| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
7. ததுத்தரிஸிக்கா²பத³ங்
7. Tatuttarisikkhāpadaṃ
522. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² அச்சி²ன்னசீவரகே பி⁴க்கூ² உபஸங்கமித்வா ஏவங் வத³ந்தி – ‘‘ப⁴க³வதா, ஆவுஸோ, அனுஞ்ஞாதங் – ‘அச்சி²ன்னசீவரஸ்ஸ வா நட்ட²சீவரஸ்ஸ வா அஞ்ஞாதகங் க³ஹபதிங் வா க³ஹபதானிங் வா சீவரங் விஞ்ஞாபேதுங்’; விஞ்ஞாபேத², ஆவுஸோ, சீவர’’ந்தி. ‘‘அலங், ஆவுஸோ, லத்³த⁴ங் அம்ஹேஹி சீவர’’ந்தி. ‘‘மயங் ஆயஸ்மந்தானங் விஞ்ஞாபேமா’’தி. ‘‘விஞ்ஞாபேத², ஆவுஸோ’’தி. அத² கோ² ச²ப்³ப³க்³கி³யா பி⁴க்கூ² க³ஹபதிகே உபஸங்கமித்வா ஏதத³வோசுங் – ‘‘அச்சி²ன்னசீவரகா, ஆவுஸோ, பி⁴க்கூ² ஆக³தா. தே³த² நேஸங் சீவரானீ’’தி, ப³ஹுங் சீவரங் விஞ்ஞாபேஸுங்.
522. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū acchinnacīvarake bhikkhū upasaṅkamitvā evaṃ vadanti – ‘‘bhagavatā, āvuso, anuññātaṃ – ‘acchinnacīvarassa vā naṭṭhacīvarassa vā aññātakaṃ gahapatiṃ vā gahapatāniṃ vā cīvaraṃ viññāpetuṃ’; viññāpetha, āvuso, cīvara’’nti. ‘‘Alaṃ, āvuso, laddhaṃ amhehi cīvara’’nti. ‘‘Mayaṃ āyasmantānaṃ viññāpemā’’ti. ‘‘Viññāpetha, āvuso’’ti. Atha kho chabbaggiyā bhikkhū gahapatike upasaṅkamitvā etadavocuṃ – ‘‘acchinnacīvarakā, āvuso, bhikkhū āgatā. Detha nesaṃ cīvarānī’’ti, bahuṃ cīvaraṃ viññāpesuṃ.
தேன கோ² பன ஸமயேன அஞ்ஞதரோ புரிஸோ ஸபா⁴யங் நிஸின்னோ அஞ்ஞதரங் புரிஸங் ஏதத³வோச – ‘‘அச்சி²ன்னசீவரகா அய்யோ பி⁴க்கூ² ஆக³தா. தேஸங் மயா சீவரங் தி³ன்ன’’ந்தி. ஸோபி ஏவமாஹ – ‘‘மயாபி தி³ன்ன’’ந்தி. அபரோபி ஏவமாஹ – ‘‘மயாபி தி³ன்ன’’ந்தி. தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா ந மத்தங் ஜானித்வா ப³ஹுங் சீவரங் விஞ்ஞாபெஸ்ஸந்தி, து³ஸ்ஸவாணிஜ்ஜங் வா ஸமணா ஸக்யபுத்தியா கரிஸ்ஸந்தி, பக்³கா³ஹிகஸாலங் 1 வா பஸாரெஸ்ஸந்தீ’’தி! அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² ந மத்தங் ஜானித்வா ப³ஹுங் சீவரங் விஞ்ஞாபெஸ்ஸந்தீ’’தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர தும்ஹே, பி⁴க்க²வே, ந மத்தங் ஜானித்வா ப³ஹுங் சீவரங் விஞ்ஞாபேதா²’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம தும்ஹே, மோக⁴புரிஸா, ந மத்தங் ஜானித்வா ப³ஹுங் சீவரங் விஞ்ஞாபெஸ்ஸத²! நேதங், மோக⁴புரிஸா, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
