| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
7. ததுத்தரிஸிக்கா²பத³வண்ணனா
7. Tatuttarisikkhāpadavaṇṇanā
522-4. தேன ஸமயேனாதி ததுத்தரிஸிக்கா²பத³ங். தத்த² அபி⁴ஹட்டு²ந்தி அபீ⁴தி உபஸக்³கோ³, ஹரிதுந்தி அத்தோ², க³ண்ஹிதுந்தி வுத்தங் ஹோதி. பவாரெய்யாதி இச்சா²பெய்ய, இச்ச²ங் ருசிங் உப்பாதெ³ய்ய, வதெ³ய்ய நிமந்தெய்யாதி அத்தோ². அபி⁴ஹட்டு²ங் பவாரெந்தேன பன யதா² வத்தப்³ப³ங், தங் ஆகாரங் த³ஸ்ஸேதுங் ‘‘யாவதகங் இச்ச²ஸி தாவதகங் க³ண்ஹாஹீ’’தி ஏவமஸ்ஸ பத³பா⁴ஜனங் வுத்தங். அத² வா யதா² ‘‘நெக்க²ம்மங் த³ட்டு² கே²மதோ’’தி (ஸு॰ நி॰ 426, 1104; சூளனி॰ ஜதுகண்ணிமாணவபுச்சா²னித்³தே³ஸ 67) எத்த² தி³ஸ்வாதி அத்தோ², ஏவமிதா⁴பி ‘‘அபி⁴அட்டு²ங் பவாரெய்யா’’தி அபி⁴ஹரித்வா பவாரெய்யாதி அத்தோ². தத்த² காயாபி⁴ஹாரோ வாசாபி⁴ஹாரோதி து³விதோ⁴ அபி⁴ஹாரோ, காயேன வா ஹி வத்தா²னி அபி⁴ஹரித்வா பாத³மூலே ட²பெத்வா ‘‘யத்தகங் இச்ச²ஸி தத்தகங் க³ண்ஹாஹீ’’தி வத³ந்தோ பவாரெய்ய, வாசாய வா ‘‘அம்ஹாகங் து³ஸ்ஸகொட்டா²கா³ரங் பரிபுண்ணங், யத்தகங் இச்ச²ஸி தத்தகங் க³ண்ஹாஹீ’’தி வத³ந்தோ பவாரெய்ய, தது³ப⁴யம்பி ஏகஜ்ஜ²ங் கத்வா ‘‘அபி⁴ஹட்டு²ங் பவாரெய்யா’’தி வுத்தங்.
522-4.Tenasamayenāti tatuttarisikkhāpadaṃ. Tattha abhihaṭṭhunti abhīti upasaggo, haritunti attho, gaṇhitunti vuttaṃ hoti. Pavāreyyāti icchāpeyya, icchaṃ ruciṃ uppādeyya, vadeyya nimanteyyāti attho. Abhihaṭṭhuṃ pavārentena pana yathā vattabbaṃ, taṃ ākāraṃ dassetuṃ ‘‘yāvatakaṃ icchasi tāvatakaṃ gaṇhāhī’’ti evamassa padabhājanaṃ vuttaṃ. Atha vā yathā ‘‘nekkhammaṃ daṭṭhu khemato’’ti (su. ni. 426, 1104; cūḷani. jatukaṇṇimāṇavapucchāniddesa 67) ettha disvāti attho, evamidhāpi ‘‘abhiaṭṭhuṃ pavāreyyā’’ti abhiharitvā pavāreyyāti attho. Tattha kāyābhihāro vācābhihāroti duvidho abhihāro, kāyena vā hi vatthāni abhiharitvā pādamūle ṭhapetvā ‘‘yattakaṃ icchasi tattakaṃ gaṇhāhī’’ti vadanto pavāreyya, vācāya vā ‘‘amhākaṃ dussakoṭṭhāgāraṃ paripuṇṇaṃ, yattakaṃ icchasi tattakaṃ gaṇhāhī’’ti vadanto pavāreyya, tadubhayampi ekajjhaṃ katvā ‘‘abhihaṭṭhuṃ pavāreyyā’’ti vuttaṃ.
