| Library / Tipiṭaka / তিপিটক • Tipiṭaka / কঙ্খাৰিতরণী-পুরাণ-টীকা • Kaṅkhāvitaraṇī-purāṇa-ṭīkā |
৭. ততুত্তরিসিক্খাপদৰণ্ণনা
7. Tatuttarisikkhāpadavaṇṇanā
পকতিযা সন্তরুত্তরেন চরতি কথিনপলিবোধৰসেন ৰা সাসঙ্কসিক্খাপদৰসেন ৰা। এত্থ সিযা – ‘‘ন মত্তং জানিত্ৰা বহুং চীৰরং ৰিঞ্ঞাপেস্সন্তি, দুস্সৰাণিজ্জং ৰা’’তিআদিনা (পারা॰ ৫২২) উজ্ঝাযন্তানং সুত্ৰা ভগৰাপি ছব্বগ্গিযে ভিক্খূ ‘‘কথঞ্হি নাম তুম্হে মোঘপুরিসা ন মত্তং জানিত্ৰা বহুং চীৰরং ৰিঞ্ঞাপেস্সথা’’তি (পারা॰ ৫২২) ৰত্ৰা সিক্খাপদস্স পঞ্ঞত্তত্তা চ ইমিস্সং কঙ্খাৰিতরণিযং ‘‘বহুচীৰরৰিঞ্ঞাপনৰত্থুস্মিং পঞ্ঞত্ত’’ন্তি ৰুত্তত্তা, সমন্তপাসাদিকাযং ‘‘ন হি অনচ্ছিন্নচীৰরা অত্তনো অত্থায সাখাপলাসং ভঞ্জিতুং লভন্তি, অচ্ছিন্নচীৰরানং পন অত্থায লভন্তী’’তি ৰুত্তত্তা চ অঞ্ঞস্সত্থায পমাণং ৰিঞ্ঞাপেতুং ৰট্টতীতি চে? ন, কস্মা? অঞ্ঞাতকৰিঞ্ঞত্তিসিক্খাপদস্স অট্ঠুপ্পত্তিযা এৰ অঞ্ঞাতকৰিঞ্ঞত্তি ৰারিতা। তস্স সিক্খাপদস্স অনাপত্তি। পাল়িযং (পারা॰ ৫২১) ‘‘অঞ্ঞস্সত্থাযা’’তি ইমিস্সা অনাপত্তিপাল়িযা অঞ্ঞস্সত্থায ৰিঞ্ঞাপেন্তো তস্স ঞাতকপ্পৰারিতে এৰ ৰিঞ্ঞাপেতি, ন অঞ্ঞেতি ৰচনতো চ ৰারিতা। তস্মা ভগৰাপি ‘‘বহুং চীৰরং ৰিঞ্ঞাপেস্সথা’’তি (পারা॰ ৫২২) ৰিগরহিত্ৰা সিক্খাপদং পঞ্ঞাপেন্তো ‘‘অভিহট্ঠুং পৰারেয্যা’’তি ৰুত্তনযেনেৰ পমাণতো গহণং অনুজানি, ন অঞ্ঞস্সত্থায পমাণতো ৰিঞ্ঞাপনং। যস্মা পনিমং সিক্খাপদং অঞ্ঞস্সত্থায ৰিঞ্ঞাপনৰত্থুস্মিংযেৰ পঞ্ঞত্তং, তস্মা ইধ ‘‘অঞ্ঞস্সত্থাযা’’তি ন ৰুত্তং, ন ন লব্ভতীতি কত্ৰা।
Pakatiyā santaruttarena carati kathinapalibodhavasena vā sāsaṅkasikkhāpadavasena vā. Ettha siyā – ‘‘na mattaṃ jānitvā bahuṃ cīvaraṃ viññāpessanti, dussavāṇijjaṃ vā’’tiādinā (pārā. 522) ujjhāyantānaṃ sutvā bhagavāpi chabbaggiye bhikkhū ‘‘kathañhi nāma tumhe moghapurisā na mattaṃ jānitvā bahuṃ cīvaraṃ viññāpessathā’’ti (pārā. 522) vatvā sikkhāpadassa paññattattā ca imissaṃ kaṅkhāvitaraṇiyaṃ ‘‘bahucīvaraviññāpanavatthusmiṃ paññatta’’nti