিযাদিনা অত্থো’’তি ভণতি, দসমেন আপজ্জতীতি অধিপ্পাযো সিযা। যস্মা চ ইদং কপ্পিযকারকস্স আচিক্খনাদিসংৰোহারো চ, তস্মা তং নৰমেন ৰুত্তন্তি ৰেদিতব্বং। কিঞ্চাপি কযৰিক্কযেৰ হোতি কপ্পিযৰত্থূহি অনুঞ্ঞাতং, ইমিনাৰ নযেন কিঞ্চাপি দুক্কটৰত্থুপি দসমে অধিপ্পেতং আপজ্জতি, অট্ঠকথাৰিরোধতো পন নাধিপ্পেতমিচ্চেৰ গহেতব্বো।
Atha vā yaṃ vuttaṃ ‘‘kappiyavatthūnaṃyeva tattha āgatattā’’ti, tattha kiñcāpi dukkaṭavatthūnipi adhippetāni, na pana pāḷiyaṃ vuttāni anāpattivārappasaṅgabhayāti vuttaṃ hoti. Muttādīsupi vuttesu anāpattiyaṃ kappiyakārakassa ācikkhati, ‘‘idaṃ muttādi amhākaṃ atthi, amhākañca iminā ca iminā ca veḷuriyādinā attho’’ti bhaṇati, dasamena āpajjatīti adhippāyo siyā. Yasmā ca idaṃ kappiyakārakassa ācikkhanādisaṃvohāro ca, tasmā taṃ navamena vuttanti veditabbaṃ. Kiñcāpi kayavikkayeva hoti kappiyavatthūhi anuññātaṃ, imināva nayena kiñcāpi dukkaṭavatthupi dasame adhippetaṃ āpajjati, aṭṭhakathāvirodhato pana nādhippetamicceva gahetabbo.
কা পনেত্থ কারণচ্ছাযাতি, পঞ্চন্নং সহ তত্থ অনাপত্তিপ্পসঙ্গতো অনাপত্তি এৰাতি চে? ন, তত্থ অনাগতত্তা। অনাগতকারণা ৰুত্তন্তি চে? ন, পঞ্চন্নং সহ আপত্তিৰত্থুকস্স অনাপত্তিৰারলাভে ৰিসেসকারণাভাৰা, অকপ্পিযত্তা পঞ্চন্নং সহাপি আপত্তিযা ভৰিতব্বন্তি সিদ্ধো অট্ঠকথাৰাদো।
Kā panettha kāraṇacchāyāti, pañcannaṃ saha tattha anāpattippasaṅgato anāpatti evāti ce? Na, tattha anāgatattā. Anāgatakāraṇā vuttanti ce? Na, pañcannaṃ saha āpattivatthukassa anāpattivāralābhe visesakāraṇābhāvā, akappiyattā pañcannaṃ sahāpi āpattiyā bhavitabbanti siddho aṭṭhakathāvādo.
অপরো নযো – যদি দুক্কটৰত্থুনা কযৰিক্কযে নিস্সগ্গিযং, কপ্পিযৰত্থুম্হি ৰুত্তপরিযাযো তত্থ লব্ভেয্য, ন পন লব্ভতীতি নৰমে এৰ তানি ৰত্তব্বানি। তস্মা সংৰোহারো নাম কযৰিক্কযোপি অঞ্ঞথা পরিৰত্তনং পরিযাদিযিত্ৰা পৰত্তো, কযৰিক্কযঞ্চ মোচেত্ৰা ‘‘ইমিনা ইমং দেহী’তি চেতাপেতি, ৰট্টতী’’তি অৰত্ৰা দসমস্স অনাপত্তিৰারে ৰুত্তনযেনেৰ তেসং পরিৰত্তনে নিস্সগ্গিযানুমতিৰিরোধতো অট্ঠকথাযং ৰুত্তনযেনেৰ দুক্কটৰত্থুনা চেতাপনে দুক্কটমেৰ। নেসং কযৰিক্কযেন নিস্সগ্গিযন্তি চে? ন, সব্বস্সপি কযৰিক্কযত্তা। তেনেৰ ৰুত্তং ‘‘অন্ধকট্ঠকথাযং পন ‘সচে কযৰিক্কযং সমাপজ্জেয্য, নিস্সগ্গিযং পাচিত্তিয’ন্তি ভাসিতং, তং দুব্ভাসিতং। কস্মা? ন হি দানগ্গহণতো অঞ্ঞো কযৰিক্কযো নাম অত্থী’’তি (পারা॰ অট্ঠ॰ ২.৫৮৯), অত্তনো মতিযা কযৰিক্কযলক্খণসম্মতে দসমস্স অনাপত্তিৰারে ৰুত্তনযেনেৰ তেসং পরিৰত্তনে নিস্সগ্গিযানুমতিৰিরোধতো চ। ভৰতু ৰা অত্তনো পটিসিদ্ধমিদং কারণং, দসমে অৰস্সমেৰ জানিতব্বানীতি তানি কযৰিক্কযানেৰাতি তেসং নিস্সগ্গিযভাৰঞ্চ গতানীতি এৰম্পি সিদ্ধো অট্ঠকথাৰাদো।