ஸந்தருத்தரபரமந்தி ஸஅந்தரங் உத்தரங் பரமங் அஸ்ஸ சீவரஸ்ஸாதி ஸந்தருத்தரபரமங், நிவாஸனேன ஸத்³தி⁴ங் பாருபனங் உக்கட்ட²பரிச்சே²தோ³ அஸ்ஸாதி வுத்தங் ஹோதி. ததோ சீவரங் ஸாதி³தப்³ப³ந்தி ததோ அபி⁴ஹடசீவரதோ எத்தகங் சீவரங் க³ஹேதப்³ப³ங், ந இதோ பரந்தி அத்தோ². யஸ்மா பன அச்சி²ன்னஸப்³ப³சீவரேன திசீவரிகேனேவ பி⁴க்கு²னா ஏவங் படிபஜ்ஜிதப்³ப³ங், அஞ்ஞேன அஞ்ஞதா²பி, தஸ்மா தங் விபா⁴க³ங் த³ஸ்ஸேதுங் ‘‘ஸசே தீணி நட்டா²னி ஹொந்தீ’’திஆதி³னா நயேனஸ்ஸ பத³பா⁴ஜனங் வுத்தங்.
Santaruttaraparamanti saantaraṃ uttaraṃ paramaṃ assa cīvarassāti santaruttaraparamaṃ, nivāsanena saddhiṃ pārupanaṃ ukkaṭṭhaparicchedo assāti vuttaṃ hoti. Tato cīvaraṃ sāditabbanti tato abhihaṭacīvarato ettakaṃ cīvaraṃ gahetabbaṃ, na ito paranti attho. Yasmā pana acchinnasabbacīvarena ticīvarikeneva bhikkhunā evaṃ paṭipajjitabbaṃ, aññena aññathāpi, tasmā taṃ vibhāgaṃ dassetuṃ ‘‘sace tīṇi naṭṭhāni hontī’’tiādinā nayenassa padabhājanaṃ vuttaṃ.
தத்ராயங் வினிச்ச²யோ – யஸ்ஸ தீணி நட்டா²னி, தேன த்³வே ஸாதி³தப்³பா³னி, ஏகங் நிவாஸெத்வா ஏகங் பாருபித்வா அஞ்ஞங் ஸபா⁴க³ட்டா²னதோ பரியேஸிஸ்ஸதி. யஸ்ஸ த்³வே நட்டா²னி, தேன ஏகங் ஸாதி³தப்³ப³ங். ஸசே பகதியாவ ஸந்தருத்தரேன சரதி, த்³வே ஸாதி³தப்³பா³னி. ஏவங் ஏகங் ஸாதி³யந்தேனேவ ஸமோ ப⁴விஸ்ஸதி. யஸ்ஸ தீஸு ஏகங் நட்ட²ங், ந ஸாதி³தப்³ப³ங். யஸ்ஸ பன த்³வீஸு ஏகங் நட்ட²ங், ஏகங் ஸாதி³தப்³ப³ங். யஸ்ஸ ஏகங்யேவ ஹோதி, தஞ்ச நட்ட²ங், த்³வே ஸாதி³தப்³பா³னி. பி⁴க்கு²னியா பன பஞ்சஸுபி நட்டே²ஸு த்³வே ஸாதி³தப்³பா³னி. சதூஸு நட்டே²ஸு ஏகங் ஸாதி³தப்³ப³ங், தீஸு நட்டே²ஸு கிஞ்சி ந ஸாதி³தப்³ப³ங், கோ பன வாதோ³ த்³வீஸு வா ஏகஸ்மிங் வா. யேன கேனசி ஹி ஸந்தருத்தரபரமதாய டா²தப்³ப³ங், ததோ உத்தரி ந லப்³ப⁴தீதி இத³மெத்த² லக்க²ணங்.
