| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
7. ததுத்தரிஸிக்கா²பத³வண்ணனா
7. Tatuttarisikkhāpadavaṇṇanā
522. ஸத்தமே பாளியங் பக்³கா³ஹிகஸாலந்தி து³ஸ்ஸவாணிஜகானங் ஆபணங். ‘‘பக்³கா³ஹிதஸால’’ந்திபி பட²ந்தி.
522. Sattame pāḷiyaṃ paggāhikasālanti dussavāṇijakānaṃ āpaṇaṃ. ‘‘Paggāhitasāla’’ntipi paṭhanti.
523-524. அபீ⁴தி உபஸக்³கோ³தி தஸ்ஸ விஸேஸத்தா²பா⁴வங் த³ஸ்ஸேதி. தேனாஹ ‘‘ஹரிதுந்தி அத்தோ²’’தி. வர-ஸத்³த³ஸ்ஸ இச்சா²யங் வத்தமானத்தா ஆஹ ‘‘இச்சா²பெய்யா’’தி. த³ட்டு² கே²மதோதி எத்த² கா³தா²ப³ந்த⁴வஸேன அனுனாஸிகலோபோ த³ட்ட²ப்³போ³. ஸஅந்தரந்தி அந்தரவாஸகஸஹிதங். உத்தரந்தி உத்தராஸங்க³ங். அஸ்ஸ சீவரஸ்ஸாதி ஸாதி³தப்³ப³சீவரஸ்ஸ. அச்சி²ன்னஸப்³ப³சீவரேனாதி அச்சி²ன்னானி ஸப்³பா³னி தீணி சீவரானி அஸ்ஸாதி அச்சி²ன்னஸப்³ப³சீவரோ, தேனாதி அத்தோ². யஸ்ஸ ஹி அச்சி²ந்த³னஸமயே தீணி சீவரானி ஸன்னிஹிதானி ஹொந்தி, தானி ஸப்³பா³னி அச்சி²ன்னானீதி ஸோ ‘‘அச்சி²ன்னஸப்³ப³சீவரோ’’தி வுச்சதி. தேனேவ ‘‘அச்சி²ன்னஸப்³ப³சீவரேன திசீவரகேனா’’தி வுத்தங். திசீவரகேனாதி ஹி அச்சி²ந்த³னஸமயே திசீவரஸ்ஸ ஸன்னிஹிதபா⁴வங் ஸந்தா⁴ய வுத்தங், ந பன வினயதேசீவரிகபா⁴வங் து⁴தங்க³தேசீவரிகபா⁴வங் வா ஸந்தா⁴ய. ஏவங் படிபஜ்ஜிதப்³ப³ந்தி ‘‘ஸந்தருத்தரபரமங் தேன பி⁴க்கு²னா ததோ சீவரங் ஸாதி³தப்³ப³’’ந்தி வுத்தவிதி⁴னா படிபஜ்ஜிதப்³ப³ங். அஞ்ஞேனாதி அச்சி²ன்னஅஸப்³ப³சீவரேன. யஸ்ஸ தீஸு சீவரேஸு ஏகங் வா த்³வே வா சீவரானி அச்சி²ன்னானி ஹொந்தி, தேனாதி அத்தோ². அஞ்ஞதா²பீதி ‘‘ஸந்தருத்தரபரம’’ந்தி வுத்தவிதா⁴னதோ அஞ்ஞதா²பி. யஸ்ஸ ஹி தீஸு த்³வே சீவரானி அச்சி²ன்னானி ஹொந்தி, ஏகங் ஸாதி³தப்³ப³ங். ஏகஸ்மிங் அச்சி²ன்னே ந ஸாதி³தப்³ப³ந்தி ந தஸ்ஸ ஸந்தருத்தரபரமஸாதி³யனங் ஸம்ப⁴வதி, அயமேவ ச அத்தோ² பத³பா⁴ஜனேன விபா⁴விதோ. தேனாஹ ‘‘தங் விபா⁴க³ங் த³ஸ்ஸேது’’ந்தி.