Tena kho pana samayena aññataro puriso sabhāyaṃ nisinno aññataraṃ purisaṃ etadavoca – ‘‘acchinnacīvarakā ayyo bhikkhū āgatā. Tesaṃ mayā cīvaraṃ dinna’’nti. Sopi evamāha – ‘‘mayāpi dinna’’nti. Aparopi evamāha – ‘‘mayāpi dinna’’nti. Te ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā bahuṃ cīvaraṃ viññāpessanti, dussavāṇijjaṃ vā samaṇā sakyaputtiyā karissanti, paggāhikasālaṃ 2 vā pasāressantī’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū na mattaṃ jānitvā bahuṃ cīvaraṃ viññāpessantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, na mattaṃ jānitvā bahuṃ cīvaraṃ viññāpethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, na mattaṃ jānitvā bahuṃ cīvaraṃ viññāpessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
523. ‘‘தஞ்சே அஞ்ஞாதகோ க³ஹபதி வா க³ஹபதானீ வா ப³ஹூஹி சீவரேஹி அபி⁴ஹட்டு²ங் பவாரெய்ய ஸந்தருத்தரபரமங் தேன பி⁴க்கு²னா ததோ சீவரங் ஸாதி³தப்³ப³ங். ததோ சே உத்தரி ஸாதி³யெய்ய, நிஸ்ஸக்³கி³யங் பாசித்திய’’ந்தி.
523.‘‘Tañce aññātako gahapati vā gahapatānī vā bahūhi cīvarehi abhihaṭṭhuṃ pavāreyya santaruttaraparamaṃ tena bhikkhunā tato cīvaraṃ sāditabbaṃ. Tato ce uttari sādiyeyya, nissaggiyaṃ pācittiya’’nti.
524. தஞ்சேதி அச்சி²ன்னசீவரகங் பி⁴க்கு²ங்.
524.Tañceti acchinnacīvarakaṃ bhikkhuṃ.
அஞ்ஞாதகோ நாம மாதிதோ வா பிதிதோ வா யாவ ஸத்தமா பிதாமஹயுகா³ அஸம்ப³த்³தோ⁴.
Aññātako nāma mātito vā pitito vā yāva sattamā pitāmahayugā asambaddho.
க³ஹபதி நாம யோ கோசி அகா³ரங் அஜ்ஜா²வஸதி.
Gahapati nāma yo koci agāraṃ ajjhāvasati.
க³ஹபதானீ நாம யா காசி அகா³ரங் அஜ்ஜா²வஸதி.
Gahapatānī nāma yā kāci agāraṃ ajjhāvasati.
ப³ஹூஹி சீவரேஹீதி ப³ஹுகேஹி சீவரேஹி.
Bahūhi cīvarehīti bahukehi cīvarehi.
அபி⁴ஹட்டு²ங் பவாரெய்யாதி யாவதகங் இச்ச²ஸி தாவதகங் க³ண்ஹாஹீதி.
Abhihaṭṭhuṃ pavāreyyāti yāvatakaṃ icchasi tāvatakaṃ gaṇhāhīti.
ஸந்தருத்தரபரமங் தேன பி⁴க்கு²னா ததோ சீவரங் ஸாதி³தப்³ப³ந்தி ஸசே தீணி நட்டா²னி ஹொந்தி த்³வே ஸாதி³தப்³பா³னி, த்³வே நட்டா²னி ஏகங் ஸாதி³தப்³ப³ங், ஏகங் நட்ட²ங் ந கிஞ்சி ஸாதி³தப்³ப³ங்.
Santaruttaraparamaṃtena bhikkhunā tato cīvaraṃ sāditabbanti sace tīṇi naṭṭhāni honti dve sāditabbāni, dve naṭṭhāni ekaṃ sāditabbaṃ, ekaṃ naṭṭhaṃ na kiñci sāditabbaṃ.
