| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
7. ததுத்தரிஸிக்கா²பத³வண்ணனா
7. Tatuttarisikkhāpadavaṇṇanā
தங்-ஸத்³தோ³ செத்த² பகதத்த²வசனோ. சேதி நிபாதமத்தங். சேதி வா யதீ³தி அத்தோ², தஸ்ஸ ‘‘பவாரெய்யா’’தி இமினா ஸம்ப³ந்தோ⁴ வேதி³தப்³போ³. பவாரெய்ய சேதி யதி³ பவாரெய்யாதி அத்தோ². ‘‘அபீ⁴தி உபஸக்³கோ³’’தி (ஸாரத்த²॰ டீ॰ 2.523-524) இமினா தஸ்ஸ அத்த²விஸேஸாபா⁴வங் த³ஸ்ஸேதி. தேனாஹ ‘‘ஹரிதுந்தி அத்தோ²’’தி. பவாரஸத்³த³ஸ்ஸ இச்சா²யங் வத்தமானத்தா ‘‘இச்சா²பெய்யா’’தி வுத்தங். இச்ச²ங் உப்பாதெ³ய்யாதி பச்சயே இச்ச²ங் உப்பாதெ³ய்ய. உபனிமந்தனாயேதங் அதி⁴வசனங். தேனாஹ ‘‘யாவத்தக’’ந்திஆதி³. நெக்க²ம்மந்தி பப்³ப³ஜ்ஜங். த³ட்டூ²தி த³ட்டு²ங். ச²ந்தா³னுரக்க²ணத்த²ஞ்ஹெத்த² அனுனாஸிகலோபோ. கே²மதோதி நிப்³ப⁴யதோ. காயேன வா வாசாய வா அபி⁴ஹரித்வா நிமந்தெய்யாதி ஸம்ப³ந்தோ⁴. யதா² ச காயேன அபி⁴ஹரெய்ய, வாசாய ச, தங் விதி⁴ங் த³ஸ்ஸேதுங் ‘‘உபனெத்வா’’திஆதி³ வுத்தங் ஸஅந்தரந்தி அந்தரவாஸகஸஹிதங். உத்தரந்தி உத்தராஸங்க³ங். பரமந்தி அவஸானங். அஸ்ஸ சீவரஸ்ஸாதி அஸ்ஸ ஸமுதா³யபூ⁴தஸ்ஸ ஹரிதப்³ப³ஸ்ஸ சீவரஸ்ஸ. தக்³கு³ணஸங்விஞ்ஞாணோ ஹி அயங் பா³ஹிரத்த²ஸமாஸோ யதா² ‘‘லம்ப³கண்ணோ’’தி த³ட்ட²ப்³ப³ங். தேனாஹ ‘‘நிவாஸனேனா’’திஆதி³. உக்கட்ட²பரிச்சே²தே³ன ஹி ஸப்³பே³ தங்பரமங்யேவ க³ஹேதுங் லப⁴ந்தி.
Taṃ-saddo cettha pakatatthavacano. Ceti nipātamattaṃ. Ceti vā yadīti attho, tassa ‘‘pavāreyyā’’ti iminā sambandho veditabbo. Pavāreyya ceti yadi pavāreyyāti attho. ‘‘Abhīti upasaggo’’ti (sārattha. ṭī. 2.523-524) iminā tassa atthavisesābhāvaṃ dasseti. Tenāha ‘‘haritunti attho’’ti. Pavārasaddassa icchāyaṃ vattamānattā ‘‘icchāpeyyā’’ti vuttaṃ. Icchaṃ uppādeyyāti paccaye icchaṃ uppādeyya. Upanimantanāyetaṃ adhivacanaṃ. Tenāha ‘‘yāvattaka’’ntiādi. Nekkhammanti pabbajjaṃ. Daṭṭhūti daṭṭhuṃ. Chandānurakkhaṇatthañhettha anunāsikalopo. Khematoti nibbhayato. Kāyena vā vācāya vā abhiharitvā nimanteyyāti sambandho. Yathā ca kāyena abhihareyya, vācāya ca, taṃ vidhiṃ dassetuṃ ‘‘upanetvā’’tiādi vuttaṃ saantaranti antaravāsakasahitaṃ. Uttaranti uttarāsaṅgaṃ. Paramanti avasānaṃ. Assa cīvarassāti assa samudāyabhūtassa haritabbassa cīvarassa. Tagguṇasaṃviññāṇo hi ayaṃ bāhiratthasamāso yathā ‘‘lambakaṇṇo’’ti daṭṭhabbaṃ. Tenāha ‘‘nivāsanenā’’tiādi. Ukkaṭṭhaparicchedena hi sabbe taṃparamaṃyeva gahetuṃ labhanti.