Tatrāyaṃ vinicchayo – yassa tīṇi naṭṭhāni, tena dve sāditabbāni, ekaṃ nivāsetvā ekaṃ pārupitvā aññaṃ sabhāgaṭṭhānato pariyesissati. Yassa dve naṭṭhāni, tena ekaṃ sāditabbaṃ. Sace pakatiyāva santaruttarena carati, dve sāditabbāni. Evaṃ ekaṃ sādiyanteneva samo bhavissati. Yassa tīsu ekaṃ naṭṭhaṃ, na sāditabbaṃ. Yassa pana dvīsu ekaṃ naṭṭhaṃ, ekaṃ sāditabbaṃ. Yassa ekaṃyeva hoti, tañca naṭṭhaṃ, dve sāditabbāni. Bhikkhuniyā pana pañcasupi naṭṭhesu dve sāditabbāni. Catūsu naṭṭhesu ekaṃ sāditabbaṃ, tīsu naṭṭhesu kiñci na sāditabbaṃ, ko pana vādo dvīsu vā ekasmiṃ vā. Yena kenaci hi santaruttaraparamatāya ṭhātabbaṃ, tato uttari na labbhatīti idamettha lakkhaṇaṃ.
526. ஸேஸகங் ஆஹரிஸ்ஸாமீதி த்³வே சீவரானி கத்வா ஸேஸங் புன ஆஹரிஸ்ஸாமீதி அத்தோ². ந அச்சி²ன்னகாரணாதி பா³ஹுஸச்சாதி³கு³ணவஸேன தெ³ந்தி. ஞாதகானந்திஆதீ³ஸு ஞாதகானங் தெ³ந்தானங் ஸாதி³யந்தஸ்ஸ பவாரிதானங் தெ³ந்தானங் ஸாதி³யந்தஸ்ஸ அத்தனோ த⁴னேன ஸாதி³யந்தஸ்ஸ அனாபத்தீதி அத்தோ². அட்ட²கதா²ஸு பன ‘‘ஞாதகபவாரிதட்டா²னே பகதியா ப³ஹும்பி வட்டதி, அச்சி²ன்னகாரணா பமாணமேவ வட்டதீ’’தி வுத்தங். தங் பாளியா ந ஸமேதி. யஸ்மா பனித³ங் ஸிக்கா²பத³ங் அஞ்ஞஸ்ஸத்தா²ய விஞ்ஞாபனவத்து²ஸ்மிங்யேவ பஞ்ஞத்தங், தஸ்மா இத⁴ ‘‘அஞ்ஞஸ்ஸத்தா²யா’’தி ந வுத்தங். ஸேஸங் உத்தானத்த²மேவ.
526.Sesakaṃ āharissāmīti dve cīvarāni katvā sesaṃ puna āharissāmīti attho. Na acchinnakāraṇāti bāhusaccādiguṇavasena denti. Ñātakānantiādīsu ñātakānaṃ dentānaṃ sādiyantassa pavāritānaṃ dentānaṃ sādiyantassa attano dhanena sādiyantassa anāpattīti attho. Aṭṭhakathāsu pana ‘‘ñātakapavāritaṭṭhāne pakatiyā bahumpi vaṭṭati, acchinnakāraṇā pamāṇameva vaṭṭatī’’ti vuttaṃ. Taṃ pāḷiyā na sameti. Yasmā panidaṃ sikkhāpadaṃ aññassatthāya viññāpanavatthusmiṃyeva paññattaṃ, tasmā idha ‘‘aññassatthāyā’’ti na vuttaṃ. Sesaṃ uttānatthameva.
ஸமுட்டா²னாதீ³ஸு இத³ம்பி ச²ஸமுட்டா²னங், கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மவசீகம்மங், திசித்தங், திவேத³னந்தி.
Samuṭṭhānādīsu idampi chasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ, ticittaṃ, tivedananti.
ததுத்தரிஸிக்கா²பத³வண்ணனா நிட்டி²தா.
Tatuttarisikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 7. ததுத்தரிஸிக்கா²பத³ங் • 7. Tatuttarisikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 7. ததுத்தரிஸிக்கா²பத³வண்ணனா • 7. Tatuttarisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. ததுத்தரிஸிக்கா²பத³வண்ணனா • 7. Tatuttarisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 7. ததுத்தரிஸிக்கா²பத³வண்ணனா • 7. Tatuttarisikkhāpadavaṇṇanā