ததோ சே உத்தரி ஸாதி³யெய்யாதி ததுத்தரி விஞ்ஞாபேதி, பயோகே³ து³க்கடங். படிலாபே⁴ன நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங்…பே॰… இத³ங் மே, ப⁴ந்தே, சீவரங் அஞ்ஞாதகங் க³ஹபதிகங் உபஸங்கமித்வா ததுத்தரி விஞ்ஞாபிதங் நிஸ்ஸக்³கி³யங். இமாஹங் ஸங்க⁴ஸ்ஸ நிஸ்ஸஜ்ஜாமீதி…பே॰… த³தெ³ய்யாதி…பே॰… த³தெ³ய்யுந்தி…பே॰… ஆயஸ்மதோ த³ம்மீதி.
Tato ce uttari sādiyeyyāti tatuttari viññāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, cīvaraṃ aññātakaṃ gahapatikaṃ upasaṅkamitvā tatuttari viññāpitaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
525. அஞ்ஞாதகே அஞ்ஞாதகஸஞ்ஞீ ததுத்தரி சீவரங் விஞ்ஞாபேதி, நிஸ்ஸக்³கி³யங் பாசித்தியங். அஞ்ஞாதகே வேமதிகோ ததுத்தரி சீவரங் விஞ்ஞாபேதி, நிஸ்ஸக்³கி³யங் பாசித்தியங். அஞ்ஞாதகே ஞாதகஸஞ்ஞீ ததுத்தரி சீவரங் விஞ்ஞாபேதி, நிஸ்ஸக்³கி³யங் பாசித்தியங்.
525. Aññātake aññātakasaññī tatuttari cīvaraṃ viññāpeti, nissaggiyaṃ pācittiyaṃ. Aññātake vematiko tatuttari cīvaraṃ viññāpeti, nissaggiyaṃ pācittiyaṃ. Aññātake ñātakasaññī tatuttari cīvaraṃ viññāpeti, nissaggiyaṃ pācittiyaṃ.
ஞாதகே அஞ்ஞாதகஸஞ்ஞீ, ஆபத்தி து³க்கடஸ்ஸ. ஞாதகே வேமதிகோ, ஆபத்தி து³க்கடஸ்ஸ. ஞாதகே ஞாதகஸஞ்ஞீ, அனாபத்தி.
Ñātake aññātakasaññī, āpatti dukkaṭassa. Ñātake vematiko, āpatti dukkaṭassa. Ñātake ñātakasaññī, anāpatti.
526. அனாபத்தி – ‘‘ஸேஸகங் ஆஹரிஸ்ஸாமீ’’தி ஹரந்தோ க³ச்ச²தி, ‘‘ஸேஸகங் துய்ஹேவ ஹோதூ’’தி தெ³ந்தி, ந அச்சி²ன்னகாரணா தெ³ந்தி, ந நட்ட²காரணா தெ³ந்தி, ஞாதகானங், பவாரிதானங், அத்தனோ த⁴னேன, உம்மத்தகஸ்ஸ, ஆதி³கம்மிகஸ்ஸாதி.
526. Anāpatti – ‘‘sesakaṃ āharissāmī’’ti haranto gacchati, ‘‘sesakaṃ tuyheva hotū’’ti denti, na acchinnakāraṇā denti, na naṭṭhakāraṇā denti, ñātakānaṃ, pavāritānaṃ, attano dhanena, ummattakassa, ādikammikassāti.
ததுத்தரிஸிக்கா²பத³ங் நிட்டி²தங் ஸத்தமங்.
Tatuttarisikkhāpadaṃ niṭṭhitaṃ sattamaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 7. ததுத்தரிஸிக்கா²பத³வண்ணனா • 7. Tatuttarisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 7. ததுத்தரிஸிக்கா²பத³வண்ணனா • 7. Tatuttarisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. ததுத்தரிஸிக்கா²பத³வண்ணனா • 7. Tatuttarisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 7. ததுத்தரிஸிக்கா²பத³வண்ணனா • 7. Tatuttarisikkhāpadavaṇṇanā