யஸ்மா அச்சி²ன்னஸப்³ப³சீவரேன திசீவரமத்தகேனேவ பி⁴க்கு²னா ஏவங் படிபஜ்ஜிதப்³ப³ங், அஞ்ஞேன பன அஞ்ஞதா²பி, தஸ்மா தங் விபா⁴க³ங் த³ஸ்ஸேதுங் ‘‘தத்ராயங் வினிச்ச²யோ’’திஆதி³ வுத்தங். அதி⁴ட்டி²தசீவரஸ்ஸாதி திசீவராதி⁴ட்டா²னநயேன வா பரிக்கா²ரசோளவஸேன வா யேன கேனசி அதி⁴ட்டி²தசீவரஸ்ஸ, இத³ஞ்ச யேபு⁴ய்யேன அதி⁴ட்ட²ஹித்வா சீவரங் பரிபு⁴ஞ்ஜதோ வுத்தங், ந பன அனதி⁴ட்டி²தசீவரஸ்ஸ சீவரே அச்சி²ன்னே அயங் விதி⁴ ந ஸம்ப⁴வதீதி. யஸ்ஸ வா திசீவரதோ அதி⁴கம்பி சீவரங் அஞ்ஞத்த² அத்தி², தத்த² நத்தி², தேனாபி ததா³ தத்த² அபா⁴வதோ த்³வே ஸாதி³துங் வட்டதி. பகதியாவ ஸந்தருத்தரேன சரதீதி (ஸாரத்த²॰ டீ॰ 2.523-524) அத்த²தகதி²னத்தா வா ஸாஸங்கஸிக்கா²பத³வஸேன வா அவிப்பவாஸஸம்முதிவஸேன வா ததியஸ்ஸ அலாபே⁴ன வா சரதி. ‘‘த்³வே நட்டா²னீ’’தி அதி⁴காரத்தா வுத்தங் ‘‘த்³வே ஸாதி³தப்³பா³னீ’’தி. ஏகங் ஸாதி³யந்தேனேவ ஸமோ ப⁴விஸ்ஸதீதி திண்ணங் சீவரானங் த்³வீஸு நட்டே²ன ஏகங் ஸாதி³யந்தேன ஸமோ ப⁴விஸ்ஸதி உபி⁴ன்னம்பி ஸந்தருத்தரபரமதாய அவட்டா²னதோ. யஸ்ஸ ஏகங்யேவ ஹோதி அஞ்ஞேன கேனசி காரணேன வினட்ட²ஸேஸசீவரத்தா.