Aparo nayo – yadi dukkaṭavatthunā kayavikkaye nissaggiyaṃ, kappiyavatthumhi vuttapariyāyo tattha labbheyya, na pana labbhatīti navame eva tāni vattabbāni. Tasmā saṃvohāro nāma kayavikkayopi aññathā parivattanaṃ pariyādiyitvā pavatto, kayavikkayañca mocetvā ‘‘iminā imaṃ dehī’ti cetāpeti, vaṭṭatī’’ti avatvā dasamassa anāpattivāre vuttanayeneva tesaṃ parivattane nissaggiyānumativirodhato aṭṭhakathāyaṃ vuttanayeneva dukkaṭavatthunā cetāpane dukkaṭameva. Nesaṃ kayavikkayena nissaggiyanti ce? Na, sabbassapi kayavikkayattā. Teneva vuttaṃ ‘‘andhakaṭṭhakathāyaṃ pana ‘sace kayavikkayaṃ samāpajjeyya, nissaggiyaṃ pācittiya’nti bhāsitaṃ, taṃ dubbhāsitaṃ. Kasmā? Na hi dānaggahaṇato añño kayavikkayo nāma atthī’’ti (pārā. aṭṭha. 2.589), attano matiyā kayavikkayalakkhaṇasammate dasamassa anāpattivāre vuttanayeneva tesaṃ parivattane nissaggiyānumativirodhato ca. Bhavatu vā attano paṭisiddhamidaṃ kāraṇaṃ, dasame avassameva jānitabbānīti tāni kayavikkayānevāti tesaṃ nissaggiyabhāvañca gatānīti evampi siddho aṭṭhakathāvādo.
এত্থাহু পোরাণা – ‘‘অত্তনো সন্তকং রূপিযং পরহত্থগতং করোতি অজ্ঝাচরতি, দুক্কটং। পরস্স রূপিযং অত্তনো হত্থগতং করোতি, অট্ঠমেন নিস্সগ্গিযং। উগ্গহিতৰত্থুপরিৰত্তনে কথং জাতং? অব্বোহারিকং জাতং। অথ পরস্স রূপিযং অত্তনো হত্থগতং পঠমং করোতি, রূপিযপ্পটিগ্গহণস্স কতত্তা অট্ঠমেন নিস্সগ্গিযং। অত্তনো সন্তকং রূপিযং পরস্স হত্থগতং পচ্ছা করোতি, সংৰোহারেন নিস্সগ্গিয’’ন্তি। ‘‘রূপিযস্স গহণমত্তেন অট্ঠমেন আপত্তি, পচ্ছা পরিৰত্তনে নৰমেনা’’তি হি তত্থ ৰুত্তং, তং পন যুত্তং। ‘‘অজ্ঝাচরতি, দুক্কট’’ন্তি দুৰুত্তং। দুক্কটস্স অনিযমপ্পসঙ্গতো নিস্সজ্জনৰিধানেসু দস্সিতোৰ। কিং ৰুত্তং হোতি – যদি দ্ৰীহি নিস্সগ্গিযেহি ভৰিতব্বং, নিস্সজ্জনৰিধানে ‘‘অহং, ভন্তে, রূপিযং পটিগ্গহেসিং, নানাপ্পকারকঞ্চ রূপিযসংৰোহারং সমাপজ্জি’’ন্তি ৰত্তব্বং ভৰেয্য ‘‘রূপিযং চেতাপেতী’’তি সব্বত্থ পাল়িযং রূপিযপ্পটিগ্গহণস্স ৰুত্তত্তা।
Etthāhu porāṇā – ‘‘attano santakaṃ rūpiyaṃ parahatthagataṃ karoti ajjhācarati, dukkaṭaṃ. Parassa rūpiyaṃ attano hatthagataṃ karoti, aṭṭhamena nissaggiyaṃ. Uggahitavatthuparivattane kathaṃ jātaṃ? Abbohārikaṃ jātaṃ. Atha parassa rūpiyaṃ attano hatthagataṃ paṭhamaṃ karoti, rūpiyappaṭiggahaṇassa katattā aṭṭhamena nissaggiyaṃ. Attano santakaṃ rūpiyaṃ parassa hatthagataṃ pacchā karoti, saṃvohārena nissaggiya’’nti. ‘‘Rūpiyassa gahaṇamattena aṭṭhamena āpatti, pacchā parivattane navamenā’’ti hi tattha vuttaṃ, taṃ pana yuttaṃ. ‘‘Ajjhācarati, dukkaṭa’’nti duvuttaṃ. Dukkaṭassa aniyamappasaṅgato nissajjanavidhānesu dassitova. Kiṃ vuttaṃ hoti – yadi dvīhi nissaggiyehi bhavitabbaṃ, nissajjanavidhāne ‘‘ahaṃ, bhante, rūpiyaṃ paṭiggahesiṃ, nānāppakārakañca rūpiyasaṃvohāraṃ samāpajji’’nti vattabbaṃ bhaveyya ‘‘rūpiyaṃ cetāpetī’’ti sabbattha pāḷiyaṃ rūpiyappaṭiggahaṇassa vuttattā.