523-524.Abhītiupasaggoti tassa visesatthābhāvaṃ dasseti. Tenāha ‘‘haritunti attho’’ti. Vara-saddassa icchāyaṃ vattamānattā āha ‘‘icchāpeyyā’’ti. Daṭṭhu khematoti ettha gāthābandhavasena anunāsikalopo daṭṭhabbo. Saantaranti antaravāsakasahitaṃ. Uttaranti uttarāsaṅgaṃ. Assa cīvarassāti sāditabbacīvarassa. Acchinnasabbacīvarenāti acchinnāni sabbāni tīṇi cīvarāni assāti acchinnasabbacīvaro, tenāti attho. Yassa hi acchindanasamaye tīṇi cīvarāni sannihitāni honti, tāni sabbāni acchinnānīti so ‘‘acchinnasabbacīvaro’’ti vuccati. Teneva ‘‘acchinnasabbacīvarena ticīvarakenā’’ti vuttaṃ. Ticīvarakenāti hi acchindanasamaye ticīvarassa sannihitabhāvaṃ sandhāya vuttaṃ, na pana vinayatecīvarikabhāvaṃ dhutaṅgatecīvarikabhāvaṃ vā sandhāya. Evaṃ paṭipajjitabbanti ‘‘santaruttaraparamaṃ tena bhikkhunā tato cīvaraṃ sāditabba’’nti vuttavidhinā paṭipajjitabbaṃ. Aññenāti acchinnaasabbacīvarena. Yassa tīsu cīvaresu ekaṃ vā dve vā cīvarāni acchinnāni honti, tenāti attho. Aññathāpīti ‘‘santaruttaraparama’’nti vuttavidhānato aññathāpi. Yassa hi tīsu dve cīvarāni acchinnāni honti, ekaṃ sāditabbaṃ. Ekasmiṃ acchinne na sāditabbanti na tassa santaruttaraparamasādiyanaṃ sambhavati, ayameva ca attho padabhājanena vibhāvito. Tenāha ‘‘taṃ vibhāgaṃ dassetu’’nti.
கேசி பன ‘‘திசீவரகேனாதி வுத்தத்தா திசீவரங் பரிக்கா²ரசோளவஸேன அதி⁴ட்ட²ஹித்வா பரிபு⁴ஞ்ஜதோ தஸ்மிங் நட்டே² ப³ஹூனிபி க³ஹேதுங் லப⁴தீ’’தி வத³ந்தி, தங் ந க³ஹேதப்³ப³ங். பத³பா⁴ஜனஸ்ஸ ஹி அதி⁴ப்பாயங் த³ஸ்ஸெந்தேன யஸ்மா பன ‘‘அச்சி²ன்னஸப்³ப³சீவரேன…பே॰… தங் விபா⁴க³ங் த³ஸ்ஸேது’’ந்தி வுத்தங், பத³பா⁴ஜனே ச ந தாதி³ஸோ அத்தோ² உபலப்³ப⁴தி, தஸ்மா தங் ந க³ஹேதப்³ப³மேவ. யம்பி மாதிகாட்ட²கதா²யங் (கங்கா²॰ அட்ட²॰ ததுத்தரிஸிக்கா²பத³வண்ணனா) வுத்தங் ‘‘யஸ்ஸ அதி⁴ட்டி²தசீவரஸ்ஸ தீணி நட்டா²னீ’’தி, தத்தா²பி அதி⁴ட்டி²தக்³க³ஹணங் ஸரூபகத²னமத்தந்தி க³ஹேதப்³ப³ங், ந பன திசீவராதி⁴ட்டா²னேன அதி⁴ட்டி²தசீவரஸ்ஸேவாதி ஏவமத்தோ² க³ஹேதப்³போ³ பாளியங் அட்ட²கதா²யஞ்ச ததா² அத்த²ஸ்ஸ அஸம்ப⁴வதோ. ந ஹி திசீவராதி⁴ட்டா²னேன அதி⁴ட்டி²தசீவரஸ்ஸேவ இத³ங் ஸிக்கா²பத³ங் பஞ்ஞத்தந்தி ஸக்கா விஞ்ஞாதுங். புரிமஸிக்கா²பதே³ன ஹி அச்சி²ன்னசீவரஸ்ஸ அஞ்ஞாதகவிஞ்ஞத்தியா அனுஞ்ஞாதத்தா பமாணங் அஜானித்வா விஞ்ஞாபனவத்து²ஸ்மிங் பமாணதோ ஸாதி³யனங் அனுஜானந்தேன ப⁴க³வதா இத³ங் ஸிக்கா²பத³ங் பஞ்ஞத்தங், தஸ்மா ‘‘பரிக்கா²ரசோளிகஸ்ஸ ப³ஹும்பி ஸாதி³துங் வட்டதீ’’தி அயமத்தோ² நேவ பாளியா ஸமேதி, ந ச ப⁴க³வதோ அதி⁴ப்பாயங் அனுலோமேதி.