vuttattā, samantapāsādikāyaṃ ‘‘na hi anacchinnacīvarā attano atthāya sākhāpalāsaṃ bhañjituṃ labhanti, acchinnacīvarānaṃ pana atthāya labhantī’’ti vuttattā ca aññassatthāya pamāṇaṃ viññāpetuṃ vaṭṭatīti ce? Na, kasmā? Aññātakaviññattisikkhāpadassa aṭṭhuppattiyā eva aññātakaviññatti vāritā. Tassa sikkhāpadassa anāpatti. Pāḷiyaṃ (pārā. 521) ‘‘aññassatthāyā’’ti imissā anāpattipāḷiyā aññassatthāya viññāpento tassa ñātakappavārite eva viññāpeti, na aññeti vacanato ca vāritā. Tasmā bhagavāpi ‘‘bahuṃ cīvaraṃ viññāpessathā’’ti (pārā. 522) vigarahitvā sikkhāpadaṃ paññāpento ‘‘abhihaṭṭhuṃ pavāreyyā’’ti vuttanayeneva pamāṇato gahaṇaṃ anujāni, na aññassatthāya pamāṇato viññāpanaṃ. Yasmā panimaṃ sikkhāpadaṃ aññassatthāya viññāpanavatthusmiṃyeva paññattaṃ, tasmā idha ‘‘aññassatthāyā’’ti na vuttaṃ, na na labbhatīti katvā.
অট্ঠকথাসু ‘‘অঞ্ঞাতকপ্পৰারিতট্ঠানে পকতিযা বহুম্পি ৰট্টতি, অচ্ছিন্নকারণা পমাণমেৰ ৰট্টতী’’তি ৰুত্তং। তং ‘‘অনাপত্তি ঞাতকানং পৰারিতান’’ন্তি (পারা॰ ৫২৬) ৰুত্তঅনাপত্তিপাল়িযা ন সমেতীতি সমন্তপাসাদিকাযং (পারা॰ অট্ঠ॰ ২.৫২৬) ৰুত্তত্তা ইধাপি ৰুত্তনযেনেৰ ঞাতকপ্পৰারিতে ৰিঞ্ঞাপেন্তস্স অত্তনো ধনেন গণ্হন্তস্স অনাপত্তীতি লিখিতং। ‘‘অঞ্ঞস্সত্থাযা’’তি নিদানৰিরোধতো ন ৰুত্তং, তথাপি অনন্তরে ৰুত্তনযেনেৰ লব্ভতি এৰাতি ৰদন্তি।
Aṭṭhakathāsu ‘‘aññātakappavāritaṭṭhāne pakatiyā bahumpi vaṭṭati, acchinnakāraṇā pamāṇameva vaṭṭatī’’ti vuttaṃ. Taṃ ‘‘anāpatti ñātakānaṃ pavāritāna’’nti (pārā. 526) vuttaanāpattipāḷiyā na sametīti samantapāsādikāyaṃ (pārā. aṭṭha. 2.526) vuttattā idhāpi vuttanayeneva ñātakappavārite viññāpentassa attano dhanena gaṇhantassa anāpattīti likhitaṃ. ‘‘Aññassatthāyā’’ti nidānavirodhato na vuttaṃ, tathāpi anantare vuttanayeneva labbhati evāti vadanti.
ততুত্তরিসিক্খাপদৰণ্ণনা নিট্ঠিতা।
Tatuttarisikkhāpadavaṇṇanā niṭṭhitā.
