| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
7. д̇ад̇уд̇д̇арисигкаабад̣̇аван̣н̣анаа
7. Tatuttarisikkhāpadavaṇṇanā
522-524. сад̇д̇амз баал̣ияам̣ баг̇г̇аахигасааланд̇и д̣̇уссаабан̣ам̣. д̇ан̃хи ваан̣иж̇агзхи д̣̇уссаани баг̇г̇ахзд̇ваа д̣̇ассанадтаанад̇ааяа ‘‘баг̇г̇аахигасаалаа’’д̇и вужжад̇и. асса жийварассаад̇и саад̣̇ид̇аб̣б̣ажийварасса. ‘‘д̇ижийваригзнаа’’д̇и иминаа ажчиннад̇ижийварад̇о ан̃н̃асса вихаараад̣̇ийсу нихид̇асса жийварасса абхаавам̣ д̣̇ассзд̇и. яад̣̇и бхавзяяа, вин̃н̃аабзд̇ум̣ на ваддзяяа. д̇аавагаалигам̣ ниваасзд̇ваа ад̇д̇ано жийварам̣ г̇аахзд̇аб̣б̣ам̣, д̇аавагаалигамби алабханд̇асса бхууд̇аг̇аамавигобанам̣ гад̇ваа д̇ин̣абан̣н̣зхи чад̣̇анам̣ вияа вин̃н̃аабанамби ваддад̇и зва. ан̃н̃знаад̇и ажчиннаасаб̣б̣ажийварзна. д̣̇вз надтаанийд̇и ад̇хигаарад̇о вуд̇д̇ам̣ ‘‘д̣̇вз саад̣̇ид̇аб̣б̣ааний’’д̇и.
522-524. Sattame pāḷiyaṃ paggāhikasālanti dussāpaṇaṃ. Tañhi vāṇijakehi dussāni paggahetvā dassanaṭṭhānatāya ‘‘paggāhikasālā’’ti vuccati. Assa cīvarassāti sāditabbacīvarassa. ‘‘Ticīvarikenā’’ti iminā acchinnaticīvarato aññassa vihārādīsu nihitassa cīvarassa abhāvaṃ dasseti. Yadi bhaveyya, viññāpetuṃ na vaṭṭeyya. Tāvakālikaṃ nivāsetvā attano cīvaraṃ gāhetabbaṃ, tāvakālikampi alabhantassa bhūtagāmavikopanaṃ katvā tiṇapaṇṇehi chadanaṃ viya viññāpanampi vaṭṭati eva. Aññenāti acchinnaasabbacīvarena. Dve naṭṭhānīti adhikārato vuttaṃ ‘‘dve sāditabbānī’’ti.
526. баал̣ияаа на самзд̇ийд̇и ‘‘анаабад̇д̇и н̃аад̇агаанам̣ баваарид̇аана’’нд̇и имааяа баал̣ияаа на самзд̇и д̇ад̇уд̇д̇аривин̃н̃аабанааабад̇д̇иббасан̇г̇з зва вуд̇д̇ад̇д̇аа. ‘‘ан̃н̃ассад̇т̇ааяаад̇и на вуд̇д̇а’’нд̇и ид̣̇ам̣ ан̃н̃ассад̇т̇ааяа д̇ад̇уд̇д̇ари вин̃н̃аабанз ниссаг̇г̇ияам̣ баажид̇д̇ияам̣ ход̇ийд̇и имамад̇т̇ам̣ д̣̇ийбзд̇и, д̇ан̃жа баажид̇д̇ияам̣ язсам̣ ад̇т̇ааяа вин̃н̃аабзд̇и, д̇зсам̣ ваа сияаа, вин̃н̃аабагассзва ваа, на д̇аава д̇зсам̣ д̇зхи авин̃н̃аабид̇ад̇д̇аа, нааби вин̃н̃аабагасса ад̇д̇аанам̣ уд̣̇д̣̇исса авин̃н̃аабид̇ад̇д̇аа. д̇асмаа ан̃н̃ассад̇т̇ааяа вин̃н̃аабзнд̇ассааби ниссаг̇г̇ияам̣ баажид̇д̇ияам̣ на д̣̇иссад̇и. баал̣ияам̣ бана имасса сигкаабад̣̇асса ад̇д̇ано саад̣̇ияанабадиб̣ад̣̇д̇хад̇аавасзна бавад̇д̇ад̇д̇аа ‘‘ан̃н̃ассад̇т̇ааяаа’’д̇и анаабад̇д̇иваарз на вуд̇д̇анд̇и вад̣̇анд̇и, д̇ан̃жа яуд̇д̇ам̣ вияа д̣̇иссад̇и, виймам̣сид̇ваа г̇ахзд̇аб̣б̣ам̣. д̇ад̇уд̇д̇арижийварад̇аа, ажчиннаад̣̇игааран̣ад̇аа, ан̃н̃аад̇агавин̃н̃ад̇д̇и, д̇ааяа жа бадилаабход̇и имаанзд̇т̇а жад̇д̇аари ан̇г̇аани.
526.Pāḷiyā na sametīti ‘‘anāpatti ñātakānaṃ pavāritāna’’nti imāya pāḷiyā na sameti tatuttariviññāpanaāpattippasaṅge eva vuttattā. ‘‘Aññassatthāyāti na vutta’’nti idaṃ aññassatthāya tatuttari viññāpane nissaggiyaṃ pācittiyaṃ hotīti imamatthaṃ dīpeti, tañca pācittiyaṃ yesaṃ atthāya viññāpeti, tesaṃ vā siyā, viññāpakasseva vā, na tāva tesaṃ tehi aviññāpitattā, nāpi viññāpakassa attānaṃ uddissa aviññāpitattā. Tasmā aññassatthāya viññāpentassāpi nissaggiyaṃ pācittiyaṃ na dissati. Pāḷiyaṃ pana imassa sikkhāpadassa attano sādiyanapaṭibaddhatāvasena pavattattā ‘‘aññassatthāyā’’ti anāpattivāre na vuttanti vadanti, tañca yuttaṃ viya dissati, vīmaṃsitvā gahetabbaṃ. Tatuttaricīvaratā, acchinnādikāraṇatā, aññātakaviññatti, tāya ca paṭilābhoti imānettha cattāri aṅgāni.
д̇ад̇уд̇д̇арисигкаабад̣̇аван̣н̣анаа нидтид̇аа.
Tatuttarisikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 7. д̇ад̇уд̇д̇арисигкаабад̣̇ам̣ • 7. Tatuttarisikkhāpadaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 7. д̇ад̇уд̇д̇арисигкаабад̣̇аван̣н̣анаа • 7. Tatuttarisikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 7. д̇ад̇уд̇д̇арисигкаабад̣̇аван̣н̣анаа • 7. Tatuttarisikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 7. д̇ад̇уд̇д̇арисигкаабад̣̇аван̣н̣анаа • 7. Tatuttarisikkhāpadavaṇṇanā