Keci pana ‘‘ticīvarakenāti vuttattā ticīvaraṃ parikkhāracoḷavasena adhiṭṭhahitvā paribhuñjato tasmiṃ naṭṭhe bahūnipi gahetuṃ labhatī’’ti vadanti, taṃ na gahetabbaṃ. Padabhājanassa hi adhippāyaṃ dassentena yasmā pana ‘‘acchinnasabbacīvarena…pe… taṃ vibhāgaṃ dassetu’’nti vuttaṃ, padabhājane ca na tādiso attho upalabbhati, tasmā taṃ na gahetabbameva. Yampi mātikāṭṭhakathāyaṃ (kaṅkhā. aṭṭha. tatuttarisikkhāpadavaṇṇanā) vuttaṃ ‘‘yassa adhiṭṭhitacīvarassa tīṇi naṭṭhānī’’ti, tatthāpi adhiṭṭhitaggahaṇaṃ sarūpakathanamattanti gahetabbaṃ, na pana ticīvarādhiṭṭhānena adhiṭṭhitacīvarassevāti evamattho gahetabbo pāḷiyaṃ aṭṭhakathāyañca tathā atthassa asambhavato. Na hi ticīvarādhiṭṭhānena adhiṭṭhitacīvarasseva idaṃ sikkhāpadaṃ paññattanti sakkā viññātuṃ. Purimasikkhāpadena hi acchinnacīvarassa aññātakaviññattiyā anuññātattā pamāṇaṃ ajānitvā viññāpanavatthusmiṃ pamāṇato sādiyanaṃ anujānantena bhagavatā idaṃ sikkhāpadaṃ paññattaṃ, tasmā ‘‘parikkhāracoḷikassa bahumpi sādituṃ vaṭṭatī’’ti ayamattho neva pāḷiyā sameti, na ca bhagavato adhippāyaṃ anulometi.
யஸ்ஸ தீணி நட்டா²னி, தேன த்³வே ஸாதி³தப்³பா³னீதி எத்த² யஸ்ஸ திசீவரதோ அதி⁴கம்பி சீவரங் அஞ்ஞத்த² டி²தங் அத்தி², ததா³தஸ்ஸ சீவரஸ்ஸ அலப்³ப⁴னீயபா⁴வதோ தேனபி ஸாதி³துங் வட்டதீதி வேதி³தப்³ப³ங். பகதியாவ ஸந்தருத்தரேன சரதீதி ஸாஸங்கஸிக்கா²பத³வஸேன வா அவிப்பவாஸஸம்முதிவஸேன வா ததியஸ்ஸ அலாபே⁴ன வா சரதி. ‘‘த்³வே நட்டா²னீ’’தி அதி⁴காரத்தா வுத்தங் ‘‘த்³வே ஸாதி³தப்³பா³னீ’’தி. ஏகங் ஸாதி³யந்தேனேவ ஸமோ ப⁴விஸ்ஸதீதி திண்ணங் சீவரானங் த்³வீஸு நட்டே²ஸு ஏகங் ஸாதி³யந்தேன ஸமோ ப⁴விஸ்ஸதி உபி⁴ன்னம்பி ஸந்தருத்தரபரமதாய அவட்டா²னதோ. யஸ்ஸ ஏகங்யேவ ஹோதீதி அஞ்ஞேன கேனசி காரணேன வினட்ட²ஸேஸசீவரங் ஸந்தா⁴ய வுத்தங்.