এত্তাৰতা যং পোরাণগণ্ঠিপদে ৰুত্তং ‘‘দুক্কটৰত্থুনা কযৰিক্কযং পরিহরন্তেন চতূসু নিস্সগ্গিযৰত্থূসু একেকস্মিং গহিতে অট্ঠমেন নিস্সগ্গিযং হোতি। দুক্কটৰত্থুনা দুক্কটৰত্থুন্তি ‘‘ইমিনা ইদং দেহী’’তি গহিতে তেনেৰ নিস্সগ্গিযং হোতি। ‘‘কযৰিক্কযম্পি নীহরিত্ৰা গহিতে দুক্কটং, চেতাপিতরূপিযগ্গহণে অট্ঠমেন, পরিৰত্তনে নৰমেনাতিআদিনা অত্তনা অনুগ্গহেত্ৰা কপ্পিযৰসেন নীহরিত্ৰা পঞ্চহি সহধম্মিকেহি সদ্ধিং পরিৰত্তেতুং ৰট্টতী’’তি, তং ৰিসোধিতং হোতি। অপরম্পি তত্থ ৰুত্তং ‘‘নিস্সজ্জিতব্বে অসতি কথং পাচিত্তিযং, দুন্নিস্সট্ঠরূপিযম্পি ‘ন ছড্ডেতী’তি ৰদন্তস্স ৰিস্সট্ঠো উপাসকো তং গহেত্ৰা অঞ্ঞং চে ভিক্খুনো দেতি, কপ্পতী’’তি, তঞ্চ দুৰুত্তং। ন হি গহিতত্তা ততো অঞ্ঞং ৰত্থু হোতি। পুন অপরঞ্চ তত্থ ৰুত্তং ‘‘ইমং ‘গণ্হাহী’তি ৰদন্তস্স সদ্ধাদেয্যৰিনিপাতদুক্কটং, ‘এতং দেহী’তি ৰদন্তস্স ৰিঞ্ঞত্তিদুক্কট’’ন্তি, তঞ্চ দুৰুত্তং। তত্থ হি পযোগদুক্কটং যুত্তং ৰিয পঞ্ঞাযতি।
Ettāvatā yaṃ porāṇagaṇṭhipade vuttaṃ ‘‘dukkaṭavatthunā kayavikkayaṃ pariharantena catūsu nissaggiyavatthūsu ekekasmiṃ gahite aṭṭhamena nissaggiyaṃ hoti. Dukkaṭavatthunā dukkaṭavatthunti ‘‘iminā idaṃ dehī’’ti gahite teneva nissaggiyaṃ hoti. ‘‘Kayavikkayampi nīharitvā gahite dukkaṭaṃ, cetāpitarūpiyaggahaṇe aṭṭhamena, parivattane navamenātiādinā attanā anuggahetvā kappiyavasena nīharitvā pañcahi sahadhammikehi saddhiṃ parivattetuṃ vaṭṭatī’’ti, taṃ visodhitaṃ hoti. Aparampi tattha vuttaṃ ‘‘nissajjitabbe asati kathaṃ pācittiyaṃ, dunnissaṭṭharūpiyampi ‘na chaḍḍetī’ti vadantassa vissaṭṭho upāsako taṃ gahetvā aññaṃ ce bhikkhuno deti, kappatī’’ti, tañca duvuttaṃ. Na hi gahitattā tato aññaṃ vatthu hoti. Puna aparañca tattha vuttaṃ ‘‘imaṃ ‘gaṇhāhī’ti vadantassa saddhādeyyavinipātadukkaṭaṃ, ‘etaṃ dehī’ti vadantassa viññattidukkaṭa’’nti, tañca duvuttaṃ. Tattha hi payogadukkaṭaṃ yuttaṃ viya paññāyati.
পকিণ্ণকং নিট্ঠিতং।
Pakiṇṇakaṃ niṭṭhitaṃ.
এল়কলোমৰগ্গো দুতিযো।
Eḷakalomavaggo dutiyo.