Yasmā acchinnasabbacīvarena ticīvaramattakeneva bhikkhunā evaṃ paṭipajjitabbaṃ, aññena pana aññathāpi, tasmā taṃ vibhāgaṃ dassetuṃ ‘‘tatrāyaṃ vinicchayo’’tiādi vuttaṃ. Adhiṭṭhitacīvarassāti ticīvarādhiṭṭhānanayena vā parikkhāracoḷavasena vā yena kenaci adhiṭṭhitacīvarassa, idañca yebhuyyena adhiṭṭhahitvā cīvaraṃ paribhuñjato vuttaṃ, na pana anadhiṭṭhitacīvarassa cīvare acchinne ayaṃ vidhi na sambhavatīti. Yassa vā ticīvarato adhikampi cīvaraṃ aññattha atthi, tattha natthi, tenāpi tadā tattha abhāvato dve sādituṃ vaṭṭati. Pakatiyāva santaruttarena caratīti (sārattha. ṭī. 2.523-524) atthatakathinattā vā sāsaṅkasikkhāpadavasena vā avippavāsasammutivasena vā tatiyassa alābhena vā carati. ‘‘Dve naṭṭhānī’’ti adhikārattā vuttaṃ ‘‘dve sāditabbānī’’ti. Ekaṃ sādiyanteneva samo bhavissatīti tiṇṇaṃ cīvarānaṃ dvīsu naṭṭhena ekaṃ sādiyantena samo bhavissati ubhinnampi santaruttaraparamatāya avaṭṭhānato. Yassa ekaṃyeva hoti aññena kenaci kāraṇena vinaṭṭhasesacīvarattā.
பஞ்சஸு நட்டே²ஸூதி திசீவரங் உத³கஸாடிகா ஸங்கச்சிகாதி இமேஸு பஞ்சஸு சீவரேஸு நட்டே²ஸு. ‘‘ஏகஸ்மிங் வா நட்டே²’’தி வசனவிபரிணாமங் கத்வா யோஜேதப்³ப³ங். ததோ உத்தரீதி ஸந்தருத்தரபரமதோ உத்தரி.
Pañcasu naṭṭhesūti ticīvaraṃ udakasāṭikā saṃkaccikāti imesu pañcasu cīvaresu naṭṭhesu. ‘‘Ekasmiṃ vā naṭṭhe’’ti vacanavipariṇāmaṃ katvā yojetabbaṃ. Tato uttarīti santaruttaraparamato uttari.
ஸேஸகங் ஆஹரிஸ்ஸாமீதி த்³வே சீவரானி கத்வா ‘‘ஸேஸகங் புன ஆஹரிஸ்ஸாமீ’’தி அத்தோ². ஸேஸகங் துய்ஹங்யேவ ஹோதூதி வுத்தஸ்ஸாதி தா³னஸமயே ஏவங் வுத்தஸ்ஸ. ஸசே பன ‘‘ஸேஸகங் ஆஹரிஸ்ஸாமீ’’தி வத்வா க³ஹெத்வா க³மனஸமயேபி ‘‘ஸேஸகங் துய்ஹங்யேவ ஹோதூ’’தி வத³ந்தி, லத்³த⁴கப்பியமேவ. ந அச்சி²ன்னநட்ட²காரணா தி³ன்னந்தி பா³ஹுஸச்சாதி³கு³ணவஸேன தி³ன்னங். வுத்தனயேனாதி ‘‘ஞாதகப்பவாரிதே வா விஞ்ஞாபெந்தஸ்ஸ, ஸமயே ச அஞ்ஞஸ்ஸ வா ஞாதகப்பவாரிதே தஸ்ஸேவத்தா²ய விஞ்ஞாபெந்தஸ்ஸ’’தி வுத்தனயேன.
Sesakaṃ āharissāmīti dve cīvarāni katvā ‘‘sesakaṃ puna āharissāmī’’ti attho. Sesakaṃ tuyhaṃyeva hotūti vuttassāti dānasamaye evaṃ vuttassa. Sace pana ‘‘sesakaṃ āharissāmī’’ti vatvā gahetvā gamanasamayepi ‘‘sesakaṃ tuyhaṃyeva hotū’’ti vadanti, laddhakappiyameva. Na acchinnanaṭṭhakāraṇā dinnanti bāhusaccādiguṇavasena dinnaṃ. Vuttanayenāti ‘‘ñātakappavārite vā viññāpentassa, samaye ca aññassa vā ñātakappavārite tassevatthāya viññāpentassa’’ti vuttanayena.
ததுத்தரிஸிக்கா²பத³வண்ணனா நிட்டி²தா.
Tatuttarisikkhāpadavaṇṇanā niṭṭhitā.