Yassa tīṇi naṭṭhāni, tena dve sāditabbānīti ettha yassa ticīvarato adhikampi cīvaraṃ aññattha ṭhitaṃ atthi, tadātassa cīvarassa alabbhanīyabhāvato tenapi sādituṃ vaṭṭatīti veditabbaṃ. Pakatiyāva santaruttarena caratīti sāsaṅkasikkhāpadavasena vā avippavāsasammutivasena vā tatiyassa alābhena vā carati. ‘‘Dve naṭṭhānī’’ti adhikārattā vuttaṃ ‘‘dve sāditabbānī’’ti. Ekaṃ sādiyanteneva samo bhavissatīti tiṇṇaṃ cīvarānaṃ dvīsu naṭṭhesu ekaṃ sādiyantena samo bhavissati ubhinnampi santaruttaraparamatāya avaṭṭhānato. Yassa ekaṃyeva hotīti aññena kenaci kāraṇena vinaṭṭhasesacīvaraṃ sandhāya vuttaṃ.
526. ‘‘ஸேஸகங் துய்ஹேவ ஹோதூதி தெ³ந்தீ’’தி வுத்தத்தா ‘‘பமாணயுத்தங் க³ண்ஹிஸ்ஸாம, ஸேஸகங் ஆஹரிஸ்ஸாமா’’தி வத்வா க³ஹெத்வா க³மனஸமயேபி ‘‘ஸேஸகம்பி தும்ஹாகஞ்ஞேவ ஹோதூ’’தி வத³ந்தி, லத்³த⁴கப்பியமேவ. பவாரிதானந்தி அச்சி²ன்னகாலதோ புப்³பே³யேவ பவாரிதானங். பாளியா ந ஸமேதீதி ஸந்தருத்தரபரமதோ உத்தரி ஸாதி³யனே அனாபத்தித³ஸ்ஸனத்த²ங் ‘‘அனாபத்தி ஞாதகானங் பவாரிதான’’ந்தி வுத்தத்தா ந ஸமேதி. ஸந்தருத்தரபரமங் ஸாதி³யந்தஸ்ஸ ஹி ஆபத்திப்பஸங்கோ³யேவ நத்தி², ஸதி ச ஸிக்கா²பதே³ன ஆபத்திப்பஸங்கே³ அனாபத்தி யுத்தா த³ஸ்ஸேதுந்தி அதி⁴ப்பாயோ. கேசி பன ‘‘பமாணமேவ வட்டதீதி இத³ங் ஸல்லேக²த³ஸ்ஸனத்த²ங் வுத்த’’ந்தி வத³ந்தி.
526. ‘‘Sesakaṃ tuyheva hotūti dentī’’ti vuttattā ‘‘pamāṇayuttaṃ gaṇhissāma, sesakaṃ āharissāmā’’ti vatvā gahetvā gamanasamayepi ‘‘sesakampi tumhākaññeva hotū’’ti vadanti, laddhakappiyameva. Pavāritānanti acchinnakālato pubbeyeva pavāritānaṃ. Pāḷiyā na sametīti santaruttaraparamato uttari sādiyane anāpattidassanatthaṃ ‘‘anāpatti ñātakānaṃ pavāritāna’’nti vuttattā na sameti. Santaruttaraparamaṃ sādiyantassa hi āpattippasaṅgoyeva natthi, sati ca sikkhāpadena āpattippasaṅge anāpatti yuttā dassetunti adhippāyo. Keci pana ‘‘pamāṇameva vaṭṭatīti idaṃ sallekhadassanatthaṃ vutta’’nti vadanti.
யஸ்மா பனித³ங்…பே॰… ந வுத்தந்தி எத்தா²யமதி⁴ப்பாயோ – ‘‘அஞ்ஞஸ்ஸத்தா²யா’’தி வுச்சமானே அஞ்ஞேஸங் அத்தா²ய பமாணங் அதிக்கமித்வாபி க³ண்ஹிதுங் வட்டதீதி ஆபஜ்ஜதி, தஞ்ச அஞ்ஞஸ்ஸத்தா²ய விஞ்ஞாபனவத்து²ஸ்மிங் பஞ்ஞத்தத்தா வத்து²னா ஸங்ஸந்தி³யமானங் ந ஸமேதி. ந ஹி யங் வத்து²ங் நிஸ்ஸாய ஸிக்கா²பத³ங் பஞ்ஞத்தங், தஸ்மிங்யேவ அனாபத்திவசனங் யுத்தந்தி. க³ண்டி²பதே³ஸு பன தீஸுபி ‘‘இமஸ்ஸ ஸிக்கா²பத³ஸ்ஸ அத்தனோ ஸாதி³யனபடிப³த்³த⁴தாவஸேன பவத்தத்தா ‘அஞ்ஞஸ்ஸத்தா²யா’தி வத்துங் ஓகாஸோயேவ நத்தி², தஸ்மா ந வுத்த’’ந்தி கதி²தங். இத⁴ ‘‘அஞ்ஞஸ்ஸத்தா²யா’’தி அவுத்தத்தா அஞ்ஞேஸங் அத்தா²ய ஞாதகபவாரிதேஸு அதி⁴கங் விஞ்ஞாபெந்தஸ்ஸ ஆபத்தீதி சே? ந, தத்த² புரிமஸிக்கா²பதே³னேவ அனாபத்திஸித்³தி⁴தோ. ததுத்தரிதா, அச்சி²ன்னாதி³காரணதா, அஞ்ஞாதகவிஞ்ஞத்தி, தாய ச படிலாபோ⁴தி இமானெத்த² சத்தாரி அங்கா³னி.
Yasmā panidaṃ…pe… na vuttanti etthāyamadhippāyo – ‘‘aññassatthāyā’’ti vuccamāne aññesaṃ atthāya pamāṇaṃ atikkamitvāpi gaṇhituṃ vaṭṭatīti āpajjati, tañca aññassatthāya viññāpanavatthusmiṃ paññattattā vatthunā saṃsandiyamānaṃ na sameti. Na hi yaṃ vatthuṃ nissāya sikkhāpadaṃ paññattaṃ, tasmiṃyeva anāpattivacanaṃ yuttanti. Gaṇṭhipadesu pana tīsupi ‘‘imassa sikkhāpadassa attano sādiyanapaṭibaddhatāvasena pavattattā ‘aññassatthāyā’ti vattuṃ okāsoyeva natthi, tasmā na vutta’’nti kathitaṃ. Idha ‘‘aññassatthāyā’’ti avuttattā aññesaṃ atthāya ñātakapavāritesu adhikaṃ viññāpentassa āpattīti ce? Na, tattha purimasikkhāpadeneva anāpattisiddhito. Tatuttaritā, acchinnādikāraṇatā, aññātakaviññatti, tāya ca paṭilābhoti imānettha cattāri aṅgāni.
ததுத்தரிஸிக்கா²பத³வண்ணனா நிட்டி²தா.
Tatuttarisikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 7. ததுத்தரிஸிக்கா²பத³ங் • 7. Tatuttarisikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 7. ததுத்தரிஸிக்கா²பத³வண்ணனா • 7. Tatuttarisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. ததுத்தரிஸிக்கா²பத³வண்ணனா • 7. Tatuttarisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 7. ததுத்தரிஸிக்கா²பத³வண்ணனா • 7. Tatuttarisikkhāpadavaṇṇanā
